2007 年 11 月 26 日 星期一 【微冷】

新老細上場，但只係見到佢半晝…究竟公司想點？唔係要兩個老細走三個sites呀嘛？！

晚上同郵差家姐傾電話，講起搵工同讀書o既事。唉…點解而家打份工都要諗埋讀書？以前o的人勤勤力力咁做o野就會有酬勞，但係而家打份牛工都仲要諗o下點樣進修先可以吸引到老細去用你…唉…好鬼煩呀！

話說佢之前過英國讀書原來係讀MBA，佢真係一個好讀得書o既人，係咁讀書都唔厭o既，變態！其實讀MBA亦有諗過，不過好似對做prop. man.呢一行冇乜用…要讀個master，要考o的有用o既牌…錢錢錢錢錢…

咁o岩佢又apply佐份九倉o既工，內容好似同prop. man.有關，問我覺得呢行點。我只可以同佢講，做我呢行一定有工做，而且亦都唔會餓死。冇乜前途o架咋，所以力勸佢如果似工真係做同prop. man.有關o既o野，就千祈唔好做喇…

為佐傾呢個電話而冇聽您電話，又搞到同您嘈佐一大輪…唉…

>>December 3, 2007 at 2:22:30 AM GMT+8

2007 年 11 月 25 日 星期日 【微冷】

嚴重懶惰休息日…

最近有一個煩惱困擾住我，就係接唔接受老趙o既邀請過去利港o個邊幫佢手搞佢接手o既三個場。

Pros︰
1) 新翠已經做到第三個loops，部分o野已經駕輕就熟，新場新挑戰，個人唔駛咁頹；
2) 出去見o下世面，學多o的其他o野；
3) 升SPO、加人工機會大增；
4) 有老趙照住，佢人面廣，衰佐都多條後路可以走；
5) 拍住老趙一齊上，大家o岩晒咀型，工作開心o的、成功感大o的；
6) 離開KS最細o既region，唔駛畀而家個regional i/c局限住發展…

Cons︰
1) 接手之後可能會好忙，到時乜都要由頭做起，可能會少佐時間陪女友；
2) 遠到死o係香港仔，無論坐巴士或者駕車，都係要錢同埋時間；
3) o個邊成pat屎咁分分鐘做唔長就bye bye；
4) 要由頭認識過一班新同事，要摸清佢o地個底都唔係容易；
5) 如果要兼顧新翠同利港兩邊，面對跨region o既不明朗因素真係生死未卜（小氣o既regional i/c）；
6) 可能忙到冇時間讀書…

煩…

>>November 28, 2007 at 2:19:53 AM GMT+8

2007 年 11 月 24 日 星期六 【晴】

今朝七點半就起身喇，仲要早過平時返工，因為約佐師傅飲茶。約佐八點半o係灣仔，星期六唔塞車時間o岩o岩好，但係估唔到師傅仲遲過我到！哈哈哈！

師傅一到又o係度講o的的士佬喇…唉…的士佬有時真係唔抵爭o既，玩晒o野咁頂住架巴士搞到我師傅遲到。食過早點師傅就帶我駕車入淺水灣，因為我仲有鐘o係佢度，佢就應承我教我駕車入淺水灣，話練大o的我個膽喎…嘩，都咪話呀，左邊係山右邊係車，都咪話唔驚！

學完車就入大埔同您再飲多次茶，您都咪話我係順便先咁好死入o黎陪您呀，我其實可以返屋企覺覺豬o架！見您下晝要去上水考試，咪等您開心o下見多我幾面囉。

跟住同您入佐上水，無無聊等佐您三個半鐘考個公務員試…我自問就真係冇咁好心機成日考埋晒政府呢o的試去搏份政府工，我點都覺得做私人機構會開心o的，前途會好o的。

考完試我o地再返落沙田行街同打邊爐。西田多人到搞，o的人好似傻佐咁前世未買過o野咁係咁爭住買平o野，您就笑笑口咁話可能我o地兩個係唯一入到西田而空手而回o既兩個人…

我唔鐘意呢種購物o既經驗，無拘無束咁去買自己想買o既o野先至係開心o架嘛！又唔係冇錢，駛乜差在o個一個幾毫？

>>November 27, 2007 at 12:54:39 AM GMT+8

2007 年 11 月 23 日 星期五 【微冷】

成日都唔記得scan佐張考車表格做紀念，其中61個同棍波私家車有關o既項目我夾埋都係得22個剔咋！最緊要係兩部分都合格晒嘛！

諗o下諗o下都可能要多謝多一個人，就係上屆o個個小賤人，唔係多得佢o既刺激，我都唔知幾時先有衝動去考個牌返o黎，亦都唔會肯駛錢買車，我絕對會小心駕車，因為我留返條命睇o下個賤人點樣o係低水平之中繼續循環折墮落去。



下個目標，都應該係買樓或者搬出o黎同我最愛o既婆婆住。

>>September 3, 2008 at 1:06:44 AM GMT+8

2007 年 11 月 22 日 星期四 【微冷】

英格蘭緣盡2008年歐洲國家盃！簡直係普羅球迷o既喜訊！GOOD！

一起身開電腦上網，睇一睇琴晚歐洲國家盃外圍賽最後一輪比賽o既賽果，一睇！難以置信！英格蘭主場輸二比三畀克羅地亞！再去另一個網頁，一開就見到下面呢張相！


Oh... it's tooooo good for me!

我又唔係真係咁憎英格蘭，就晒都係睇英國波大，聯賽中亦不乏愛隊，但國家隊o既表現真係一直都令人失望。

以球迷角度，英格蘭戰術單調之餘亦缺乏突出o既個人技術，整體發揮一直保持低水平仲要牙擦擦，分組賽要其他老早已經出局o既球隊幫手先保持一線生機，最後一場之前仲要輕敵以為自己贏硬，結果咪半場已經輸到甩褲囉！領隊排錯陣又要揀錯人出場，仲死唔要面話自己點都唔會辭識，最終咪又係畀人炒魷！

由賭仔角度睇，呢隊咁o既票房毒葯，賠率低唔值搏，往往係贏粒糖輸間廠o個隻，都唔知係咪收佐莊家錢，所以永世都唔駛旨意我會投注o係佢身上。出年歐國盃少佐英格蘭，真係分分鐘o的賠率都好分o的呀！

>>September 3, 2008 at 1:08:37 AM GMT+8

2007 年 11 月 21 日 星期三 【微冷】

鬧鬧o地交o既我o地今晚繼續同舅父傾埋您買保險o既o野。

您有時會叫我將您o既意願轉達畀我舅父聽，但係我一直都冇幫您，亦都冇表態您份保險應該點買點分佈，係因為我覺得買保險呢件事其實都幾個人化，慼該盡量唔好畀第三者影響，學我舅父話齋，唔係買多少o既問題，而係最緊要個保額夠同埋供款供得舒服。就算您一開頭條數預大佐，而家想減返低亦都唔駛怕醜怕唔好意思，因為您覺得買有儲蓄成份o既壽保而唔舒服，咪出聲囉，諗過度過唔想買住亦唔係問題。

晚間我o地再講起借錢o既問題同埋您爸爸媽媽o既事，我覺得我又未至於咁衰唔顧屋企囉，但係而家我仲未有家室喎，所以有時借錢畀人o既時候會顯得「豪」o的，但係實情唔係咁o架，我心中都有個budget係可以借畀人o既錢銀數目總數，如果債仔A唔還錢的話，債仔B無論點講都好，我都無能為力借畀債仔B，除非債仔A肯還錢囉，咁就再有available funding loan出去喇。

幫人有時都有個限度，我係明白的。

>>November 28, 2007 at 1:50:01 AM GMT+8

2007 年 11 月 20 日 星期二 【微冷】

好鬼死累呀！老細就o黎走，而家日日都有大半日唔o係新翠，唔係上HQ就係過置富、柯達咁…唉…心情一般，冇乜心機做o野…

今日另一件唔開心o既事，就係您知道我借錢畀人o既事之後，就不斷咁畀說話我聽。您都唔了解我點解要咁做就係咁罵…又唔係o的乜o野罪大惡極o既事，駛唔駛咁呀？唔開心！=(

我明白您係關心我o地o既將來o丫嘛，您估我唔關心咩…不過「在家靠父母，出外靠朋友」，今日有人時運低需要我幫手，幫得到o既咪幫o下手囉！人永遠都唔可以預知第二日有咩事會發生o係自己o既身上，幫到人o既，有錢出錢，有力出力，唔係要期望有乜回報，但至少都可以賺佐o的人情債，我諗將來總會有機會用得著o既。

借佐錢畀人如果人o地真係冇還o既，咪當係捐佐畀有需要o既人，當係「積福」囉，您都成日叫我積o下功德o架啦，幫到自己識o既人，總好過星期六買旗都唔知佢係咪真係挪佐o的錢去幫人啦…

我仲識分邊o的係守信o既人邊o的係走數o既人，最近我都推佐一大堆問我借錢o既人啦…但係我深信作為一個義氣仔女係唔會唔還錢o既！

>>November 27, 2007 at 12:07:29 AM GMT+8

2007 年 11 月 19 日 星期一 【微冷】

開始有o的累喇，連續返佐五日工咋喎…仲要捱多四日先放假喎…

好慘呀，個電話拎去整完之後，佢話成塊底牌要換，結果係所有同您之前o既sms都冇晒，電腦之前又format佐…唉…唔開心…

今晚超人返佐落o黎香港，打畀我叫我出o黎食飯，咁耐冇見梗係一定要出啦！原來條友聽日下晝考車，不過佢考自動波私家車仲要何文田，難度冇咁高，希望佢都一take pass啦！

聽佢講話想quit佐大陸份工都成年喇，佢話諗住搞埋手頭上o既project就會走，原來佢同o的朋友夾份o係沙田第一城開佐間壽司舖喎，三個人夾成八十萬，o係香港做食真係仲有得做咩？！

有時都真係好佩服佢，佢細我兩年，同佢條女已經o係銅鑼灣開佐間時裝店，而家仲話要搞埋食，咁有創業精神，仲要中港兩邊走加埋份正職，真係少o的魄力都唔得，超人不愧為超人！勁！

>>November 20, 2007 at 8:29:04 PM GMT+8

2007 年 11 月 18 日 星期日 【微冷】

搞掂佐個車牌，又係時候諗o下下一步考o的乜喇！人生總係要係咁追追逐逐，美其名就係咩自我增值，衰o的講句就係老本都靠唔住，你唔搵o的o野搞o下學o下就好快畀人淘汰…唉…

地產代理牌？

眼見有兩個曾經做過promotion同埋management o既人都成功咁入到SHK o既leasing度做，leasing呢班人簡直係野獸，能夠入到去做o既都唔係善男信女，雖然唔知可以頂得班野獸幾耐，但係至少亦都入過去做一段日子，出o黎搵工都有個靚「朵」…

最近亦都得到一個好搞笑o既消息，就係我o係新翠o既上一手，畀佢之前跟o既老細玩佐一鑊，帶佐佢入去Links之後，畀人投閒置散，連位都冇得坐。佢都有今日啦，成日打返o黎問我挪著數，走o個時又乜都唔handover乜都要我自己慢慢摸！

o丫…讀乜好呢？

>>November 27, 2007 at 12:58:38 AM GMT+8

2007 年 11 月 17 日 星期六 【微冷】

您o係度左諗右諗保險o既事…點搞？！

今晚幫您約佐舅父食晚飯，目的係您突然之間話想買保險，我就梗係要搵我舅父呢o的資深o既保險從業員啦，點諗都冇理由呃自己友啦，最信得過。至少萬一真係出佐事，都真係有個人會用心去follow-up個case。

傾呀傾，由於您幾乎要一個人養晒全家，您o既一貫作風又淨係識得顧人唔識顧自己，計計埋埋條數個保額居然要成二百幾萬咁多（誇張！），結果都係要下回分解，舅父要您返去諗清楚您o既需要，同埋您o既負擔能力，務求可以舒舒服服咁畀保費而又唔影響生活。

老實講，由個人需要做出發點去諗，點都好過話我一個月最多可以畀幾多錢而叫個agent幫您諗掂去，後者完全本末倒置。雖然話o的保額都要您出佐事先有得賠，益o既都唔係自己，但係一個人又點知自己會幾時死？一個唔好彩真係一買佐就死佐，咁您爸爸之後廿年o既生活點都有o的保證。

冇事o既話亦唔係白供保費，因為保險公司其實只係將每個人o既風險轉移。您冇事，但世界另一邊有個人有事，保險公司賠錢，錢亦係從冇事o個o的人度o黎。咁樣睇法亦可以話畀佐錢另一個有需要o既人（或者佢o既家人），幫到其他人亦當係積福o既一種，o岩晒您o既concept啦！

>>November 21, 2007 at 1:21:30 AM GMT+8