2005 年 5 月 16 日 星期一 【晴】

嘩~ 今日真係死得人．．．一朝早就去屯門法院喇，因為我有個女之前missing，而家坐完馬頭圍，今日要聽社會福利報告，睇下佢會點判．．．最後，梗係判左入瑪利灣寄宿啦！後來為左安全起見，我陪同佢父母一齊送佢入去啦，費時佢中途走左去就麻煩．．．送左佢去之後又要同父母同個福利官開會傾番個case既事，呀！好煩，仲好累添．．．一來一回咁就攪左我大半日喇，返到中心都已經係四點幾，本來要supervision都sup唔到，要改日子．．．講真，而家我有supervision恐懼症，超級驚呀，因為每次個死八婆都總有d花臣出黎，唉，好煩同好驚囉，真係唔知佢又會出咩招數黎柴我喇．．．唔，真係好想快d搵到份好工呀！即刻走人呀！

>>May 19, 2005 at 11:09:17 AM GMT+8

2005 年 5 月 10 日 星期二 【晴】

今日只係返朝早一節，所以亦約左媽咪去行街街．．．去左荃灣呀！之後夜晚就去左男友度．．．

>>May 14, 2005 at 10:11:52 AM GMT+8

2005 年 5 月 9 日 星期一 【雨】

今朝一早就起身去見空姐．．．一朝早去機場果間富豪度見，嘩，我去到果時八點三，就已經有成差唔多千人係度排緊隊，我梗係即刻走去排啦．．．排到咁上下原來先知道係拎籤先咋！我拎左八百一十號，要三點先至有得見，所以咪返屋企先囉．．．

夠鐘時我再去，一樣係好多人呀！我見到原來要排隊去掂高．．．唉～真係樣衰，我同個標準距離成三四寸．．．咁就梗係最後都唔入圍啦．．．唉，超樣衰囉．．．不過，如果有地勤見，我都希望試下．．．算啦，都一次證明自己真係好矮．．．好失敗呀！

>>May 14, 2005 at 10:10:59 AM GMT+8

2005 年 5 月 8 日 星期日 【雨】

嘩，今日星期一，本來係放假架，但係一朝早要出去tai wo hau中心度上crisis intervention既堂．．．好悶呢．．．今日簡直係落狗屎，本來諗住約媽咪出去旺角行街，因為要買套新suit，for聽日去見空姐用．．．唉，到而家都仲未準備好，因為都唔知要準備乜野，我只係諗左自我介紹既英文同普通話版咋．．．唉，真係有少少擔心．．．．如果聽日去到話我唔夠高既真係魚到爆囉．．．

>>May 14, 2005 at 10:07:21 AM GMT+8

2005 年 5 月 7 日 星期六 【晴】

今日雖然係星期日，但係我都要返工呀．．．成日係度prep下個星期六既大型活動物資．．．好麻煩，好似做工廠妹咁，真係衰．．．最死係，明知果日自己唔洗去果個活動度幫手（因為果日中心唔夠人，所以要我留低囉）更加就唔想去做啦．．．不過，唉！都要做架，一係唔好do囉！

>>May 14, 2005 at 10:05:14 AM GMT+8

2005 年 5 月 6 日 星期五 【晴】

今日只係返朝早一節，所以心情較好．．．今朝成朝冇做野呀，反而不斷係度做自己野，好似上下網搵工，打下求職信同履歷表，又有send左兩封信咁囉．．．唔，我決定下星期二比自己一個挑戰，就係試下見第二個行業既工．．．其實．．．我都好擔心架，因為我對於其他行業真係完全冇把握，所以真係要好好咁計劃一下．．．

今日下午放工後就搵男友行街，去左西田呀，因為知佢就收皮嘛，諗住去買下平野，順便買母親節禮物嘛．．．哈！跟著夜晚就約左班天使社群既朋友食飯．．．都幾開心呀！

>>May 7, 2005 at 4:37:21 PM GMT+8

2005 年 5 月 5 日 星期四 【晴】

唉~ 琴日約左個舊同事食飯，同佢講起好多而家工作上既不愉快．．．其實真係好唔開心呀！好灰．．．．尤其係每日都受著壓迫，我真係好想快d離開呢個工作環境，簡直唔係人既地方，係一個人間地獄！

所以，我應該要好好咁為自己既將來去打算．．．我近日心情好矛盾好煩悶，因為真係不斷係度思考又思考．．．真係好頭痛，因為我實在有太多需要擔憂同顧及，唔係輕易可以放得低，尤其係我仲要養家既問題．．．唉，好煩！

神呀，我而家真係好迷茫，請你給予我指引，讓我知道我應該如何走我要既路．．．

>>May 6, 2005 at 4:56:18 PM GMT+8

2005 年 5 月 1 日 星期日 【陰】

哈！去完camp返黎喇．．．真係好開心．．．琴日我地都好晏先至出發，因為男友部電腦突然down左，佢堅持要攪好先至走，所以由本來去貝澳，改左去荃錦凹果個郊野公園度露營囉．．．我地去到果時都入左夜喇，去到果時真係嚇死人，d霧好勁呀，好似伸手不見五指咁，其實我初頭都幾驚，不過好在有男友係度，我唔再驚．．．我地拿拿林搵個好地扎好營，但係果度好多人，好多靚地都已經比人霸左，好辛苦先至搵到個地方．．．扎營果時d天氣就越來越差，又大風又大霧，又有好多露水係d樹度飛落黎，同我上次去camp果時風吹雨打差唔多！不過我地都好努力整頓好一切．．．跟住就好開心咁煮飯仔，一路食一路煮．．．真係幾開心架，我覺得咁樣開胃d添．．．食到好飽呀，十二點幾就訓左入營，傾傾下計大家都飽到訓著左囉，醒番果時已經點幾鐘，過左一陣傾左陣計又訓，一訓訓到今朝十一點．．．

嘩，其實琴晚都好恐怖，可能我地係四百幾米高既山度，所以天氣真係好差，琴晚又大風又落雨，好似打風咁．．．好彩我地個營扎得好根基，所以唔洗怕會塌下來！今朝我地起身果時已經走左好多人喇，不過我地一於少理，照慢慢煮同食完我地既早餐先再執野走．．．

唔，今次既節目真係又一次令我唔可以忘記．．．太開心喇．．．雖然過程好似好悶咁．．．不過最重要係同咩人去，意義在那裡嘛！

>>May 2, 2005 at 3:02:27 PM GMT+8

2005 年 4 月 29 日 星期五 【晴】

haha~ 我好懶呀，差唔多有成半個月冇寫日記囉．．．一來真係懶，二來其實係近來個人都好冇mood，為左自己既仕途而煩惱．．．唉！我估明愛果份應該都會冇我份架喇．．．我諗我除左轉行之外，都好難可以搵到一份人工又唔差，而且工作範圍我又鍾意既，仲有係冇做外展咁辛苦既工架喇．．．我都有睇過其他行業既工，不過我始終唔知自己可以做得d乜．．．

不過唔諗住喇，咁難得聽日同兩日有假放，梗係諗左去玩先啦．．．哈！
好開心呀！我聽日同男友會去wild camp呀！其實我地兩個人好耐冇去過camp喇，除左自己各自工作需要帶camp1外，自己去都已經唔知係幾耐之前囉．．．所以今次真係好興奮，好期待．．．真係等左呢日好耐喇．．．　YEAH~

今晚一放工就去左男友度，因為我地之前特登買左好多露營用品，我要去佢度PACK野嘛，加上佢阿媽先兩日生日，所以要去佢度切生日蛋糕呢！佢家姐帶埋兩隻狗狗黎，又可以同狗狗玩呀！哈！

唔，今日D天氣都好似麻麻地，希望聽日唔好太差天氣，攪到去唔到啦．．．好擔心！

>>May 2, 2005 at 2:40:45 PM GMT+8

2005 年 4 月 12 日 星期二 【暴雨】

今日對於我黎講係一日又驚又怕既一日....
我個妹今日一朝早出門口，因為佢參加左學校既日本交流團，今朝早一早搭飛機去東京．．．本來係一件幾開心既事，因為睇住佢可以出去玩，我既心情比佢更興奮開心，因為終於可以放個妹出去見識一下喇．．．但係，今日下午收到佢既電話，知道佢入左醫院．．．我當時好擔心，頓時成個世界好似好灰咁，又唔知佢既情況如何．．．經過同導遊四轉既電話之後，我個妹既情況仍未穩定，而家醫生都話冇藥可以控制，唯有等佢自己慢慢好番．．．

我仍然好擔心，尤其當我回想起我同我個妹係長途電話裡交談時，我不時叫佢振作，叫佢唔好驚唔好怕，好快冇事．．．等既安慰說話，佢又話番比我知佢既情況幾咁辛苦時，我真係喊左出黎，加上佢當時聽到我喊佢又喊埋一份，我真係．．．．感覺到好心痛，好心up．．．完全唔識形容當時心情，真係好感受到佢果種辛苦，無助，害怕．．．一個人係外國，媽咪家人又唔係身邊，要自己一個人去面對一個仲未穩定既病情．．．我好明白佢一定好傷心，好驚，好辛苦．．．唉！好心痛，見到佢咁，我經常不時流淚．．．但係，我為左要主持大局，與老師導遊聯絡溝通，與校方聯絡安排，與醫生傾談．．．我唔可以倒下！加上，媽咪既心情已經十分低落，我唔可以再讓佢擔心埋我，我要堅強處理事件．．．！

而家可以做既，就係不時為我個妹祈禱，希望神給予佢力量，勇氣，去面對病情，去戰勝病痛，真希望神可以眷顧佢，看守佢，讓佢可以渡過難關，同時亦希望神佢能安慰佢，媽咪，所有身邊既人不安既情緒，好讓大家可以給予支持妹妹，讓佢早日康復！

擔心真係十分擔心，但．．．我可以做什麼呢？

>>April 13, 2005 at 2:55:19 PM GMT+8