2003 年 12 月 30 日 星期二 【颳風】

悲傷既二零零三年將會過，
迎接二零零四年既來臨。
假期前夕，
公司照例可以放早，
今日四點就可以收工，
但係我都係做呀做，
做到差唔多六點先離開公司，
跟住由觀塘行路落九龍灣。


對於減壓既方法，
我有自己既一套，
步行對於我黎講係一個好方法。
可能我玩開野外定向啦，
所以我都喜歡步行。
可以一邊欣賞沿途人生百態，
一邊思考一下各項事情，
又或者純粹專注於雙腳，
左、左、左、右、左。
控制自己既呼吸，控制步速……


約了人六時三十分等，
早到了十數分鐘。
（挑戰我？都話幾點都得架啦！）
打了一會兒遊戲機，
就入場睇戲，
係戲院小食部見到爆谷吸引，
就買了一桶入去食。
今日有人請我睇戲，
（雖然係免費飛……）
有人請食爆谷，
（雖然被人淋到成身都係……）
仲由人請飲野，
（其實係佢欠我錢……）
臨開場前，銀幕出現以下字句：
「距開場有四分鐘，請到小食部購買………」

2003 年 12 月 29 日 星期一 【晴】

今日約左班大同食飯，
所以六點二十分左右就收工，
係行去地鐵站既時候，
想起一 d 幾特別既野。
每逢假期前夕，
又或者星期五，
我想一般人都會早 d 走，
唔會超時工作咁耐。
而係平日呢，
就可能會超時工作耐 d。
但係我就相反，
係每逢假期前夕或者星期五，
我多數都係主動超時工作。
其實原因係咩呢？
係因我平時唔得閒，
唔夠 ot 數，所以要補番？
定係其實逢過時過節我都冇人約，
因為既然冇野做，
不如留係公司做野呢？


講番轉頭，
今日食飯之前，
我首先落尖咀換禮品，
咁就苦左某人等左我半個鐘。


換完之後就再坐地鐵落油麻地，
去既時候，我以為我會第一個到啦，
點知估錯晒，佢地班人出奇地好早到。
之後行入橫街去間酒樓，
一路行點解好似咁熟咁既，
冇錯喇，正正就係某人新居樓下。
其實都幾抵食，
十一個人埋單九百七，
仲要包飲品同雪糕。
d 野食都唔錯，
係位置偏僻 d 姐，
不過同一班傻既食完飯，
會唔會嚇到某人以後都唔出黎呢？
佢地仲話十一號之前攪多次活動，
又睇下攪唔攪得成？


原本以為我聽日係畀人攝時間，
但係走既時候有人聽到令外一個人陰聲細氣講電話，
得知部份對話內容之後，
知少少內情既我得出一個結論：
「被攝者亦攝人」
當然我係局外人，
唔適宜畀咁多意見，
但係我認為唔應該再拖 lor……

>>December 31, 2003 at 2:25:15 AM GMT+8

2003 年 12 月 28 日 星期日 【晴】

去旅行買手信買得少得濟，
原本都驚唔夠手信派，
尤其是昨天有人唔記得帶手信，
（我冇叫又好，有人唔記得又好）
我都驚畀唔到手信踢波個班，
不過去到既時候……
（詳見昨天的日記）
可以省回一大推。


不過睇見明天大同飯聚既出席名單，
我又好似再次樂觀得濟。
不過船到橋頭自然直，
我想應該都夠既。


都幾佩服我班大同，
廿六號係沙田碰到其中兩個，
確定有場飯聚，
第二日已經通知晒所有人，
因有人有事唔得閒，
今日已經再次致電所有人通知改期既事，
今日黃昏已經有出席名單，
明日就已經出黎飯聚。
效率之高，
真係唔到你唔驚。


我班大同，只要有人肯認頭做攪手，
其實好快就可以攪到個活動出黎，
但係冇人認頭呢，
就可以拖番你三五七個星期，
話說十二月頭已經有人問聖誕有冇野玩，
結果呢？聖誕假過左都冇活動，
一有人負責呢，三日就起貨。


相比我班中同，
真係差之千里，
就算有人做攪手，
反應都係一般，
講錯，係一 d 反應都冇，
出席人數只係小貓三四隻。
（大同個邊講緊既係八九成）

>>December 29, 2003 at 1:41:14 PM GMT+8

2003 年 12 月 27 日 星期六 【晴】

上次帶人返教會，
某人有不快經歷，
今日屢敗屢戰，
再帶某人返教會，
唔知佢今日感覺點呢？


不過一開始就衰左，
因為起身就同媽媽傾計，
結果就遲左出門口，
走左班巴士，
我行到落培小時，
已經遲到…… ><


完左崇拜之後，
我地去左七仔便利店食午餐，
懷舊一番，自中三四開始，
我都好耐冇係七仔食午餐。


食完午餐，
就去左油麻地幫個中同量度新屋，
攪完一大輪，
就坐車落土瓜灣踢波。
佢地打黎約我既時候，
我都醒水問佢有邊個到，
咁佢就說出一推人名，
大約有六七人左右啦，
跟住佢話佢仲有幾個 Friend 黎，
仲話約左第二隊波鬥波。
結果係一如以往，
吹水唔駛抹嘴，
總共有五個人黎！！
雖然我有遲到係不對，
但係吹水王完全冇悔意，
咁我都冇佢符，
唯有要帶眼識人，
唔好輕易信人啦，
浪費左個下午 tim……

>>December 29, 2003 at 12:09:46 AM GMT+8

2003 年 12 月 26 日 星期五 【颳風】

本來今日班中同朝早係添馬艦個嘉年華玩，
咁我中午放工就要趕過去，
但係個邊因為唔夠人所以取消，
我亦樂得清閒，
有番 d 私人時間。
放左工食完飯，
就返左屋企睇 VCD，
原本打算係廳個大電視到睇，
不過發覺部 VCD 機壞左，
我入左隻 VCD ，
佢都話 No Disc。
結果我都係要用番部電腦個細 LCD 睇。


六點幾就要坐車過海，
會埋班中同有飯聚，
一如以往，我遲十五分鐘咩，
總有人遲四十五分鐘，
其實係咪我睇錯錶，
早到左呢？
（仲要有人放我飛機……）


食完飯，就補番去嘉年華，
我一項機動遊戲都冇玩到，
最主要原因係驚。
我係一個好細膽既人，
d 咁刺激既野，
免得到就免啦！
不過係唔係真係唔坐得呢？
咁又唔係既，
我都試過去 Ocean Park 有玩機動遊戲。
但係我又覺得，
既然係驚，點解要上去玩呢？
呢 d 係咪貼錢買難受呢？
d 人追求刺激，
其實係為乜呢？
我想唔通，想唔明，
其實係咪有代溝？
我已經脫晒節呢？

>>December 28, 2003 at 4:24:46 PM GMT+8

2003 年 12 月 25 日 星期四 【颳風】

今朝一早就去左睇魔戒，
（一早既意思係九點半……）
都有人話我地傻，
晨早流流去睇戲，
唔訓耐 d，休息多 d。
不過我就覺得點解要浪費個大好早上？
我又唔鐘意夜晚浦到三更半夜，
咁夜晚訓左覺，
（雖然講緊既可能係三四點）
朝早就梗係要活動活動吓啦。


由於我以前玩開 AD&D，
所以睇呢套戲都幾有共鳴，
不過我都得到個教訓，
就係睇三個鐘戲之前，
記住去左洗手間先，
如果唔係就會錯過一 d 精彩鏡頭。


中午食迴轉火鍋，
d 料轉轉咁出，
我覺得好攪笑 lor。


跟住無情情有人話想睇樓，
咁咪去 lor，
不過我都唔明，
乜我地個 look 似有錢買樓咩？
勁多人 sell 我地，
結果都係被其中一個介紹。
不過，我係黎睇樓，
點解第一開始就 show 個會所我睇？
會所設施會係一個考慮要素，
不過我覺得都係個單位本身重要 d，
佢咁樣 sell 法，
會唔會有 d 本末倒置呢？
最攪笑係有人被人叫做……嘿嘿嘿


有人話聽日要帶個有拉鍊既袋去玩嘉年華，
咁就坐車返沙田，
咁橋就撞到大同 D 和大同 R，
就咁樣就約左個飯局喇，
唔知仁哥哥和浩堅哥哥黎唔黎呢？

>>December 28, 2003 at 1:20:23 PM GMT+8

2003 年 12 月 24 日 星期三 【乍雨乍晴】

今日爸爸放假，
咁就同佢去食早餐，
打開份報紙一睇，
今日既頭條係捉左頭號通輯犯季炳雄，
而佢藏身既地點就正正係我屋企附近。


話說我昨天出門口返工，
一落樓就見到警察封晒路，
我仲見到有幾部 CAMERA 係度，
不過我竟然意識唔到係警察做野，
我以為係拍緊戲，
個心仲係度想：「都好耐冇人係度拍戲。」

2003 年 12 月 23 日 星期二 【晴】

買左 d 手信返公司，
原本仲驚 d 食物係放聖誕假之前食唔晒，
放咁耐會變壞，
點知，點知，放了一日多少少，
就已經食晒，
係我高估左 d 食物數量，
定係低估左佢地 d 食量呢？


公司今日一點開 Party，
係 Party，唔少得既就梗係交換禮物啦，
舊年得我一份係 Log-on 買，
今年就好多都係 Log-on / City-Super 既花紙，
攪到有人問係咪找一個代表去買……
（我下年要找過第二個買禮物既地方……）
我份禮物同舊年一樣，
都係杯套裝，
不過都有少少分別既。
而我就抽到一本 McMug 相簿。


三點就可以自由收工離開，
但係我呢 d 扮勤力份子，
平安夜又冇人約，冇節目，
梗係唔拾得走住啦，
一路做到五點幾，
連老細都走喇，
（佢走埋黎贊我 work hard ^_^）
公司得番我同我上司，
咁我都執野收工喇。
上左阿力度，
打左陣機，同埋借左十幾本 Exam，
本來返屋企食飯，
不過返到佢，
媽媽出左街，
爸爸又「開緊工」，
我唯有自己攪掂自己既晚餐。


十點半約左童軍班人行街，
不過等齊人，
打完機都成十一點半，
不過剛迫到入尖沙咀海傍，
對面海個位小姐又話要返屋企喇，
咁我又迫返出去地鐵站……

>>December 27, 2003 at 3:05:56 AM GMT+8

2003 年 12 月 22 日 星期一 【微冷】

有個好冇記性既人，
原本以為有 d 小事佢會唔記得，
點知佢記得 wor。
知道個一刻，
真係好感動，
不過冇流涕……

2003 年 12 月 21 日 星期日 【晴】

陰晴不定既天氣使人吃不消，
冷熱不定既氣溫使人不習慣。
但係有 d 野，
忽冷忽熱仲使人難受，
時間係咪可以沖淡一齊？
無論開心既，
定係唔開心既，
似乎都承受不住時間既衝擊。
不同既可能係所需時間上既長短。


開心既事，時間一耐會唔記得，
傷心既事，時間一耐都會忘記。
咁究竟開心既事快 d 唔記得，
定係傷心既事快 d 唔記得？


有時真係好感慨，
以前見到係糖黐豆，
現在雖未至於水溝油，
但係都就黎似陌路人，
究竟係咩原因呢？
有冇補教方法呢？


熱戀期既時候，
眼中看到既自有優點，
甚麼事也會信任對方。


但係時間一過，
（又係「時間」！）
就會進入瓶頸期，
眼中只有缺點，
往日的優點不復見，
開始不信任，
開始很多投訴。


幸運既，可以突破重重難關，
進入甜蜜期，
但係亦有不少係分手收場，
歸根究底，
可能就係對時間輕敵。


講返轉頭，
長痛不如短痛，
與其拖拖拉拉，
不如痛痛快快，
快刀斬亂麻，
否則拖得越久，
雙方越痛苦。

>>December 23, 2003 at 9:58:09 AM GMT+8