2004 年 7 月 7 日 星期三 【綿綿細雨】

框架

「框架」可以算是一把雙面刃，
應用得好時，
可以事半功倍，
防止走歪了路。
但也有可能反傷了自己。


有一位中學師弟，
我和他本身並不認識的，
只是在學校的網上 Forum 有數面之緣。


他和學校的一位老師交惡，
原因是那老師用了一些侮辱性的詞語。
自此這位師弟就用了一個框框去看事物，
完全否定了這位老師，
甚至當時力撐這位老師的前副校長的所有。
包括教學法、做人態度、升職資格等。
亦因為有這個框框，
侷限了他的視野，
說話愈來愈偏激。


話說最近母校有十數老師將辭職，
其中包括這位老師。
這位同學就在 Forum 大事抨激這位老師，
說這老師一走，
學校將脫若海云云。


這老師的課，
我有上過。
同一科目，
其他老師的課，
我也上過。
每個老師的教學法不盡相同。
有的著重欣賞，
有的著重理論，
有的著重實踐，
各有優劣，
我看不出到了完全否定的地步。
我相信因為這個框框，
這位同學才有這樣的言論。


若然久不久可以抽身而出，
以宏觀的角度看事物，
說不定可以更海闊天空呢？


互勉之。

>>July 9, 2004 at 2:12:26 AM GMT+8

2004 年 7 月 6 日 星期二 【酷熱】

昨晚媽媽買左碗勁辣米線返黎，
而經沒有放湯，
都辣到會跳舞。
我只係食一啖，
已經成頭標晒汗。
結果用水沖過 d 米線，
再自己開湯，
先勉強入到口，
阿媽今次真係大整蠱。


昨日爸爸去覆診，
返黎既時候，
撞正有人派包裹。
爸爸怪我仲乜有包裹送黎都唔預先話佢知，
咁我點知幾時到 wor。
送包裹黎個人好攪笑，
咁我唔係家，
爸爸問可唔可以代收，
個人問爸爸有冇身份證，
跟住又問佢係咪我阿哥！
但係最後都係有 check 身份證，
簽收左就算。


咁昨晚食完米線，
就拆箱影相留証據啦。
一拆就好驚，
覺得好似個肚多左條蟲咁。
被人搶先一步買左我想買既野……


另一方面，
又有兩大盒「維他命丸」！
（真係好似架！）
套用廣告話齋，
「我唔會試架」
（想食死我咩，咁多？ -_-"）
食半年都未必食得晒。
究竟我肥死先，
定有註牙蛀牙先呢？


今晚跑步有新杉穿，
件杉咁輕（佢自稱 Ultralight wor），
會唔會跑得快 d 呢？
^_^

>>July 7, 2004 at 3:35:12 AM GMT+8

2004 年 7 月 5 日 星期一 【晴】

今朝一早就收到總會個 E-mail，
話個賽事控制員及賽事負責人訓練班收左我。
換句話說，
我要問人借手提電腦上堂，
一借就借個半月，
仲要係部新既手提電腦
真係唔係幾好意思。
唔借又唔得，
借左又唔好意思，
我都唔知點講……


今晚臨放工，
老細打內線黎問我 Lab 部電腦多唔多用，
因為明天有新同事黎，
想畀部電腦佢可以 check E-mail。
咁我就順手做埋個 Demo 畀佢睇，
一攪就攪到七點，
返到屋企都已經七點半，
係咁易扒兩啖飯就要趕住出去上堂。


今日上堂老師問問題，
用意向形動詞作句。
唔知點解，
第一個又係叫中我，
老師話係習慣 wor……

我求其作左句
だいがくへこよう。
（一齊回大學丫）
老師跟住問我：
「間大學有咩特別？」
我當堂冇聲出……

2004 年 7 月 4 日 星期日 【乍寒還暖】

今日本來約左人睇蜘蛛俠 2，
點知有人六點鐘話我知，
佢冇眼鏡所唔去睇。

雖然一早都有心理準備，
不過知道事實時，
亦由天堂跌落地獄咁。
你地或者會問：
「冇眼鏡唔係一早知既咩？」
其實就係間眼鏡鋪誇下海口，
話今日可以趕得起副新眼鏡，
點知結果就係做唔到……


結果我係公司做到七點幾先走，
公司大廈部客 Lift 又壞左，
去貨 Lift 個出口又鎖埋，
結果我要行落三層先搭到貨 Lift 走。
返到屋企都成八點幾。


返到去就激死左。
首先就係有人好八卦咁係我房門外「裝」我，
我問佢仲乜咁八卦，
佢竟然話我係「八公」，
激死第一次。


食完飯，
教媽媽填張英文 Form。
教佢個時，
佢又嘻皮笑臉、冇心裝載。
講完佢又話唔明，
要聽多次，
激死第二次。
本來想幫佢填左佢算，
點知又話唔可以代填，
字跡不對張 Form 唔收。
菲律賓領事館真攪笑，
你理得我係咪代填，
最後個簽名唔係冒簽咪得 lor……

>>July 6, 2004 at 5:29:10 PM GMT+8

2004 年 7 月 3 日 星期六 【雷雨】

昨晚打機打到三點（定四點呢？），
今朝九點幾就起身返崇拜。
今日原來係青少年主日，
有青少年崇拜的人負責帶唱詩，
有電結他、Flute、Bass和 Drum Set 伴奏。
之後有話劇和見証。
死啦，
原來我同青崇班年輕人已經有代溝，
我睇晒佢成個劇，
都唔知佢地想講乜，
甚至連個劇完左我都唔知……


個見証又係咁，
我又係唔係好知佢究竟想講乜。
死啦，
估唔到我已經老喇，
嗚嗚嗚……… ><


跟住証道既時間，
今日既講者係吳宣倫博士，
講題係父母既權柄。
一如以往，
佢講道都係以 Power Point 輔助，
而個 Power Point 係好大量英文，
簡直睇到想死。


崇拜完左之後返左屋企訓，
食完飯之後，
就去左做 Gym，
今日做手同腹。
做既時候好辛苦，
尤其是係做 Drop Set 時，
不過做完之後，
冇上次咁痛。


返到屋企，
就收到過唔係幾好既消息，
不過暫時唔得閒處理，
雖然好擔心，
不過都係要訓覺先，
兩點起身先處理。


話就係咁話，
結果都係 send 左 message 畀某某人探口風，
某某人好似唔係好願講咁，
以「mess up」黎回應我。
一攪就攪左兩粒鐘，
係咁易訓兩粒鐘就彈起身，
發覺件事已經解決左。
趁未開波，
打畀某人睇吓佢點，
順手話畀佢知個消息。
點知又係斷線……><


不過聽到把聲，
都叫安心 d。

2004 年 7 月 2 日 星期五 【乍寒還暖】

今日放左工落左紅磡廣場，
因為聽個領袖講，
紅磡廣場有間賣自家品牌腳架的鋪頭，
較大牌子便宜很多。
咁所以就決定去朝勝一下，
去到搵到第一間，
唔係我想找那間，
Window Shopping 了一會，
再去找原本那間。
找到了後，
係門口睇左幾個形號，
因為唔係急用的關係，
決定下次找埋專業人士黎幫眼。
之後去返之前那間，
問佢有冇單腳腳架袋，
答案一如所料，
係冇既。
看黎都係要依討論區網友的意見，
買個 Snooker 既 que 袋，
又或姐 Golf 桿袋黎用，
唔知會唔會好貴呢。
結果買左個柔光罩，
開頭以為紅磡買會平 d 啦，
點知仲貴過旺角公認貴既鋪頭，
激死我…… ><


去到紅磡，
本來打算去睇返場戲，
（竟然唔醒起去 Gym 間新分店看看）
但係突然下起雨來，
結果要班師回朝。
今個星期 d 戲未睇，
下個星期又有兩套上，
邊夠時間睇呀？


原本約左六點半維波踢波，
但係我訓到八點幾，
結果當然冇去到啦。


十一點幾做完 Gym，
係行返屋企既時候，
做左差唔多兩個月冇做個既野，
可惜網絡唔爭氣……><


期待飛緊黎個樣野。
唔敢問咁多，
希望冇估錯啦。

>>July 5, 2004 at 4:48:24 AM GMT+8

2004 年 7 月 1 日 星期四 【清涼】

昨日坐小巴下山時聽收音機，
知道七一大遊行提早於兩點半出發。
當時望錶都已經三點幾，
歸心似箭，
趕到返屋企都已經三點半。
昨日朝出門口前，
已經拜託爸爸兩點左右替我開了熱水爐，
好讓我返到家可以立即沖涼換衫。
誰料爸爸竟然唔記得，
原因係掛住「賭」！
激死我 ><


沖涼換衫後，
立即拿相機出發去維園。
其實一路都以為今年會少好多人去遊行，
舊年和我一齊去既大同今年都唔去，
得返我一個人。
都想過究竟去唔去好，
我覺得我應該企出黎，
去話畀政府知，
我地究竟想要 d 乜。
呢個政府施政實在太差了，
有人話：「唔係丫，係政府努力下，經濟已經改善啦。」
但係想深一層，
邊個令到經濟差？
現在就好似我捅你十刀，
之後幫你其中一個傷口止血，
然後同你講：「你好返好多喇」
一樣唔合理。
我更害怕的是，
六年又六年，六年又六年，
成為遁環不息的惡夢。


舊年七一去到金鐘轉車站，
人潮係塞滿大半個月台，
等了十班車也末必上到。
今年去到金鐘，
咦？點解好似咁少人既？
列車仲要有位坐，
一路都驚會唔會得返幾萬人呢？


直至去到維園六號足球場，
還是覺得很少人，
但係身後開始愈來愈多人，
真係唔知 d 人係邊度黎。


聽收音機時都幾攪笑，
有聽眾打電話上去，
又係話一路坐地鐵都只見好少人，
但上茶樓飲茶時，
整個酒樓都係一片白海。
（今年大會主題衣著係白色 T-恤）


因為天氣熱的關係，
唔少人不支暈到，
群眾都好自覺立時讓開一條路畀急救人員通過，
而唔係圍埋睇熱"獢A
由此可見香港人質素之高。
成五十萬人上街遊行，
可以如斯和平，
可以如斯節制，
而且秩序井然，
我為身為港人感到驕傲！
好多國家有二、三十萬人上街已經發生暴力衝突了。


沿途有唔少團體為遊行人士打氣，
帶領喊口號等，
係銅鑼灣一條天橋上，
有民主派議員帶口號，
佢講一句，我們跟著喊一句。
其中一句我估係咁（估既原因係佢只係講完上半句已經被人噓）：
「不得普選，誓不罷休」
佢該名議員說完：「不得普選」時，
略位停頓片刻，
已經氣水聲四起！


去到灣仔，
有教會設置了數部水機，
為遊行人士帶來一杯又一杯的清涼的水，
又開放了禮拜堂予遊行人士小休。


今年見到唔少以前未聽過既組織，
例如由中學及大學基督徒組成的「民主補習社」。
喜見年輕一輩不再係死讀書，
有其政治理念。

舊年沒有上到政府總部，
今年決意要一上「朝聖」。
四點到達維園，
七點半先係政府總部下山。
而後坐船過尖沙咀，
返到屋企都已經八點半。
小睡片刻之後，
見證希臘以一球擊敗捷克入決賽。

2004 年 6 月 30 日 星期三 【清涼】

昨晚話早訓話早訓，
結果係阿力度走時都已經十二點半。
上床睡覺時，
荷蘭對葡萄牙都差不多打完上半場。
今朝七點就要起身，
之後坐地鐵去荃灣，
再轉小巴上川龍。


今日訓練地點係白石橋，
係川龍對落既燒烤場等齊人之後，
（未計有兩個人遲到）。
我們就分兩批上山，
第一批就直接上山，
另外有兩個經驗較淺的，
就要做個 Map Walk 先。
山上氣温很高（攝氏 32.6 度），
加上又冇風，
半個鐘之後，
大家已經汗流浹背。
好不容易抵達起點，
大家放下行裝之後立刻出發。
我係第二個出發，
未到第一個 Point 已經追到之前那人。
但係因為大意，
Miss 左一個路口，
一路衝落山，
保守佔浪費了近十分鐘，
重置定位，修正航道。
因為天氣炎熱關係，
末到第二個 Point 我已經開始不支。
一路以緩慢速度前進，
去到第六個 Point，
個人已經暈暈地。
六去七時，
見到有兩個行山人士，
就不自覺跟住佢地，
連佢地行條路唔係我應該行個條都唔知。
上到車路，
先知行錯，
仲要差少少 Out Map。
同阿健修正落返條路，
打完七號 Point，
去八號 Point 時會途經起點，
當時已差不多十二點，
玩了近個半鐘，
只係進行左第一張圖的前半，
知道沒可能限時完成，
同阿健一齊決定放棄了。
陸陸續續有人放棄返來，
最勁那個港隊代表，
都只係玩完第一張圖。
喝過冰凍的飲料，
（托手提冰箱上去的教練真偉大！）
我們分四路下山，
其中三路要負責收 Points。
我和阿棟先上頂，
然後沿山脊落山。
我地竟然係第一批落到亭既，
只後第二批收 Points 既也到了，
反而遲遲未見第三批和直接下山的人。
當時已經兩點半有多，
我因為要趕下場，
所以怱怱換衫回家。

>>July 2, 2004 at 8:54:46 AM GMT+8

2004 年 6 月 29 日 星期二 【清涼】

愈來愈有一個團隊的感覺，
今天終於落實了外套的設計。
將採取最經濟的做法，
在女人街入貨，
找廠商做背部會名及胸前人名的:虷r，
用彩色打印機印胸前的 Logo。
外套款式為簡約設計，
純黑色配而每邊三條由膊頭沿手臂的白間。
整件成本不多於一百元正。


因為明天早上會有野外練習的關係，
今晚的訓練以輕鬆為主。
主菜為持圖跑。
地圖有 88 個控制點，
我們順序去所有 4 的倍數或號碼有 4 的控制點。
總數有 33 個，
跑了約三十分鐘。


訓練甜品為「捉」，
一般而言，
「捉」的運動量比其他訓練為高。
因為其他訓練可調節速度，
但係「捉」的大部份時間都要保持最高速度。
歷來唔少人都在呢個訓練被扯乾，
當然先決條件係認真對待這個「訓練」，
唔好揸灘啦！


食完晚飯之後上了阿力屋企，
打左一陣機。
之後打了四圈，
我再次成為助攻王，
今次要做 38 下掌上壓。
昨天做完 Gym，
三頭肌還隱隱作痛，
真天又來雪上加霜。
慶幸的是，
以前我做唔到十下掌上壓，
現在已可一口氣做三十下。

>>July 2, 2004 at 4:34:24 AM GMT+8

2004 年 6 月 28 日 星期一 【清涼】

上個星期二係端午假期，
唔駛上日文班。
今個星期恢復正常，
要交兩頁紙既功課，
奇怪既係，
好多同學仔都未做晒。
個個星期都要上課既時候，
d 同學反而交得齊，
今次有兩個星期，
反而交唔齊……


今個星期係做複習和練會話，
最攪笑係老師問左我同一條問題兩次，
當然問既文法唔同，
條問題係問個垃圾筒放係邊。
我兩次個答案都一樣，
當我第二次答個垃圾筒係玄關既時候，
老師問：「又係玄關？」
咁我答：「你問同一樣野，我答同一地方，證明我冇講大話」


又一條問題問自動販買機有咩買到，
有人講飲料，
我即刻講食物。
但係老師係都唔畀我地講公仔，
一時話呢 d 唔係公仔，
算係玩具。
一時又話呢 d 係鎖匙扣……


另外有個好消息係政府終於了呢個 Course 係認可持續進修課程，
即係話可以申請政府資助，
但係條件就係要考三級能力試合格。
不過同時有個壞消息，
下學期 MSc 個時間表出左，
都係返星期一和星期二兩天，
即係話又撞堂，
好彩老師有另外一個 Course 教緊，
新一期我可以轉過去，
逢星期六下午上堂。
即係話我唔可以星期六教定向班賺外快，
而且十月有個星期六要請假，
因為個日要做 Project Presentation。


深入想一想，
這是一個多麼奇妙的按排喔！

>>June 30, 2004 at 7:42:24 AM GMT+8