2005 年 7 月 9 日 星期六 【晴】

唔~ 今日又要返工呀！不過放左工之後就會去飲，因為有個同事結婚呀，梗係要去賀下啦．．．不過又要比人情．．．好慘！因為已經好窮喇，琴日又請左屋企人去食壽司呢．．．呀！天呀，要捱到幾時先有糧出呀！！！

>>July 10, 2005 at 9:13:19 AM GMT+8

2005 年 7 月 7 日 星期四 【微雨】

哈~ 今日又係上急救既日子．．．今日覺得d野都幾易，所以都上得好開心．．．上完堂之後同男友同埋一個朋友仔去左b仔涼粉度食宵夜，食完就走人囉，因為聽日要返早，仲係九至一果隻，因為聽日返朝早一節咋，早d放工可以早d去玩．．．

聽日約左屋企人去行街呀，開心！

>>July 10, 2005 at 9:13:47 AM GMT+8

2005 年 7 月 4 日 星期一 【晴】

唔，今朝早係我一直好緊張既一日．．．就係做appraisal喇．．．

今朝都唔係做左好耐，個半鐘度都做完囉．．．過程中都算順利既，不過當然我有好多野都唔係太同意啦，果個team leader佢最叻就係屈人架喇．．．不過算啦，我都為自己既前途諗緊，都唔會做得耐架喇，分分鐘好快走人．．．有佢講囉，我咩都ok架！

最後個結果都係有得續約，不過人地話唔知續幾耐喎．．．吹脤囉，如果續我半年咪死？唉～呢間機構真係好pk呀！

>>July 10, 2005 at 9:10:20 AM GMT+8

2005 年 7 月 2 日 星期六 【晴】

今日要返工呀，所以都幾灰心．．．不過因為夜晚約左班同事去釣墨魚，所以都有番少少心機啦．．．不過我地都唔知係咩野原因，最後我地一條船總共釣左五條墨魚咁大把，最後仲要死左兩條添．．．唉～真係樣衰到爆．．．個船家話之前有好多人都釣成廿幾三十條架．．．

不過都幾好玩既．．．好在聽日放假，因為今晚好夜先至返到屋企，成點呀！本來打算今晚去男友度陪佢既，點知佢又唔比喎，話怕我夜危險，又要晒同事陪我返屋企咁．．．不過我都知佢關心我既．．．

聽日我同男友都放假，大家都諗住好好咁利用呢日假期去玩下輕鬆下呀！唔知聽日去邊好呢？

>>July 10, 2005 at 9:07:22 AM GMT+8

2005 年 6 月 30 日 星期四 【晴】

真係開心，琴日一放工夜晚就同男友去左大陸玩．．．唉，本來係約左一班朋友去玩架，點知班衰人一個一個咁放人飛機．．．真係好唔鍾意呢種咁既人，係一就一，二就二啦，初時問佢又話去，又話ok，最後又拖三拖四都話唔去．．．真係好討厭囉，無黎搭什．．．

不過算啦，最後就當我地兩個自己拍拖囉，都不知幾開心，又可以有收穫，買左野呀，都幾好．．．不過聽日要返工呀，本來打算玩埋聽日，可以淨係返深宵，點知中心又唔夠人手，迫住要我返下夜．．．唉，真係好多好掃興既事發生！不過算啦，玩完返黎都覺係開心，同埋最重要你同男友去嘛．．．已經足夠架喇．．．

>>July 10, 2005 at 9:04:18 AM GMT+8

2005 年 6 月 27 日 星期一 【雨】

唔~ 其實呢幾日都唔多好心情，因為下個月五號就要做appraisal喇．．．心情好緊張，而且有點兒想逃避咁．．．好怕又要面對一d我唔多想面對既事情！唉~ 一向樂天既annie已經不再喇！加上呢排成日天氣好差，連心情都差埋呀！

>>July 10, 2005 at 9:00:57 AM GMT+8

2005 年 6 月 26 日 星期日 【晴】

今日原本放假，但係因為有個個案要上court，所以今日陪左佢去屯門法院．．．真係衰，等左成朝，最後都要下午先再上堂，真係成個人等到傻左．．．．後來個個案被判守老感囉，唉，佢預左架喇．．．希望佢真係因此可以生性d喇．．．

>>June 27, 2005 at 4:22:22 PM GMT+8

2005 年 6 月 25 日 星期六 【綿綿細雨】

哈，琴日好正，放工之後去左男友既同學仔elaine屋企，因為佢新居入伙，我地特登去佢度玩架．．．我地一班人上佢度，又傾計，又劈酒，又睇戲，真係好開心，我地冇乜唔會傾到，講到，玩到．．．哈，真係感覺到果種自由既感覺，好耐冇番黎喇呢種感覺．．．好開心，真係好free．．．琴日玩到今朝零晨四點幾先至訓，後來我都成一點幾先至起身．．．跟住就發生事喇．．．因為elaine佢今日要返工，所以放低左key比我地，我地起左身之後去左食野，本來諗住番上去，點知開唔番道門，攪到我地再要落街行，好在身上有錢有電話o者，打比佢求救囉，咁佢都盡趕返黎架喇，後來一齊去左飲茶茶，我地仲送左張茶几過佢添，佢不知幾歡喜．．．

原來elaine佢好鍾意畫畫架，我而家先知，佢d畫都幾靚，好有風格，好藝術畫架．．．唔，我都好羨慕佢有咁興致，可以搵到一樣野比自己去抒發感受同情緒呀！我都要向佢學習一下先得！

>>June 27, 2005 at 4:20:25 PM GMT+8

2005 年 6 月 23 日 星期四 【雨】

哈，今日第一日返急救班呀！我覺得都唔易學呀！今日第一堂都幾得意丫．．．我男友先攪笑，坦白講，我覺得佢記理論性既野真係好叻，我反而對呢d野記性較差．．．反而呢較pratcial既野我比佢好少少，例如包紮既方法同技巧咁．．．哈，好在係我做佢partner咋，如果唔係都應該冇人肯同佢part喇，因為原來要咁多身體接觸既，如果要第二個女仔同佢part，人地一定話佢非禮，哈！不過都幾好玩．．．希望可以pass到啦！下星期五唔洗返呀，因為係7.1，放假．．．真係擔心到時忘記晒d野．．．唔得，得閒要搵男友一齊練習下先！

>>June 27, 2005 at 4:14:22 PM GMT+8

2005 年 6 月 22 日 星期三 【雨】

琴日要返深宵呀！真係辛苦．．．呢排好似從來冇試過好天，早早都落雨．．．好怕怕呢．．琴日返深宵都好麻煩，出出入入時都要拎住把遮，好唔方便工作呢．．．

今日真係超級眼訓呀，琴晚雖然兩點零鐘已經返到屋企，已經盡早走上床訓架喇，但係今日都超級累呢．．．捱得好辛苦呀！今日仲要夜晚開會，真係好眼訓喎！聽日仲要返早，唉，呢幾日真係好辛苦呀！

>>June 27, 2005 at 4:10:48 PM GMT+8