2004 年 6 月 7 日 星期一 【晴】

昨晚好奢侈咁十點幾走去訓，
訓左足足八個鐘。
今朝係好自然咁醒，
完全唔需要電話、鬧鐘或者人肉鬧鐘幫手。
今朝當我醒個一刻，
根據經驗，
我應該係遲到既，
仲要係遲好多。
當我拿拿臨彈起身，
先發覺原來只係七點左右。


今日有好充足既時間刷牙洗面沖涼食早餐。
但係當然有好大既代價啦，
就係我 d 日文功課未做晒。
五張功課紙，
只有其中兩張係做晒既，
另外三張都各有半頁紙未做，
主要係作短文未做。


如果係填充、選擇題個 d 唔難做，
因為始終有 Model Answer。
但係好似作句、短文，
呢 d Open End Question 呢？
有時用返母語答都力有不隸，
更何況係我日文 d 詞彙係少得可憐呢。
例如問你早餐食 d 乜，
舉兩個理由。
當我好努力咁作完，
我發覺例子已經寫左…… ><


夜晚上堂，
老師用日文問問題，
然後叫我地答。
d 問題真係好難答 lor。
例如：
如果去邊度，你會覺得唔舒服？
如果要買飛，可以去邊度買？
如果聽得唔清楚，應該點做？
等等


上完堂，
放棄左做 Gym，
繼續好奢侈咁早睡。

2004 年 6 月 6 日 星期日 【乍寒還暖】

攝影係一種好神奇的野。
將畫面記下來，
到若干年後看返，
可能可以勾起一段段既回憶。
說來慚愧，
去完旅行成半年有多，
d 相都未拿去晒。
原因係未執好。
今日經過觀塘廣場間晒相鋪，
真係有 d 衝動唔執拿去晒。


一路都懶去執相，
但係有 d 又唔執唔得。
開返 d 相睇，
有 d 真係影得好差。
曝光不對，
暗位 d detail show 唔到出黎。
係部機既問題？
定係人既問題？
我相信係後者。


部機有 auto mode，
我相信如果我當佢傻瓜機咁用，
影出黎既相會畀現在好。
但我買呢部機既原因就係唔想只係識用傻瓜機。
我還想買單鏡反光機，
不過看來需要很多時間，
我的技術才可以駕馭呢部機。
再要更多的時間，
才可以駕馭單鏡反光機。
不過以我三分鐘熱度既性格，
可能冇呢一日。


昨晚放相落 Pocket PC 時，
發現左一幅相。
原來有時從唔同角度睇，
都有驚喜 wor。

>>June 8, 2004 at 5:01:40 AM GMT+8

2004 年 6 月 5 日 星期六 【晴】

今日下午去左奧海城，
因為電視台係那度有 Function，
我地一班攝影版既版友，
就組團去影明星。
個 Function 兩點半開始，
我點半到達，
已經有很多人排隊入去坐。
不過我地呢 d 梗係企外圍影啦。
不過 d 人好鍾意攝位，
明明我地霸左位，開晒梯，
d 人都要迫入黎。
例如有個婆婆，
帶住個孫迫入我地三個人中間。
又有個細路係我地腳同腳之間閃入黎，
仲要企係我地 d 梯上面。
我地又唔好意思話佢地 wor。
最攪笑係個細路個頭撞到我部相機，
我都未話佢，
佢竟然擰轉頭仇視我……


個 Function 遲左少少開始，
同現場觀眾玩左三個項目，
包括乒乓波、划艇和射籠門。
之後就完場，
我影只左廿張相左右。


原來之後仲有個 Function，
今次係英文台既節目巡禮。
一樣係有現場觀眾排隊，
但今次 d 人就好唔守規則。
係咁逼入黎，
有 d 似早前澳門新賭場開幕咁，
當然係小形 d 啦。
我覺得好羞恥 lor，
咁大個人連排隊都唔識……

2004 年 6 月 4 日 星期五 【晴】

原本媽媽話佢負責約醫生，
咁我見佢呢幾日冇講，
以為唔駛睇住。
點知今朝佢打黎畀我，
問我係咪睇。
咁我見冇咩特別野做，
咪話去 lor。


但係問番媽媽，
佢話冇 make appointment，
原因係佢打上醫務所，
個姑娘話有好多人，
今日唔可以預約。
咁媽媽話唔好理，
照衝上去，
唔信上到去佢唔睇咁話 wor。


約左媽媽四點半係嘉賓大厦門口等，
結果媽媽到都成四點九。
上到去得個小貓三四隻，
並唔係姑娘今朝所講既好多人。
個姑娘仲問我點解唔預約先，
叫我下次記住早半日預約。
我都唔知點應佢好……


見完醫生，
媽媽放下心頭大石。
原本佢驚我患皮膚癌，
不過醫生話唔係，
係好小事而已。


之後同四虎去左打籃球，
我地四個都好耐冇打籃球。
射極都唔入，
包括籃底同走籃，
結果被人大炒……><


夜晚去左食齋，
現在 d 齋不論外形同口感，
做到同真既肉好似。
我以前聽過 d 傳言，
d 齋畀真既肉汁浸過，
不過我相信唔係啦。


食完晚飯，
佢地打麻雀，
但因為我唔賭錢，
結果就唯有係後面睇。

>>June 6, 2004 at 3:54:08 PM GMT+8

2004 年 6 月 3 日 星期四 【酷熱】

有三位親戚由廣洲黎左香港旅遊，
原本佢地係係佢地弟婦（即係我既表舅母）屋企度住。
但昨晚黎左我屋企過夜。
因為佢地今日報左香港 local tour，
上午九點幾係尖沙咀某酒店門口集合，
表舅母屋企係大埔個邊，
咁梗係係佐敦過去方便啦。
結果昨晚大執位，
三位親戚訓我父母房，
爸爸訓我房，
媽媽訓廳既梳化，
而我呢，
就要開地席訓地下，
訓到腰酸骨痛…… ><


平時夜晚訓覺，
我會開住收音機。
不過今晚開收音機會嘈住人，
所以我唯有開 MP3 機 既 Radio，
載 Head Phone 訓。
一點幾先有得訓，
五點左右媽媽起身返工，
自然被佢嘈醒左。
之後剛剛訓番，
又輪到爸爸落街。
我第一時間走番入房訓床，
一訓就訓到七點九先醒。
食完早餐就返工。


一路個頭都好痛，
返到公司，
即刻食兩粒必理痛。
感覺先至好 d。
到中什訓完冕覺，
個頭又痛，
又再食多兩粒必理痛。
但係點解會頭痛呢？
我又唔知 wor…… ><

>>June 4, 2004 at 8:55:17 AM GMT+8

2004 年 6 月 2 日 星期三 【酷熱】

成個星期沒做 Gym 了，
今日係屋企食完飯，
就出去做 Gym。
去到既時候已經九點幾，
大同 A 君已經做完，
仲不斷施壓叫我快 d 做完快 d 走。
做完兩部背肌既機之後，
去做四頭肌。
點知做做吓，
好似係第四 Set，
個頭特然好痛，
咁我立刻停落黎，
沖涼換衫走人。
個時仲未夠十點半。


一如以往，
我沖好晒涼，
換晒衫，
大同 A 君都未攪掂。
我就坐低等佢啦，
亦都拿部 MP3 機出黎聽。
好可憐我部 MP3 機，
由我個褲袋跌落張椅，
由張椅個窿跌落地下，
哇哇哇 ><


之後畀佢捉左去飲野，
原本去仙"�林，
點知冇位。
結果就去左仙"�岩，
叫左杯朱古力雪萌，
都唔好飲既 ><
咁通常飲野就係我八卦既時候，
今次 Collect 到唔少資料，
唔錯唔錯。
不過我唔係好明，
點解時下 d 人咁鍾意 send SMS 呢？
一日 Send 十幾封，
點解唔電話講呢？
方便快捷。

>>June 4, 2004 at 4:51:08 AM GMT+8

2004 年 6 月 1 日 星期二 【晴】

呢一期會既 Training 希望改變下形式，
唔好只操體能，
可以練多 d 技術。
所以每個月月尾都會有一次野外練習，
而逢星期三既訓練，
也希望可以多元化。
但係如果一個人計劃晒既話，
就會做死一個人。
所以都希望每個舊人都可以負責一 d 咁。
今晚個 Training 就由我負責。
因為班新人睇圖弱，
本來打算做 Map Memory。
我 Course 都 set 好晒，
點知返到去發覺冇其他圖畀我用，
結果就要轉訓練方法。
係我去放 Points 既時候，
佢地就係玫瑰園玩追龍。
我放完 Points 黎到，
發覺效果唔係幾理想，
結果就改左做接力短跑。
之後就係 Course Country 既 Park O，
由一個舊人配一個新人，
總數二十個 Points，
梅花間竹咁打晒返黎。
五隊中，有四隊打晒返黎，
有一隊只係打到一半左右。
個小學五年級既隊員，
不論技術和態度，
都有很大的改善空間。
係佢地出左去打 Points 既時候，
我就做自己既訓練，
做短途來回跑，
去時衝刺，
然後慢慢 Jog 回來。
跑了大約十分鐘，
衝了十次左右，
就已經好累，
今個星期的訓練量似乎唔係好夠，
看來要加多一課，
不過我今個星期都好累。


剛過去那個星期，
係哈薩克舉行左個亞洲及太平洋區野外定向錦錦賽。
係香港代表團中，
經理是來自我母校的老師。
我個會也有一位年輕賽員入了代表隊，
他更於比賽中拿了三個獎。
今日佢就帶埋手信返黎 Training。
對於佢師父黎講，
簡直係雙囍臨門。
除了徒弟揚威海外之外，
佢最近亦都畀 CityU 收左做學生。


咁我地呢班好事之徒當然順勢屈佢請食飯。
原本都係當講笑咁講，
點知佢真係請 wor，
簡直係奇蹟！

>>June 3, 2004 at 4:46:03 AM GMT+8

2004 年 5 月 31 日 星期一 【酷熱】

好耐都冇試過上日文堂冇功課交喇，
因為之前個星期要趕 MSc 的 projects 既關係，
結果就唔得閒做日文功課，
上堂就緊係冇得交啦。
今日學自動詞同他動詞，
好麻煩喔，
好鬼多野要背…… ><
係上堂既時候，
我就幾乎做晒今個星期 d 功課，
（上個星期既反而未做晒……）
只係欠作短文個幾 parts 未做。


毛同學唔知點解冇冇啦啦話玩番 ICQ，
仲問老師拿 ICQ UIN。
點知老師唔玩 ICQ，
佢又問 d 同學仔拿，
結果都讓佢收集左幾個同學仔既 UIN。

2004 年 5 月 30 日 星期日 【酷熱】

今晚 Midnight 要要交兩份 report 既關係，
所以昨晚開通頂做。
一路做到朝早六點左右，
先寫完第一份，
仲有一份未寫。
上床小睡一個鐘之後，
就起身返工。


去到公司大堂，
剛剛送 Lift 尾。
等到第二輪 Lift 落番黎時，
一開門已經見到兩個同事係度。
咦，我明明見到佢地坐頭先個輪架。
問番佢地，
原來頭先上到 13 樓，
（即係我公司個層）
部 Lift 竟然冇開門，
結果佢地就原 Lift 落番黎。


返到位做左陣野，
見到我上司返到黎。
但係佢係著得好 Casual，
突然佢同我講左一個消息，
攪到我反應唔到。
佢話：
「Stephen，我離開公司架喇，
你以後自己焄顧自己。」
一黎佢走得咁突然，
二黎我又未訓醒，
我完全唔知點回應佢。
執完野之後，
佢就走左喇……


放工返到屋企，
食完飯我繼續寫 Paper，
一路寫到三點幾先寫完，
仲係 Skip 左半份。
遲左三個鐘交份功課，
唔知會唔會扣分呢？

>>June 2, 2004 at 3:01:19 AM GMT+8

2004 年 5 月 29 日 星期六 【酷熱】

唔經唔覺，
我學士畢業了都差不多兩年。
今日故地重遊，
別有一番滋命。
點解會返去呢？
就係因為今日係 cu 有人攪左個 training，
係崇基學院 set 左三條 short courses。
Course A 2.2km 用左 36分42秒；
Course B 2.0km 用左 33分53秒；
Course C 1.1km 用左 19分29秒。

三條 Course 既上落比較大，
加上天氣炎熱，
唔夠氣所有 leg 都跑。
除左體能唔夠之外，
距離判斷都好差，
而且因為張圖比例係 1:3000，
唔係慣常定向圖既 1:10000，
所以距離錯誤都幾嚴重。
而且條 course 打幾個八字，
d Points 好亂，
有時打完一個 Point，
找好耐先找到下一個係邊。


今次嘗試一些不常唔會選的 route choice，
看看有冇一 d 新既衝擊。
例如其中一條 leg，
正路係跑小橋流水條樓梯上賤 Build，
我就選擇了爬旁邊係大斜坡。


因為宿舍區有唔少工程，
有 d 路我都唔知行唔行得，
結果冇選到。
例如眾志上應林那條樓梯，
華蓮落辮子路那條小路等，
我都以為封左而冇行……


結果成績唔係咁滿意。
完成上午既訓練，
去了眾志食 lunch，
之後返左屋企做功課。
六點左右小睡片刻，
八點起身食晚飯。
之後再摶殺。

>>June 1, 2004 at 4:41:37 AM GMT+8