2004 年 6 月 17 日 星期四 【酷熱】

本來今日約左班同事打籃球，
點知佢地話唔齊人，
改為下次先打籃球，
今日做其他運動。
傾過話打保齡球，
傾過話打桌球，
傾過話打羽毛球（我唔識），
打網球（我都係唔識）等等。
但結果都係不了了之……


我最後就上了阿力度。
上去個時坐電梯，
有個阿太入去先，
跟住到十四樓時，
最後一個人都出埋電梯，
電梯得返我同個阿太。
係我按關門掣時，
眼尾望到個阿太有動作，
咁我就望吓佢，
睇吓佢係唔係想出啦，
點知佢又有意思出 wor。
跟住佢就係咁同我講對唔住，
話佢掛住睇把畀老人家用雨傘，
過左唔記得出。
不過，
佢點解同我講唔好意思呢？
關我咩事？


食完飯打麻雀，
因為我唔睹錢既關係，
結果就以做啞鈴代替，
每兩圈結數一次。
頭兩圈手風唔順，
仲要包左人地一鋪八番，
結果要做廿四下。
個啞鈴有幾重呢？
我唔知個重量個數字係幾多，
但形容係我單手做，
用手肘放係大腿借力，
做四下已經唔夠力要換手。


下半場大反擊，
結果一下都唔駛做，
呵呵呵
（不過我發覺好似計錯數……）


今日只係打四圈，
已經有兩鋪十三么自摸。
（不過唔係我）
我都食過自摸大對對。


返到屋企波都冇睇就訓覺，
因為明天仲要返工。

>>June 21, 2004 at 5:28:49 AM GMT+8

2004 年 6 月 16 日 星期三 【酷熱】

都好耐冇睇戲，
見有幾套戲想睇，
今晚又冇野做，
所以一個人走去鑽石山睇戲。


有兩套戲想睇，
兩套都係唐片。
一套係警匪片，
想睇既最主要原因，
係因為有部份既取景係我屋企附近，
我想睇下電影拍下既會係點。
另一個原因，
就係我都幾鍾意睇警匪片。


另一套戲，
則係一套則係一套笑戲，
睇佢純綷為左笑吓，輕鬆下。
問左某人意見，
決定睇呢套。


放工去到鑽石山已經七點，
先上去買左飛先。
買完飛就周圍行吓，
睇下食咩好。
結果繞了幾個圈之後，
去了戲院隔離食雞。
叫了個雞腿包餐，
其實主要因為有食格格脆薯塊。


自細都鍾意食薯仔，
不過細細個讓家姐，
飲餐湯都係我食紅蘿蔔，
家姐食薯仔。


叫完個餐返黎，
先知個包係辣既。
雖然醫生叫我唔好食辣野，
不過食埋今餐先算。

>>June 18, 2004 at 4:03:15 AM GMT+8

2004 年 6 月 15 日 星期二 【酷熱】

尋日說的是一個數字，
巧合的是今天的日記和英文字母有關，
又或者可以說是和數字有關，
因為這些英文字母，
是可以和數字換算的。


我等三個英文字母，
或說成三個數字，
已經等了很久。
這三個字母，
最近開始陸續爆光，
估不到一個不比一個差。
今日終於看到最後一個
原本以為不十分好，
卻有意外驚喜呢！


兩年前用的時間心機，
比兩年後的多很多倍。
但看看結果，
似乎現在的果效比以前還好。
這說明甚麼呢？
有點入天仙局的感覺……


昨日說的數字故事，
某人想也不用想已經知道答案。
今日的字母故事，
料不到考起了某人，
他是真的估不到，
還是扮估不到，
從而令我開心呢？

2004 年 6 月 14 日 星期一 【酷熱】

今天總算完成了使用手冊的寫作，
下一步將會是現有產品的測試，
或是新產品的研發。


公事上的忙碌，緊張得以暫時舒緩，
部份精力可以放回其他事務。
包括身體、體能上的鍛鍊；
幫總會開發的教練系統；
日文上的溫習；
碩士課程的專題研習；
攝影；
定向比賽的賽程設計等等……


但看到某人最近很忙碌似的，
不禁有少許的心痛。


話分兩頭，
在昨天交功課時，
得知一個每個月都會影響我的數字將會再改變。
改變後的數字大小還不清楚，
但據聞數字是正增長。
而且也不是即時生效，
而是向後追溯到本年四月。
今次的改變，
好壞參半。


喜的是終「守得雲開」，
悲的是責任大了，
內疚感也大了。


這個數字的變化，
絕不能隨便讓人知，
尤其是媽媽。

2004 年 6 月 13 日 星期日 【晴】

昨日朝早發現左某君既秘密，
一路都考慮好唔好告發佢。
本來都唔係咁易發覺，
我專登找過都找不到。
但係估唔到今朝佢稍一不慎，
讓我發現了……


白天去了教練研討會，
返黎之後已經發現佢堵塞了漏洞。
之後我就去了做 Gym。
今次又有新野玩，
學用 Free Weight 做 Barbell Squat。
不過用了很多時間去學習正確的姿勢。
大部份時間都係冇加鐵餅既。
之後做到正確姿勢後，
兩邊各加了一塊 10 磅的鐵餅做。
之後用單腳做 Leg Press，
兩隻腳各做三組。
我才加了操二頭肌，
之後沖涼返屋企。


返到屋企，
我發覺漏洞堵塞只係一時假像，
不過我都未決定到點做。
睇完 Good Luck之後就小休一會，
之後兩點幾起身睇波，
歐洲國家杯分組賽既法國對英國。
呢場波真係峰迴路轉，
睇完波之後我就再訓過，
不過見某人好似仲未起身。


講返轉頭，
昨晚套 Good Luck 畀了我很大既反思空間，
究竟呢份係職業定係工作呢（Career or Job）？
究竟我應該點樣待我份佢呢？
以呢行為終？
定抑或係……

>>June 14, 2004 at 5:03:40 AM GMT+8

2004 年 6 月 12 日 星期六 【晴】

昨日下午踢完波，
先返屋企沖個涼，
再坐車入西貢。
一路返屋企既時候，
個肚都好唔舒服，
我估計係飲水飲得太多，
結果亦埋下今晚既伏線……


由屋企入西貢，
最快既方法應該係去旺角坐紅 Van 直入西貢。
不過當我去到登打士街既時候，
我見到排緊隊既至少有五、六十人，
仲要係一架 Van 仔都冇。
唯有轉 Second Plan 啦，
就係坐地鐵去彩虹轉綠 Van。
我約左班同事六點鐘等，
但係我去到油麻地地鐵站都已經五點九，
當時可以肯定既就係一定會遲到，
結果就六點三先到。


其實本來係 Join 團，
係尖沙咀上船既。
但係因為人多，
我地有成十三人，
結果就自己租船，
要係西貢上船。


架船一出海我地就開餐，
食 Pizza Hut，
我雖然食左暈浪丸，
但都好唔舒服，
只係食左三塊 Pizza。


之後開始釣墨魚，
我一條都釣唔到 ><
後來走了出船頭釣，
入面就開了爐黎煮墨魚。
唔食尤自可，
我一放入口，
咬了兩下已經想嘔。
結果真係嘔左出黎。
返到上岸，
佢地有 d 去食糖，
有 d 去飲酒，
但係我好唔舒服，
兩邊都冇去到。


坐小巴出到旺角，
之後行返屋企，
仲有五分鐘返到屋企，
都要嘔多次 ><


呢排炒炒真係忌水 ><

>>June 14, 2004 at 3:59:20 AM GMT+8

2004 年 6 月 11 日 星期五 【晴】

今日中午放工之後，
坐隧巴過海去維園，
因為紐版係那兒有踢波活動。
第一場我係白衫隊，
司職中場位置，
不過有時打前鋒那個打後左，
我就壓前左打前鋒。
一開始有氣有力，
可以係咁走位，
隊友都放左唔少直線我走，
不過我對快速運行中的波控制麻麻，
出波出得唔靚。
尤其是 d 快速反擊，
一個要對幾個，
過得第一個，
未必過到第二個，
就算過到第二個，
都過唔到第三個。


有一球右邊 cup 入中間過一個，
入禁區後地波傳入中間，
不過畀人解圍。


另外一球係左邊，
左扣右扣避過三個入禁區，
不過都係冇位起腳，
要傳番出黎。


又有一次打反擊，
得我一個人。
過左第一個，
係對方後衛剷到埋黎之前起腳，
地波左面死角，
不過畀籠門救到。


好彩後尾都入左球，
籠門剷了個波出黎，
被我截到，
之後左腳掛網。


小休過後打第二場，
今次係深色衫隊，
司職前鋒，
不過被對手入了幾球之後，
我愈打愈後，
最尾變打了中堅。


第三場開始之前我就走了，
因要趕下場，
入西貢釣墨魚。
詳情明天再講……

>>June 14, 2004 at 3:27:59 AM GMT+8

2004 年 6 月 10 日 星期四 【晴】

之前兩日都要七點起身，
今日訓到八點。
起身時兩腿仍然好疲倦，
返而背肌就冇乜事。


昨晚去左做 Gym，
做左三個背肌既動作，
三個胸肌既動作。
個教練話好開心，
因為見到我做既動作有 80-90%都係姿勢正確，
間唔中一個半個動作出錯，
係可以接受既事。


不過做胸肌個動作係好困難，
要縮膞、夾背、之後夾胸。
現階段仲未可以 Handle 得好好，
不過我想信係不久既將來，
我可以 Train 得好好。


上完堂，
帶番心跳錶同心跳帶，
走左去跑步機跑步。
好耐冇係跑步機跑，
今日只係少少地跑三十分鐘，
跑左 5.47 公理，
比目標少了一點。

2004 年 6 月 9 日 星期三 【晴】

除了體能之外，
說話的藝術亦要多多訓練。
大同們星期六去睇馬戲，
咁因為我一早約左班同事去釣墨魚，
所以去唔到。
但係我又有兩張捐款收據要畀佢地 wor，
結果早幾日托個大同幫我轉交。
約左七點九等，
點知個大同七點半就打畀我話到左。
我就七點八先去到，
去到同佢講左句：
「你咁早到既？」
原本既意思只係想講：
「你咁早到既？（攪到我好似遲到 tim）」
點知人地就聽左另外一個意思……
「你咁早到既？（你平時成日都遲 wor）」

2004 年 6 月 8 日 星期二 【酷熱】

今朝返工嚇親同事，
話說去到大堂，
唯一既一架客 Lift 滿左，
剛剛我同事入左去之後，
我就入唔到喇。
如果等架 Lift 上到十三樓再落番黎地下，
我想要等好耐，
所以我決定行樓梯。
其實都唔可以叫行既，
因為頭半段我係跑上去。
跑到六、七樓左右，
開始冇氣，
改跑為步行。
上到十三樓，
架 Lift 剛上到十二樓，
我快過我 d 同事少少。


不過我記得上次跑樓梯，
係可以一口氣跑到八樓既，
現在好明顯係體能弱左啦…… ><


夜晚係九龍公園 Training，
跑三個大圈，
第一個都仲做到九分半，
第二、三個已經要十一分半了…… ><
體力的分配都需要很大的改善。
係我既組別，
野外定向一條 Course 既長度大約就係三個大圈，
因我以今晚既速度，
肯定睇唔到圖。
如果係真係比賽，
我想我現在至少都要個半鐘先完成度，
大約得 610 分，
太低了…… ><


Training 既密度被早幾個月低了。
早幾個月因為有比賽，
加上去親 Gym 都有跑步，
一個星期都起碼 Train 20k。
但最近做 Gym 由主要練氣變成主要練肌肉，
舉完鐵之後都冇再跑，
結果只係靠星期三既 Team Training，
體能明顯下降了，
豬腩肉亦都走返晒出黎…… ><

>>June 10, 2004 at 4:09:56 AM GMT+8