2007 年 6 月 17 日 星期日 【清涼】

郵差相約我7月3號去睇Christina Aguilera o既concert，我o係網上訂飛o個頁左搞右搞load佐廿幾次，先load到兩個前少少o既位，o丫，點知條粉腸又諗住自己去票房買飛，真係畀佢吹到啤啤聲！

我對CA o既認識好一般，淨係聽過首Lady Marmalade，不過佢鐘意，作為朋友o既，就陪o下佢去睇啦！朋友，在於分享喜愛o既o野。等我去聽concert之前刨多o的佢o既mp3s先…

She's soooo sexy!


>>September 15, 2008 at 1:42:06 AM GMT+8

2007 年 6 月 16 日 星期六 【清涼】

好多面色睇！好唔開心！都唔知您今日係心情唔好定係累，o的脾氣好似特別差咁，掂一掂都會火…您係樣樣都好，係口不對心講反話同埋成日要我估您諗緊乜呢樣o野最令我頭痕、頭痛。

終於都o係agnes b專門店見到呢個袋，本來想過兩日先自己偷偷o地買畀您，所以都冇即刻買。但見您扭計扭得咁犀利，仲講埋晒o的悔氣說話，話咩打電話叫第二個人買畀您，我估呢o的唔係愛一個人應該講o既說話嘛…聽完真係火火o地即刻想走。見您去佐睇衫就走去買佐個袋畀您，點知買佐您又話好似第二隻色好睇o的，又話個大o的o既size實用o的抵o的，真係頂您不順…算！

唔多鐘意agnes b呢個牌子，唔係佢o的o野唔好，亦唔係價錢，而係因為呢個係7A鐘意o既牌子之一，逢親同佢有關o既o野，我都唔鐘意。

晚上終於都睇佐想睇好耐o既Pirates of the Caribbean: At World's End（港譯︰《加勒比海盜：魔盜王終極之戰》），不過我都係覺得第二集最好睇、最好笑。您冇睇過第一、二集，有o的唔係好明，不過第三集有o的內容都係補充返之前兩集o既疑團。總括o黎講，真係一套無論劇情同拍攝手法普通o既西片，化妝同之前都差唔多，可能入去睇之前期望過大，真係一般一般。


您咁欣賞周潤發，送兩張劇照畀您喇。


>>September 15, 2008 at 1:41:36 AM GMT+8

2007 年 6 月 15 日 星期五 【清涼】

我真係好失敗！害人害物！

今日勁down呀，因為晨早溜溜就接到服務處同事聞風喪膽、租戶一聽到佢個名就罵罵聲o既租務部大紅人Debbie o既電話，話我o地琴日出畀周大叔o個封信o的內容錯佐！！！

pppppk！原來真係睇漏眼，真係唔知係咪鬼"yum"眼，居然改o的唔改o的，老細又睇唔到，咁就拿佐去寄…曾經試過o係收信時間o係個郵筒隔o黎等郵差o黎收信，但係結果郵局呃人，o係指定o既時間居然冇人o黎收信，結果白等之餘亦都撈唔返封信…死得…

好鬼死冇用，話過自己升佐做o野要小心o的，唔可以再咁容易出錯，明明睇佐兩次但係都睇唔到，第二段改佐但第一段又冇改，真係唔知自己做緊乜…搞到老細要同我揹呢隻鑊，真係唔死都冇用…唉…好唔開心，唔知自己點解可以咁唔小心…

失落…

>>June 22, 2007 at 3:15:10 AM GMT+8

2007 年 6 月 14 日 星期四 【清涼】

一如所料，CityU o個度係冇收到我讀master，我一做完個interview都知唔得o架喇。不過咁樣仲好，因為我都未儲夠錢一次過現兜兜咁畀，唔想過o的借貸生活，而家唔收反而樂得自在。

琴日學車畀師傅由頭罵到落尾，諗o下諗o下7月3日考下晝4點真係有o的危機，四圍都係學生、校巴咁，好唔著數，信心都係唔夠，不如又去改期啦…mmm…

可惡也！今日畀公司個屎忽鬼裝中我同Kenji o係4樓廁所gel頭煲煙！頂佢個臭肺o丫！條友仔擺明匿埋o係廁格裡面伏我o地，我同Kenji入到廁所o係廁格門下面裝入去，裡面居然係冇腳o既！我o地都已經覺得好奇怪o架喇，因為據我o地o既觀察，朝頭早好少人會踎塔，我部分人都係坐。呢條x樣居然狗到熄佐部walkie兼踎o係個屎塔上面偷聽！好在今朝我o地都冇乜o野講，大部分都係吹水無聊o野。

見個廁格裡面個人咁耐都唔出o黎，我都覺得有o的奇怪o架喇，仲要沖廁之前冇「搣」廁紙聲，加上仲有一聲開walkie talkie o既聲，已經可以肯定係條屎忽鬼！不過條友唔知係咪踎到腳痹，見我o地冇料爆就自己開門行返出o黎，不過畀佢撞中我煲緊煙！再睇返CCTV，原來條友已經伏佐我o地成三、四個字！有組織，有預謀！

放工過佐去接您收工，可以攬住您，感覺多麼好~ 我愛您！

>>June 15, 2007 at 12:35:49 AM GMT+8

2007 年 6 月 13 日 星期三 【雨】

今日係您o既cashback日，心情好忐忑…

由於有張百老匯電影中心o既贈券今日到期，唯有自己一個人去睇戲，我揀佐Cashback（港譯︰《愛情回水》），英國戲，最鐘意聽同睇。

故事講Sean Biggerstaff（哈利波特裡面其中一個男仔）演一個藝術系學生，最叻係畫畫，尤其鐘意女性o既裸體，夢想開畫展。而佢係好有能力去欣賞到每個唔同o既人身上唔同o既曲線o既唔同o既美。因為第一次拍拖第一次失戀，搞到嚴重失眠，於是去佐supermarket返通宵班，識佐女主角Emilia Fox云云。


套戲好生鬼，又好笑。好幾個鏡頭都有另類o既拍攝手法，加強佐視覺上o既刺激，令到平鋪直磘o既故事增添一o的色彩。好似呢個想一把火燒佐同負心前女友o既合照o既鏡頭，好有味道。不過點睇都係條新女正o的啦！


一住睇一住令我諗返起之前做過o既白痴戇居事。對方明明已經變佐心，仲居然走去四圍搵之前未能夠為佢覆行o既一o的承諾或者為佢帶o黎一o的佢缺乏o既o野。女人要變心，心硬起上o黎o個時，真係無可挽回。仲要好戇居咁同佢細佬sms，想佢細佬幫手買過張床褥畀佢，雖然最後都冇佐下文呀，但係當時居然仲去關心佢訓得好唔好，而o個張床亦即會係佢同另一個男人上床o既床，o個份矛盾o既心情，你都咪話唔心酸。


估都估到個男主角後尾搞得成個畫展，會請個女主角去啦，而個女主角一去到，就將之前o既誤會化解晒，因為o的畫通通都係畫佢o架！勁romantic，但老土到爆。最後一幕好靚o架，話男主角可以停住時間，帶女主角走佐出去雪地，互相擁吻。大團圓結局。


Ben Willis: Once upon a time, I wanted to know what love was. You just have to see that it's wrapped in beauty and hidden away in between the seconds of your life. If you don't stop for a minute, you might miss it.

返佐入大埔等您返o黎，好擔心，而您又好耐都未畀電話我，我真係好驚會失去佐您，失去一次都唔可以！最後見您個傻人雙手分別拎住一盒大玩具，傻傻o地咁落佐巴士四圍望…嗯…真係好想喊呢（忍住！）…您終於都返o黎喇…我好掛住您呢…凍冰冰o既您攬住我，本來都想緊緊咁抱住您，但我個身臭臭，下次香o的先啦…

我愛您，唯一。

>>September 15, 2008 at 1:41:32 AM GMT+8

2007 年 6 月 12 日 星期二 【清涼】

我的MegaBox之旅（2007年6月13日）

話說13號下晝同婆婆食完晏晝飯再冒雨送佐佢返公司之後，因為太悶o既關係，見身處九龍灣，橫掂都係，一於去呢個新mall睇o下有乜咁巴閉，順手睇o下有冇橋可以抄。

其實正如之前上prop. man.呀阮sir講過，決定一個mall o既成功與否，得一個條件，就係location。呢個騎呢MegaBox，位處九龍灣工業區，真係唔去過都唔知，原來就o係之前去挪「平安咭」o個度，即係超「隔涉」…

接駁呢個mall同已發展o既九龍灣旺區，就只得一條feeder bus，仲要o係德福。好難想像如果地鐵賤格o的唔畀佢加個站o係o個度，係咪真係仲會有人去。好在今日天陰陰有o的雨，如果唔係成百幾人o係等車o個度排隊都真係幾熱幾焗o下，仲要一等要等佐成四、五班車先上到，一企就企佐四個字有多…shit…

要等咁耐車先得，如果唔係新開幕，一次唔會吸引到咁多人，而好似我呢類又怕熱又怕等又怕煩o既人，更加只會去一次，因為實在太唔方便。

九龍灣工業區又有一個弊病，就係塞車，周圍都係大貨車，條條路都塞，真係o係車上面有冷氣都覺得唔耐煩。行十分鐘都到o既地方，坐feeder bus居然又要用佐十五分鐘…shit！

好多o野都未開門，見佢o的舖間間都超級大，真係難為佢o既租務部下下都要搵o的超級大有錢客去租咁大個舖，難搞，但係拆細o黎租又會失佐個場o既特色喎，唔通要好似九龍城廣場咁變晒做outlet場？！

廁所內籠o既design有九成係抄足apm，失望。以為會有surprise添…shit！冇功課交…

由下至上再上至下咁逐層行佐一陣，再同以前o既KS同事Bubble傾佐兩句，跟住就走。落到地下lobby，問個姐姐仔有冇巴士去旺角，佢話附近有架小巴，問佢紅定綠，佢就答唔到，仲老點我去counter問其他同事。去到counter，有個薯嘜男仔（醬爆個頭…shit…o係counter返工呀大佬…）招呼我，同一個問題，同一個答案，但加多一本地圖。

行佐去佢o地所講o既位置，原來就係107個總站附近…shit！呢度真係冇巴士去旺角o架！連香港最重心o既一個區都只係得o的等到你死都唔開車o既紅van，一係就行返去德福搭地鐵或者o個度先有巴士去各區，地理位置真係「超」方便！交通配套好差，通宵夜巿好難搞。

好難想像佢過佐grand opening之後仲可以點樣捱落去…

局住行返出德福，日曬雨淋加空氣超級污濁，仲要過幾條繁忙o既馬路，真係唔知o的上佐年紀同埋拖住一兩件細路o既家庭點行。半路中途見到Sino有塊地起緊樓，仲大大個牌寫住「Central Business District」，真係o岩喎，不過適用於幾十年之後，附近o既工廠拆晒重建o個時囉。

除佐商場選址問題最嚴重之外，仲有兩個我覺得呢個場好難做得起o既因素。第一就係佢冇一個大o既中庭去搞o的超級大functions（或者呢個場o既定位唔係咁，不過唔搞明星functions想做得起都難）；第二就係o的前線員工真係training得唔係好夠，態度一般之餘（客套o既門面說話已經o係香港o既服務業成為佐一個must），最慘係日日o係度返工都唔熟附近o的路，真係仲需要多加訓練喇…

8月正式grand open，到時再去一次又睇o下會點。Good Luck喇MegaBox。



>>September 15, 2008 at 1:18:41 AM GMT+8

2007 年 6 月 11 日 星期一 【清涼】

您話星期三就會從佢手中挪返之前交畀佢投資o既錢，衷心希望呢件困擾您o既事情到佐星期三就會有一個完結，衷心希望係咁。

男女之間o既感情，咩叫o岩？咩叫錯？對一個人有感覺其實係冇對錯之分，對與錯，只在於所做過o既o野。您可以對千千萬萬咁多個人有感覺，但唔等如您會對所有有感覺o既人做出向對方示好或者示愛o既表現，尤其係當你已經有一個穩定o既另一半o既時候。

「…不要激動愛情等他自發…」（聖經《雅歌》2:7）

「…發乎情止乎禮…」（吳森《情與中國文化》）

有時真係好頂唔順呀十三妹，雖然佢而家仲係後生，但係都唔好成日換畫啦…或者都係我害佐佢，搞到佢而家咁唔安定…唉…對於十三妹，雖然當年大家都係去到冇晒感情o個隻，但係點都算係我先負佢，好在大家都可以由朋友變成情侶再轉化返成朋友，大家無聊互串一番亦頗傾得到心事，可以互相提點o下，朋友o既其中一個好處本應就係咁，大家談論起以前o的低能o野亦可互相揶揄一番。

上個禮拜五o係車上面聽到衛蘭首《大哥》，心裡面好不是味兒，我其實好憎呢首歌，因為首歌令我諗返起o個時同前一屆o岩o岩拍拖，落bar飲o野o既情景。其實每一日都有好多唔同o既經歷，有開心有唔開心，前一屆o既事令到我咁唔開心，錯就錯在o個時同佢影佐太多o既相片，呢o的咁o既記錄，加深佐受傷害後o既記憶，以致我冇法子原諒呢一個人，我o既腦中亦只淨低對佢o既壞記憶。

Josephine亦係一個只會記得開心舊事o既歷屆，縱使以前相處係有咁多瑕疪，但大家都係年紀小，o係咁多年愛情路上o既跌跌碰碰之中，大家都有成長，大家都有互相扶持，互相支持對方努力咁去搵一個自己好愛亦好愛自己o既伴侶。我相信媽媽其實最鐘意就係呢個女，而並唔係7A。因為佢好識孝順人，仍然會記得我媽媽，有時又會孝敬o下我媽媽，而我媽媽提起佢o既時候都仲會笑，平均提起o既次數亦遠遠超過任何一個。希望佢早日搵到個識得對佢好o既男人。

對7A的，我覺得係媽媽多多少少係覺得我欠佐佢，作為一個母親，有為兒子補償o既成份在內。媽媽亦識趣唔會o係我面前提起佢，因為明知我唔鐘意佢提起呢個人。o係我腦裡面，亦只得佢攬住我媽媽o個個喊包樣，真係諗起都咋舌。

您呢…雖然係小朋友o的，又有o的奇怪o既小姐脾氣，但係其實我知道您本身都唔想發我脾氣o既，有時我又係唔抵爭o架喇，講百厭o既我百厭過您啦，成日激到您有氣冇地抖。第日老佐如果患佐老人痴呆，您會o係我腦裡面留低o的點樣o既回憶呢？會係您o既木獨諗o野樣o丫？定係您o個個傻笑揮手樣呢？還是係您突然之間記得返o的o野o個時o既覺得自己好唔抵o既樣呢？我又會o係您腦海裡面留低點樣o既回憶呢？

我o地生出o黎o既BB又會似您多o的定似我多o的呢？

好掛住您，好想攬實您，同您講︰I love you~

>>June 12, 2007 at 8:42:41 AM GMT+8

2007 年 6 月 10 日 星期日 【雨】

今日好懶惰，留o係屋企成日都係咁訓…

好似訓極都唔夠咁，琴晚三點幾開始落大雨同打雷，好在返得屋企早，如果唔係有遮都濕透。o係屋企上o下網，msn o下，四點幾先訓，但係十二點就醒佐，食佐少少o野再訓過，其實有o的累。

如果一早出佐去睇早場，可能您又唔會咁憫，最多都係眼訓o的嗟…所以您唔可以畀我咁懶o架，如果唔係我真係一日可以訓足二十四小時唔願落床出街…

不過真係好熱呀，訓o係床上面又唔想郁…星期日，懶洋洋…

好想見您o架，但心有餘力不足，難以抗拒張床o既魔力…mmm…都係我唔好…

我愛您！117日點解會記得？因為…我成日都數住囉！啜~

>>June 11, 2007 at 2:22:32 AM GMT+8

2007 年 6 月 9 日 星期六 【雨】

元朗之旅…累累…

今日您要去元朗間山卡啦學校度考公務員的中英文試，我就要放佐工先可以去接您。o係柴灣地鐵站去元朗西鐵站，都只係用佐一個鐘頭十分鐘，o個十分鐘仲要係等東涌線開車而用o既，其實兩處都好近嗟！

唔知呢o的試係咪真係咁難考o既呢？雖然唔駛錢考，但係我就真係冇乜興趣去考，好似好辛苦咁，您考完後又好似好失望咁。有時又會諗，究竟o係政府部門裡面用成語o既機會有幾大呢？點解要人o地考埋o的咁o既o野呢？呢個政府真係奇怪。

我o地都未試過一齊o係元朗行街街，今日總算有個新地方o丫，突然之間好想食糖，居然夾佐成三十蚊咁多…仲想食芝士波呀，不過您唔畀我食o丫… @_@

行o下行o下最終去佐打邊爐，又唔係貴，o的o野食係自己去挪o既，可以食幾多挪幾多，唔駛間硬食，幾好！您就話佢o的豉油好入味，不過又好似辣佐o的…好滿足，因為又可以同您打一個快樂o既邊爐！

總算發現新大陸，但係元朗同大埔之間，只有一架64K，仲要搭成個幾鐘，都咪話唔辛苦喎…坐巴士坐到成個人散晒啦，好在聽日放假嗟…

咪顧住打機啦，激死我！吼！

>>June 11, 2007 at 2:08:33 AM GMT+8

2007 年 6 月 8 日 星期五 【清涼】

今次升職加薪最大o既impacts，係我第一次o係同一間公司裡面做到可以升職，同埋我而家o既人工，終於都高過佐我讀完大學出o黎，第一份工o係中大半工讀做TA o個時呃返o黎o既studentship！

諗以前返好多o野…為佐讀呢個所謂o既master，開始搬出去住，遠離佐屋企人，失去始終都比得到多。最慘就係搞到搬返屋企時有佐鼻敏感，更加係唔衰挪o黎衰。爛鬼master又挪唔到，事業起步又遲佐兩年，眼見好幾個最好o既朋友仔都生活上晒軌道，有o的更加結埋婚，甚至有車有樓，真係唔白點解自己o的o野去得咁慢…

而家o係物管，總算比上不足比下有餘罷。不過仲有好多o野達成，條路要點行呢？

----------------------------------------------------------------------------------------------------------------------------

完全因你
彭羚

從前的我　迷途失望
而人海裡面困惑只感到恐慌
迷途的我　如何泊岸
浮沉中碰著這份愛使我嚮往

完全因你　重燃希望
無窮黑暗內擦亮了心裡燭光
完全因你　情懷激盪
隨緣竟碰著你令我得到釋放

你改變命運的結局　陪流淚的我笑著看
一個韆鞦於春雨裡　猶像我心在搖盪
打破命運　為我阻攔冬日風雪下降
能令一生不迷惘

從前的我　從前的禍
明明出錯但你令我擺脫痛楚
完全因你　來臨相助
而人生已沒有不可
悠然地唱罷這首歌
多得你用心再造我

你改變命運的結局　陪流淚的我笑著看
一個韆鞦於春雨裡　猶像我心在搖盪
打破命運　為我阻攔冬日風雪下降
能令一生不迷惘

從前的我　從前的禍
明明出錯但你令我擺脫痛楚
完全因你　來臨相助
而人生已沒有不可
悠然地唱罷這首歌
多得你用心再造我
感激你用心愛著我

>>June 11, 2007 at 1:33:33 AM GMT+8