2004 年 4 月 28 日 星期三 【微雨】

昨日放工返到屋企之前，
首先去了理髮店。
將那把留了四個幾月既頭髮剪去。
有人問我仲乜咁耐都唔剪頭髮，
係唔係想留長扮形云云。
其實只係我懶唔去之嘛，
昨晚有時間，
咪走去飛髮 lor。


飛完髮，食完飯，
就坐定定睇「下一站彩虹」。
睇完之後就要做功課。
總共有三樣野要做，
第一樣係 Final Project 既 Progress Report，
第二樣係選 Project 既 Reference Paper，
不過呢兩樣都唔係最趕。
最趕係第三樣，
日文既工作紙。
原本可以下星期二上堂先交，
不過早幾日收到風，
Prof. 會係下星期二講 Project 既野，
咁即係話我焗走日文。
為左唔想積埋咁多功課，
我唯有早早做定，
入落公文袋，
交低係日文學校接待處先。
因為 Weekend 要做 Progress Report，
未必可以抽到時間，
結果就唯有星期五去擺低。
換句話說，
要今晚訓覺之前做晒。
升左上高班，
d 野難左好多，
結果用既時間畀我預期多左一倍有多。
看來我要再加把勁。
（又聽住先啦……）

做做吓收到過電話，
原來係上司打黎。
佢發現左我冇熄到 Lab 部電腦，
就咁畀佢訓示一輪…… ><

>>April 30, 2004 at 4:43:10 AM GMT+8

2004 年 4 月 27 日 星期二 【暴雨】

今日又有成績公佈，
係另外那科既 Mid-term 分數，
94 over 100，
我相信個 Mean 都有九十幾。
不得不讚係個 Tutor 既效率，
我 Send E-mail 問佢我個分數，
不用五分鐘佢已經有 Reply。

放工之後，
本來約左打籃球，
但係竟然下起雨來。
我地唯有成隊兵操返上公司，
擺低 d 衫。
有人提議去打桌球，
我們一行六人去左淘大。
個度舊係舊 d，
但係就激平。
係奧海城篤波百二蚊一個鐘，
係呢度同等價錢可以打四個鐘。
當然一分錢一分課，
奧海城間房豪華 d，
設備齊 d，
保養好 d。
但係陶大對我呢 d 唔識打既黎講，
已經夠晒。

只係打左一局（打成個鐘……><）
我就趕住走。
因為約左做 Gym。
教練首先睇左我點拉筋，
除了某部份動作需要改善之外，
基本上都夠。
之後佢左做器械，
做腳那部做到我腳仔軟。
之後做背肌，
要完全做對動作，
對我黎講係好難。
要挺胸，放縮膞頭，同時要夾實背肌，
對我來說很難，
結果教練找了另一部機畀我練，
練胸肌亦都係咁，
為左讓我 feel 條肌肉點樣發力，
用到 Free Weight。
下次係星期日晚上堂，
但係之前我要自己去做一次，
要做對個動先，
我一定得既！

>>April 29, 2004 at 5:58:26 AM GMT+8

2004 年 4 月 26 日 星期一 【晴】

今個星期簡直是成績公佈週，
星期一有 Mid-Term 成績，
今日有日文 Final 成績。
今次日文係溫得最少既一次，
唔知有冇溫左十個鐘，
但係亦都係最淺既一份卷。
所以考出黎既成績不過不失啦，
不過勤力獎始終冇望。
今次係我第二次獎份作文打左 print 出黎交，
但係錯字都有好多……><
而老師畀我既評語係，
我應該可以作好 d，
我當然唔敢話佢知我只係用左一個鐘去做啦。


跟住開始上堂，
今堂有好多會話既機會。
但係就暴露了我詞滙少，聽力差既弱點。
攪好耐先聽得明老師問乜，
又攪好耐先答得到。
而且又冇信心答，
講得好細聲好細聲好細聲好細聲……


據老師所講，
係呢一兩堂先可以咁多會話，
之後就可能冇咁多機會講野。
原因係佢以前個班八個學生都會過埋黎，
加上原有班底和兩個新同學，
成班有成二十個人！
個八個學生轉過黎，
係因為唔習慣新老師既教學方法，
我都同意，
我補課都上過其他老師，
都唔係好習慣。
但係一班廿個人我好驚好嘈，
好難學到野。
可惜老師冇時間兼顧教兩班，
咁都冇辦法架啦，
唯有自己課餘落多兩錢肉緊。
（呢句好似聽唔少次，結果係……）

>>April 29, 2004 at 2:59:02 AM GMT+8

2004 年 4 月 25 日 星期日 【晴】

今天是 Mid-Term 後的第一課，
預料會派卷。
果然不出所料，
入到課室，
已看一大疊卷放在教師桌上。


由於有兩班的同學既卷，
教授第一件事要做既，
就係將佢地分成兩半。
看著佢逐本對名，
進度非常緩慢。
未幾，佢終於放棄了，
改要求我們講名佢再找。
可惜的是，
效率仍然不高。
結果就將兩個 Process 同時做，
分兩班之餘，
同時也看看當事人在不在。
我們當然有幫眼啦。


派派下，我終於見到我份卷，
由教授手中接過試卷既同時，
佢講了一句：「考得唔錯 wor」。
當時我勁愕然 lor，
因為佢只係同我一個講，
我分又唔係高，
得那 64 分，
考七十幾分、八十幾分既大有人在。
不過當我發現，
有唔少卷既分數係去到廿幾分，
我就覺得我既分係唔低。
不枉我拿了一天年假來溫書，
及把答題簿寫得滿滿的。


但正式上堂的時候我心不在焉，
因為 Weekend 要交 Final Project 既 Progress Report，
我當然係度臨急抱佛腳，
成堂係度睇 Paper。
教授講既完全入唔到腦。

>>April 28, 2004 at 9:49:44 AM GMT+8

2004 年 4 月 24 日 星期六 【晴】

今個賽季最後一場公開日場，
是由香港野外定向會主辦的幹事盃。
今年舉行的地點是牛寮，
地圖由奧森布可立重新繒製，
加入了大量林內資料，
賽區由 95% 快至慢跑樹林組成。
據一些有外國比賽經驗的賽員所說，
身處其中有如於外國比賽一樣。

既然賽會用心良苦
我並不是以競賽的心態出發，
而是當是一個練習，
盡可能都留在林內。

頭五個路段我都不慢，
主要是沿等高線前進，
總時間是 14 分 21 秒，暫排第十三。
（題外話：小弟當年的旅號正正是 1421）
由五號控制點去六號控制點，
大部份人都是選沿明顯小路走。
小弟為了練習的關係，
選了條近乎直線的前進路線。
先走通行困難植物中的不明顯小徑，
抵達白林，原本想沿河直去控制點，
但因為通行太困難，
結果轉到另一條不明顯小徑。
到達石牆陣，
轉入明顯小徑，
再轉入原先小河到控制點。
如果一開始走小路，
應該需時不多於八分鐘，
結果我用了十六分多。

為了測試體能，
由八號控制點去九號控制點，
我選擇了上山頂。
及後明顯的體能下降，
每個控制點都慢了點兒。
結果用了 122 分鐘，
比第一的慢接近一倍。

完了比賽之後，
去了參觀三楝屋博物館。
欣賞當中的建築，
以前人們的生活等。
唔知佢去過未呢？
下次帶佢去先……

>>April 28, 2004 at 9:13:06 AM GMT+8

2004 年 4 月 23 日 星期五 【微冷】

最近迷上了睇漫畫，
其實一路都有儲開，
以前睇過港漫「天龍八部」，
港漫即係那些$13 薄裝漫畫，
現在睇開日本漫畫，
例如「烈火之焰」、「足球小將」、
「Naruto」、「One Piece」、「球場幻想曲」等。
完左既漫畫唔計，
只係講仲連載緊既。
一個星期一話得十七、八頁，
睇得唔夠喉。
「HunterXHunter」那些每兩、三個星期，
總有一、兩個星期去取材而停刊既更加吊癮啦。
一係就睇單行本，
但係睇一本要等個幾兩個月先有下一本，
真係等到頸都長。

結果我就找來 d 連載左一段日子，
但一直都冇睇既。
繼早前追看百幾話既「網球王子」之後，
今個星期睇了二百幾話既「通靈王」。
有時甚至睇到費寢忘餐，
三點幾先去訓。

雖然減少睡眠時間，
但我唔覺得浪費，
因為從中我有很大的得著。
故事既主角是一個叫「葉」既通靈者，
佢係那種泰山崩於前而面不改色既人，
口頭憚係：「總有辦法解決」。
就算環境如何惡劣，
佢都唔會放棄，
堅持下去。

我地好多時做事失敗，
好多時唔係輸在件事本身，
而係輸在自己。
我們好多時遇到問題，
唔係尋求解決方法，
而係想好多好多既藉口，
一開始就否定做到既可能性，
認為自己一定做唔到。
唔知我幾時先改善呢個懷長慣呢？

>>April 26, 2004 at 1:17:50 PM GMT+8

2004 年 4 月 22 日 星期四 【清涼】

幾經辛苦，
今朝終於做完份 BOM，
下午繼續寫 User Manual。
寫下 Manual，
畫下圖，
話咁快就夠鐘放工。
放左工就出長沙灣上堂，
第四階段既技術改良班，
亦都到了最後一堂。
今堂講既野比較少，
只係講左少少關於運動創傷，
少少關於飲食營養。
上完堂就做檢討，
回饋意見畀教練。
基本上同學仔認為分兩個半日既戶外實習，
會比一個全日既戶外實習好。
我覺得有利有敝啦，
半日既戶外實習可以容許少少既超時，
但全日既戶外實習就唔得喇，
因為要係天黑前下山，
而正常都起碼五六點先完得。
但半日實習既唔好處係用左好多交通時間，
野外定向通常都係 d 遠離巿區既地方，
動不動都來回需時兩個幾鐘，
一個全日既實習就可以省下呢兩個幾鐘。
Anyway，呢 d 都係教練既決定，
如無意外都唔係影響到我，
因為我都唔需要再上。


上完堂，
原本打算去做 Gym 既，
結果太疲倦，
冇佢了。

2004 年 4 月 21 日 星期三 【酷熱】

原本打算今日去奧海做 Gym，
順手拿返 d 個人物品，
因為個會籍到五月就會到期了。
但係上司今日 Assign 左 d 新野我做，
就係寫 BOM （Bill of Materials），
我做到晚上七點幾都未做完，
結果就冇去做 Gym。


搵左個大同出旺角睇戲，
首先約係百老匯等。
百老匯得兩套戲上，
一套係「教命」，
一套係「活死人凶間」。
由於我打死都唔睇恐佈片，
結果就上左新世紀。
去到既時候，
「天作之盒」已經開左場。
餘下可選擇既有三套，
「以暴易暴」、「戀情告急」、「大佬愛美麗」，
有人睇左「戀情告急」，
結果就選擇睇「大佬愛美麗」。


買完飛，
仲有成個鐘，
就去左太子 d 機鋪。
因為冇乜機好打，
結果就睇人打。
有個人打高達好攪笑，
已經達到人機會一既境界。
人隨機動，
當要閃避往左時，
除了左手將搖杆撥往左之外，
身體亦同時閃往左邊，
好似 d Laser 真係會射出黎咁。

忙裡偷閒睇左套戲，
但係份 FYP 仲未動過筆，
要加把勁了。

>>April 24, 2004 at 5:09:34 AM GMT+8

2004 年 4 月 20 日 星期二 【晴】

終於考晒 Mid-Term，
可以放多少少時間落訓練方面。
今晚約左教練九點鐘，
係屋企食完飯，
就慢慢行出去。
我原本都預多左時間，
打算去到熱埋身，拉埋筋先。
點知去到換緊衫時，
先發覺唔記得帶掛鎖。
禍不單行係，
我身上只得兩蚊。
唯有行番出去提款機拿錢先，
跟住行幾條街先找到鋪頭買鎖。
再次返到去，
已經遲到了…… ><


係正式訓練之前，
我先做了一些測試。
包括唔同部位既 size，
量脂肪比等。
之後量柔軟度，
用坐姿體前彎既方法，
一般數值為 31-34，
尚何級別為 19-30，
而小弟既結果係 1，
冇錯，係個位數字 1……><


之後量血壓和心跳，
可能行了幾條街未平伏，
所以第一次量左既唔準，
之後量多次右手，
數值合理左，
不過我相信都係比我正常大左。

再次後係做心肺功能測試，
測試結果係 Excellent，
呵呵呵。

跟住正式做訓練，
玩左五部機，
依次鍛練股四頭肌，背肌，胸肌，三頭肌和二頭肌。
每部機既動都唔難，
但係要 100% 做對動作，
將 100% 既 Input 化成做 Output 就有 d 難度。
尤其是身體各部位放既位置同角度，
邊部份放鬆，
邊部份收緊，
就比較掌握，
不過我相信係難唔到我既。

>>April 24, 2004 at 4:45:34 AM GMT+8

2004 年 4 月 19 日 星期一 【酷熱】

滿以為會識自動自覺報平安，
點知原來都係唔識既，
結果等了一日，
失望足一日。