2007 年 4 月 8 日 星期日 【陰】

您問我而家o既您同我初初認識o既您有乜分別，其實又真係好唔同。有o的您都講佐啦，工作同生活中o既您就好似兩個唔同性格o既人咁，以為您會連生活都好理智咁去解決問題，點知原來係調返轉，係工作時都加入埋感性o既原素，係一個成日個腦袋o係度轉o既思想家…

仲有一樣其實我想講好耐，係我由始至終都冇想像過o既，就係即使您有以前唔開心o既經歷，但係您確實愛我愛得好落力。我以為一個人受過傷之後，或多或少總會對感情呢回事好有忌違同戒心。但係當我體驗我o地之間o既感情時，我會感受到您o個份熾熱o既情懷，您會用心去栽培、去抓緊。至少我唔會感受到您因為過去o既事而為我帶來失落o既情緒，您會依然都咁錫我、咁愛護我…

我好難想像失去您獨自過活o既日子會變成幾咁糜爛…為佐唔好令到您偷走，我要好努力，帶您到一個更幸福o既將來！

>>April 9, 2007 at 3:19:14 AM GMT+8

2007 年 4 月 7 日 星期六 【陰】

三日o既假期話咁快就完結，今日又要返工喇。離開佐原居兼且係工作o既柴灣兩日，入到彷彿冇咁繁忙o既大埔，心情都好似舒暢佐，閒極無聊放假其實就只係想咁樣，最好就係唔知做過乜咁就一day，先至係放假o既最高境界。

過去兩日，傻瓜o既您，煲過愛心雞湯畀我飲（雞湯不嬲都係我o既最愛），蒸過排骨，炒過菜心、荳苗，煲過腐粥雞蛋糖水等等咁多樣o野畀我食，由買菜、煮o野到洗碗一手包辦，咁辛苦咁服侍我呢個懶人，好傻瓜呢…呢o的充滿愛o既(食送)菜，會深深刻刻咁印o係Dominic o既心裡面，永遠都唔會忘記。

我永遠都愛您~ >3<

>>April 11, 2007 at 1:39:56 AM GMT+8

2007 年 4 月 6 日 星期五 【微冷】

艾也，大家都好似病病o地喎，點解呢？

訓到下晝兩點幾先起身，我就好夠，您就訓得唔係咁好咋喎…係病病定係個枕頭唔舒服呢？

起身、飲茶、行街、買(食送)、煮飯、食飯。放假o既生活就係咁簡單。好悶咩？都唔係o丫。您乜都唔畀我做，就一定會悶囉…您個傻婆，係咁煮o野我食，我唔變肥都唔得啦！o的o野食一百分呀！啜~

電視連續幾晚都做緊梁詠琪，好無聊呀！一句說話講九億幾次，尤其係︰「當一段感情要結束o既時候，我會同自己講，過去o既就已經過去，當係發佐場夢囉。」其實自己一直都好憎佢，因為佢係第三者，拆散人之後而家又畀人飛佐，其實唔抵可憐，但係仲要扮到好慘咁，唔鐘意佢。

「分手我學到兩個人之間o既感情係冇得勉強…」其實佢咁多集重覆又重覆，好悶呢。佢所講o既o野，其實都係o的老生常談o既事，我覺得好大部分人都係會咁講o架啦，講愛情o既經歷，我都大把可以講啦，駛乜去乜女兒國去體驗o丫，特登搞個節目去o黎，去講o的大部分人都有一樣o既common睇法，o徙氣。

>>April 6, 2007 at 11:32:56 PM GMT+8

2007 年 4 月 5 日 星期四 【微冷】

今日訓到十一點幾起身，因為約佐師傅一點學車，連續學兩日車，進度好似都幾好。師傅成日都叫我自己拿主意去做，不過個膽都係細囉，師傅成日都話︰「技術我可以教，但係感覺就要靠自己…」盤(車太)都唔知扭幾多先好，係咪真係感覺呢？

學完車就要走下場，去九龍灣踢波，成半年以上冇踢過波喇，真係好唔掂呢，跑幾o野就好似死狗咁，冇晒氣，九個字就好似死佐咁… @_@

原來呀媽去佐澳門玩，今晚屋企冇飯開！！！去玩都唔出聲，有冇搞錯呀？！

踢完波沖個涼，就入大埔陪您。好o野，終於可以一齊輕輕鬆鬆咁同您過一個短短o既假期。好好享受啦~

>>April 6, 2007 at 11:12:54 PM GMT+8

2007 年 4 月 4 日 星期三 【颳風】

琴晚訓到半路無端端流鼻涕流醒佐… @_@

今朝學車冇遲到，學車情況亦見順利，開始掌握到當中o既技巧，師傅亦都開始畀機會我自己駕，自己揀路行，但係我都係冇乜信心，所以行來行去都係o個幾條路兜來兜去。學完師傅又叫我跟埋車，睇佢教另一個學生，賺佐。約佐聽日再學，今個月多o的假，可以學多幾堂，五月十四號就考，要加油！

今晚接您收工之後入佐沙田，行佐陣街再去娛樂城打邊爐，勁抵呀，唔駛百五蚊兩位任食，仲要有無限可樂不停供應！不過o的o野成日漏單囉，好在我o地兩個都唔係極之厭尖o既人，一分錢一分貨，唔可以要求太高。

您問我點解鐘意您？之前咪答過囉，又要再答o架…因為我同您相處落、傾o下偈之後，覺得您會對我好好，同埋覺得您會畀到幸福我囉！唔畀再追問喇！喜歡一個人，係一種感覺；愛一個人，卻係源於欣賞。

第50日！

>>April 5, 2007 at 3:35:47 AM GMT+8

2007 年 4 月 3 日 星期二 【雨】

謝謝您個傻豬同我分享佐咁多您背景o既事。

除非您有另一個，否則我點都唔會離開您，即使您身邊o既事同物係有幾複雜。

既然大家有緣遇上，更要珍惜呢一份情，努力面對、排除萬難，咁先顯得呢份情係珍貴，第日諗返起先覺得咁樣先至係「經歷」。

我o地要用時間去證明畀所有人睇，畀佢o地知道我o地係真心相愛，要每一個唔睇好我o地o既人都用羡慕o既眼光去望我o地！

我愛您！好愛好愛您！絕對唔會因為o的小事而丟低您一個唔理，我要照顧您一生一世！

今朝一起身已經好頭痛，不過返工做做o下o野唔知係咪因為太忙又好似冇乜o野，不過我真係要訓覺呀…zzz…

>>April 5, 2007 at 3:24:10 AM GMT+8

2007 年 4 月 2 日 星期一 【雨】

今日老趙約佐朋友食飯，我就「的」起心肝返屋企食啦，諗落舊年儲到錢，好大原因係上半年大部分返工o既日子都係返屋企食，所以慳到錢。由四月開始，有機會就返屋企食啦，因為要儲錢娶婆婆~

成日都好勤力咁做o野呀，係咁做係咁做月頭要交o既reports，估唔到又可以趕起星期三放假前搞掂喎，聽日可以清閒少少咁搵o的signage o既報價。

忍佐屋企部電腦幾個月，今日終於又「的」起心肝format佐佢再裝過個Windows，搞佐四、五個鐘，部腦終於都可以連返屋企其他電腦、可以Hotsync到部Palm同埋可以ActiveSync返部電話，之前幾個月o既苦，終於都完。

公司家變呀今日，有個technician居然玩o野，寫投訴信上總公司投訴個senior tech.，仲要影印埋人o地o的工卡send上去… @_@ 但係投訴o個o的o野又極無聊，話佢唔簽簿食飯，仲有冇打卡開、收工之類。佢係咪戇x o架？自己人打自己人，簡直就同英姐一擔擔…唉…呢o的咁o既人，真係早走早著啦，佢煩到o既，其實唔係個senior tech.，而係老趙…唉…老趙又無端端多佐o的o野做，係咪玩o野先？！慘…

>>April 3, 2007 at 1:23:58 AM GMT+8

2007 年 4 月 1 日 星期日 【酷熱】

熱情，應該放o係兩個人o既感情之中，而唔係放o係兩個人o既生活上。

您覺得自己o既生活好平淡，怕會悶親我。其實您應該好明白，我只係想追求一段穩定、簡單同平實o既感情，由工作到生活，甚至人生，根本大部分時間都係好悶、好無聊o架啦，邊有咁多新鮮刺激可以追求o丫？如果咁大個人都睇唔通，仲去追追逐逐，佢真係唔係好適合拍拖。

您又問及我覺得您有乜缺點。講真o丫，一個性格係缺點定係優點，真係好視乎情況同時間。最最最重要o既o野，係要明白自己愛o既人o既性格，o係唔同o既時候作出支持同安慰。我有時亦會過慮，會鑽牛角尖，一個coin有兩面，點都係要睇情況而定（天時、地利、人和）。

我講過啦，您習慣諗晒所有情況先去決定件事點做，係好定係壞，都要睇係件乜o野事，只係我習慣見步行步，船到橋頭自然諗到解決方法，兩個人唔同性格取向，唔可以一面倒話您咁樣o既性格就係缺點。愛一個人，要包容佢o既性格，幫助佢o係呢種性格上向有用同有利o既方向去開發，即使對自己o黎講可能呢種性格係「頂心杉」，但係兩個人始終來自兩個唔同o既背景同經歷，有緣走埋一齊，開始拍拖甚至結婚，都係自己揀，所以要努力去包容，成存。

無論性格係點，只要肯去向好o既一方面諗，點都有包容同解決o既辦法。正如您成日話我乜都維護您，您覺得自己做錯佐又會畀我講到您其實好合理，唔中肯。我覺得冇問題o丫，我有時都會講o野好硬好倔頂撞您啦，我知道幾時畀中肯o既評論您o既。不過與其畀中肯o既評論，我不如畀多o的感情上o既支援好過喇，因為您係一個成年人，好多時您內心根本已經有個決定有個方向，我又何必打亂您o既思緒呢？

我好愛您！啜啜啜！

>>April 1, 2007 at 3:53:48 AM GMT+8

2007 年 3 月 31 日 星期六 【酷熱】

終於submit佐CityU個Master o既申請表，一天都光晒，而家只有等運到。不過搞掂佐個job duty，可以開始send求職信去試o下搵份PO做o下，或者當係練習o下見到都好。

下晝您過佐o黎陪我，等我收工，您真係好錫我！我愛您！ >3<

您話唔鐘意我影您相，因為您唔鐘意影相。嗯…其實我對於影相呢回事亦都有o的矛盾。而家部Canon要到暑假先供斷，當時點解會買相機呢？係因為想同自己愛o既人留返一o的美好o既回憶，所謂「好趁青春留倩影」。不過呢o的曾經以為係最美好o既回憶，剎那間成為最利害o既殺人武器，o個一下o既震撼，亦未必係生命中可以負擔o既。所以我對影相呢回事，其實又愛又恨。

無論如何，即使您o係人群之中並唔係最出眾o既一個，婆婆o係公公o既心目中，永遠都係最美最善良o既您！

您又教訓我，講o野唔好咁尖酸刻薄去到盡，目的係為我o地將來o既小朋友積o的福…會o既咩？我個人慣佐直腸直肚，口直心快，有碗話碗嘛，係我o既性格o黎o架，既然您唔鐘意，我就盡力忍o下口，積o下口德啦。

>>April 11, 2007 at 1:39:44 AM GMT+8

2007 年 3 月 30 日 星期五 【酷熱】

星期五，同老趙一齊傾到八點半用咩design之類，好努力咁完成佐第二份signage o既review，下個禮拜可以拿報價。

本來諗住接您收工，但係您又因為個system要維修而早走佐，而老細同我又唔駛上康業度聽業主大會o的o野，所以大家都乖乖返佐屋企，冇得見，慘…

下晝過佐新鴻基開佐個無聊會。話說今年政府要退兩期rates畀o的客，公司IT team又懶好心想令到個流程快o的同方便o的，諗住提供o的協助畀Leasing o個邊，點知又拉埋我o地MSO上去聽。老實講，佢o地完全未諗個流程同o的deadline，上去就係discuss，IT同Leasing你一句我一句，根本唔見得會有結論，坐佐一個鐘o係度睇戲，結果IT班人出聲暗示邊o的唔關事o既人可以走，我o地一班MSO o既人先有得乘機走人…頂！

我o地做MSO o既，其實只係一部人肉機器，你o地班大佬想我o地做乜我o地咪做乜囉，最緊要你o地有o的明確o既指示，我o地接到order就做o架啦，o的決策o既o野，你o地傾掂咪send個email落o黎我o地就照做囉，懶係想集意見咁都唔知做乜，低能的。MSO一班同事o既結論係︰一切照平常咁做，根本就唔駛搞咁多o野，又睇o下佢o地最終會傾到個乜o野結論出o黎…

>>April 1, 2007 at 2:52:45 AM GMT+8