2006 年 1 月 10 日 星期二 【晴】

今日男友放假，所以都陪足佢成日．．．日頭既時間我地去左行街街，我就有收獲呀，買左對行山鞋．．．其實都抵買既，六百蚊有找，仲有coretex，都幾好架，後來男友仲送多對行山襪比我，成百幾蚊架，我咁大個人第一次買對咁貴既襪囉，哈，好在係男友送架o者！

跟住夜晚就約左個朋友仔食飯，佢係男友既大學同學，我有個舊同事剛去左佢度做野，朋友仔都有提起我個舊同事，哈，世界真細小囉．．．

食完飯之後好好笑，我個朋友仔無啦啦話想去玩塔羅牌占卜下自己既愛情運喎，所以咪陪左佢去一間cafe度玩囉，勁好笑呀，個占卜師成個阿毛咁既，都唔知d野真定假既．．．不過占卜就係咁架啦，信就有不信則冇，我個朋友好似好信佢咁呀．．．不過我同男友就唔多信喇，哈！女人既錢真係好易賺呢！

唔！聽日要一早起身去面試呀，去國泰見地勤既工作呀！其實有點擔心同緊張，因為始終對呢份工作唔係咁有把握囉，不過都試下啦．．．要努力呀！

>>January 15, 2006 at 11:46:15 AM GMT+8

2006 年 1 月 9 日 星期一 【晴】

哈，其實而家咁多時間，我係應該好好咁寫下我既日記既，但係都係因為懶啦，哈，都唔係日日寫．．．唔得，我要好好咁比心機呀！

琴日收到國泰既一個call，佢即時做左個phone in呀，之後就約左我星期四朝早去面試呀！唔，我都有少少擔心，英文方面我唔擔心呀，反而普通話呢家野．．．佢唔識我我唔識佢呀！哈，都唔知點好，呢兩日真係要好好咁練習一下先至得喇．．．唉！其實我都好想轉到行，雖然呢份工既人工唔高，當然比之前做社工少好多好多啦，但係如果真係入到行既，我都覺得發展同晉升空間比起做社工更多，所以我都希望可以一試．．．希望神可以給予我呢個機會啦，我都交予祂為我安排一切架喇．．．

>>January 10, 2006 at 3:53:36 PM GMT+8

2006 年 1 月 7 日 星期六 【晴】

本來今日去義工服務架，但係我唔舒服，最後都冇去到，真係有少少唔好意思啦．．．仲有本來約左個義工朋友交收一d野，但係因為我冇去到攪到佢白白拎左d好重既野黎，哈，真係好唔好意思呀！

希望可以快d好番啦．．．男友佢都係一樣，喉嚨發炎呀，希望佢都快d好番啦！

>>January 10, 2006 at 3:49:37 PM GMT+8

2006 年 1 月 6 日 星期五 【晴】

哈，琴日一朝早起左身去左男友度，之後同佢過左日假期啦，之後今日就一朝早七點起身，陪男友去申請身份證呀，預約左八點半囉，辛苦死，一早起身．．．不過我又衰既，星期五晚又橫住要玩電腦大富翁遊戲，最後男友為左我開心，陪我玩到兩點幾呀，所以第二朝幾辛苦都一定要陪番佢啦，係咪？

所以今日好充實呀，陪足佢一日行晒香港九龍新界呀，又去左工展會度行下，買左少少野囉，都係食物，你知啦，我地係胃食精黎架嘛，哈！

唔！聽日要去做探訪呀，一朝早要起身，訓啦，早抖

>>January 10, 2006 at 3:50:05 PM GMT+8

2006 年 1 月 3 日 星期二 【晴】

哈，之前收到表姐既電郵，佢想我幫佢手買少少佢結婚既頭飾，因為佢怕姨媽（佢阿媽）會買d唔太o岩佢口味既野，所以都係叫左我請昌啦，哈！不過我咪承機當自己去行下街，幀便當幫自己睇定d結婚野先囉，哈，都幾好架，無段段行下街都有少少收獲，買到d平靚正既野啦，有時平野都有好野既．．．冇計，而家冇收入，都要量入而出架喇．．．唉，希望早日搵到工啦．．．

>>January 10, 2006 at 3:44:20 PM GMT+8

2006 年 1 月 1 日 星期日 【晴】

哈~ 終於完成左份part time喇，而家鬆左一口氣啦，可以好好咁休息休息．．．因為之前一口氣咁返左連續幾日工，雖然之前一向都有返工，應該唔會覺得係一個辛苦既生活，但係呢份工都有少少勞動性，所以都唔多唔少有少少辛苦架．．．

而家做完呢份兼職喇，可以好好咁為自己既前景計劃同安排一下喇．．．唔！要開始努力搵工喇，早日搵到份工，可以過番個肥年嘛．．．

>>January 10, 2006 at 3:41:18 PM GMT+8

2005 年 12 月 31 日 星期六 【晴】

嘩~ 新年快樂呀!

琴日同男友渡過左我地既相識七周年紀念....雖然我地並冇出去一齊count down渡過2005年, 但係我地都有係電話中一齊倒數架, 都幾開心...

而我地30至31號呢兩日就去左大陸玩, 約埋個朋友仔一齊去dup骨啦...哈~ 都幾開心呀! 因為好耐冇去dup過喇, 而家簡直係個人輕鬆晒啦...

而今日仍繼續返工, 今日d人流都唔係好多, 都幾ok, 希望好好咁捱埋聽日last一日啦...

>>January 3, 2006 at 9:45:43 AM GMT+8

2005 年 12 月 27 日 星期二 【陰】

嘩~ 連續四日既聖誕節工作天終於完成喇．．．真係好辛苦呀，連續落四日都幾係野架．．．不過我都唔夠男友辛苦，放假都仲要去考山藝同返工，唉！大家都要努力呀！

琴日好正，放工呀同左屋企人食飯，之後一齊去左睇戲呀，睇king kong呀！嘩，好好睇囉，真係由頭緊張都尾呀，足足三個鐘呀，好好睇呀，我仲有少少感動添．．．同之前幾套既kin土kong比較下，今次呢套真係多左好多特投原素，好好睇，而且個男女主角都幾靚仔靚女架，一句講晒，highly recommend架．．．

唔！抖番幾日又要再戰工作喇，真係要好好把握玩樂同休息既然時間．．．仲有幾日就係我同男友既相識七周年喇，心情真係好特別．．．話咁快又就黎七年喇，真係有少少感觸呀！

>>December 28, 2005 at 4:40:26 AM GMT+8

2005 年 12 月 24 日 星期六 【晴】

方寸大亂
男：無論我今天 有多麼的風光
　 都要你背後打氣
　 無論在假裝 對你愛理不理
　 都當你是我知己
女：我幹這麼多 都不夠多
　 抑或你怕了我麼
　 慌慌失失怎麼竟像傻

*男：無論你眼中 我怎麼的不羈
　　 不過我最著緊你
　　 無論在這刻 我最叫你生氣
　　 不過我下過心機
女：請不必囉嗦 喜歡我麼
　 吞吐對答那麼多 拖拖拉拉
　 不知竟為何

女：始終不知怎做 都不知怎說
　 怎能明瞭心事
男：其實我 如何面對
　 才讓你能明瞭心事
女：若我奉獻太多 你如何承受我
　 恐擠迫感太多
男：恐擠迫感太多
女：一早消失方寸 一顆心很亂
　 怎能完成心願
男：其實我 如何待你
　 才讓你能完成心願
合唱：難道做太少抑或是做太多　都是　我傻

repeat*

女：始終不知怎做 都不知怎說
　 怎能明瞭心事
男：其實我 如何面對
　 才讓你能明瞭心事
女：若我奉獻太少 你如何明白到
　 我心喜歡你麼
男：講多竟錯多
女：一早消失方寸 一顆心很亂
　 怎能完成心願
男：其實我 如何待你
　 才讓你能完成心願
合唱：難道做太少抑或是做太多　都是　我傻

** 我明白架喇, 希望我地可以一齊為我地既未來而計劃啦!**

>>December 25, 2005 at 3:17:26 PM GMT+8

2005 年 12 月 16 日 星期五 【晴】

哈~ 今日同個好姊妹一齊返part time...今日都唔係十分忙, 人流都唔係太多...可能今日係星期六卦, 我估聽日會多人d既...

今日好在有好姊妹既男友幫1咋, 佢真係幫到唔少野架, 起碼d粗重工夫有佢幫到手呀...所以我今次冇好似上次咁返完工就成個人散左咁...哈!

聽日又返喇, 今日放工就去左男友度過節, 仲同d狗狗玩, 真係開心....

>>December 21, 2005 at 4:33:20 AM GMT+8