2004 年 2 月 8 日 星期日 【乍雨乍晴】

昨日是一年一度的渣打馬拉松，
但是我沒有參與，
因為同日舉行的還有第二場定向錦標聯賽。
今場的比賽地點為於西貢驢仔石，
賽事中心則是西貢大灘民安隊訓練營。
早上大會有專車由西貢鄧肇堅運動場運送賽員到賽事中心，
開車時間是早上七時四十五分。
一早要入到西貢，
確實有點兒吃力，
尤幸都準時趕到。
去到賽事中心才發覺，
原來自行前往賽事中心還可以，
因為賽事中心距巴士中心十分近，此其一。
巴士車費比賽專車平一半，此其二。
最重要一點是，坐大會專車的時間太早，
我到達賽事中的時間距出發時間足足有兩小時！

大會有幾點值得讚。
第一、賽事中心雖然不是室內，
但總算有瓦遮頭，
使行李有個避雨的地方。
第二，賽事中心有洗手間，有熱水供應。
第三，大會提供衣物運送服務，
將賽員往起點時穿的禦寒衣物運回賽事心。
第四，地圖採用防水物料印制，
免除入地圖膠袋的功夫。

說回賽區資料，
其實於驢仔石的地段只有地圖右上角的一少部份，
有大部份都是屬於白沙澳賽區。
因為曾下大雨，所以地面非常濕滑。
就算穿上釘鞋，
鞋底也很快積上厚厚的泥，
與平底鞋無分別。
當下山時，情況更惡劣，
要很快地奔下山，
因為愈慢愈容易跌。

經過今次的比賽，
我知道早餐的重要性。
我在家中已吃了早餐，
但賽程到了一半已經開始肚餓。
以後我都必會預備少少糧食，
於出發前吃下。

賽程全長 6.1 公里，19 個控制點。
大部份控制點間的距離很短，
分佈於三個區域，
區域之間以 long leg 連貫，
是一條既要求體能好，
也考驗技術水平的比賽。

我在比賽中所犯的錯誤不多，
致命性的錯誤發生於 2 去 3 的長路段，
原本路線正確，
但於其中一個彎位轉錯了方向，
與正確的方向背道而馳。
更槽的是，原本應該是向下走，
我卻是向上爬，消了大部份體能。

時限一百五十分鐘，
冠軍用了七十一分鐘，
我用了一百一十八分鐘，排第十三，
得六百五十多分，
還有兩名賽員排我之後。

今次比賽更是賠了夫人又折兵，
跌得損手爛腳之餘，
發現指南針有氣泡，
第二天更病了。
真是身痛、頭痛、肉痛、心更痛。

2004 年 2 月 7 日 星期六 【乍雨乍晴】

有些事我想極也想不通，
究竟問題出在那兒？
是我老闆？是我自己？
還是介於中間的 Project Manager？

作為一個 Software Engineer，
我盡了最大努力生了個仔出黎。
上繳中央覆核打回頭之後。
咁應該邊個畀 Feedback？
話畀個 Software Engineer 知點改？
我覺得係用家 lor 。
但係我上司既 logic 係，
應該係 Software Engineer 想點改。
如果我知點改，
就已經係交那個 version implement 左啦，
現家當然應該係用過既人話畀我知邊方面唔理想，
我從而改進。

記得老闆之前叫我同我上司溝通多 d，
但係我同親我上司傾，
佢就梗係大耍太極，
叫我自己決定。
?了 hardware 方面我幾乎完全唔識，
所以處理唔到之外。
其餘大大小小，
包括下至 Coding，
上至 Software Design，
甚至 Deadline 既決定，
都係我一手包辦。
有時我會想，
究竟佢係 Project Manager，
定係我先係呢？

雖然從另一個角度睇，
佢畀了很大的自由度我。
但會唔會擔子太大呢？
我有點兒吃不消。
最近一兩日情況有點改善，
希望不是太遲啦。

不過所謂開會既過程係：
「你覺得仲可唔可以改善？」
「你覺得咁樣用方唔方便？」
「你認為應該點改？」

>>February 9, 2004 at 8:18:23 AM GMT+8

2004 年 2 月 6 日 星期五 【乍雨乍晴】

星期四畀人放飛機，
昨晚又係約左同一個人。
今次佢冇放飛機喇，
我地一齊去睇千嬅首場演唱會。
講起上黎都覺得自己勁，
三十五日內去三次紅館。
睇左三個演唱會。
（Twins，左麟右李，楊千嬅）

其實演唱會 d 飛係二手。
講起都攪笑，
話說佢（暫時叫 A 君）約左人（暫時叫 G 君）今晚睇，
即係睇第二場。
咁 A 君就係佢個 friend 手上買左兩張第一場既飛，
同我去睇；
與此同時 G 君就係佢個 friend 手上買左兩張尾場既飛，
同 A 君去睇。
而原本個兩張第二場既飛，
A 君就九折賣番出去……

講番個演唱會，
我為左係演唱會影相，
特意上星期買左支單腳。
今日發現，支單腳太長，
放唔到入背包，要手持。

張飛寫既係第九行，
但因為有三行加行關係，
即係第十二行。
以前試過坐得再近 d，
好似 Twins 個場係七行。
今次仲要係轉角位 tim 。
但第九行轉角位，
就即係欄桿之後既第一行，
冇錯，即係最近只係同千嬅相隔一條欄桿。

但係針冇兩頭利，
坐得太前就會睇唔到對面角發生咩事，
千嬅行近就會有班人衝落黎迫落你到。
影相亦麻煩，
遠既時候要加支 Tele 鏡，
但係加左就影唔到近。
每次千嬅行近既時候，
我就要好快手咁將支 Tele 鏡拆落黎，
走既時又要好快咁裝番上去……

今場既嘉賓都係由我個邊出黎，
但係出親黎都係背住我，
攪到我影唔到正面 ><

講返個演唱會內容，
不過不失啦。
千嬅本身已經病，
把聲開唔到，
加上又試過入錯，
唔記得歌詞等。

一開始就捉左一對年輕夫婦上?唱歌，
中間又有一段冗長沉悶既打機環節。
及後係 encore 環節，
又有觀眾拿左支咪唱。
當有歌千嬅話唔熟歌詞，
更有觀眾拿出貓紙給千嬅。

演唱會十一點完場，
返到屋企訓得教都成兩點。
後果就係，
今朝五個響鬧裝置都叫我唔醒 ><

>>February 7, 2004 at 1:47:04 PM GMT+8

2004 年 2 月 5 日 星期四 【乍雨乍晴】

昨日被人放飛機，
結果得我自己一個去。
食完麥當奴，打完機，
就換衫入場，
曾經有一段時間，
Gym 場好多人。
但今日去到，
真係好少少人。
做完重量訓練，
就去左練跑，
今次比上個星期再跑多五分鐘，
即係跑了四十五分鐘，
長度係 7.3547 公里。
成績只是一般，
因為還沒能於一小時內跑完十金里。
較安慰的是，
今次全程都用均速。

2004 年 2 月 4 日 星期三 【乍雨乍晴】

「唔怕生壞命，最怕改壞名」
有時一個唔係咁好既名，
真係唔係咁好。

首先係發音方面，
有個發音簡單，
字字鏗鏘既名，
特別容記得你。
但若你名比較繞口，
咁就自然差一段。
最慘係你個名諧音係另外一個意思，
咁就慘上加慘。
例如明明係叫梓恒（恆），
但係因為好人有懶音既關係，
成日叫你做止痕，
個種滋命真係唔係咁好愛。
尤其是姓「畢」同姓「吳」，
要改名就更加難。


隨了讀音之外，
寫法都有近似既麻煩。
例如小弟明明叫「炒炒」，
但係我 d 仔女竟然睇到係「妙妙」。
過年個時又有新名，
今次有人叫我「紗紗」（sa sa）。
唔知幾時我又有其他名，
好似「沙沙」、「杪杪」。
所以話，
改名都係一門藝術。


又或者，係你個名前再加字，
而且多數係單字。
以前我班大同係咁，
現在某人又係咁。
究竟點解呢？
加左順口 d 咩？
定係因為我缺乏某樣野，
所以有意用呢個字安慰我？

真係令人費解……

>>February 4, 2004 at 11:27:21 PM GMT+8

2004 年 2 月 3 日 星期二 【乍寒還暖】

覺得自己愈來愈敗家，
就好似昨天咁，
我係科大上緊堂，
都可以用部 Pocket PC 透過 Wireless 上網，
買左支二手鏡頭。
幾日就洗成二千元，
我都幾佩服自己倒錢既能力……

某人話既然我想，
但係又成日洗咁多錢，
多數都係儲唔到架喇。
如其洗晒，
不如每個月一出糧，
即刻畀晒佢啦。
連錢都想管？
咁不如殺左我吧啦，
我寧死不屈架喇。

同人傾開閒計，
原來佢一個月儲到人工既八成！
若我可以好似佢咁儲到八成，
又或者再打過八折，
即一個月儲六成四，
似乎可以係預定日子前儲夠錢。

2004 年 2 月 2 日 星期一 【晴】

近來習慣等待，
等他人的答覆，
等車等人等時間過，
又或是等人召見。

今天是年十三，
由初五開始開工，
到今天等到食春茗。
但不是食晚飯，
而是中午到茶樓飲茶。
雖則只是飲茶，
但選址絕對一絲不苟。
我地去既係出名好食既「金龍船」，
金龍船絕對不是浪得虛名，
食物水準十分高，
尤其是燒肉、奶黃餃、
仲有個人認為可以媲美鼎泰豐的小籠包。

唔好睇我公司細細，
都坐滿三張?。
食完點心同炒飯，
仲有免費的芝麻糊。
雖然好好食，
但係就食到過晒鐘。
好彩全公司一齊食，
算唔算合法遲到？


老闆放完假都差不多三個工作天，
我也等他召見照肺等了同樣三個工作天。
直至今天下午，
終於等到了。
結果沒有想像中咁差，
至少沒有被人炒，
沒有被人大罵，
相反，仲上了寶貴的一課。
我學識了不要對自己的 Program 太仁慈，
多些從用家的角度出發，
看看有冇不妥當的地方，
有功能上既疑問，
就多些同上司相量。
（有人理我的話……）
佢又話呢個係一個唔容易的 Project，
我一個人做，
已經很了不起。
功能上很強，
只是 Interface 唔係咁理想。
不論佢是否笑裡藏刀，
至少我沒有被人完全否定，
已經很好了。
又發現了一個公司的優點，
就係有很好既 on-job training，
無時無刻都學到野。


後記：
這篇日記也是在 Pocket PC 上完成，
甚至希望透過 Wireless LAN，
直接用 Pocket PC 係科大 send 上 Server，
係咪好勁呢？
可惜伺服器繁忙，
login 唔到 ><……

>>February 3, 2004 at 3:01:06 PM GMT+8

2004 年 2 月 1 日 星期日 【晴】

有句說話：「知足常樂」，
但真正做到的又有幾人？

誠言、小弟距離這個境界，
還有很遠很遠的路……

我時常埋怨人工低，
工作時又長。
但是，今天和同事談天，
原來他先前在 Software House 工作，
工作時間更長。
因為老闆永遠想能在最短時間，
能夠完成最多的產品，
甚至希望用比正常少的工作天。
交功課的時限永遠很短很短，
約按章工作，
即一到放工時間就離開公司，
肯定不可以在限時內完成。
結果就要每天加班到很晚，
換句話說，
工時比較我的還長。
再者，我的公司是一間好公司，
起碼淮許遲到早退，
大前題是不可以太過份。
雖然最近收到小道消息，
公司正開發一個系統，
記錄員工的出入時間……

公司又容忍我用了差不多兩年，
但還未完成第一個產品。
最近才收到公司有微言的消息，
我還應該有怨言嗎？

薪金待遇方面，
我時不滿意沒有五位數字的薪金，
但看看大學畢業生平均入職薪金，
我已經很高了……
公司福利又不錯，
有醫療保險，
每年十一日有薪假期，
公司可以寬頻上網，可以用 ICQ，
比較其他人，
我還應該有怨言嗎？

知道歸知道，
埋怨還是有。
但願我能學憧「知足」。


後記：
第一次在 PDA 上寫日記，
上車開始寫，
寫完落車。
個多小時的車程，
剛好寫好一篇。

>>February 2, 2004 at 3:20:21 PM GMT+8

2004 年 1 月 31 日 星期六 【晴】

我係一個李克勤既歌迷，
但亦都喜歡聽陳小春既歌。
喜歡既唔係佢既歌藝，
某程度上我唔喜歡他既聲音。
喜歡既係佢 d 歌既詞，
同埋佢 d 既既風格。
所以克勤隻新碟有小春既獻世，
直情合晒河車啦。
早幾日 update 左部 mp3 機 d 歌，
發覺原來我放左兩首獻世，
一首係陳小春既，
另一首係李克勤既。


除左獻世之外，
其他我喜歡既歌包括：
取消資格、一句到尾、不歡而散、
失戀王、耳邊風、臭草、
啼笑姻緣等等。


喜歡聽佢既歌，
可能因為感覺得新鮮。
香港樂壇似乎冇乜人唱 R&B、Hip Hop既歌。
以前仲仲有 LMF，
不過 LMF 都已經散了。


可能我不會唱歌，
唔識高低音，
沒有抑仰頓挫的音調。
所以喜歡上呢種 rap 佔很大原素既歌。
好似軟硬既「廣播道 fans 殺人事件」，
郭富城的「妳是我的一切之春眠篇」，
我都好鍾意。

2004 年 1 月 30 日 星期五 【微冷】

香港人打尖既方法真係要寫個「服」字，
「明打」，「暗打」，「扮打」乜都有，
今日又經歷左一次「奇遇」。

話說中午去左美心快餐食野，
咁係 Counter 買完飛，
就要再排隊拿野食，
咁我就排係一個男人後面。
係呢個時候，
我見到有個女人係個位行出黎，
咁個女人係我左手面行過黎，
而我右手面就係出口。
咁好自然我以為佢要離開，
咁就向後退一步讓佢過。
點知佢就排左係我前面，
真係「啤」一聲。
結果我平時多數都唔打尖，
都要用人事關係過番佢頭……


講番美心快餐，
我要將佢 Black-list。
話說我叫左過下午茶餐，
有蝦多士，
有薯仔沙律，
仲有杯要補錢既焦糖咖啡。

d 野食真係唔得，
咖啡唔好飲；
蝦多士除了咬落有 d 口感，
冇黎味道既；
薯仔沙律叫有 d　味道，
不過係似嗽口水味……


食完午餐（定係叫下午茶？）
就坐車落黃金，
我冇買野，
反而同行既大同 A 君就買左個 Wireless Router，
但係點解張 EPS 係我既？


Anyway，同佢行完鴨寮街，
主要睇 Monopod，
不過睇唔中，冇買。
大同 A 君就坐車過海，
我就一路行落太子、旺角咁返屋企。
行左旺電格價，
又入左永成睇單腳，
今次睇中要破財，
不過破財係聽日既事……

>>January 31, 2004 at 5:46:20 PM GMT+8