2004 年 7 月 27 日 星期二 【酷熱】

今朝起身，
早餐係牛奶麥皮加一杯鮮榨西瓜汁，
正一牛頭唔搭馬嘴……
而且一小碗的牛奶麥皮，
根本就唔夠飽，
結果都係返到公司附近先買老麥。


老闆放完大假返黎，
自然要入佢房傾野。
因為有一件零件，
間 Vendor 已經冇在出，
咁就要找個件。
老闆昨晚十一點幾 send E-mail 問我有冇問題，
咁其實我昨日已經找到答案
幾經掙扎，
結果都係冇覆返畀佢。
今日就自然同佢講返啦，
但原來個答案係錯既，
好彩冇認叻……


放左工落左 SOC Training，
因為有部份人去了參加全國賽的關係，
停操了兩個月，
今個星期恢復操練。
今日只有一個單元：「接力拼圖」，
一隊三個人，
以接力的形式每次去兩個控制點，
然後拼一塊。
結我我個隊大勝，
純講體能，我輸好多，
但一講到用腦……


今年年尾，
香港會攪個亞洲城巿定向比賽，
今日班 EC 開會傾如何選人出賽。
佢地決定以過去一年參賽成績來決定。
但這個根本唔公平，
而且亦很難比較，
試問一個係 20 歲組別跑第一的賽員，
和一個係精英組別跑第尾的賽員，
誰可出賽？


食晚飯的時候，
我們不斷提出例子和質疑，
結果可能改做跑一場選拔賽，
雖然亦有不公平的地方，
但比原先的好得多了。

>>July 29, 2004 at 7:58:39 AM GMT+8

2004 年 7 月 26 日 星期一 【酷熱】

開始懷疑自己既表達能力，
唔係第一次表達我對午飯飯盒既要求，
不過結果呢，
一次比一次失望……


今晚食完飯就好早出門口，
去到學校大約七點五十五分，
難得我有一次唔係遲到，
不過呢，
竟然冇得入課室住，
因為上一班仲未落堂。


入課室之前，
毛理同我講話佢星期六下午都要返工，
唔可以上堂。
但係現在個老師得星期二和星期六有堂，
星期二我要返大學，
星期六毛理要上班。
咁即係一係我同毛理分開上堂，
一係就轉老師。
現在距今個 Course 最後一堂仲有幾個星期，
仲有時間慢慢想。


講起最後一堂，
即係話考試就到，
但今個學期學既野都好似唔係好熟
生字就更加差啦，
老師好耐都冇同我地默書，
我就自然少背啦……


唔得，
唔可以咁懶懶閒既，
要放多 d 時間落日文到，
希望每日都有一個小時既溫習啦……


十點幾返到屋企，
本來想早 d 訓，
結果攪吓攪吓，
又一點喇……

>>July 28, 2004 at 4:26:18 AM GMT+8

2004 年 7 月 25 日 星期日 【乍寒還暖】

今晚放左工之後，
坐緊車返屋企既時候，
收到大同 A 君的電話，
問我幾時去做 Gym。
我話一陣九點，
佢就話見面先講，
有事同我講。


跟住返到屋企，
又收到佢電話，
叫我帶多個鎖出黎。
因為佢唔記得帶鎖匙，
剪左鞋櫃個鎖。


咁我食完飯，
打左陣機就出去啦。
去到換好衫，
幫大同 A 君個鞋櫃掛返個鎖，
就去找教練喇。
今日既訓比較特別，
唔係三樓舉鐵，
而係二樓練跑步機。


先以 Incline 為 3 度， 6 公里每小時既速度熱身，
然後以 10 公里每小時既速度跑一分鐘。
10 公里每小時既速度對我黎講，
還算輕鬆。
之後降回 6 公里每小時既速度，
讓心跳回復正常。
原本應該等到九十幾下每分鐘，
不個等左好耐都維持係每分鐘 130 下左右。
結果唔等，
去下一階段，
12 公里每小時既速度跑一分鐘，
6 公里每小時既速度讓心跳回復至每分鐘 130 下左右。
14 公里每小時既速度跑一分鐘，
6 公里每小時既速度讓心跳回復至每分鐘 130 下左右。
16 公里每小時既速度跑一分鐘，
6 公里每小時既速度讓心跳回復至每分鐘 130 下左右。
18 公里每小時既速度跑一分鐘，
6 公里每小時既速度讓心跳回復至每分鐘 130 下左右。
當想上 20 公里每小時既速度既時候，
發覺部機上既都上唔到 20，
上到 18 點幾，
又跌返 16 點幾，
結果一分鐘後，
都還沒有去到 20 公里每小時既速度。
教練說以快些少的速度做起始，
以 10 公里每小時既速度跑一會，
然後再試 20 公里每小時。
好可惜，都係去唔到 20 公里每小時，
而且因為係呢分鐘，
部機係 16 至 18 呢個 Range 上上落落，
今次跑得異常辛苦。
教練說他曾試三樓的跑步機，
是可以上到 20 公里每小時既速度的，
但不想我係三樓練，
因為這樣會成為展覽品的……


係慢跑既同時，
教練問我平時練跑有冇咁甘，
我亦順手告訴了他 X 特訓和 Y 特訓。


跑步訓練之後，
我拉腳的筋，
總其三組動，
分別拉大腿的"外"、"後"和"內"三條。
我拉筋出既汗，
比剛才跑步還要多，
教練也說，
他舉鐵也沒有出這麼大力呢！


拉完筋之後，
都有去舉鐵，
分別練了小腿腓腸肌和手臂三頭肌。
之後同大同 A 君去飲野，
原來佢想同我講既係，
阿米即將轉工，
仲要係大同 A 君以前做過那間 Software House。
仲以為咩事，
一早知啦，
等我仲懶緊張咁……


另外一個消息，
就係大同 A 君加人工，
而且請食飯，
多謝多謝。

>>July 27, 2004 at 8:34:30 AM GMT+8

2004 年 7 月 24 日 星期六 【晴】

好害怕，
生命中兩個對我重要既人，
都有機會離我之去，
雖則話天下無不散之筵席，
但唔開心總會有既。


其中一個，
我都好耐冇見她了，
而關於佢既消息，
都係道聽途說返黎。
對上一次見佢，
好似係過農曆年，
定好似係再之前呢？
我都唔記得了。
佢住咁遠，
我又要返工，
要去探她的確係幾難就到時間。
我曾經以為我係一個好堅強既人，
不過我唔敢想像我失去她既時候會點，
我仲讀書既時候，
她同我講，
叫我出黎做野時先請佢飲茶。
不過我出左黎做野兩年，
都咪請過佢飲茶，
又咪畀過錢佢買野食……><


當時辰到，
佢話要走既時候，
我又憑甚麼留住她，
又有甚麼可以有這個能力？
既來之，則安之，
說的時候倒很容易。


另外一個，
做完手術都已經三個月有多，
仍然係屋企休養緊。
聽媽媽講，
佢好似又痛過，
但係我又唔知可以做乜，
叫佢唔好食煙，
唔好飲咖啡，
佢又唔聽話……


最近佢做賭埋波 tim，
總算叫有 d 野做吓。
今日仲好開心咁同我講，
話買仲左烏拉圭對哥倫比亞波膽 tim。

>>July 26, 2004 at 3:30:09 PM GMT+8

2004 年 7 月 23 日 星期五 【晴】

雖然昨天訓得少，
但係中午放工都唔可以返屋企訓，
要先落黃金一趟。
話說上星期有個同事去開黃金，
我就叫佢順手幫我買個 USB Floppy 機，
部機仲要係連 Card Reader tim，
畀 Notebook 用，真方便，
不個部機唔係買黎自用，
而係幫某人媽媽買。


講返部機，
買左返黎之後試啦，
係公司試過 4 部 Desktop，
1 部 Notebook，
又試埋我問某人媽媽借返黎部 Notebook，
都係用唔到。
咁我唯有拿去換。
結果真係部野壞，
但係冇晒銀色，
換左個黑色返黎，
仲襯部 Notebook 啦。


之後返佐敦，
去左鏡鋪打價。
想整個相架咁既野，
「表」我個件紐卡素簽名波衫，
力爸報價四百幾，
遠遠超出我預算，
我要認真考慮吓。


之後上左阿力度，
打三圈左右，
一開波我就連食五鋪，
遠遠被「拋離」，
打完之後，
我一下都唔駛做，
佢地三個一人做三十下左右。


食完飯，
力爸幫細牛同黑洞拔罐，
我見冇野做，
咪又試下 lor。
拔完之後，
變左毒旦，
背脊一個個深紫色既圓形。
力爸仲叫我唔好做咁多 Gym，
畀人一盤冷水照頭淋……

>>July 26, 2004 at 4:36:04 AM GMT+8

2004 年 7 月 22 日 星期四 【晴】

有個同事明天 last day，
所以今晚就佢 farewell。
約左放工先打籃球，
不過就一個話腰骨痛，連工都冇返，
另一個就話腳傷。
但係好彩都夠六個人。

和隔離場打全場，
被人大炒三十比二 ><。


打完波之後，
有幾個有事走先，
餘下的人會合埋幾個唔打波既同事，
一行七人出左尖沙咀食晚飯。
幾年冇去過澳門茶餐廳，
水準好似下降左咁，
其中葡國雞，
只得好少雞。
埋單一人四十，
個價錢都叫 ok 啦。


之後落左酒吧繼續，
好都好耐冇飲酒，
對上一次飲得比較勁，
應該係 O'Camp 做組爸個時，
都成五年 lor。
至於落吧，
基本上我都唔好，
唔會點落既，
上次落都好似係五年前，
走去做探子個次。


今次真係飲得好勁，
返到屋企都成五點，
訓兩三粒鐘又要起身返工。
話說我第二朝差唔多九點先起身，
竟然還是有去酒吧的同 Team 人中，
第一個返到公司！

>>July 26, 2004 at 4:35:48 AM GMT+8

2004 年 7 月 21 日 星期三 【晴】

書展又黎喇，
今年亦都係有夜書巿，
六點後入場只需 $10。
但我發覺夜書巿既時間係唔夠用既，
我結果都有一個館冇行到。


有人話書展愈來愈細，
我都有同感。
自從書展和漫畫展分家後，
展館細了，
展館數目亦少了。
但係據我所知，
我所認識既人入面，
起碼有十幾二十個都係昨晚去行夜書巿，
但我一個都撞唔到，
如果咁睇，
個書展都唔係好細姐。


昨晚放工就坐車落灣仔，
但我坐多左個站，
行好遠先到會展…… ><
入到場都差唔多七點半，
先上 Hall 5，
我買左兩隻無記音樂特輯既 VCD，
同埋一本鋼琴譜。
阿健就買左 D 海報。
原本以為間間鋪賣既野都係 Unique，
點知唔係 wor，
見到有另一間又係有個本琴譜，
標價貴左，
但係打左八拆之後平左…… ><
下年都係要格一輪格先。


落返 Hall 1，
入口見到人頭湧湧，
原來周慧敏黎左簽名，
我唔記得帶相機，
不過阿健就有影到。
之後行埋 Hall 1，
剛剛十點離開。
開左幾樣野，
大部份都唔係畀自己既。
尤其係一本小說都冇買，
本來想過買哈利波特小說（即係 MK 買左個本），
一 d 畢華流既舊書咁。
不過醒起舊年書展買既書未折，
前年書展買既書未開始睇，
我就收手了……

2004 年 7 月 20 日 星期二 【乍寒還暖】

上個星期二，
屋企多了一個神秘紙袋。
紙袋中有兩盒金莎朱古力，
同埋一支香水。
早一兩日爸爸同我講返，
話媽媽估 d 朱古力同香水係我女朋友送。
咁我就好奇怪喇，
我邊度搵個女朋友返黎，
可以用「紙袋」送禮物去我屋企呢？
最後發覺，
原來 d 野係家姐叫工人拿返黎。


媽媽 d 幻想功夫好到家，
最慘係佢明明係估錯，
同佢講返佢又唔信。
舉個例，
佐敦四虎好好感情，
成日都上大大力屋企玩，
順手食埋晚飯先走。
咁媽媽就話大大力個妹係我女朋友，
如果唔係唔會成日上人地屋企。
但係問題係，
大大力都冇妹既，
又何來變個人出黎做我女朋友呢？
但係講佢又唔信 wor，
所我決定以後都唔會回應佢既題問。
因為如果我答「是」，
佢就話自己好勁咁估對了；
如果我答「否」，
佢就話佢估中，
不過我唔認姐。
咁你地教我喇，
我應該點答？


To hey：
介唔介意話我知你係邊個？
點解唔寫拍拖既野？
唔寫係因為「不能也，非不為也」。
而且我目前唔需要預時間拍拖，
所以 Shedule 可以排得 Full Full 的。

>>July 21, 2004 at 3:49:25 AM GMT+8

2004 年 7 月 19 日 星期一 【乍寒還暖】

今日一早就激死左，
話說早排我為左分開邊 d 衫用手洗，
邊 d 衫用機洗，
買左個污衣籃返黎。
咁可以用機洗既就放落污衣籃，
要用手洗既就放落膠盤。


今朝起身沖完涼，
見到個洗衣機開左，
但係機洗 d 衫仲係個污衣籃。
污衣籃放係浴室，
我係浴室沖緊涼，
又點有衫會開到機呢？
一看之下，
原來工人將 d 手洗衫放左落洗衣機度洗。
嚇得我丫，
咪即刻問個工人發生咩事 lor。


佢話因為佢今日朝早要去領事館，
咪將 d 衫放落洗衣機度洗 lor。
仲話一次半次之嘛。


我咪即刻叫佢熄機，
拿返 d 衫出黎 lor。
問題係，
既然分得開兩類衫，
你咪跟返黎洗 lor。
我唔介意你遲一日先洗，
問題係有 d 衫唔可以用機食，
用機食好易整爛件衫。
更甚既係，
用機洗好易會整污件衫，
你冇睇錯，
因為久唔久就有 d 銹漬整落 d 衫度。
有 d 衫唔緊要，
我冇所謂。
但係我果件幾百蚊既波衫，
仲要熨埋 Number 熨埋名。
整爛左、整污左，
我真係同你死過。


好盡力去 Control 自己把火，
似乎 EQ 都仲係好低。
請代禱。

>>July 20, 2004 at 10:09:13 AM GMT+8

2004 年 7 月 18 日 星期日 【晴】

尋日係傑志係香港大球迎戰英超勁旅紐卡素既大日子，
我四點半就到左銅鑼灣，
會合球迷會班幹事，
之後就分兩批，
一批返回時代廣場，
負責派飛畀預先訂飛既會員。
一批包括我就先入場掛橫額。


發生件好攪笑既事，
話說有個人將近大球場，
先發覺唔記得帶入場卷，
所以就要返荃灣屋企拿。
咁我地個個都係度笑，
咁我就話，
如果佢返到屋企，
發覺張飛原來一直係自己身上，
咁仲攪笑。
點知畀我開口中，
話說佢女朋友驚佢唔得帶飛，
將張飛由信封拿了出來，
放在男朋友個銀包，
個男朋友就一直以為張飛仲係信封，
結果就發生左件攪笑既插曲。


官方話今日入場人數係一萬三千幾人，
比我想像中多人。
成場波我大部份時間都係影相，
Total 影左一百八十幾張相，
如果唔係成日被人遮住，
影得仲多 tim 呀。


下半場舒利亞被換出，
佢將佢件波衫拋向球迷會既觀眾席，
有人奮不顧身搶了回來，
雖然受了傷，
但得到舒利亞穿著過既波衫，
又有紐卡素既職員遞來的膠布，
我都想搶到波衫那個是我呢！


臨完場時，
觀眾開始玩人浪，
我們足足玩左四轉 tim 呀。


結果全場完 1:1，
十二碼紐卡素勝 7:6，
總比數紐卡素勝 8:7。


完場後有班球迷去送機，
我因為太疲倦，
所以沒去，
回到家上床諈時望一望個鐘，
原來已經 42 個小時沒有睡了。

今次真係一次好開心既經歷。
感謝主。


題外話，
估唔到又上報紙，
你找唔找到我呢？
某人一望都認得出，
畀五個叻佢。


>>July 20, 2004 at 4:52:57 AM GMT+8