2004 年 6 月 27 日 星期日 【清涼】

如果醫生同你講：
「好抱歉，得返一個月命」，
又或者有冇一個月都唔知，
你會有咩想法？
種種跡象顯示，
都係唔放得幾耐，
因為日日要返工，
所以都冇時間去認真 check check。


昨日開始聽唔到野了，
所以都相信時間所餘無多。
其實聽唔到野，
都唔係一朝一夕既事。
聽唔到個一刻，
當然感到突然和不安。
其實早係個多月前，
開始覺得唔妥，
看著錶皮上既數字愈來愈大。
由平時既 20，
去到最近既 30。


曾經以為係能量唔夠，
結果叉足電既幫助不大。
結果今朝都係無奈地接受現實。


夜晚返到屋企，
係打緊 E-mail 去問既時候，
心血來潮想到 d 野，
既然有一絲希望，
當然要試試啦！
結果……


原來係我斷錯症，
壞既唔係我部 MP3 機，
而係 Headphone。
換個條 Headphone 之後，
我又聽得返收音機喇。
舊個條 Headphone，聽到 MP3，
聽唔到 Radio，
自然估係 Radio 粒 Chip 壞，
點會做到係同時作為天線既 Headphone 壞 wor。
不過條 Headphone 買左幾個月，
估唔到咁快壞…… ><

>>June 29, 2004 at 4:28:10 AM GMT+8

2004 年 6 月 26 日 星期六 【酷熱】

一般人眼中既巧合，
在基督徒眼中會歸為神的安排。
感謝神在我每次軟弱或跌倒時，
總會安排人或直接、或間接的帶我回正路。


遠一點的，
在高中時有人從新帶我回團契，
（是安西？是某人？或是 D18冠軍？記不起了）

中六時，
有不是基督徒的朋友帶我到教會崇拜，
（非基督徒帶基督徒返教會，多奇妙！）

入了大學（還是中七？），
因引領了一「波友」返教會，
所以保持（被迫？）每星期返教會。

有時離棄了神，
妄相憑一己之力行事，
或是有基督徒直接提醒我，
或是有非基督徒間接提醒我，
總會有人提點了我。


昨天做重量訓練，
在作伸展運動時，
教練問我人生的目標是甚麼，
我答是作一個散發基督徒特質的基督徒。
（我竟會這樣答，真奇妙。感謝神。）


然後展開了一個基督徒和一個非基督徒的對話。
將種子播了，
期望可以萌芽。
很慚愧的，
我不是一個「多產」的基督徒，
我是重質，而不是重量的。
我期望我可以「感染」別人信主。

經過和教練的對話，
不單教練有所得著，
我自己也有得著，
就是文初所說的「間接提點」。
在解答教練的問題，
我返思到，
原來我做的還不足夠，
原來我的心不夠堅定
原來我再次偏離了正道。

感謝主。

2004 年 6 月 25 日 星期五 【酷熱】

今日係正日生日，
拆了媽媽的利是，
又多一百蚊洗，
呵呵呵。

2004 年 6 月 24 日 星期四 【酷熱】

一定要屈王生請食飯！
（唔知係咪就係傳說中既路人 X 呢？）


話說昨日下午收到個電話，
剛好我沒空接，
結果飛左去留言信箱。
聽返留言信箱，
係一個自稱阿某既舊同事，
話傾返公司個網頁。
但係，佢公司個網頁關我咩事？
Anyway，趙打去神秘人度問下。
一問之下，
如來佢所講既阿某係我中學同學，
（我大學同學都有人叫阿某）


故事其實係咁既：
話說 S 君透過阿某作為中間人，
接左阿某公司既一份 Freelance 黎寫佢公司網頁。
（阿某現已離職，故神秘人稱其為舊同事）
咁個 Client （即係神秘人）一路都係將 d 料畀阿某先，
阿某就會聯絡 S 君跟進。
有咩 Freedback，
S 君就會話透過阿某話返畀 Client 知。
而 Job d 錢呢，
亦都係寫張支票畀阿某，
由佢交畀 S 君。


但係近日個 Client 找唔到阿某，
但係 d 野又 Urgent 要改，
結果就直接打畀 S 君………


所以就發生了昨日下午個電話。
但係係通話當中，
我係原全唔知神秘人講緊既係咩公司，
個網頁係點既樣，
有咩要要 Follow up 等等。


點解呢？
原因就係個網頁一直都係阿某做既，
但係佢又唔可以讓公司知道係佢做。
試想下，
一個公司職員幫公司寫網頁，
會被視為份內事，
唔會有額外既錢。


結果阿某就想了一條橋，
就係用第二個人既名義，
以 Freelance 既形式接黎做。
而呢咁好彩被徵用名義既人，
就係小弟我喇。
原本都冇乜所謂既，
不過現在麻煩到我，
我有借出 FTP 畀佢個 Client upload d files 上黎，
阿某請我食餐飯都好應該啦。
最好梗係可以攜眷出席啦 ^_^

>>June 25, 2004 at 9:05:38 AM GMT+8

2004 年 6 月 23 日 星期三 【清涼】

原本打算丟出碟，
唔入戲院睇。
不過昨日家姐問一問我睇左未，
攪到我又心癢癢想入場睇。
講緊既係上左差不多兩個星期既「大事件」。


一到六點鐘，
我就好想即刻走，
因為今日只有三場，
分別是 7:00、8:45 和 10:30。
如果趕唔切 7:00 那場，
就要等成兩粒鐘。
不過又唔走得住，
因為上個星期同老闆講過話星期三有實驗結果睇，
但係星期四我都未攪掂。
本來想入房親口交待，
不過剛好有同事入左去，
看來都會講好耐，
結果我寫左封 E-mail 畀老闆交待了進度就離開公司。
去到荷里活大約六點九，
咁就排隊買飛啦。
因為都上左成兩個星期，
少人睇係意料中事，
大約有十幾二十個人左右啦，
同另外一套今日新鮮上影既「重案黐孖Gun」，
幾乎全院滿座（有兩個單丁吉位），
成強烈對比。
買了「重案黐孖Gun」的人，
仲要另外排條長長既人籠先可以入場。


說回套戲，
成套戲主要係大角咀和渡船角取景，
兩個我好熟識的場景。
一開幕那場十分鐘（大約啦）一 shot 過既槍戰，
充分表演出杜 Sir 既功力。


開頭我以為套戲取景都係外圍那兒，
誰料及後鏡頭一轉，
已經看見屋企樓下大門口，
不過我住咁耐（都成廿幾年），
都未見過有人賣燴蕃薯 wor ^_^


後來有大廈外面走到入大廈中，
就已經不是原本那大廈了。
當中的結構，
沒有電影當中那樣複雜，
原本係 H 形結構，
兩梯八伙。
而且電影中看似座大廈很長，
有三個門口，
其實那兒是三座大廈（前座、中座和後座），
而且三個門口也不通的。
（你由天台跳過隔離另計）


看完之後，
結論係：可以一看，但不是必看那種。
期待柔道龍虎榜、Spiderman 2 和 Harry Potter 3。

>>June 25, 2004 at 8:21:43 AM GMT+8

2004 年 6 月 22 日 星期二 【酷熱】

昨日係五月初五端午節，
好多人都會一家人食餐飯，
我地叫呢 d 做「做節」。
因為要就家姐既關係，
昨晚冇做節，
改左係今晚做。
原本我逢星期三都要跟會練跑，
原本都係打算唔食飯去跑步。
（之前都試過，撞正我上日文）
後來想想吓都係返去食飯啦。
因為公司都仲有 d 手尾，
想個埋先，
唔想咁早走。
但唔「準時」放工，
跑步個度就多數遲到。
咁不如返屋企啦。


之前都做定功課，
問定幾點開飯，
要等邊個咁。
當時媽媽好肯定咁答我話：
「等你姐，你想幾時開飯都得。」


坐完小巴行緊返屋企，
七點半未夠就打電話黎嗺我，
問我到未，
話全世界等我一個。


咁我趕頭趕命返到去，
點知仲未開得飯。
都未開得，
嗺我做乜么野 wor？
若然欠少少就開得既話，
我都冇咁慶。
但係我返到去，
一個R都未整好，
結果等到八點未有得食，
等左足足半個鐘有多！


食完飯我就拿拿聲返會，
順手還返 d 信封畀會。
（大約四百幾個度啦，
　以前寄會訊用既。　）


佢地問我去邊，
我簡單咁答佢返 Scout。
佢地就質疑我既答案，
又話我約左女仔云云。
係唔信既，
問黎做乜 wor？
激鬼死我…… ><

>>June 25, 2004 at 6:32:05 AM GMT+8

2004 年 6 月 21 日 星期一 【乍寒還暖】

原來已經廿五個月，
追左佢足足整整廿五個月。
係昨天（即係二零零四年六月二十一日），
終於都完了。
有 d 唔捨得，
不過完都合理既。
冇理由在拖落去，
一拖就會變質，
變左質就會由好變平庸。
甚至為左拖而做出一 d 不合常理既事，
做到很浮誇時，
又有甚麼意義呢？


為免 1234567 又誤會，
冇啦啦宣佈死亡，
今次講得白 d，
我一路講緊既係一套漫畫「球場幻想曲」，
由日本漫畫家草場道輝繒畫。
係昨日出左第二十五期最終回。
以日本對意大利的決賽作結，
轍平和馬高這對宿敵，
各自表現出佢地作為 Fantasista 既能力，
帶領所屬國家隊上演一場扣人心弦既決賽。
馬高係己方底線大腳踢前，
彈地笠過日本的門將入網，
將比數改寫成二比一。
及後日本隊既另一個 Fantasista 被換入場。
不用多講，
日本人既體育漫畫，
最後當然係主角個隊贏既。
呢奪係我繼「我們的足球場」、「Whistle!」後，
另一奪覺得好好睇既足球漫畫。
係最佳既位置完結，
雖然尾段都仲有少少拖戲的感覺，
但比起拖戲之王既足球小將，
簡直係少巫見大巫。

2004 年 6 月 20 日 星期日 【乍寒還暖】

今日係二零零四年六月二十一日，
係《哈利波特 - 鳳凰密令》出版一週年。
自從 ICQ 可以畀我取消個出生日期，
今年終於可以名正言順取消個出生日期，
不需要用個假既黎騙人。


好唔開心既係收唔到 SMS，
有個組織係上莊之前話「每」位會員生日既時候都會收到短訊祝賀。
但係我就收唔到，
我唔係話貪佢個封 SMS，
不過我好重誠信 lor。
雖則我唔係再學學生會員，
但我假假地都係名譽會員，
我個時問得好清楚，
佢地都話有，
咁現在即係算咩？


夜晚入沙田燒野食，
所以今日都帶左衫褲返黎換，
放左工就坐 89x 入第一城。

2004 年 6 月 19 日 星期六 【晴】

今日又畀人放飛機，
話說有人約我今早返完崇拜一齊食 Lunch，
點知佢連崇拜都冇返……
講返個崇拜，
今日係講耶穌係地上既養父約瑟，
話佢不論 AQ（Adversity Quotient 逆境商數）、EQ（Emotion Quotient 情緒商數）、 SQ（Spiritual Quotient 靈命商數）均高……


崇拜完左之後，
去左角格價（電腦和相機配件），
之後返左屋企。


今日父親節，
但我早、午、晚三餐都沒空和他吃，
結果請了佢食下午茶。
五點九個字左右，
就出發去踢波。


今日紐版約左另外一隊踢波，
打七人場，
我地只有九個人，
佢地有十幾人，
打車輪戰都走死我地。
開頭我地都和對方打成均勢，
仲領先三比零，
之後換入我和另外一個口水人，
就開始兵敗如山倒，
被人反先，
半場落後三比四。
休息過後，
我由後防移至前鋒，
而速度拉開對方後線。
其中一球龍門球彈笠過對面後衛，
我有中場線疾走，
係底線前追到過波，
仲起埋腳，
可惜柱邊出界。

又有一球，
我特然加速截到對方後衛既橫傳，
可惜不能轉變成入球。


後來努力終於有回報，
我係右路連續擲了多個界外球，
結果第四球成功穿越對方後衛，
傳到遠柱無人看管的隊友，
成攻射入。

及後一球三打一，
我亦成功用右腳射出一個急勁既射球，
貼柱而入。


結果全場完比數為五比八飲恨。
若非門將演出神勇，
我們不止失八球。
但另一方面，
我們有兩球 Own Goal，
加上口水佬入黎之後好似打少個咁，
除去這兩個因素，
其實都係拉成均勢。

>>June 21, 2004 at 9:00:53 AM GMT+8

2004 年 6 月 18 日 星期五 【酷熱】

今日放工就出左旺角睇外套，
原因係全球賽班代表想做件外套代表個會。
咁就出去格下價，
睇吓款咁。
我一直都覺得，
一係唔攪，
一攪就要盡力攪到最好。


出到旺角差唔多兩點，
先去大快活食 Lunch，
點知個餐牌已經換左下午茶，
結果只係食左個雞翼餐。


食完就開始掃鋪，
去左四間幫團體造衫既店鋪。
一間平，但 d 款麻麻，
兩間貴少少，
一間好貴，貴成倍。
之後行左 d 運動鋪，
又行左女人街。
係女人街發現左件淨色既 Windbreaker，
開價 70，再加埋自已燙 Logo，
成本大約一百元一件。
跟住落左深水步，
個度 d 衫做開批發，
可能可以平 d tim。
第一間 d　風褸貴，
不過 d 短袖衫幾抵。
另外有間做冒牌貨，
冒 Nike 既，
70 元褸連褲，
不過我唔鍾意佢個冒牌 Logo。


之後出左旺角做 Gym，
首先做 Machine Squat，
每邊兩塊大鐵餅，
每塊鐵餅都係 45lbs，
即係 Total 180lbs！
做完真係腳痹……


之後做了Lying Leg Curls（Hamstrings 腿後肌）、
Machine Bench Press 和 Butterfly（Chest 胸肌）、
Seated Cable Rows 和 Pulldown（Back 背肌）、
Triceps Pushdown with V-Bar Attachment（Triceps 三頭肌）、
Barbell Curl （Biceps 二頭肌）。
做手那時，更是一組三頭肌，
唔休息即刻接一組二頭冗。
做完之後真係好疲倦喔！
個身好似散晒咁……

>>June 21, 2004 at 7:47:34 AM GMT+8