2004 年 1 月 9 日 星期五 【晴】

好驚，有人兩三日洗既錢，
已經多過我一個月糧，
咁究竟我一個月要搵幾多錢先夠呢？


今日中午放工就落左黃金砌機，
由於早到既關係，
由自己一個人上左去格價先，
格完價都差唔多到約定時間，
就落返地鐵站。
畀某人睇過報價單之後，
就返上去買機。


由於砌機需時，
係下了訂金之後，
我們就去左食野，
賣舊手提電話，逛電腦商場，
我得出一個結論，
就係行電腦商場，
尤其係你想格價時，
最好都係一個人行，
如果唔係就會悶親其他人……


砌機個度話個零鐘攪掂，
我遲左半個鐘去拿機，
去到都仲要等多半個鐘，
佢地 d 效率真係……


之後小弟順手做埋送貨，
參觀左某人屋企，
同某人個 anna 姐傾左一陣，
之後出番市中心食壽司。


食完壽司之後，
去左買蛋糕慶祝乜乜日。
之後漫步回程，
途中對一些問題交換了彼此既看法。
好似今次係第一次咁正經咁討論，
因為問既問題多，範圍又廣，
被人誤會我介意佢以前既事，
其實只不過是我多事八卦之嘛……


其中一個問題既結論，
好驚上一輩既家長門會反對，
不過幾年之後既事，
相信船到橋到自然直……

2004 年 1 月 8 日 星期四 【颳風】

昨晚同今早一共收到兩封來自科大的電郵，
對某些人來說，
當中的內容可能是好消息。
但站在我的角度來看，
不單不是好消息，
甚至是壞消息。


昨晚約晚上七時，
我收到第一封電郵。
信中內容提及到我報的課程可以申請政府的持續進修基金。
持續進修基金要求申請人於課程開始前申請，
逾期遞交的申請概不受理。
但若就讀的是一個單元制課程，
則仍可在下一個單元開課前作出申請。
最高可獲有關課程學費的 80% 或 1萬元，
以數額較小者為準。
但由於我先前已經透過公司申請中小企培訓基金，
我不可能再獲持續進修基金的資助，
所以第一封電郵對我來說是沒有意思的。


第二封電郵是今早十一時二十八分收到的，
內容是第三學期的上課時間表已經編排好了。
上課日期由零四年二月二日開始，
至同年五月十五日。
每逢星期一晚上七時至九時五十分，
上「無線通訊系統（Wireless Communication Systems）」的課。
逢星期二晚上七時至九時五十分，
上「寬頻通訊網絡（Broadband Communication Networks）」的課。
有課程被編排在星期二上，
對我來說是一個惡夢，
因為逢星期二晚上我本來是要學日文的。
現在正考慮應否不上大學的課而主攻日文，
還是自修日文，
以上大學的課為前提。
除此以外還有兩個選擇，
第一個是將日文改到其他日子上，
不過可能要轉老師，
一起上課的同學也不同了，
不知可否適應。
第二個選擇是一個星期上日文，
一個星期上大學，
但是卻有可能大學的課堂不明，
日文的內容也不明瞭。


懇請代禱，
求神給予我聰明智慧，
可以下正確的決定。

2004 年 1 月 7 日 星期三 【微冷】

返到熟識既地方練跑，
但見到的不是熟識既人，
以前練開跑的隊友，
有部份人還在，
有部份人不見，
不知是放棄出席，
還是因事務繁忙而請假。
驚喜地，有新成員加入，
不過不知會唔會保持得耐呢？
不知多久冇有新成員加入了，
以前都試過久唔久有，
但係跑一兩就唔見左人，
或者下期計劃已經沒有報。
真正練跑又參加比賽的，
真是少之又少。
我們時常都驚因為不夠報名人數，
而要取消這個集訓計劃。
我們曾經試過以一堆假名，
以求填夠數……


今天的訓練是 Y 形變速跑，
將一個約一公里長既圈分成四段，
以一段快，一段慢，
兩段快，一段慢，
三段快，一段慢，
四段快，一段慢，
三段快，一段慢，
二段快，一段慢，
一段快，一段慢既次序跑。
總數係十六段快跑，七段慢，
約六個圈。
原本要求係三十分鐘完作，
結果我用了四十分鐘。
但我相信我有進步，
因為以前我係慢既時候係非常慢，
快既時候亦都係慢，
但係今次雖然我慢既時候亦然係非常慢，
但係快既時候真係快左 d 。
唔知幾時可以慢既時候係非常快，
快既時候係非常快呢？


今天原本帶晒野做 Gym，
但係因為疲倦，
結果還是不去，
呢幾個月白蝕畀間 Gym House……

2004 年 1 月 6 日 星期二 【晴】

話說某人做左某間屋既室內設師，
畫左一大輪圖之後，
又話間屋唔足秤，
又話間房細，
得幾十尺，又短 wor，
擺唔到床，只可以放梳化床，
放左梳化床又放唔到櫃……

咁我今日就計吓我買唔買到樓啦，
計吓可唔可以買到大少少既樓，
計吓每個月要儲幾多錢，
計吓可唔可以儲到咁多錢。
經過一輪簡單而又不嚴謹既運算之後，
得出既結論係：
「我唔駛旨意買到樓」
哈……哈……哈……

2004 年 1 月 5 日 星期一 【晴】

唔知我係咪已經同世界脫節呢？
我唔係好明現家 d 人既愛情觀，
PG 家長指引既內容就唔講喇，
講吓其他方面。


有人會一個拖幾個，
我唔明點解唔可以一心一意對一個，
有 d 仲要香港一個，
唔知邊個國家又一個。
識到一個仲勁，
香港都幾個，
平安夜都走幾場。
一個拖幾個，
唔累的嗎？
難明……難明……


離離合合，聚聚散散，
身邊都見到唔少，
有 d 拍左幾個月就散，
有 d 拍左幾年都散，
有 d 就散吓拍番又想散，
有 d 就一個想散，一個死咬唔放。
睇報紙有段仲離譜。
無啦啦即興結婚，
訓醒覺就走去攪離婚。
其實咁複雜既野，
我完全唔明，
係咪代表我唔適會有愛情呢？

2004 年 1 月 4 日 星期日 【晴】

又到星期一，再次回歸工作，
預料今日將會是沉悶，
今晚有個唔知係咪驚喜既驚喜，
唔知係乜呢？
既期待又不期待。


成日都想早 d 訓，
但 End up 都要十二點幾一點先訓到，
昨晚臨訓前講左陣電話，
間接得知一個自己曾經好想知既答案，
個答案其實都係推論出黎，
我唔係直接知個答案。
不過都睇化左，
個答案係點已經唔重要，
都係得個知字已而。


講到呷醋同變心問題，
竟然有人唔信我，
我好傷心 lor ><


我可以回應既就係，
除非我突破了自己既價值觀，
又或者我萬念俱灰，
完全死晒心，
我先有機會去搵第二個。
再者，我覺得一腳踏兩船係吃力不討好既事，
基於練精學懶既原因，
我更加唔會試。


我唔知你咁想快 d 返黎既原因，
如果你係唔放心既，
我可以同你講，畀 d 信心我。

如果你係放唔低既，
我覺得除非你覺得唔會維持得長既，
如果唔係成世流流長，
都唔爭在個一個兩月啦，
早 d 讀完，實習完咪仲好。

又或者係真係讀得太辛苦，
想放假 relax 一下。


不過呢個始終係你既決定，
無論決定係點，
我都會支持既。

2004 年 1 月 3 日 星期六 【晴】

今朝返崇拜，
中途由眾坊街跑到去廣華醫院，
可能由於天氣好，
所以跑步個感覺都幾好，
開頭都有 d 擔心會退步，
因為某人返左黎之後，
我都冇練過跑，
現在都安落 d。


好開心有人真係幾個星期都有返崇拜，
不過唔知到去，
仲會唔會 Keep 住返呢？
種子已經撒了，
可唔可以開花結果我就控制唔到。


返完崇拜之後，
有人去左 Second In，
In 完之後我就去左踢波，
雖然今次係多左人，
不過阿袁生講既名單依然係唔對現既……
今日大家表現都唔係好好，
被人壓住黎打，
係咁失波，
結果都要靠我把握對手兩次犯錯，
入左兩球，之後我仲有助攻 tim。


返到屋企，收到個幾嚇人既消息，
原來某某人已經試過全壘打，
（用得某某人，當然唔同用開既某人啦）
曾幾何時，我都有打全壘打既念頭，
但係自己守舊既價值觀又有衝突 wor，
曾經有機會失守，
但係幸好一係周圍環境，
一係自己阻止了自己，
可能真係七八年後先會發生。

2004 年 1 月 2 日 星期五 【晴】

今日發覺公司仲有其他同事傷風，
經研究過之後，
發覺罪魁禍首係公司冷氣太勁，
我仲要坐係風口位……


做做吓野既時候收到份文件，
原來係公司份糧單，
被人扣人工呀，好慘呀！ ><
公司仲要衰到死，
將之前個幾個月出多左既扣番……><
不過諗深一層，
之前其實我係收高左，
現家只係回復原狀，
但係數字下調，
點都有 d唔開心。


中午收工之後，
先去　Pizza Hut 食野，
試左 d 新口味，
唔可以話佢難食，
但係唔好食 lor，
d 味好怪……


之後又去添馬艦既冬日嘉年華，
冇錯，係又去，
今個冬日我已經係第三次去，
不過今次去個 feel 唔係咁好，
個場好冷清，
唔知係因為 d 人之前已經去晒，
定係時間尚早，
個場好少人，攪到我都冇心情玩，
好彩仲可以 Enjoy 「行」既過程。


最驚既就係，
事後睇某人日記，
佢又係去左冬日嘉年華，
又係去左 Pizza Hut，
不過佢就係去完冬日嘉年華先去 Pizza Hut，
我地咁都撞唔到……


夜晚入左沙田燒野食，
奇蹟地冇落雨……

2004 年 1 月 1 日 星期四 【颳風】

昨日有得睇叱吒，
返到屋企訓得到都成兩點，
今朝又要一早起身返工，
當然，我係唔知醒既……
（殊…唔好咁大聲……）


返到公司烏吓烏吓咁，
但係都寫 Program 寫到天昏地暗。
約莫寫到六點左右，
雖然仲有少少 bug，
但因為約左人既關係，
所以我都開始執野。

就係呢個時間，
我收到一個電話，
有人坐車訓到唔知醒，
坐車坐左唔知去邊。
唉，佢遲 d 一個人過到那邊，
有 d 擔心 tim。
臨走想同上司交代進度，
但係佢又同第二個傾緊，
我唯有等吓先啦。
（難為左某人等我咁耐……）


跟住坐車去都會商場食野，
原本想去 Country Road 食野，
去到發覺係自助餐，
如果持演唱會飛仲有九折優惠，
又有 live 音樂聽。
原本都有少少心動，
但睇下時間好似得半個鐘多 d 食，
加上個 waiter 講左一句，
我即刻打消念頭。
佢講咩？
佢話有 d 睇演唱會既人，
七點四十五分都會入去食。
嘩！唔係掛，演唱會八時正開始，
由那兒行去紅館十五分鐘都剛剛夠，點食？

最後去左仙"�林食鍋仔飯，
基本上都幾好食，
美中不足係我冇雞扒食，
仲要飲熱既朱古力珍珠。


睇完 concert，
係沙田坐車返屋企，
呢頭話完人唔知醒落車，
今次到我老貓燒鬚，
坐多左兩個站去左尖沙咀，
嗚嗚嗚嗚，我唔制呀 ><

2003 年 12 月 31 日 星期三 【乍雨乍晴】

昨天睇戲之前之後，
都去左打機。
好耐冇試過去大場打機，
尤其係有 Para Para機既大場。

發現既第一件係，
政府放寬了牌照，
機鋪可以合法營業到兩點。

其次係機鋪有日租 locker。
「營業到兩點」係旺角都見過，
日租 locker就真係第一次見，
唔知係咪全港獨家呢？

另外，同以前一樣，
係有一班人一齊玩兩部 Para Para機，
即係有兩個人入左錢玩，
而後面就有一大班人跟住跳……