2007 年 8 月 26 日 星期日 【清涼】

繼八月頭有「I LOVE YOU BOYZ」o黎過新翠搞簽唱之後，去到八月尾都仲唔放過我o地，仲要搞個「舊BOYZ」其中一名成員關智斌o既簽唱會，真係做足成個八月…




呢o的垃雜o野終於都完晒，但係又要忙第二o的o野，又要摷返廿年o既house files，睇o下點樣同個陳年舊客Giordano夾完交舖…單係摷呢o的files已經夠挪命，上到機房閣仔五分鐘已經開始流晒汗，仲要摷到對手污糟晒兼成身濕到透都搵唔到，真係又要多謝個clerk，聰明到將o的咁有用o既o野全部放晒o係最難到o既地方。

>>September 15, 2008 at 3:07:51 AM GMT+8

2007 年 8 月 25 日 星期六 【酷熱】

開心~開心~好開心~今日過得好開心~ >3<

老趙星期五開始放六日大假去旅行，今個禮拜就由我返晒星期六、日，不過今朝唔係返公司，而係去training，不過所謂training，其實又有大部分時間出佐去講電話，搞到聽唔到個律師講o的court cases，o徙晒。

好在十一點半就散場，仲可以返到公司做o野，同埋同呀Man夾一夾美心爆喉轆喉單o野。下晝半hea半做，本來諗住六點收工，不過同老趙msn之後想上機房頂摷埋o的house files，結果就搞到八點先收工。

星期六係您唔駛返屋企食飯o既holiday，您同o的朋友仔聚完舊之後再o黎新翠接我。之後我o地去佐就近o既杏花村食元綠，o野食就預佐一般，但係出乎意料地o的服務態度極好，不過對您o黎講，睇星期三o個集o既《歲月風雲》好似仲重要過食o野，咁我就陪o下您個電視精睇啦！

之後坐車返屋企您就訓到好似豬豬咁…好累嗎？錫錫~啜啜啜！

當我需要您o既時候，您就會o係我身邊，o個種親密o既感覺同滿足，唯有您冇人可以畀到。謝謝您的愛！

>>August 28, 2007 at 2:44:21 AM GMT+8

2007 年 8 月 24 日 星期五 【酷熱】

記得早幾日無線o的電視劇集先至加插佐韓瑪莉遇上「祈福黨」，因為佢好關心家人，但係又太過易信人，所以幾乎畀人呃錢，估唔到現實之中同類o既事情居然係咁近…唉…又要寫多個IR… @_@

----------------------------------------------------------------------------------------------------------------------------

祈福黨5神棍落網　茂名伙拍來港　柴灣騙老婦5萬
《明報》08月 24日 星期五 05:05AM

【明報專訊】公安曾揭發有「祈福學堂」大肆培訓祈福騙徒的廣東茂名市，昨又有3男2女合伙來港找尋獵物，柴灣一婆婆不幸被選中，誤以為家人有重病命危，乖乖交出5萬元財物，著祈福黨代找神醫施法消災解難，但不幸中之大幸，5神棍剛把得手的財物放入衣袋，即被埋伏的商業罪案調查科人員當場拘捕，婆婆幸保不失。

身上搜出藥丸藥膏利市封

警方商業罪案調查科訛騙案調查組第3隊總督察郭麗嫻表示，3男2女騙徒分別持雙程證及護照，警方又在各人身上搜出藥丸、藥膏及大量利市封等物品，各人懷疑過去半年間從廣東茂名多次來港，在不同地區犯案，警方正聯絡其他受騙的事主到警署認人。

據本港及內地公安消息指出，本港街頭行騙集團多來自廣東茂名、電白、陽江、梅縣、五華等窮鄉僻壤，其中以茂名騙徒尤其猖獗，當地公安曾於2001年揭發有「賊頭」暗中開設「祈福學堂」，招收無業游民傳授騙術，如騙局的情節和台詞、「神醫」的事迹、「消災」的方法和道具的使用等，「畢業」後可獲安排來港做案，利用一些長者對家人的關心行騙。

自2003年起，警方商業罪案調查科針對活躍全港的祈福集團展開「鉤蟲行動」。郭指出，接獲一些受害市民報案後，警方便開始蒐集情報，部署多個月後鎖定3男2女祈福黨，發現各神棍近日再合伙來港，於是跟蹤監視，昨日發現他們向柴灣一名67歲家庭主婦下手。

探員現身　婆婆保不失

祈福黨昨晨9時在街頭藉故向老婦搭訕，聲稱其兒子厄運當頭，健康會有重大問題，其中一匪自稱自己認識一名「隱世神醫」，只要把巨額財物交給「神醫」施法，便可為其家人消災解難。婆婆信以為真，取來5萬元現金及財物，相約於新翠花園商場一間酒樓內交款。8名探員遂埋伏監視，當匪徒接過財物後，探員一擁而上表露身分，姓陳（43歲）、姓吳（40歲）和姓譚男子（29歲），以及姓戴（34歲）和姓莫（43歲）女子涉嫌串謀行騙，當場被捕。

>>August 26, 2007 at 4:48:27 AM GMT+8

2007 年 8 月 23 日 星期四 【酷熱】

今日調佐假，因為約定佐要陪您去中大見工。

其實香港o的大學o既estate management請人真係少之又少，今次係難得o既機會，雖然好多不利因素令到您唔可以好好咁準備，但係有時interview都要講運，明顯地今次您都in得唔錯，不過如果真係請您，您又會唔會做呢？我覺得如果有萬五蚊一個月或者以上，兩年合約係可以考慮o既。

之後我o地落佐沙田行佐陣街同食o野，今日可以緊緊咁抱實您，心情大好~

啜！

----------------------------------------------------------------------------------------------------------------------------

硬係唔駛返工先有事發生o既…

柴灣破祈福黨拘5男女
《明報》 08月 23日 星期四 12:35AM

警方商業罪案調查科根據線報，在柴灣新翠商場4樓一間酒樓外搗破祈福黨，拘捕3男2女。

今日11時，一名67歲婦人在酒樓準備將5萬元交予祈福黨，警員即採取行動，拘捕3男2女，全是內地人。

今年頭7個月，警方共接獲126宗街頭騙案報告，涉及835萬元。

>>August 24, 2007 at 2:34:13 AM GMT+8

2007 年 8 月 22 日 星期三 【酷熱】

今日五點五十分玩佐個pk判頭兩o野，叫做報佐少少仇，等佢唔好以為佢自己大晒又老馮咁。

話說上個禮拜四交佐舖畀One2Free，欠佢兩個三速掣，o個條粉頭就由禮拜四開始一直疲勞轟炸，係咁打電話o黎催生晒，好似我殺佐佢老豆老母欠佢一世咁，已經講佐會幫佢追返上手，佢都係要一日打九億次電話o黎，真係激到我嬲嬲o地。

星期一我畀佐兩隻舊o既佢，佢見到兩隻舊掣，就話而家冇人用，我早就知佢想「R」隻新掣，但係我係都唔畀佢，因為唔係老馮。之後佢繼續日日打o黎催，仲教我做o野，口講就話叫我唔好介意，其實o的語氣不知幾咁差，好，我就要玩鑊你！

德哥畀佐兩隻新掣我，我就即刻挪畀佢，但係佢個舖冇人簽收喎，我就打畀佢，反追佢o的裝修按金同保險copy，仲提提佢叫佢o的工人唔好老馮咁自出自入，入場要登記，一於同佢玩到底，要執正o黎做，真係話咁易。老實講，真係人不犯我我不犯人，但係犯著我o既人我一定要佢冇好唔好過，冇好下場！

放工前公司要拜神，走完第一轉又要走下場，真係趕。

今晚係您o地幫爸爸預祝生日o既飯局，有好多您o的親戚一齊呀，都係第一次見，過程大致歡樂，我呢o的後輩梗係唔好講咁多o野啦，坐低食o野啦！您又話會唔夠食，點知o的o野都食剩晒要打包！

您睇o下小朋友幾得意！o的細路係呢個時候先至好玩o架咋，細個o的同再大過o的都唔好玩。


嗯？！「李府」喎，係咪我娶您呢？


>>September 15, 2008 at 3:07:51 AM GMT+8

2007 年 8 月 21 日 星期二 【清涼】

好掛住您…

今日老細放假，工作尚算ok。有時我會諗，以老細一個做o野咁投入，有時甚至做到廢寢忘餐，又肯幫朋友o既一個男人，究竟佢背後o既女人會係一個點樣o既人呢？佢咁多時間擺佐落去工作上，佢老婆又有冇乍佢型呢？諗起都覺得好得意。

有次老細放假打電話畀佢，條友仔居然o係屋企吸緊塵，可以睇得出呢個男人其實都幾靠得住喎，雖然唔知佢係咪成日放假都幫手執屋吸塵，但係有做過點都好過冇做。

上網睇到山頂凌宵閣好似開返喇喎，見到呀南個手機有o的同佢親戚o係山頂影o既相，我估應該可以上去喇，等我揀個良辰吉日同您上去逛逛啦！我愛您！

>>August 24, 2007 at 1:46:39 AM GMT+8

2007 年 8 月 20 日 星期一 【清涼】

放完兩日，又要開始返工，唔可以算係好忙，只係o的工作非常濕碎而且o徙時間，查實物業管理就係咁樣，將好多無無謂謂濕濕碎碎o既o野砌埋一舊，咁就話係專業喇喎，死未…

上個禮拜發過脾氣後，除佐o係工作上有時躁底同經常粗口爛舌之外，我覺得今個禮拜o既心情轉好佐好多，思前想後諗諗我o地o既關係，發覺自己有時又真係太過固執，或者係「男大人主義」作祟都未定…

早幾日講到上屆o既事，我又覺得自己好似已經冇以前咁憎佢，不過唔咀咒佢又唔代表會祝福佢。條路點行，係自己揀o既，是好是壞都要自己承受。

----------------------------------------------------------------------------------------------------------------------------

算
張信哲

傷　當然也傷
但我表情毫不牽強
臨別也拍合照相彷似從前一樣

就當你走到了異鄉
各也生存塵世上
亦不想再發現他朝老了的色相

失戀唯有扮情願
怎可拿往事清算
連仇人仍未捨得結怨
曾相戀哪敢申冤

怎可能每事如願
失戀完繼續挑選
能隨緣才望得穿永遠
劇終總有過開端
有便算

想　當然也想
付上感情贏得景仰
原諒你告別那刻彷似逃亡一樣

任你去釋放你自己
我隻身重回天地
未必慘過我們一起看過的苦戲

失戀唯有扮情願
怎可拿往事清算
連仇人仍未捨得結怨
曾相戀哪敢申冤

怎可能每事如願
失戀完繼續挑選
能隨緣才望得穿永遠
劇終總有過開端
有便算

不與命運鬥氣我沒有氣
讓你贊我好心地
他有力量愛你我不怪你
和他不需要比

失戀唯有扮情願
怎可拿往事清算
連仇人仍未捨得結怨
曾相戀哪敢申冤

怎可能每事如願
失戀完繼續挑選
能隨緣才望得穿永遠
劇終總有過開端
有便算

>>August 24, 2007 at 1:36:09 AM GMT+8

2007 年 8 月 19 日 星期日 【清涼】

今日全日都唔係好精神，起佐身又再訓返，上個禮拜食晒o的葯後，個喉嚨又開始返唔舒服，可能係因為天氣太差…

好多方面o既事都好似由四方八面咁湧埋o黎，煩到嘔…您話我升佐做PO之後，o的脾氣大佐好多。究竟係咩原因呢？照計o的o野都係咁樣做o既嗟，咁好o既老細又唔會特別加壓畀下屬o架啦，搞咩呢？

搞咩呀？搞咩呀？搞咩呀？突然之間好迷失咁…辛苦佐日日都受晒我氣o既您…

好掛住台灣，好想同我最愛o既婆婆去台灣旅行relax o下~

>>August 20, 2007 at 1:05:13 AM GMT+8

2007 年 8 月 18 日 星期六 【清涼】

話說琴晚十三妹同佢男友o係apm見到我上屆同埋佢條仔，即刻就打o黎再今朝晨咁早就係咁send sms畀我，話覺得佢而家條仔比我樣衰，同埋佢條仔又覺得我上屆哨牙好醜樣之類（人o地個blog話o岩o岩做完激光矯視呀，話唔定遲o下會去箍埋牙…）。唉…唔好咁無聊啦，多多事幹人o地點樣關你鬼事咩！八八卦卦兼口多多搞搞震都可以話係十三妹o既強項喇…

分手都已經係大半年前o既事啦，人梗係有自由去追尋佢自己認為係好o既o野，人家覺得幸福咪由人家囉，你係咁講人o地o既不是又如何呢…總之佢o既事已經完全同我冇關喇，我冇興趣再得到同佢有關o既消息，唔駛咁八講畀我知o架喇，ok？！不過講真你同佢都幾有緣o丫，成日都畀你撞到正，證明九龍半島真係好細囉。

早兩日同十三妹傾電話，先知道之前佢屋企出佐事。唉，有時真係有苦自己知o既，幫到咪幫囉，幫唔到都冇辦法，順其自然罷啦。

今晚上佐您屋企食飯，聽到您呀爸話平時o係屋企做家務有幾咁辛苦云云，有o的怨氣咁囉。聽落都幾「銀」耳，真係家家有本難念的經。您係個孝順女，成日聽埋o的咁o既說話，要承擔埋呀爸o既情緒，亦難有時顯得咁「翠和」…我又明白多一點點。琴晚o的sms來來往往好倔添，我o地唔可以成日都係咁，咁樣好似唔係好健康…

返到屋企睇佐之前曾經想去睇o既港產片《跟縱》，有梁家輝同埋任達華，但係偏偏加佐個徐子珊落去，搞到非常之唔好睇，仲有個邵美琪好唔自然咁講埋晒o的好似粗俗佐o既對白，好差。我覺得一係就真係去到盡講粗口，一係就一句都唔好講，不倫不類最垃圾。

>>August 19, 2007 at 4:32:15 AM GMT+8

2007 年 8 月 17 日 星期五 【酷熱】

您覺得我o地拍佐拖半年，但係我都仲係唔明白您，其實會唔會係您唔明白我呢？

本來您o黎接我收工我係好開心o架，送佐您返屋企之後我再自己去食o野同返屋企，返到屋企一講電話您無情白事又發脾氣，話我連講說話去(乙水)您都做唔到，覺得我冇以前咁愛您，o係我o既角度您睇，覺得您好無理取鬧，不過我知道您呢期係o的唔方便o既日子，我都想忍耐忍耐。

後尾您再send sms畀我，繼續講我冇之前咁愛您，甚至連買o野畀您敷衍o既說話都唔講。呢期唔知您做乜，成日都話您覺得一個女人要佢愛o個個男人畀錢佢駛先至叫做幸福，又覺得個男人買o野畀個女人先會覺得幸福，但係我兩樣都做唔到，所以我就唔愛您，係咪膚淺佐少少呢？我已經身心俱疲，暫時唔想同您o係呢個時候談論呢個問題，但係您又偏要講，真係憫死我！

我知道您本身唔係一個貪錢o既人，亦都明白您叫我畀錢您儲起去，用o黎籌備我o地將來o既小天地。您話畀幾多錢您都儲都冇乜所謂，又話您扭我買o野其實只不過係撒o下嬌，唔係認真想我買o野畀您…

雖然唔係我o既性格，但係我自問都間唔中順應您有講「敷衍」您話買o野畀您o既說話。我o既作風係︰做男人o既，講得出就要做得到，斬釘切鐵話佐買就要買。難道您仲係唔了解我對我愛o既人o個份執著同認真？敷衍了事並唔係我做事o既一貫作風。

另一方面儲錢o既問題我比您更加有分數。我應承佐畀錢您儲起，我唔會食言。我自問我克制用錢o既能力比您更加強。或者我o係您o既印象之中係成日借錢畀人或者畀人昆錢，但係我自有我儲錢o既方法，您唔駛擔心。o係二零零六年咁艱苦o既情況底下，我都同上屆去過澳門、泰國、馬來西亞旅行，亦照顧佐佢不少飲飲食食購物駛費，再借佐最少二萬幾蚊畀人，但係我年結仍然可以死慳死抵咁儲到三萬幾蚊o係銀行呀！

我而家正在調校緊自己駛錢o既幅度，實際上我o既信用卡日常駛費已經由之前o既一個月六千幾減到上個月o既四千幾。咁o岩上個月申請完暫時提高信用額，去用信用卡幫您還佐萬八蚊學費，九月頭就要找萬二蚊卡數，即使您分期還錢畀我，我亦都要時間調整返自己o既流動資金。另外恒生最近改到最少要存五萬蚊先唔駛交月費，即使係十蚊我都覺得唔合理，我就更加想快o的放達到佢o個個無聊o既最低存款額，免得畀恒生克扣！

以上幾點我都同您講過，但係您就好似冇聽過咁。為佐呢個錢o既問題，我已經收埋畀自己一個人煩。我確確實實應承佐您九月尾出佐糧就畀錢您，您仲偏偏要日日都o係度喋喋不休咁o係我耳邊話我唔畀錢您、唔買o野畀您、唔愛您、唔錫您，即使您心裡面唔係真係想我買o野畀您，或者一心想我快o的儲到舊錢，但係我覺得反而係您完全唔明白我咁，您咁樣做只會令我煩上加煩！壓力百上加斤…

返完呢個禮拜工，真係日日都咁充實，做到不似人形搾乾搾淨。今個禮拜，我完成佐上一季o既variance report；收佐再交埋兩個舖，應付佐兩間電訊公司o既三班人再加佢o地o既三班裝修佬；恒生銀行白租半年o既舖終於開始裝修；同判頭夾裝佐兩個新CCTV鏡頭；報價訂呢樣訂o個樣；應付兩個個體戶超煩女租戶o既冷氣問題；緊急解決港燈星期二無端端停電兩秒搞亂個場；幫手處理Skinfood爆玻璃傷人；懲治茶軒倒晒o的食物殘渣落商場大渠搞到沙井塞湧水；Mirabell天花滴水惡化上去佢個又窄又危險o既天花頂整水盤；幫手搞小商場拆危險招牌；應付租務部n個無聊要求同reports；解答及協助個無能clerk處理每日o既無聊問題及工作；打出接收近百個電話及發出近廿個emails…

班友仔仲要係咁日日煩住我要我決定升職請食飯o既茶單！屎都滾！你有見過我得閒過咩？真係屎都唔得閒屙，一切都夠喇！畀我靜一靜好唔好？！唔駛好耐我就可以o係勞工處展能就業科開個「I」case叫佢o地同我搵過份清潔工…

總之，應承得您o既o野我一定會做，做唔到o既o野我一定唔會應承。我只想要一個傻傻o地咁跟住我電話接駁鈴聲唱歌去(乙水)我開心o既婆婆呀… :(

>>August 18, 2007 at 4:35:17 AM GMT+8