2004 年 3 月 9 日 星期二 【微冷】

繼續講 career，
我地係咪應該有一個 career plan 或 career objective 呢？
近日睇 BBS，
有人爭論緊呢一點。
有人話，
因為見工時 in 你那個唔會 care 你既 career objective，
所以冇需要有。
又有人話，
現在做合約多過做長工，
所以有都冇用，
咁不如唔好浪費時間想。

我就覺得咁，
有 career objective 就等同有一個奮鬥既目標，
不致於係 career path 迷失自己既方向。
career objective 係自己既，
唔係為左寫畀人睇。
所以根本唔需要考慮對見工有沒有用。
而 career objective 亦需要實實際際，
浮誇既 career objective 根本沒有用。

講左咁耐，
我既 career objective 究竟係咩呢？
未想到…… ><

2004 年 3 月 8 日 星期一 【微冷】

星期六探 Prof. 時，
見到佢係枱角放左 一 d 膠，
用處係防止佢個女撞親個頭。

但係意外真係好難避免。
係短短三個小時，
小桃就已經先後兩次撞親頭。
第一次係佢坐低時，
撞到個電視機櫃櫃角，
仲撞到櫃角崩埋。
唔夠十分鐘，
我地再次聽到「彭」一聲，
今次係撞到個地下。

究竟係咪防不勝防呢？
如果一個人三日唔係兩日就撞到周身瘀傷，
間中會唔小心切去手指一角，
又或者界刀飛腳趾。
咁可以點防呢？
好似監獄咁，
冇任何利器、
食野用膠餐具？
傢俱全部用圓角既，
再加軟膠防撞？
地下密鋪 たたみ（塌塌米）？

但又係咪真係防得到呢？
身體正常都咁，
第時操身大細時又點呢？
專人廿四小時貼身保護？
嘩！做左 G4 特工呀！

2004 年 3 月 7 日 星期日 【微冷】

最近發現左個有趣既地方，
一個叫 「unemployed」既新聞組。
攪笑既係佢地活係自己既世界，
發生咩事都話係個老闆不對。

舉個例子，
有個人話如果佢被公司解僱，
公司賠了一個月通知金。
佢問可唔可以唔收大信封個張支票，
繼續返工繼續出糧。

常理都知唔得啦！
公司冇話包養你一世嘛。
咁那個人就話，
唔係佢應徵份工，
而係間公司挖角。
所以老闆久佢人情云云。

仲話想告間公司無理解僱，
一個月代通知金補償唔到佢被解僱之後既損失。

我愈睇就愈想笑。

另外有人 post 左一篇請人廣告出黎，
問公司想請一個「膠樽打碎員」。
咁 post 文那個人就 highlinght 左要求應徵者要英文良好既要求，
然後就話 d employer ……
但係我又覺得，
係咪膠樽打碎員就唔需要識英文呢？
如果間公司係外國注資公司，
管理層講英語……
又或者膠樽面有英文寫既資料，
佢需要將膠樽先分類……


又有一個人做開 IT，
月入萬幾兩萬。
年幾前公司收縮裁人，
補左筆錢畀佢。
咁佢到現在都未有工做，
唔係冇公司請佢，
而係佢不屑做人工只係得幾千蚊既工。
佢話冇理由 down grade 讓人笑。
早幾年科技泡沬，
有好多都係 overpay 左。
現在經濟又差左，
根本好難賺番以前咁多錢。
佢仲話自己舊錢慢慢洗，
一年只係用七千蚊，
生活仲要過得好充實。
所謂既充實，
都只不過係成日大部份時間係圖書館，
上吓網、找吓工、睇吓書……
點解 d 人總是不肯面對現實？

>>March 8, 2004 at 10:18:59 AM GMT+8

2004 年 3 月 6 日 星期六 【微冷】

三月七日，色級比賽第四站，
地點是西貢驢仔石。
該賽區於二月八日曾舉行聯賽，
當時的賽事中心位於大灘。
今次可能人多了，
起點位置不同了，
又或其他原因，
賽事中心位於西貢海下燒烤區。
以往這兒交通不方便，
乘九巴 96R 或 94 於高塘站下車後，
步行約 40 分鐘後才到。
自從海下灣海岸公園開幕後，
多了一個選擇，
可於西貢墟乘坐 7 號專線小巴直達海下，
車費每位只需十元正。

賽事中心地點優良，
附近有多個流動洗手間。
海下村有食物及飲品出售，
當然價格較市區高，
但都是一個合理價格。

可能小弟不是由「正門」離開賽事中心前往起點，
看不到指示起點在那方向，
找了一會才知起點在海下村那邊。

今天最早出發的賽員十時正便出發，
最遲出發時間為下午一時正，
而小弟則於正午十二時正出發。
賽程長度為 5 公里多些，
總共二十個控制點。
攀高 300 米，
需要攀高的路段不多，
但每次都是大上大落，
體能要求嚴格。

錯誤再次發生於長路段。
教班時常強調於路口要做 3S，
Stop（Slow）、Set Map、Selete。
但自己於比賽期間多次忘記這點，
多次走錯方向，損失不少時間。

由最後一個控制點回終點是一段下山急斜，
路上佈滿碎石。
當於上面奔跑時，
痛楚的感覺便有如腳底按摩。

啡組最快的時間約五十分二十六秒，
小弟時間約為七十六分三十五秒。
本會的阿棟於 H21 終勝一仗，
時間約為六十八分五十九秒，
比第二及第三的快十分十一秒。
蘋果蛋教練則三甲不入，
需時約八十九分零七秒，
得一席「梗頸四」。
排第五的是本會另一名會員所羅門。
阿棟於總成績緊守第二位，
落後領先的只有三十二分。
已可肯定的是阿棟能入年終三甲，
究竟阿棟能否再上一層樓，
勇奪色級賽 H21 的冠軍，
一雪上年未能升班的憾事呢？
蘋果蛋教練又能否明年升班呢？
（數字上，蘋果蛋教練及所羅門已無入三甲希望）
一齊還看三月二十八日，
於青衣舉行的第五場色級賽！

>>March 9, 2004 at 6:19:04 AM GMT+8

2004 年 3 月 5 日 星期五 【颳風】

原本約了一班網友去維園影花，
但係因為約了一個大學時代的 Prof.，
結果就沒有去影花。
話說該 Prof. 最近弄瓦之喜，
我們幾名不同年份畢業的舊生結伴到他家探訪。

我們約好了三時半在大埔墟火車站等。
我中午離開公司時約二時，
步行往觀塘碼頭巴士總站，
乘坐 74X 巴士前往大埔。
一小時後在廣福道下車，
路經姐姐屋企樓下，
步行住大埔墟火車站。
採取路線係只行過一次的穿過運頭角遊樂場，
而不行大街，即運頭街或南運路。
純憑記憶，行一條個幾月前行過既路，
幸好都沒有行錯。


等齊人，再打的上 Prof. 既家，
終於見到 bb 女喇！
bb 女剛滿月，
好可愛呀！
Prof. 拿了 bb 女同佢剛學講野既家姐 d 相我地睇，
佢兩姊妹真係好似樣。
我就全靠佢地耳仔的分別，
分到邊個打邊個。

之後我地又食薑醋，
d 薑醋都幾好食，
但係我食唔慣 lor。

之後我地又傾左好多話題，
例如電影啦。
講過「我的野蠻女友」，
有一個師兄可以睇得 detail 到見到有架 UFO 係戲中飛過，
佢話逐格 Play 先見到！

又談過吓近況啦，
發現左樣好恐怖既事。
就係原來 Prof. 知我跑定向，
係從另外一個同我不是太熟既 Prof. 口中得知。
仲要傳聞中我代表過香港跑定向！
（好似我都只係入過香港訓練隊，未入過香港代表隊）
嘩！好驚呀！

臨走既時候，
小桃（bb 女家姐）好似唔拾得咁。
唔知佢係唔捨得我地走，
定係唔捨得佢爸爸呢？
（Prof. 揸車送部份人到火車站。）

>>March 8, 2004 at 4:12:18 AM GMT+8

2004 年 3 月 4 日 星期四 【微冷】

成個星期都冇覺好訓，
每日平均眼眠時間唔超過五個半鐘。
日日都想早 d 訓，
但係總會因為某 d 原因冇得訓。
晚晚可以熄燈上床都起碼已經成一點，
有幾晚去到成三點幾。
朝朝七點幾就起身準備返工，
有兩朝差唔多八點先起到身。
返到公司自然唔夠精神，
行動力大減啦。

結果昨晚下定決心，
放工即刻返屋企訓到天昏地暗。
曾經有人想動搖我既決定，
係咁勸我去做 Gym。
但係由於我真係頂唔信，
結果都係冇去到。
返到屋企，
本來想即刻訓。
但係望一望個鐘都已經七點十五分，
唔爭在等多十五分鐘等爸爸返黎，
食埋飯先訓。

咁就開集男女字典睇啦，
睇到一半爸爸就返到屋企。
食完飯，睇埋集男女字典，
就預備上床訓覺。
（其實仲有打左陣機同聽左陣收音機）
結果十點幾先訓。

星期三晚冇跑到，
星期四晚又冇跑到。
為左唔好成個星期都唔跑，
我決定今朝一早起身跑步。
五點三起身，
五點七食完早餐，
六點五出門口。
用左三十三分鐘跑三個大圈，
每個圈大約係 2.288 公里。
即係跑左約 6.9 公里，
平均唔駛五分鐘跑 1 公里。
如果速度可以 Keep 到，
我跑 10 公里就唔駛五十分鐘，
但係我知道因為跑得短先咁快。
（其實比標準仲係慢好多）
希望有一日，
我就算連續跑一小時、兩小時都係可以四分幾一公里啦！

>>March 5, 2004 at 9:09:55 AM GMT+8

2004 年 3 月 3 日 星期三 【晴】

又有大慘事發生呀！ ><
距上次炒機只係相差八日，
我部 Pocket PC 又炒喇！
我個名雖然叫炒炒，
都唔駛係咁炒架……


話說昨晚放工坐地鐵出佐敦，
等車既時候，
咁就 Delete Memory card 上 冇用既野。
其實近排都怪架喇，
張卡建築面積明明 256 MB，
實用面積點都有 247 MB 啦。
但係經過個零星期使用之後，
我發覺好似唔係好"睄①C
已使用記憶體為 69 MB，
可使用記憶體為 70 MB。
兩個數加埋係 139 MB，
即係被食左 100 MB 有多！
咁等車時就順手行 Scandisk，
睇吓有冇問題啦。
點知個 Program 行行吓 Hang 左機，
Reset 左部機之後，
慘事就發生喇……


我發覺部機好多 Program 都行唔到，
而且行唔到既 Program 都係裝係張 Memory card，
只有極少部份係 Memory card 既 Program 可以 survive。
咁開 Explorer 睇睇啦，
發覺儲係 Memory card 既 Files 唔見左大半！
簡直係情天霹靂，
好彩昨日朝心血來潮將 Memory 卡既 Files 炒晒入 Office 部 Desktop 到。


今朝將張 Memor card format 左，
張卡靚仔晒，同新既一樣 ^_^
再將 d Files 炒返晒返去，
部機又用得返喇！ ^_^
雖然部機用得返，
但係昨晚就成晚冇得用機 ><

>>March 4, 2004 at 9:12:06 AM GMT+8

2004 年 3 月 2 日 星期二 【颳風】

老闆上個星期去左美國一個展覽，
今日返黎公司，
咁自然我要交功課畀佢睇啦。
有個 Bug 我攪左成三日都攪唔掂，
今日先係云云十四萬三千零二十一個字元中，
找出我原來打多左一個 Character！
之後就開 Turbo 改 Program。
上司叫我做 Demo 畀老闆睇之前，
先做一次畀佢睇先。
我下午五點先做得起畀佢睇，
佢睇完自然有野要改啦。
改左幾次之後終於 Ready 做 Demo 畀老闆睇，
呢個時候係下午接近六點。
但好景不常，
有第二個同事已經入左老闆房。
上司問我趕唔趕住走，
咁我就話：「有野做但唔趕」
咁我上司就話咁不如等一陣啦。


一等就等到六點半，
咁開始做 Demo 啦。
做完 Demo 係個 lab 出返黎已經過左七點半，
但係跑步訓練係七點開始。
即刻離開公司坐地鐵落佐敦，
去到九龍公園已經八點三。
去到既時候剛好係佢地跑完主訓練，
今日係三十分鐘大圈 Easy Run。
我只可以參與餘下既體能遊戲，
雖則都有半小時，
但係訓練量完全唔夠…… ><


食完飯去打機減壓，
其中有個遊戲我完全唔知玩緊乜。
呢個係一個四打既格鬥 Game，
二打二大混戰。
亂到我打左兩次都唔知自己玩緊乜，
個 Game 又可以打傷隊友 wor，
攪到我隊友被電腦打緊既時候我唔敢出手救佢。
因為試過我錯手打傷佢。
玩完個 Game 我得到既結論係：
我唔會再玩呢個 Game，
就算玩都唔會玩隻打。

>>March 4, 2004 at 9:11:20 AM GMT+8

2004 年 3 月 1 日 星期一 【微冷】

唔知幾時開始，
我愈黎愈懶。
記得以前小學時，
可以一整天係圖書館。
d 書睇完一本又一本，
仲要係每隻字，每幅圖都品嘗。
有人話我識好多野，
其實好多都係細個儲返黎。


試過一口氣睇晒成套書劍恩仇錄。
現在？
我都唔知幾耐冇試過一口氣睇晒一本書。
就算有，都係「掃」書，而唔係閱讀。
一頁紙我有讀三份一既字已經算多喇……


中學個陣，
可以十點訓覺，
三、四點起身溫書做功課。
現在？
唔好話三、四點起身，
有溫過書都已經係奇蹟……

記得中六參加辯論比賽，
比賽之前個晚係學校附近同安娜姐和 Woman 傾到好夜。
（我係主辯，安娜姐係第二副辯，Woman 係智囊）
之後我話等我訓醒再傾，
安娜姐問我即係幾點，
我話三點。
結果佢又真係陪我癲，
三點打黎我屋企傾論點……
可惜最後都係第一場就出局……><


初初讀日文個時，
今日既功課，
第二日就幾乎做晒。
現在？
今日上堂，
今晚做功課，
不過係做上星期既功課……


以前試過朝朝五、六點起身跑步。
現在？
一個星期最多跑三晚，
仲要係因為做 Gym 畀左月費唔想蝕先去……


究竟，
現在的我是真正既我，
還是以前的我才是真正的我呢？
我想做以前的我，
但似乎知易行難……

>>March 2, 2004 at 6:00:38 AM GMT+8

2004 年 2 月 29 日 星期日 【炎熱】

唔知大家有冇睇過黎明同王菲「大城小事」呢？
覺得好唔好睇？
繼上次大同 A 君約我睇之後，
今日又一位中同約我睇。
不過時間不適合，
佢約我明晚，
但係我明晚要返學。
就算時間就到，
我對呢套戲既興趣不大。