2003 年 11 月 30 日 星期日 【颳風】

今日先知道原來自己咁冇誠信，
作出承諾，人地話只係信少少，
好傷心呀 ><

2003 年 11 月 29 日 星期六 【颳風】

今朝一起身，
已經係中午十二點幾，
即係話我又 miss 左崇拜。
點解用「又」呢，
因為我已經連續幾個星期沒有返崇拜。
唔係要比賽，
就係要教班。
黎緊幾個星期日，
都有定向活動，
十二月七日係香港野外定向錦標聯賽第一場，
我參加 H21 組，為留班努力。
十二月十四日係香港童軍總會野外定向會錦標賽，
我要幫手做工作人員。
十二月二十一日係全港青少年野外定向錦標賽，
我參加公開組，今次係我最後一年參加呢個比賽，
因為出年我就會超齡，
所以今次會意義重大。


屈指一算，下次我返教會，
應該係十二月二十五日的聖誕崇拜。
當日我要做招待。

2003 年 11 月 28 日 星期五 【颳風】

每逢星期六放工，
都要花很多時間才可以回到家，
因為理工對開那位置，
是車輛使用率極高的路段，
逢星期六坐車去到那兒，
都是大塞車。


睡了很久，
終於到了目的地，
一個尖沙咀的開倉。
（雖然不是直接回家，但都要捱塞車之苦 ><）
回到家已經三時多。
當我去到家門口時，
我不敢入屋，
因為鐵閘處有隻麻雀，
冇錯，係一隻麻雀！
我驚我開門會令到飛入屋，
等了一會兒，
佢完全不動，
再等下去都唔係辦法，
所以大大聲行兩步，
隻麻雀終於飛走，
不過好明顯佢係傻架，
亂咁飛，個個掘頭巷都飛過晒。


終於安全返到屋企，
溫了一會兒書，
做了一會兒功課，
就再出門口去踢足球。


不過因為昨日先踩了一個小時單車，
踢了一陣我就抽根，
唔係點跑得動，
浪費了很多機會之餘，
打後衛時又幫對手製造唔少機會。
雖然係咁，
但係我都有一球助攻，
如果唔係有一球中柱，
一球畀人救空門，
我都會有進帳。


今日同飛行物體好有緣，
因為返到屋企，
見到天花板有舊野，
拿支棍篤一篤佢，
佢……佢飛架！
爸爸話佢係蝴蝶黎，
但係點解屋企會有隻蝴蝶？
仲要係一隻淨色既蝴蝶，
趕又趕唔走……

>>November 30, 2003 at 5:29:22 PM GMT+8

2003 年 11 月 27 日 星期四 【微冷】

Master Course 那兒要做 FYP，
今個學期要交計劃書，
還有工作計劃。
計劃書早幾個星期已經交了，
我 send 了 E-Mail 給 Prof. 問 comment，
佢沒有覆我，
我早兩日再 send 多一次，
今次即刻覆，
約了今天見面談談。
可能因為忘，
準備功夫做不足，
畀 Prof. 問到我口啞啞，
最後佢話，
睇唔出我個 Topic 有 d 咩可以做，
如果從技術層面上考慮，
太淡，即刻話到畀我知係得既；
如果從經濟方面考慮，
因為係 open end，
咁就太深，唔 suggest 我做。
結果我又要返起點，
做資料搜集，再定題目。
但係考試已經接近，
還有其他功課，
我會唔會搜集唔到有用既資料呢？
請代禱。

2003 年 11 月 26 日 星期三 【晴】

真係好辛苦呀！
連續三日在此吐苦水，
以往均未曾試過，
是否在這兒吐苦水，
在這虛幻的世界吐苦水，
不夠實在，
不能滿足我？
我好想有人可以聽我吐苦水，
不需要給意見，
或供應解決方法，
只是聆聽就可以了。
讓我肯定自己的存在意義，
在黑暗中見到一絲的曙光，
我便會很滿足了。


昨天滿有幹勁的去幫程式瘦身，
奈何將近收工時，
程式出現錯誤，
半天的努力被否定了，
距離死線愈來愈近，
但和終點的距離卻愈來愈遠，
捉不到也看不到，
心中感到一點的失落。


很奇怪的編譯器，
我刪除了幾行編碼，
但程式的大小卻不跌返升！
面對這樣既境況，
除了慨嘆之外，
還可以做甚麼？


年頭的時候，
定立了旅行前一定要完成整個程序，
現在，數算著日子一天一天的過，
看著終點離我而去，
我還有面目自稱編程人員嗎？
想過轉行，但卻沒有其他行業所需的技能。
前路汒汒，
可以做的就只有將一切交托給神，
是去是留，由祂定奪。

>>November 27, 2003 at 4:10:26 AM GMT+8

2003 年 11 月 25 日 星期二 【晴】

在這弱肉強食的石屎森林中迷失方向，
是很悲哀的一件事，
更不幸的是，
迷失方向而不自知，
甚或知而找不回自己。


究竟我可以在那兒找到真正的自己呢？
每天朝九晚唔知幾多的工作，
逢星期二三四的進修，
看來存在的炒炒都不是真正的炒炒。


在運動中的炒炒，
應該是最接近真的炒炒。
在腳踩健身單車，
眼看耳聽衝上雲霄，
我可以暫時忘卻日間的煩惱，
發生過的不如意事。
在一個星期一次的主日崇拜，
間中參與的野外定向比賽之外，
去做 Gym 是目前我心靈可以最寧靜的時候。
所以我決定，
星期五無論幾晚才收工，
我都要去做 Gym。


但是問題是，
大學功課這麼多，
一份二十五頁的 Essay、
一個十五分鐘的 Presentation、
一份五頁的 Planning Report、
兩科 Final、
日文功課、
日文溫習。
我是否能負擔兩個小時的付出呢？

2003 年 11 月 24 日 星期一 【晴】

每件事會有起有跌，
每到咁上下時候，
心情總會有少少底落，
總會妄自菲薄，
總會心灰意冷。
當周遭壓力漸大時，
不論是上司長輩所給的壓力，
來自同事朋輩的壓力，
你的壓力，我的壓力，
加起來會讓人喘不過氣。


想過很多方法去逃避，
包括離開這地方，
離開這世界。
雖然逃避不能解決問題，
但當我生命離開的一刻，
問題就再不是我的問題。
很辛苦，很想得到解放，
但又是否這麼容易呢？


一鼓所氣，再而衰，三而竭。
為何總要在我嘗試解決問題時，
加添更多的挫折？
為何理想與現實，
相距這樣大呢？


整天面對一大堆數字：
6428, 6500, 63fa, 9100, 8500, 7e6a, 763f……
為何我想它們變細時，
它們總是變大？
為何每當我想放棄時，
它們又會變細一段時間，
像引誘我繼續被玩？


唔想面對妳，
奈何每天要面對面看著好十小時以上，
去討好妳，去被妳玩，
去迎合你……


難道，這就是編程員的哀歌？

>>November 25, 2003 at 3:40:47 PM GMT+8

2003 年 11 月 23 日 星期日 【晴】

連續兩晚都訓唔著，
唔知呢 d 係咪叫失眠呢？
前晚三點幾先訓到，
昨晚又係三點幾先訓到，
今朝很大個黑眼圈……


究竟係咩原因訓唔著呢？
因為區議會選舉剛完結，
心急相睇結果？
又或者見到有 d 乞人憎既參選者落選，
而興奮得滯？
昨昨訓唔著就仲講得通，
但係前晚未有結果架 wor。


唔係呢個原因，
唔通係因為 download 了隻新 game，
玩到樂極忘形？
呢個情形都算講得通，
因為以前都試過，
亦試過打機打通頂。
不過以前仲細，
現在大個仔，仲未識諗？


咁會係咩原因呢？
有事未解決，
心掛掛所以訓唔著？
可能係掛，
但係我有個特點，
訓完覺就會乜都唔記得晒，
所以我都唔記得有咩未解決。

2003 年 11 月 22 日 星期六 【晴】

今日又要教班，
係國泰航空公司既班，
一個野外向第一階段訓練班。
起初見到國泰航空公司既名，
會唔會係教機師空姐玩定向呢？
會唔會要講英文呢？
我又會唔會唔識教呢？


今朝一早冇返崇拜，
原因係昨晚好夜好夜先訓，
沖涼梳洗食完午飯，
十二點半左右就出門口。
首先去投票先，
（今日係區議會選舉）
跟住坐巴士入青衣。
遲了少少去到，
（約一時四十五分，我一時四十六分先到）
去到唔見其他人"�影，
等到差不多兩點幾，
旅遊巴先到。（好似係由大嶼山國泰城開出。）
一睇 d 學生，
大部份唔係大人，
即係唔係機師空姐啦。
我估佢地係中學生，
因為聽到佢地話三月考 mock。


佢地分成四組，
我地有五個教練，
其中一個負責預備模擬賽，
其餘四個（包括我）一人帶一組。
我帶個組全部係甩繩馬騮，
而且過度活躍。
叫佢地停低聽我講解，
佢地就話要行，
最令人擔心係佢地唔知自己係邊 -_-""
雖則係咁，
大家都渡過了歡樂的下午。
（尤其是我個組）


玩完模擬賽，
有兩個 DNF，
原因係打少了一個 Point，
佢地去到山頂既時候，
見到前面那個衝落山，
佢地又衝落山，
但係人地打左 point，
佢地未打 point……


之後佢地影了好多相，
再落長宏村坐旅遊巴離開。
我就落了黃金逛街，
一路由鴨寮街行返渡船街，
六點半鐘行到十點鐘，
很累喔！

>>November 24, 2003 at 7:54:16 AM GMT+8

2003 年 11 月 21 日 星期五 【微冷】

今日返返吓工，
大虎打黎，
話佢媽媽今日打日，
（咦？咪同阿 sa 同一日？）
請我入去食飯。
咁我放左工，
就坐小巴出佐敦，
會合四虎，一齊坐車入沙田。
（三虎有事未能出席。）


打緊日記同時，
醒起公司附近有巴士直入沙田，
仲要好快 tim。
上車幾個站就到大老山隧道，
跟住就即到一城。


但係我就好蠢旦咁係佐敦坐巴士，
係旺角繞好多個圈先去獅子山隧道……


之前研究了好耐，
中午食咩好，
雖然結論係魚旦河，
但係因為唔夠時間，
結果去食麵包，
但係間麵包鋪 d 衛生就……
我見到有隻好大既蒼蠅係 d 麵包上……
結果我買了份三文治。

去到大虎屋企，
打左陣 Winning Eleven，
我一個鬥佢兩個，
除了第一場用美國慘吞三旦之外，
其他應該贏晒，
包括用喀麥隆怒數三球，
尼日利亞反勝二比一等等。


打完機之後，
打了一陣衛生麻雀，
衛生到不涉及金錢，
因為我唔賭錢嘛。


夠鐘食飯，好豐富喔，
有羊肉煲，也有盆菜。


食完飯，又打左陣機，
之後又打麻雀，
今次我連記億，打花將。
不過冇損我過關斬將，
包括一次十三么，呵呵呵 ^_^
後來佢地想打錢，
咁我就換人去上網了。

>>November 24, 2003 at 3:29:51 AM GMT+8