2007 年 5 月 8 日 星期二 【酷熱】

今日一個人食煙仔o既時候，突然諗到一o的o野。

我開頭一直諗，您怪錯佐我，我唔服氣，但係我都會嘗試(乙水)o下您o既，不過仍然口服心不服。其實我估實情應該係咁︰當您越愛一個人o既時候，您就越會著緊佢講o既每一句說話，即使對方只係隨便咁講佐兩句，甚或至只係講笑，亦好有可能會牽動起身上o既每一束神經線，所以您上個禮拜六先會咁大反應。

嗯…對唔住，我愛您呀！等公公錫返啦~ >3<

「愛情如濃酒可醉掉我，情人今生不再可取替；每句話語收於眼底，此刻跟你對望情難自制…」琴晚特登上網揀完先去訓o既我的接駁鈴聲呀，送畀您~

----------------------------------------------------------------------------------------------------------------------------

情難自制
彭羚

任晚風輕吻我耳邊　悠然相擁
共你的心意再接通　重投美夢

在髮端飄過是你氣味　滲出興奮的眼淚
今天他朝過去　全也屬你

花猶如是我心裡熱愛　懷著柔美色彩
此刻再盛開笑著靜待　得到你再以心灌溉

如果從前沒有跟你別過　誰亦難以清楚
放開各遠走這麼苦楚　心中最愛還是原先一個

愛情如熊火溫暖著　我情人好比心裡的一切
世界若要失光輝　但這點火永遠美麗

愛情如濃酒可醉掉我　情人今生不再可取替
每句話語收於眼底　此刻跟你對望情難自制

當從前共你分隔　我如像無悔輕易
可會知卻是同時　感覺到迷失的真意思

任晚風輕吻我的肩　悠然相擁
共你的心意再接通　重投美夢

在髮端飄過是你氣味　滲出興奮的眼淚
拋開傷感過去　重新親你

愛情如熊火溫暖著我　情人好比心裡的一切
世界若要失光輝　但這點火永遠美麗

愛情如濃酒可醉掉我　情人今生不再可取替
每句話語收於眼底　此刻跟你對望情難自制

愛情如熊火溫暖著我　情人永遠沒法可取替
以愛換愛多麼徹底　此刻跟你對望情難自制
此刻跟你抱著情難自制

>>May 9, 2007 at 1:48:32 AM GMT+8

2007 年 5 月 7 日 星期一 【酷熱】

琴晚諗o野打o野搞到五點幾先訓，今朝八點半就要起身返工，結果返到去都仲好眼訓，又冇乜mood做o野，小休到十一點先起身做o野。

工作唔算太忙，六點正就收工，準備去接您收工。

o的花係我送畀您o既拍拖第八十三日禮物o黎o架，係咪好靚先！今次間o野冇呃我，o的粉玫真係幾靚，唔殘。又話我o徙錢，您唔係鐘意我(乙水)您o架咩？

我自己覺得咁大個成年人，根本都唔駛鬧交o架啦，有乜事咪二口四面講清楚，四四六六拆掂去囉，呢壇咁o既o野搞到兩個人o係條街上面嘈，真係有o的離譜。兩個都咁硬頸，係唔肯認低威…

希望經過呢件事，大家會了解對方多o的，大家o既愛情小樹苗會成長得茁壯o的~

我愛您！

>>May 8, 2007 at 2:46:18 AM GMT+8

2007 年 5 月 6 日 星期日 【酷熱】

已經有好一段長時間冇o係日記度記錄過一o的對於拍拖時所遇到o既負面情緒，因為我記得有其中一個歷屆話過我，o係日記裡面講大家鬧交o既事，講我自己內心o既感受，再o係日記度留底鬧佢o既說話，今到佢好傷心。就係因為呢個原因，之後當我o係日記裡面提及兩個人之間o既事，都總係報喜不報憂，o的唔開心o既事，通通都習慣佐放o係心裡面，唔再寫出o黎。

今日我好唔開心，好似個公仔咁幾多滴眼淚都流得出。琴日係我同婆婆拍佐第81日拖o既第一次鬧大交，原因琴日已經提過，只係一個小小o既誤會，就漫延至今日開始o既冷戰。

您琴日送o既生日禮物其中有一樣係一把遮，我唔知道把遮係我o既生日禮物，您又話把遮係您送畀姨甥仔做生日禮物後，我話︰「生日送遮畀人好似怪怪o地咁喎…」跟住您就通街喊，再喊埋畀佢家姐睇。曾經，您話過男人出到o黎係要面子，我從來唔介意其他街外人點睇，但係琴日我覺得我o係您屋企人面前，已經冇晒。或者，我只適合做一個睇女人面色o既小男人。

您又話把遮係佢見我冇遮用特登買畀我。咁我真係覺得怪喎，大早我知道係我o既生日禮物的話，我一定即時收皮講句多謝就算啦，如果您只係想聽反話o既，您估我唔會講咩？唔通要我好似對住o的客咁對自己女朋友咩？

您仲叫我問o下以前o的女朋友，問佢o地呢件事上我有冇錯。我覺得錯就係錯在個人太真性情，您要我講多多遵從o既說話、假說話，我點都可以講得出，但係要對住自己愛o既人都仲要唔可以有o個句講o個句，我覺得好可悲。

點解我唔可以放佐工就做返我自己，仲要講句句說話都要就住就住？我好憎返工o個個自己呀您知唔知？做人o既o野幾假都有，您永遠都唔會知，o個個唔係真o既我。

我只係一個思想好直接、好簡單o既一個人，講o野直腸直肚，唔鐘意做乜都兜彎抹角。如果您鐘意我咁樣取悅您，咪出聲囉，我一定可以做得到。做每一件事、講每一句說話，我第一個諗法都係想講真實話，但係工作上已經唔容許我咁做。您以為人o地唔會呃你唔會害你，你就唔去防人，最終中招o個個原來就係自己。

點解要講到您就係唯一受過傷害o既人？

我唔想放佐工都仲好似返工咁趕頭趕命要交貨咁，人o地食飯食耐o的又話人o地唔打畀您，您話您眼訓都唔敢訓等我電話，埋怨我。咁您又有幾多次三點幾、四點訓唔著、發噩夢醒佐打o黎要我陪您傾偈，我都係樂意咁聽您講o野。

我真係全心全意想您開心，知您鐘意我陪您，我幾累都抽時間去接o下您收工，放假唔駛您走出巿區咁辛苦，我入去大埔陪您…我一o的o的說話都冇同您講過，幾死累都撐住，就係您講過一句，以前男朋友曾經嫌您住得遠，同埋您之前o既追求者太忙唔得閒陪您所以您唔選擇佢。咁我做錯佐o的乜？

我放閒日您要返工，我夜訓您都會朝朝八點打畀我，我都好想聽到您把聲，亦都知您想我陪您行去巴士站搭車，我都一定會同您傾到上車先收線，我唔覺得辛苦，知道您需要我。而家我都唔知我仲要點做，您先覺得滿意。好一句︰「你聽朝自己校鬧鐘，我唔會打畀你。」好冷漠，傷透心。

兩個人要走埋一齊已經好難啦，大家來自唔同o既背景，有唔同o既性格本應都係理所當然。有問題又只係識得自己走埋一邊鑽牛角尖，話咩冷靜o下，咩有心理準備會分手。我只係講過一句送遮畀人怪怪o地，您就講過無限次話要分手，咁算係乜？您好心痛咩？咁我係咪就唔會心痛？

呢o的說話講畀您聽又怕傷害您，我年半前已經習慣收埋自己一個人受。您卻係一有唔開心唔滿意o既事就話分開，又話如果大家咁辛苦就應該係性格唔o岩，究竟有冇咁唔負責任？

我唔介意畀您佔有晒所有我o既一切，老早亦已經有朋友同我分析過，認為您佔有慾其實好強，鐘意自由自在o既我，會好難適應，但係我願意唔出聲努力去將您o既習慣磨合成我生命o既一部分。返晏放工遲，返到屋企食飯食得慢，傾唔到電話都可以成為一條罪，我真係唔知點樣我先可以無罪釋放。

我唔想提我做過o的乜，但係每當您鬧分手時，我個腦都會自動回帶，曾經為您做過o既事、令您笑、令您嬲o既事。您記得我送過手錶畀您嘛？冇心思咩？您記唔記得我送隻錶畀您o個時您有咩反應呀？您第一句就話唔要呀，仲話我o徙錢。本身鐘意Titus同Citizen，最終都四周圍搵，揀佐隻最新又襯您o既Seiko，點知您o既反應除佐唔開心之外，仲話要拿隻錶去賣返錢！我hurt唔hurt？hurt。我有冇話您知？冇。

好多o野，都係看在眼裡，放在心裡。常常記掛您o既好，慢慢體諒您o既壞。唯有您先了解我o既懦弱，唯有我先了解您o既焦慮…

我係一個鐘意諗一步做一步o既人；您係一個諗清楚目標先去做o既人。兩者係好唔同，亦可以互補不足。您認為我唔主動去計劃我o地o既將來，但係我唔係一個望到好遠o既人，講得好聽就係「睇(食送)食飯」，唔好聽o既就係「見步行步」。

不過唔代表我冇計劃、冇諗過，只係未有把握o既o野我通常唔會做，亦都好少講，講得出就要做得到。您根本就同我老母一樣，睇死我一世冇發圍，淨係識得食煙、賭錢、打機四圍玩，借晒成副身家畀人又唔追人還錢，從來冇為將來打算過o既廢人一件。

記得大家o係埋一齊o既原因係乜？係因為大家都累，想搵一個終身o既伴侶，所以先有spark撻得著。呢個共同目標早o係您同我上一次拍拖都已經諗緊，終身幸福唔係挪o黎吹水講玩，我要認真o既時候會認真到不得了。我知道您喜歡有個憧憬去追尋，好童話故事式o既，但係我卻o係呢方面相對o黎講老土踏實。您想聽o既您可以問我，但係知道自己未有能力去做到o既事，我真係唔想亂咁吹咁多，您想聽o既我亦可以o係度講o下。

我知您想35歲結婚生BB，其實我覺得早一、兩年都冇所謂，最重要o既係能夠有一筆錢去結婚同買樓畀首期，呢筆錢約莫分別會係三十萬同起碼十至十五萬。買樓我會揀新界，因為空氣好，樓價較平，最好就o係返大埔，因為近住您屋企您可以隨時照顧您爸爸，不過我一定會買二手樓，一來平o的二來而家o的一手樓真係貴得o黎冇品質保證，我唔想因為一層樓而成為家中o既重擔。

我份保險約莫仲有六至七年就會break even唔駛再供，到時我會為您買一份保險，又或者未break even之前兩至三年，將我而家份保險轉佐您個名，再買過一份畀我老母。我唔善於投資，亦都唔睇好買投票呢類活動，我都肯畀錢您去玩，證明我都有心去試o下快o的滾大舊錢。

我想讀個Master挪個MCIH，目的都係想搵機會升。KS做唔係唔好，但係等佢升睇怕都要好似老趙咁做佐十年先升到APFM，我唔想咁，我想快o的搵多o的錢去養您，已經做佐兩年APO喇，我唔想苦等落去，但自知未夠料出去搏，叫價15K唔係咁容易，細公司又唔想做，但我仍會盡終於我目前o既工作。

學車唔係為佐玩，而係有一技旁身，第日接送小朋友返學都方便。冇Master讀就出年再報，學識駕車再去考地產大牌，因為做leasing先搵得錢多…仲有好多好多o野…o丫，仲有，我要買Cartier o既結婚戒指啦…簡單得o黎好靚o架！

我有冇諗過？有。係咪話實行就實行到？唔係。我有冇同您講過？冇，因為都只係計劃當中。

全世界o既人都可以誤會我，唯獨您唔可以，您一定要企o係我o個邊。只可惜您仲係一個成日要人(乙水)、心靈脆弱得很o既小朋友…

或者十三講得o岩，承諾只係偶然兌現的謊話，但係人往往就係鐘意聽o的虛無漂渺o既謊話，不過我唔識講。

>>May 9, 2007 at 1:30:46 AM GMT+8

2007 年 5 月 5 日 星期六 【酷熱】

今日您又試突然之間表現得好反常，令我覺得好無奈同不安。

實情係您為我準備佐四樣生日禮物，分別係溫暖牌頸巾、用第一次送畀您o既花製成o既乾花、萬字夾座同埋大口仔遮。

我完全無意挑剔您買畀我o既禮物，我只係表達心中o既一點意見，事實上我從來都未試過送把遮畀人做生日禮物，亦冇收過遮做生日禮物，所以我先至咁好奇。但係兩句無知、無聊o既說話，我完全唔明點解您會咁在意，誤解為我唔鐘意您送畀我o既禮物，您實在太敏感喇，諗多佐。

您叫我睇o下您寫畀我o個封信，睇o下您幾有心思去揀禮物畀我。我明白您揀o既每一樣o野都有佢o既背後原因，我亦鐘意您送畀我o既每一樣o野，只要係您送o既，或者同您有關o既，我就會鐘意啦！您記唔記得我同您講過之前有一個人，話因為我太厭尖，所以佢諗唔到送乜禮物畀我，結果就乜都冇送喇！物輕情意重，我根本就冇乜特別要求。

對唔住，整喊佐您，係我衰。不過您都唔好慣性測試我o既EQ有冇進步啦，好冇？

您話您永遠愛我，我都係，永遠愛婆婆~

>>May 6, 2007 at 3:31:54 AM GMT+8

2007 年 5 月 4 日 星期五 【雨】

個Master o既interview in得唔多好，發覺n年冇正正經經咁講英文，唔知自己想講乜，加上面對住一o的完全冇接觸過o既巿區重建作為討論題，group interview o個時已經唔係好，individual interview又問到車場，pppppppk！兩邊都開唔正我識o既o野，天才波打唔成，睇o黎收o既機會都凍過水。

不過諗深一層，自己都真係未準備好心情去讀書，加上我想現兜兜一筆過咁畀晒o的學費而唔想借錢或碌卡畀，唔收我或者都係一件好事。

之後去接您收工，本來都送您返大埔，但您見我夜晚要學車，仲要好肚餓，您都係同我去佐Pizza Hut食o野，好豐富o既晚餐呀！一見到咁多o野食就好開心，食食食食食！唔得了，好快變肥仔喇！

不過我o既預言亦實現佐，同我拍拖o既女人一定會增磅o架喎！ccc！:)

送佐您上巴士就去學車，今晚一開車就死佐兩次火，可能太耐冇學，但係駕佐陣都開始適應，而且又學識佐o的玩「極力子」o既秘訣，好過癮o架，所以學棍波係冇錯o既。之後又去佐學調頭，嗯…好似好複雜咁，不過唔緊要，我好有信心好快就可以自己handle o架喇！今日去佐好多陌生o既路面，師傅成日都話︰「畀油啦！爽o的！去啦！」原來駕車真係幾有樂趣o架！

>>May 5, 2007 at 6:12:59 AM GMT+8

2007 年 5 月 3 日 星期四 【酷熱】

聽日要去CityU interview，都係時候要準備o下到時有乜o野要講。

好努力咁趕住清埋o的report畀老趙簽，月頭真係特別煩，仲有o的退rates o既credit bills仲未出，不過之後放兩日假，下個禮拜先算喇！

好掛住您，好想您過o黎接我收工o架，但係知您好累，六點幾清晒所有o野，準備收工時打個電話畀您，見您乖乖咁上佐車返屋企，咁我又收工返去lu。好耐冇咁早收工返屋企喇！

因為早佐返屋企，順勢亦早食完飯，九點鐘又畀您(乙水)佐上床傾電話，迷糊中訓著佐…

弊喇，仲未準備interview o的o野添！ @_@

>>May 5, 2007 at 6:00:53 AM GMT+8

2007 年 5 月 2 日 星期三 【酷熱】

今日本來諗住放假，但係約唔到學車，咁就不如星期五先放全日，方便去interview之餘，亦可以訓到夠先去in。不過實最主要原因，係如果今日放佐假，恐怕月頭o的工作唔可以一日之內清晒，唯有今日照返工，先至係最好o既選擇。

做做做，做到傻晒咁，好在放佐工就可以見到您！見您個人累累o地，本來諗住求奇食個飯就同您返屋企，點知您突然之間又好精神咁話想去唱K，好o丫，去唱個飽啦！

您個傻豬一開波食個鯪魚球就畀條好細o既魚骨吉親，整極都整唔到出o黎，不過好在唱歌唱到high high o地唱完之後就冇事。您呀，玩到成杯檸水倒晒落我條keep佐幾個月都唔駛洗o既牛仔褲度呀！都唔知好嬲定好笑… >_<

>>May 5, 2007 at 5:55:31 AM GMT+8

2007 年 5 月 1 日 星期二 【酷熱】

琴晚Carol、Angel同David仔連埋我四個出佐去食飯飲o野傾偈。

Carol經歷過一段短暫o既男女朋友關係之後，我仲以為佢唔會翻兜添，點知過佐一個禮拜又走返埋一齊。兩個人一齊，最緊要係有一o的共同o既夢想或者理想，有目標咁一齊行，或者可以容易o的相處同接納對方o既性格。

我覺得佢今次呢一對係冇，以Carol一貫行動派o既作風，面對住呢個慢熱o既男朋友，真係唔多樂觀。雖然佢以扶持對方進步為己任，亦o係互相進步中得到喜樂，但係面對住一個咁被動o既人，真係難免令人懷疑佢係咪有心一齊。

我聽落就覺得係個男人本身o既能力真係有o的限制喇，而且一個人本身o既進步，真係唔可能要依賴其他人，最後即使要分手，責任亦都唔在於女方，不過千祈唔好話因為搵到另一個可能會更好o既target而分手囉，咁就顯得好賤o架喇。

其實我都想您認識o下我呢班朋友仔，唔好搞到好似成個世界只得我o地兩個人咁。不過對您o黎講可能需要o的時間啦…

>>May 2, 2007 at 2:56:23 AM GMT+8

2007 年 4 月 30 日 星期一 【陰】

呢個無聊o既十三妹都同某屆歷幾有緣o架喎，成日都打o黎話我知見到佢同咩男人一齊，今次仲抵死，話見到o個個男人好過我好多。有幾好都唔關我事啦，o係我心目中佢只係賤婦一個。佢o個時都話我對佢好好o架，倒頭o黎咪又係話變就變，一個人要變心o既時候，根本就唔會再記得人o地對過自己有幾好。當買個教訓同得到一個經驗囉。

你自己都成日話自己條仔對你有幾好幾好，有時又話條仔點衰點賤啦，好同壞，係隨住時間、關係、遭遇等等o既外在因素影響o既，太主觀o既感覺喇。

希望你仲記得，你自己同我講過︰「承諾只是偶然兌現的謊話！」你仲認唔認同？

我珍惜而家我擁有o既關係，包括女朋友、屋企人同朋友，o的舊o野擺埋一二邊啦！

----------------------------------------------------------------------------------------------------------------------------

今日有o的輕微哮喘發，誘發o既原因，就係今朝同郵差msn o既時候，佢整佐一句︰「Tiger down to level sun insulted by dogs!（虎落平陽被犬欺）」真係頂佢不順，咁樣直譯法都得，但係我一睇就明，一明就笑到pk，跟住就由朝頭早到夜晚條氣都好唔順…好笑o既o野係要付出代價… @_@

「龍游淺水遭蝦戲，虎落平陽被犬欺；人情似水分高下，世事如雲任卷舒。」清．蒲松齡

「虎落平陽被犬欺」，他覺得自己本來很有辦法，像老虎、獅子般威風，卻沒有山林讓他一展身手，落到平地上連狗都欺侮他，既沒有得到應有的尊重，自是恨天恨地，怨恨國家對不起他，社會對他不好。他不會反省自己不是一條龍，不是一隻虎，只是一個普通人，只要改掉一些惡習，只要一轉念，和氣慈悲待人，就能旋乾轉坤，人人都會樂意與你相處。

>>May 5, 2007 at 6:15:02 AM GMT+8

2007 年 4 月 29 日 星期日 【晴】

訓到好晏，醒佐舒舒服服咁入大埔，再同您去荃灣行街，相聚時間好短暫。

您係一個好為食o既小朋友，哈哈，操肥您！操肥您！

原來荃灣係有咁多「長條型」o既商場，全部都係一條巷兩邊係舖o既舖排，荃灣係咪己經可以歸立做舊區？o的商場好舊咁，又亂，管著呢o的場都幾煩。

我o地o係荃灣分別，您比我仲更加快返到屋企，但係我始終都趕唔切同屋企人一齊食飯，真係好似唔係幾好… :( 但係又想同您一齊，矛盾。

>>April 30, 2007 at 4:22:01 AM GMT+8