2004 年 4 月 8 日 星期四 【晴】

昨晚通頂，
差不多今朝六點先訓。
因為出左去打邊爐，
其實係因為打邊爐那處有波睇。

話說足協盃八強賽係紐卡素對 PSV，
有線冇得播，
得 Now 有得播。
雖然我係用 Netvigator 寬頻，
但係就冇裝 Now。
屋企冇得睇，
自然就睇吓出面有冇地方有得睇。
好好彩找到一間食店有得睇，
58 蚊任食打邊爐，
埋單一人 70蚊。

有得打邊爐之餘，
仲有韓燒。
雖然 d 野食唔係好得，
不過醉翁之意不在酒，
我都係為睇波而已。

六點返到屋企，
一訓就訓到十二點幾。
食左個麵，
通知左某人我今日係放假之後，
就繼續過我頹廢既一日。
咁就冇左一日喇……

2004 年 4 月 7 日 星期三 【晴】

上個月十三號，
我去左洗牙。
但係因為有少少牙肉腫，
覆蓋住部份牙石，
所以未能夠 100% 清潔。
咁醫生就開左 d 藥畀我，
叫我兩個星期後去覆診。

一直都抽唔到時間，
上個星期約過一次，
不過輪到醫生那邊唔方便。
結果就到昨晚先再去睇牙醫。

六點九我就去到，
不過有第二個病人睇緊，
等到六點十先到我。

今次同上次唔同，
今次係清理近牙根位置既牙石。
好痛，好痛，真係好痛！
雖然醫生一早已經講左話會赤赤痛，
但係比想像中更加痛！
佢一路幫我洗牙，
我一路標汗，
係成件衫濕晒個隻。
我自己都覺得驚呀 ><

洗牙既痛只係開始，
洗完牙之後先甘。
d 牙成晚都痛，
尤其是食飯同飲水個時，
好痛！唔制呀 ><

2004 年 4 月 6 日 星期二 【晴】

我好唔鍾意人不問自取，
偏偏有人成日都係咁。
唔單止咁，
仲要聲大夾惡，
惡人先告狀，
我好反感 lor。

講真，
又唔係見我唔到，
又唔係冇我電話。
問我一聲先拿，
都唔係好阻你時間姐。
況且開到聲，
有幾可我會托手"{丫？
結果未又係借……

2004 年 4 月 5 日 星期一 【晴】

我好冇記性，
一 d 唔開心既野，
我好快會唔記得。
但係如果我寫低係日記，
就會成日 Remind 我呢件唔開心既事……

有人話我衝動，脾氣差，
我自己亦都好清楚。
尤其是如果我被人屈，
更會爆發得更激烈。
一般情況我會平心靜講一次，講兩次。
但係再落我就火都黎。

話說醫院現在仲係黃色警報，
即係話每個病人每日只可以有兩個人探佢。
咁我昨晚去到醫院時，
護士同我講話已經有兩個人入左去，
我唔入得。
咁我就好無奈咁返屋企，
途中經過超級市場，
順手買 d 零食同早餐。
返到屋企之後，
打算等埋媽媽返黎先食晚飯。
點知等呀，
等到十點佢先返黎，
仲話佢唔係屋企食。
咁結果我白等一場，
咁都冇乜所謂，
因為都係我一廂情願等。
但係佢之後個句真係頂心頂肺，
佢問我仲乜得閒去超級市場，
都唔去醫院探爸爸。

現在唔係我唔想去，
而係佢帶左佢個 Friend 入去，
爆左 Quota 所以我唔入得去。
咁又入埋我數 ><

2004 年 4 月 4 日 星期日 【颳風】

二零零四年四月四日，
天氣情朗，但濕度高。
今天既是兒童節、是清明節，
也是 04/05 賽季的最後一場聯賽舉行的日子。

今年有很多新嘗試，
有第三場時的中距離賽，
也有今場的短途賽。
今次共有四條賽程：
男成、男青、女成、女青。
最長的一條賽程，
距離也只是 2.4 公里。
因為賽程的關係，
可以想像得到，
只要有一個控制點失位，
就可幾近肯定會輸。

今次賽區是坪洲，
一個位於大嶼山旁的離島，
由中環港內線碼頭乘坐普通渡輪需時約 40 分鐘。
由於適逢清明節，
乘搭渡輪往坪洲掃墓人士衆多，
有部份賽員因此而遲到，
有賽員更不幸因交通問題而遲到近半小時……

由坪洲碼頭一下船，
見到的第一條橫額，
不是定向總會的，
而是本會 SOC 的。
劉教練在坪洲擁有一間房子，
更巧合的是，
房子坐向正正對著碼頭和賽事中心。
順理成章，我們在該房子就寢，
並掛起橫額，
以收先聲奪人之效。
但因為房子位於賽員禁區，
而由上午 6 時至下午 2 時，
賽員不能在比賽期間外未得賽會同意進入賽員禁區，
所以我們比賽日早上五時四十五分已到了賽事中心，
足足比賽事工作人員早到了一小時。

說回比賽，
地圖的比例為 1:2500，
圖例採用短途定向比賽地圖圖例。
因為比例不同了，
原本距離判斷差的我，
表現更慘不忍睹。
由起點去 1 號控制點，
已浪費了將近 3 分鐘，
原因是距離判斷錯誤，
加上沒有信心。

整個賽程，
因距離判斷錯誤而失位的情況屢見不鮮，
但因有使用「沿途搜集特徵」這技術，
所以很快可以修正，
錯誤不足以致命。
致命的錯誤是看見控制點，
以為不是自己要找的那個，
沒有核對編號就離去，
結果繞了幾個圈，
才驚覺自己已經錯過了。
正是：
「眾裏尋它千百度，暮然回首，那 Point 卻在燈火闌珊處」

回到終點，
時間是 19 分 56 秒，
位列第十七位。
同組最快需時 13 分 56 秒，
同賽程最快更只需 10 分 50 秒！

比賽完結之後，
我們再試跑賽程一次，
我只在控制點範圍看圖，
其餘時間作「地圖記憶（Map Memory）」，
需時約 11 分。

值得一提的是今次有一條特別的規例，
就是賽區內設有步行區。
步行區是一條狹窄街道，
兩旁店舖林立，
途人眾多。
若在步行區內奔跑，
會被取消資格。
今次一共有五名賽員被取消資格，
當中有男有女，
有精英運動員，
也有組別冠軍。
其中有賽員不忿被定性為奔跑，
上書投訴，但結果被裁判團駁回。
我覺得某程度上裁判團判斷正確，
因為在沒有第三者的證供的情況下，
賽會絕對有理由相信工作人員的回報。

另外要批評賽會的是，
賽會沒有嚴格執行規例。
包括賽員進入賽事中心旁的賽員禁區後，
沒有被取消資格。
沒有攜帶哨子，
卻獲准出發。
賽員遲到，
但成績卻沒有計算遲到的時間。
我認為既然白紙黑字寫下的規則，
就應嚴格執行，
絕不能有優待。

>>April 6, 2004 at 3:39:49 AM GMT+8

2004 年 4 月 3 日 星期六 【颳風】

因為阿 C 生日，
（其實已經過左）
昨日下午我地出左黎慶祝。
小弟有幸參加上半部。

話說約了三點係奧海等，
之後去打保齡球。
根據以往經驗，
總會有人遲到。
雖然今次大部份人都準時，
但係結果都要四點先有得打。

點解？
咪就係冇人拿籌 lor。
個個都以為去到即刻有得打，
結果我地就等左成個鐘先有得打。

我地八個人，
頭幾 Round 我都係包艇，
甚至係三 Round 後都只係得個位數字。
之後開始急起直追，
中後段連打兩個全中。
可惜因為頭段失分太多，
結困只係得第三，
埋單九十幾分。

之後佢地去睇波，
而我就要返屋企會合媽媽去醫院探爸爸。

2004 年 4 月 2 日 星期五 【晴】

昨晚去左沙田睇演奏會（Recital），
點解冇啦啦咁神心睇演奏會？
原因就係其中一個表演者係我中學同學。

係演奏會中，
佢係表演 Percussion，
包括木片琴、銅片琴，
其實我都仲未分得出兩者既分別，
只係見佢有兩 Set 係度，
估佢係兩種都有。
除此之外，
還有 Dumps set 等等。

我唔係 d 咩音樂評論家，
唔識評個音樂會如何如何。
但係作為一個觀眾，
我覺得 d 音樂好好聽，
尤其係 Jazz。

2004 年 4 月 1 日 星期四 【晴】

多謝大家的關心，
出事入院的唔係我，
而係我爸爸。

話說說四月一日凌晨兩點，
我剛睡著冇耐，
就讓媽媽叫醒。

原來爸爸在廁所門口跌倒，
全身標晒冷汗，
我地即刻打 999 叫十字車黎。
（都怪我警覺性低，
我明明聽到聲，
如果我識得出黎睇睇……）

送到伊利沙伯急症室，
即刻推入急救房（Resuscitation Room）。
等了好耐，幾個醫生入過去，
之後出黎話懷疑係內出血，
推左上去照內窺鏡（Endoscop）。

又等成個鐘，
醫生出黎話出血情形好嚴重，
用內窺鏡止唔到血，
要即刻開刀，
仲話係大手術。

個手術一做就四個鐘，
醫生話情況比想像中嚴重。
係迫於無奈之下，
切除了半個胃，
將條腸駁上去。
手術算成功，
但係仲需要觀察一段時間，
因為驚有拼發症。
早上八時幾推上深切治療病房（Intensive Care Unit）。

十一點幾已經醒左，
但係話仲有手尾跟。
醫生話佢右邊個肺凹左小小，
個幾日可能要切少少組織去化驗。

希望冇事啦，
懇請各位代禱，謝

>>April 2, 2004 at 10:08:25 AM GMT+8

2004 年 3 月 31 日 星期三 【晴】

學日文那兒，
每學期都有一次補課的機會。
若因事缺課，
就可利用這個機會補回。
因為我星期二去了考 Mid-term，
沒有上日文，
所以昨晚申請了補課。
地點不是平時的佐敦校，
而是旺角分校。

唔同既班別，
雖然程度一樣，
但係風格完全唔同。
旺角呢班 d 人遲到得好勁，
原本八時開始既課，
到八時十分先見到老師，
而當時全個班房計埋我都只有兩個學生！

教學手法都唔同，
旺角班係會預先派 notes 畀同學預習，
第二個星期先教。
而且文法部份係照書講。

佐敦班就冇預習呢回事，
而且上堂要抄 notes，
因為教文法時會有很多例句。

旺角班個老師好似教仔咁，
成日都話：「乖……」

總括而言，
兩個老師各有優劣。
但係如果讓我選的話，
我都係鍾意佐敦班個老師多 d。

2004 年 3 月 30 日 星期二 【晴】

昨晚都連趕幾場，

首先 19:00 ~ 21:00 科大考 Mid-Term。

之後坐車出佐敦，
係七仔食完我個晚餐（珍珠點心拼盤），
就上左日文學校。
等放學拿功課。
點知畀個同學仔見到我，
話左畀老師聽。
老師就捉左我入課室上堂，
聽個幾分鐘，
完全唔知頭唔知路。

22:00 過後，
再坐地鐵出旺角。
中同 M 君好奇怪點解我唔係返屋企，
咁我叫佢估啦，
結果佢估左成三十幾次先估得中。

我去旺角做咩？
咪去做 Gym lor，
上個星期轉左會，
今日咪入去做吓 lor。
畀左咁多錢（真係好多…><）
冇理由浪費架。

同舊會相比，
雙方各有好有唔好。
新會地方比較大；
儀器種類較多，
練同一組肌肉都有幾部唔同既器械；
而且排列較有系統，
例如練腳既放係一堆，
練手既放係另一堆；
營業時間長 d。
（舊會朝七晚十一，新會朝六晚十二）

但係新會個 Changing Room 就比較迫；
Lockers 比較細；
電視無聲聽；
（舊會可以用 FM 收音機聽電視既聲音）
冇拖鞋，要自己帶；
冇得打 Golf、乒乓球、籃球等；
冇雜誌睇。

因為碌卡 Pre-paid 左一筆會費，
原本想一次過找晒 d 卡數，
因為唔想欠錢。
但係咁會一次過渣乾我手頭既現金，
咁會比較危險。
結果都係申請分期，
要畀四百幾手續費…><
如果昨日張支票兌現，
或者我會考慮一次過攪惦佢。
今朝申請完分期之後，
先發覺中計，
因為信用額會 Hold 起左，
結果我信用額得番零元，
但係過幾日 d 上網呀，
手提電話呀等月費就會過數，
咁點算呢？
唔想喇，
我都 control 唔到，
擔心黎都冇用，
唯有下次醒目 d……

>>March 31, 2004 at 4:46:00 AM GMT+8