2004 年 4 月 18 日 星期日 【晴】

昨日天氣放晴，
結果可以上山上堂。
第四階段訓練有四節課堂，
另外仲有四節 Outing。
因為我地下個星期都想去比賽，
結田2係我地既要求下，
第三第四節係同一日分上下午舉行。
Outing 地點係昂平，
我地係馬鞍山耀安村坐新界的士上山，
落車後約再步行廿分鐘，
到達集合地點 -- 昂平營地。
一輪熱身同數步練習之後，
正式開始訓練。

原本上下午共有多項訓練，
但係因為超時關係，
我地只係可以完成其中三至四項。
用咁耐時間既原因，
係因為訓練實在太難，
而且地圖資料太少。

舉例，上午其中一個訓練是練 compass，
從張圖得到既資料就只有方向同距離，
冇任何特徵幫助下，
其中一個 point 我試左四次，
用左接近一個小時先去到。

上星期提到測量距離，
可以用數步的方法。
但遇到一些不能直線前進的地方，
甚至連仿直線前進也不能的地方，
數步測距就完算沒有用武之地。

這時可以用目測法，
但目測法誤差大，
較準確可以看附近地徵幫手。

理論是這樣，
但實踐是另一回事。
Anyway，我不能原諒昨天咁差既表現。

經過昨日，
興起一星期跑一次山既代頭。
因為咁，想買過水袋背包，
背住跑山，
但係，會唔會買左又覺得冇用呢？
會唔會又三分鐘熱度呢？
唉，都係想清楚 d。

>>April 19, 2004 at 10:01:00 AM GMT+8

2004 年 4 月 17 日 星期六 【清涼】

手手腳腳好痛 ><
我想成因係前天去完舉鐵。
但係昨日都唔痛，
點解今日先痛？

2004 年 4 月 16 日 星期五 【溫暖】

原本今日下午有場訊工盾足球賽，
由校友隊對學生隊。
但係天公不做美，
早上落下傾盆大雨，
天文台甚至一度發出雷暴警告。
正當我以為會取消之際，
天氣開始放晴。
由公司窗口望出去，
公司樓下個足球場 d 地都開始乾。
雖然係咁，
但係中大個足球場係草地黎，
積水唔係咁易乾晒。
球場方面決定封場，
足球比賽自然唔可以舉行。
原本班 Friend 個邊都有波踢，
但係個個都話唔得閒，
結取消埋。
放工離開公司個時，
不單止晴朗，甚至有 d 曬，有 d 熱 tim。

星期六咁好天氣，
但係要留係屋企，
好似有 d 浪費。
但係三時幾特然下起暴雨來，
天文台亦一度發出黃色暴雨警告。

感謝神，
如果唔係朝早場大雨，
場波就唔會取消。
而我就極可能會變做暴雨下既犧牲品，
甚至可能會病 tim。

亦因為下午呢場大雨，
可能明天唔會落，
咁樣我就可以上山學野外定向。

不過因為呢場大雨，
我拒絕左大同 A 君邀請我睇「天作之盒」，
冇得睇「天作之盒」，
我就真係想唔通是好是壞，
希望唔係壞事啦。

>>April 19, 2004 at 3:51:48 AM GMT+8

2004 年 4 月 15 日 星期四 【陰】

科大圖書館有 d 自修位，
我半個月前溫另一科 Mid-Term，
就係呢 d 位度溫。
不過呢，
呢 d 位好多人用。
咁昨日入到圖書館，
行走一層都唔見有空位用，
但係行行下又讓我發現新大陸。
我發現有個研討室，
咁一般研討室都要預先 book 既。
而亦都有人 book 左研討室，
係裡面溫緊書。
好彩既係，
入面個班就係我 Master d 同學，
咁我就即刻入埋去啦。

研討室有個好處，
就係可以講野。
你地知啦，
係圖書館應該保持安靜。
但係研討室，
就可以討論題目，
而且因為個研討室入面都係讀同一科既人，
大家都可以發言，
達集思廣益之效。

溫到咁上下，
有圖書館既職員黎 check 我地學生證。
據佢講，
基本上科大圖書館唔會唔讓外來人入黎，
但係會以科大學生優先使用。
而一 d 好似研討室咁既地方，
就希望只係讓科大學生用返。

溫到六點左右，
佢地話食飯先，
咁我自然跟埋去啦。
佢地去左樓下 Canteen 食。
記得我上次去呢到食野，
都幾年前既事，
當時都係自助形式。
今日去到，
已經變左係有 Waiters serve 你。

晚餐有四個選，
其中一項係「燒味雙拼」，
英文括住「Two Items」。
咁好自然 Order 既時候，
會選埋食乜。
點知佢話冇得選，
OK 啦，我都係浪費左少少時間想食咩姐。
點知 d 野食黎到既時候，
完完全全係貨不對辨。
黎既係「燒味拼盤」，
包括叉燒、燒肉、油雞、紅腸、牛展。
明明係「燒味拼盤」，
點解又要係菜單寫「燒味雙拼」呢？
Anyways，27元有「燒味拼盤」、飯、大碗中湯再加凍咖啡，
都幾抵食。

>>April 16, 2004 at 10:18:58 AM GMT+8

2004 年 4 月 14 日 星期三 【晴】

今晚要考 Mid-Term，
所以請左一日假溫書，
亦順手返母校收張支票。
返去之前以為一定會找到老師，
所以冇事先聯絡佢。
其實唔係冇聯絡，
而係半個月前講過一次佢知。
去到既時候已經係十二點五十分，
佢地係四十五分放 Lunch Break，
咁我去到學校就直落金魚缸找佢啦。
點知佢竟然出左去食飯…… ><

我唯有係露天茶座等佢，
同時溫吓書。
特然有人好大聲咁叫我中文全名，
呢個人唔係別人，
正正就係定向會導師 Poon Sir喇。
見親我都要大大聲叫我全名，
真係可惡呀…… ><

亦都被佢捉左去同佢組隊跑黑夜定向。
其實一早已經想報名，
只係找唔到拍檔，
早已有唔跑既覺悟。
要我一個人跑單人組，
我寧願唔跑。

等左一個鐘頭三個字，
終於見到鍾 Sir了，
從佢手上接過支票，
就即刻去銀行入左佢。
之後坐車入科大溫書。

兩次 Mid-Term 我都有請假，
但兩次都好遲先開始溫。
上次係兩點幾先入到科大，
今次甚至係三點幾先到去。
七點就要考，
結果溫左唔夠四個鐘就要考，
邊夠時間溫晒呀？
嗯，我要檢討下先。

>>April 16, 2004 at 5:11:19 AM GMT+8

2004 年 4 月 13 日 星期二 【晴】

今朝收到上司既 e-mail，
話老細想我上司每天收工之前，
向佢回報一下我地 R&D Team 完成左甚麼工作。
我上司自然要求我們向佢回報自己完成左甚麼工作，
佢集合大家既報告之後，
加上佢自己既報告及整理後，
再同老細報告。
我好贊成呢個制度，
亦都等左呢個制度好耐。
因為一黎咁樣可以 push 到我做野，
其次就係可以 Show 到表現畀老細睇。
R&D 唔同 Sales，
Sales 做到野自然會多單，
咁老細見到單多，
自然知到佢地做到野。
但係 R&D 又點呢？
佢地做到野定做唔到野，
老細又點知呢？
當然，我地可以主動走入老細房同佢講我地做左 D 乜，
不過我地成個 Development 成四個人，
一人一日講一個鐘（我試 Demo 兩個鐘），
咁老細咪冇時間做其他野？
咁何況口講冇紀綠，
現在白紙黑字（Digital Format），
老細年度尾考慮升職加人工都有 Reference丫。

講開人工，
公司呢排走左兩個人，
換左兩個新人。
早幾日又有新人返工，
即係話即將又有人走。
其實係咪真係魚唔過塘唔肥？
係一間公司長做冇人工加？
又或者加得少？
係咪要轉公司先可以拿到高 d 既人工？

有位大同最近都轉左工，
不過佢求既唔係高 d 既人工侍遇，
（人工仲要比以前低了）
而係想轉轉工作環境。

>>April 16, 2004 at 4:43:04 AM GMT+8

2004 年 4 月 12 日 星期一 【酷熱】

昨日係連續四日復活節假期的最後一日，
但係我幾乎成日都唔係屋企，
因為去了野外上堂。
上既係野外定向第四階段訓練的第二個 outing，
地點係大帽山。
昨日天氣晴朗，
萬里無雲。
敝就敝在萬里無雲，
攪到好曬好曬…… ><

約左七點九係荃灣地鐵站等，
但係等左半粒鐘先齊人。
可憐我昨晚睇完波點幾先訓，
早知就訓多半粒鐘啦…… ><

之後去大河道天橋等巴士上山，
等等吓有架載人去地盤既白牌車經過。
多口問一問上唔上大帽山，
司機竟然應承，
仲要只係每位七元，
平過坐巴士。

架車只係去到扶輪公園，
之後要步行若四十五分鐘上山。
訓練機地係施樂園後面。
卸下行李，熱完身之後，
就開始今日的訓練。

第一項訓練是啡圖（Brown Map）練習，
啡圖基本上是一張只有等高線的地圖，
基於安全考慮，
可能會加繒一些點狀特徵。
因為地圖上只繒有等高線，
所以必須依靠等高線。
除了練習運用等高線之外，
也可學習看山形及山勢。
明白了練習的目的，
應該因應其目的而運用適當技術。
但大帽山的山勢太陡斜了，
所以要全程沿等高線前進是很困難的。
結果大部份時間我都是沿小路前進，
靠數山咀山窩的數量而定位。
在沒有大錯處的情況下，
做出的時間也不錯。

休息一會後，
馬上進行第二項訓練。
第二項訓練是星形定向，
由中心點出發，
去其中一個控制點，
然後回程到中心點，
再去下一個控制點。
今次的地圖上資料更少，
連等高線也沒有。
能運用的，
只有方向。
換句話說，
這項練是練習指南針運用。
在野外練習和在平地上練有很大的不同之處，
因為地勢凹凸不平，
沿真線前進是很困難的，
所以要靠其他方法幫忙。
首先用指南針記下前進的方向，
仍後站在起點，
向剛才記下的方向望去，
因視線是不會因地勢凹凸不平而偏離。
在這虛擬直線中，
尋找一個明確目標。
然後不論直去也好，繞路去也好，
以任何安全方法前往，
重覆以上步驟直至到達目標，
當然，若只靠方向，
很容易走過了頭。
加上用數步的方法，
就可以將誤差縮細。
因為第一個控制點放錯關係，
我花了很長時間也找不到，
亦因此影響了信心而其後的一個點也發揮不好。
習慣了以後，
就行得很順利了。

第三項練習是地圖記憶（Map Memory），
訓練地圖簡化和預先計劃（Plan Ahead）。
要明白這項練習的
首先要解釋兩個概念，
「地對圖」（Ground to Map）：是先看見實地的地徵，然後找回地圖上的圖例；
「圖對地」（Map to Ground）：是先閱讀地圖的圖例，然後找回實地上的地徵。
預先計劃就利用圖對地，
好處是主動權操在自己手上，
也可減少閱圖的次數及時間，
從以增加前進的速度。
在起點或每一個控制點都會有一張圖標示出下一個控制點或終點的位置。
計劃了路線及記下數個特徵後，
就不持地圖出發。
當然，若未能去到控制點，
是不可能知道再下一個控制點的位置，
所以都有一定難度。
由於少作這樣的訓練，
結果犯了不少的錯誤，
幸好都係兩個成功完作整項訓練的其中一個。

最後一個訓練是越野式定向（Cross Country），
其實只係順手收 Point 而已。
完了訓練之後，
我們到了川龍嘆一盅兩件。
之後就返屋企，
由於太疲倦的關係，
六點左右就訓覺，
一訓就訓到深夜點幾兩點。
之後起床食晚餐，
溫書與做功課。

>>April 13, 2004 at 9:48:57 AM GMT+8

2004 年 4 月 11 日 星期日 【酷熱】

嘩！今日係大日子呀，
原來小店已經開業一週年。
係二零零三年四月十二日，
我上載了第一篇日記，
話咁快就一年了。
不計開幕那編，
記得第一篇的日記內容是關於電影「地心浩劫」。
自此基本上每日都寫一編日記，
有時會因為唔得閒，
又或者 Server Log-in，
而遲左寫。
但事後總會補返。

開頭都會幫個日記扮靚，
加 d 表情公仔落去，
轉底色，加背掠音槳等等。
後來都開始懶了，
只係一篇四十行以上的日記就算了。

係開 Account 之前，
其實我從來都冇寫日記既習慣，
亦都冇想過會寫日記，
開頭都係畀人威迫利誘先開始寫。
（好似得「威迫」，冇「利誘」）
估唔到寫寫吓就變成習慣，
換返轉都我催交稿。

我係一個冇乜恆心既人，
樣樣事都係三分鐘熱度。
但係估唔到我都可以保持住寫咁耐日記，
簡直可以算係一個奇蹟。

寫吓寫吓，
我開始將部份同定向有關既日記拿去投稿，
叫做多左 d　原動力咁啦。

希望我可以繼續寫日記下去，
二零零五年既四２月十二日，
會有兩週年回顧。
跟住三週年、四週年……

>>April 13, 2004 at 9:50:05 AM GMT+8

2004 年 4 月 10 日 星期六 【清涼】

二零零四年四月十一日，
今天第四十七屆體育節的野外定向接力賽。
舉行地點是元朗大棠，
大會有轉車由荃灣地鐵站接送賽員到賽事中心。
專車八時十五分開出，
約了兩位隊友於美心快餐共進早餐，
其中一位約於七時三十分，
另一位約於七時四十五分。
小弟罕有地準時七時三十分到達美心快餐，
但結果只能碰見友隊的成員。
我的其中隊友七時四十五分到達美心餅店，
誤以為小弟遲到而到了大快活快餐店。
另一位更於八時十五分才到達……

我們早於 1996 年已經開始組隊，
一般而言都是我走第一棒，
但今次應隊友們的要求，
更改了先後次序。
更衣及熱身完畢後，
賽會有電子控制卡使用及交棒程序示範。
老實不客氣說句，
第一次示範效果很差，
小弟完全不清楚正在示範甚麼。
負責解說的工作人員時常說：「這邊有甚麼甚麼，那邊有甚麼甚麼」，
但小弟根本不知道他說的是那個方向。
後來換了兩名精英運動再次示範一次，
我才有比較深刻的認識，
當然不明白的地方還有許多。

示範完後，
看見有電視台的記者前來，
原來是「體育世界」的記者前來採訪。
希望這樣可以讓大眾認識野外定向是甚麼。

準時十時三十分，
第一棒的賽員出發。
這次有很特別的規定，
就是有種籽隊的設立。
種籽隊的選手可以排在較前位。
今次總共有十隊種粒隊。

出發區的設置並不完善，
寬道過於窄。
前面的賽員絕對會阻礙後面的賽員。

集體出發數分鐘後，
已有回報說有賽員通過無線電通訊站。
但不知為何，
工作人員遲遲不肯通知其下一棒隊友到接棒區準備，
反而三番四次要求無線電通訊站核對。
結果有賽員回到了接棒區，
但隊友卻不知道。

開賽二十分鐘左右，
我看見白板上有我的賽員編號。
但當我準備入出發區時，
卻看見編號已被擦去。
等了很久，
特然有工作員要求我入接棒區，
當我表示白板上還未有我的賽員編號，
工作人員卻叫我入了去才算。
結果白白暴曬了廿多分鐘。

終於到我出發了，
地圖比例是 1:5000，
賽程長度 2.3 公里，
攀高 160 米。

可能不習慣地圖比例，
本來已時弱項的距離判斷頓成致命傷。
最快賽員只需 18 分 32 秒，
我卻用了 40 分 50 秒。
大會第一次公佈的時間是一小時多，
第二次公佈的時間是 43 分 10 秒，
都是比實際時間多。

雖然個人時間計多了，
但不影響全隊的時間。
結果於 H21 組別隊際排名第六名，
比第一的那隊用多了半小時。
但主要以非聯賽賽員組成的隊伍，
能於高手臨立的 H21 組別取得第六名，
已算是有所交代了。

>>April 21, 2004 at 10:38:58 AM GMT+8

2004 年 4 月 9 日 星期五 【晴】

幾晚都唔係訓得好夠，
打算難得星期六唔駛返工，
可以訓覺訓耐 d。
點知唔夠十點就畀人嘈醒左。
唔係鬧鐘，唔係電話響，
而係我媽媽的講電話聲。

我媽媽係好攪笑既人，
佢永遠唔肯認自己錯，
就算已經罪証確鑿。
例如佢拆完我 d 信，
跟住丟埋。
佢可以話冇見過有封咁既信，
但係我可以係垃圾桶找得返。

又好似佢講電話既聲量，
係極度大聲。
好似拆樓咁，
我關了房門都聽得到。
但係佢又唔會認自己講電話大聲。
不過又唔係時時大聲，
有陣時（係極少），
佢日頭講電話係正常聲量。

講返大聲既問題。
我細個既時候，
打黎屋企既電話大部份都係佢接先。
因為佢講電話大聲，
我大部份既同學，
尤其是女同學，
都唔敢打電話去我屋企畀我。
佢地話接電話個把女聲好惡！

結果佢地有事找我既時候，
解決方法就係找過唔怕既男同學打畀我先。
不過我將呢件事話返畀媽媽聽既時候，
佢一樣都係唔認架……