2007 年 11 月 16 日 星期五 【晴】

兩個區議會候選人，本來冇諗住去投票，但係經過呢單o野之後，我就有佐決定。邊個做得o野邊個做唔到o野，真係心中有數。

----------------------------------------------------------------------------------------------------------------------------

From: [email protected] [email protected]
To: [email protected]
Cc: "SI[RS]27"@epd.gov.hk, "I[RS]26"@epd.gov.hk, "CI[RS]2"@epd.gov.hk
Date: 12 Nov 2007 10:59
Subject: Complaint of school broadcast noise from 聖公會李福慶中學 at Tsui Wan Estate, Chai Wan

檔案編號：(22) in EP830/00347

Dominic Lei：

有關柴灣聖公會李福慶中學傳出噪音的投訴

你於10月16日向本署提出上述投訴。

由該學校發出的噪音是受到《噪音管制條例》第十三條的管制。根據該條例的規定，本署須在噪音感應強的地方（例如住宅單位）進行評估，以確定有關噪音是否符合該條例的規定。如需要本署人員到府上進行量度噪音，請致電2516 1728聯絡本署康小姐，以便商討有關安排。

另一方面，本署已於10月25日建議該校負責人採取合適的措施，減低由該學校發出的聲浪。

多謝你對環境事宜的關注。

環境保護署署長
(盧敏儀 代行)
2007年11月12日

----------------------------------------------------------------------------------------------------------------------------

From: Ku Johnny
To: Dominic Lei
Date: 7 Nov 2007 15:25
Subject: 回覆︰聖公會李福慶中學噪音滋擾問題

檔案編號︰00602

致投訴人Dominic Lei︰

有關李福慶中學早會期間廣播發出噪音的個案

本人在接到 閣下的投訴後，己在次日早上到李福慶中學進行視察，發現中學集隊期間的廣播聲浪確實偏高，便致信李福慶中學校長戴德正先生要求改善情況。李福慶中學負責早會統籌事宜的蔡老師在稍後作出回覆，表示為了減低廣播對鄰近居民構成的影響，己調較擴音器的角度，並嚴格限制早會廣播所需的時間，亦會提醒負責早會廣播的同事注意在早會期間喊叫口號所發出的聲浪。

另外，我們亦在要求環保署就事件進行調查，收到我們的反映後，環保署己要求李福慶中學校方改善早會廣播所引致的聲浪。在11月5日(星期一)，環保署職員到鄰近李福慶中學的樓宇作噪音測試和評估，初步結果顯示李福慶中學星期一早上8:08至8:20的約10分鐘內進行全校早會期間，噪音沒有超出參考數據的範圍。但我們仍會繼續跟進 閣下的投訴，如學校早會廣播的問題未有明顯改善或 閣下對個案尚有任何查詢，請賜電90550733聯絡本人或37912525與辦事處職員劉小姐聯絡。

祝 生活愉快

東區區議員
古桂耀謹啟
二零零七年十一月六日

----------------------------------------------------------------------------------------------------------------------------

From:[email protected]
To: [email protected]
Date: 5 Nov 2007 10:28
Subject: Fw: 關於︰聖公會李福慶中學噪音滋擾問題

一位杏翠苑的居民(Mr. Dominic Lei):

你本年十月十六日的電郵已經收到。

關於你提及的噪音滋擾問題，本局已經與聖公會李福慶中學聯絡，跟進事件。校長並承諾盡量將揚聲器的音量降低，以減低對鄰近居民的干擾。如有進一步查詢，請致電2863 4609與教育局港島東區學校發展組聯絡。

港島東區學校發展主任
姚敬兒

電話號碼 : 2863 4641
電郵地址 : [email protected]

----------------------------------------------------------------------------------------------------------------------------

From: suk man keung
To: Dominic Lei
Date: 22 Oct 2007 22:30
Subject: Re： 關於︰聖公會李福慶中學噪音滋擾問題

Dominic Lei

多謝你的電郵，因近日工作較忙，未能及時回覆敬請原諒！

本人在區內工作己一年多，但從未接過有關居民反影學校早會噪音滋擾問題，在此非常感謝你提出的問題。

本人會盡快聯同民建聯內的一眾議員，研究商討如何可以解決閣下提出的噪音問題。

謝謝你的電郵！！

姜淑敏 謹上
2007年10月22日

>>November 17, 2007 at 1:52:48 AM GMT+8

2007 年 11 月 15 日 星期四 【晴】

好多o野做呀，放完五日假成桌面都係o野！ >_< 有排清！

今日因為個client o既事您好唔開心，其實我覺得您又無須太過自責o既…

所有人成年之後都要自立，食自己唔可以一味靠人，不過擺明呢o的人就唔係。

放佐工就唔好再諗工作o既o野啦，您成日都係咁話我o既！

>>November 21, 2007 at 10:41:50 AM GMT+8

2007 年 11 月 14 日 星期三 【晴】

今日您二家姐o係CityU行畢業禮，不過您話冇咁多個位，所以叫我下晝先過o黎影相。

一去到原來畢業禮有o野食o架！雖然o的o野係頹o的，但係有總好過冇o丫，o岩晒未食飯o既我！yumi！yumi！仲認識佐您兩個表姐添…之前我有冇見過o既呢？！mmm…

其實都幾唔鐘意畢業禮o個日影相，因為實在太多人啦，不過人o地畢業點都要「鄧」人高興o下o既…不過走來走去拎住鬼咁多o野真係好累o丫… >_<

之後我o地三個人返佐入沙田打邊爐，好快我同您就會變成兩隻肥豬豬… @_@

CityU o既天窗，都幾靚。


>>September 3, 2008 at 1:11:12 AM GMT+8

2007 年 11 月 13 日 星期二 【晴】

考牌一take過！yeah！我覺得自己都幾叻o架！不過都幾有運！

今日師傅有四個學生要考牌，都係要晒兩parts（即係調頭、泊位、斜路開車同埋出街），但係只有我一個兩parts都pass晒咋！

師傅話今日四個考牌官都好好人，叫我畀心機o的考。

個考牌官一上車，我就好緊張啦，不過調頭同泊位都係照做，初時我仲以為調頭o個時掂到個石膊（但係師傅話靚到絕），但係隻左腳就真係震晒，好似唔受控制咁… @_@ 泊完位做斜路開車，死得！又係釣「極力子」o既問題，結果架車溜後佐三次先開到車，不過我都試得多，一溜後就即踩腳掣，考牌官叫我唔駛急慢慢o黎再開過，最後都開到。

心諗，今次實肥啦，溜佐咁多次後…出到路面反而冇咁定佐好多，好似平時駕車咁。好在仲要考一條我覺得比較容易o既路線，個心都定o的。點知…

行佐一段路轉完個手臂彎之後，我先發現原來我冇校返高個side鏡，於是我就好誠實咁同考牌官講，問佢可唔可以停埋一邊先，因為自己唔記校返好個鏡，又掂喎。校完鏡之後再開車，見後面有架的士，諗住畀佢過先，點知個的士佬又停佐，考牌官話︰「人o地都停佐喇，你咪開車囉！」咁我就繼續去喇。

之後落斜我都有用三波同轉返低波o架，去到惠康個路口師傅成日話我唔望左，我亦都望多兩o野。最後一段路上都有轉二波同再轉返一波，學師傅話齋，要show o的技術畀考牌官睇。

到佐轉最後一個彎，師傅話唔好信o的試場扮維持交通o既呀姐，一定要停車同望左望右。點知我望得左右o黎，就釣死佐架車… @_@ 撻匙再去，終於都完喇…

到等成績時，因為都覺得死死o地，都冇乜期望。點知一接到張成績單，居然兩parts都合格晒！個人當時呆呆o地，un-fucking-believable！

可能個考牌官畀面我師傅啦，因為師傅話識佐呢個考牌官成廿幾年喎…但係下晝考o個個學生都係同一個考牌官，不過都係肥佐路試喎…唔理得咁多喇，得就得啦，好o野！好開心！

考完車請師傅食下午茶，師傅都好開心，特登推佐另一個學生o既booking同我去食。師傅千叮萬囑，叫我唔好開快車…嗯！知道喇。

我要多謝o既，唔單止係師傅，仲有o個個一直o係我背後默默支持我o既婆婆！啜啜啜~

>>November 21, 2007 at 1:02:38 AM GMT+8

2007 年 11 月 12 日 星期一 【晴】

師傅呃鐘呀！晨早去到，佢先至話有位姐姐仔都係聽日考，叫佢畀百二蚊我換佐我九個字o既學車時間，都不特止，仲要原來師傅只係寫低佐我今日學個半鐘… @_@ 呢個所謂o既最後機會，就係得九個字o係寶馬山上面練習泊位同調頭…

不過我又諗，師傅叫得我讓o的鐘畀其他人，係咪佢覺得其實我都已經操得有返咁上下，所以先有資格讓o的鐘畀人呢？

呢個Showhappy日記長年都係咁衰，唔係成個database down佐，就係login佐入去之後一按寫日記就自動logout返，真係吹脹！好鬼煩呀！想寫o既時候又寫唔到，幾乎晚晚都係咁，唔係要我o係個Word度寫完之後再等機會copy & paste落去呀嘛？！

>>November 20, 2007 at 8:05:28 PM GMT+8

2007 年 11 月 11 日 星期日 【微冷】

祝Angel生日快樂先！不過佢今年o既生日一定唔係過得咁開心…慘！

大件事！又轉新老細！

訓醒一上網，老細就同我講話佢要走，我問佢走去邊佢又支吾以對，於是我就出去學完車之後再返公司睇o下佢搞乜。

原來公司要調佢過置富… @_@ 玩咩！老細住上水o架喎！置富呢個場出晒名難搞，亦搞死佐唔少人，今次老細畀人調佐過去，真係凶多吉少，連佢自己都打定輸數，又話唔係做KS係最後一份工之類…唉…灰成咁都唔知點樣安慰佢好…

做佐未夠三年，就要換到第四個老細，新翠究竟係個咩地方呀？！唉…

>>November 20, 2007 at 2:12:36 PM GMT+8

2007 年 11 月 10 日 星期六 【晴】

繼續學車！努力！加油！特登連放五日假，就係為佐考車一take pass！

最後衝刺o既三日，安排佐每日最少都要學個半鐘車，而且仲唔係約佐九點半晨早就去學，而係中午訓到飽晒先出門口去學，免得浪費精神同時間仲有銀紙。不過卡住o係中間o既時間又好麻煩，半天吊都唔知約您幾點鐘好… @_@

今日真係第一次睇見、聽見師傅講粗口鬧人！話說o係寶馬山度上斜路，前面有架巴士上落客，後面有個的士佬係咁響按，咁我呢o的「學神」，就梗係唔理佢啦。點知巴士開車之後，個的士佬剷入巴士站再爬我頭，爬完頭就突然之間停車，師傅見狀好鬼慶，居然即刻叫我開車追… @_@ 我同師傅講唔好理佢啦，師傅死都要追，追到之後，師傅叫我開門畀佢落車，一落車兩個人就互罵，連o的老豆老母都搬晒出o黎…唉…o的的士佬係咁冇品o架啦，所以師傅成日都叫佢o地做「的士狗」… @_@

考牌要訣︰
「心靜神寧，耳聽目明：眼光遠大，及早變應；動作輕巧，爽手淡定；用波靈活，挪铫分明。望鏡頻頻，留意開停；路口換铫，擰頭姿整；泊位調頭，愈慢愈醒；安全禮讓，一箭功成。」

>>November 20, 2007 at 8:00:48 PM GMT+8

2007 年 11 月 9 日 星期五 【微冷】

琴晚送佐您返屋企之後，有個唔係咁熟o既朋友打o黎問我借錢…

呢個朋友雖然唔算係老死知交，但係佢都算係曾經o係我舊年失戀o既時候支持過我，見大家都搭得兩o下咀，萬萬估唔到佢會開口問我借錢。

之前佢都間唔中會打電話搵o下我，問我一o的關於澳門o既o野，因為佢想o係澳門搞生意，我又有親戚o係澳門住，就順水人情幫o下佢。

第一次問我借錢，已經係九月o既事，o個晚凌晨一點幾，九年冇打畀我o既佢突然打畀我，我仲以為佢有咩事咁急要同我傾，講到尾原來想「度水」，話澳門o個邊搞生意要錢週轉住先，過兩日就還返畀我，仲話唔急都唔會開口問我借。我見佢扮到咁急，就落街用提款機過佐5k畀佢，之後兩日佢都仲有打畀我，話要遲多兩日先還，後尾就音訊全無…

我都算喇，借畀人o既錢，心甘情願，要還o既自然會還，唔還o既我就當用少少錢買佐佢個人格。點知佢今晚又係成點鐘先打o黎，又話自己點pk點pk咁，好慘好慘，又話o的錢入晒貨，週轉不靈，又想借錢。我心諗︰你都唔好當我係傻仔先得o架！更何況呢排我都窄窄o地，想幫到愛莫能助…

跟住佢就不斷講自己點慘呀，又話連租同電費都冇得交之類，又話自己唔係唔還錢o既人，總之就係唔肯收線，話2k都殺。我見勢色唔對，就同佢講我真係冇錢，等我幫佢問o下人，試o下用我o既名義幫佢撲o下水，佢先肯收線。

收線之後，我打畀呀宏同佢講o下呢個case，佢話我第一次已經盡晒做朋友o既責任，今次唔可以再借畀佢，因為睇佢個款o個5k都唔還… @_@ 之後再打o黎，我都冇聽佢電話lu…

唉…可苦呢？5k就賣佐你o既人格畀我，你o既人格真係cheap成咁？！

>>November 16, 2007 at 2:42:47 AM GMT+8

2007 年 11 月 8 日 星期四 【微冷】

您爸爸今晚去飲，您就有得溜出o黎同我食飯喇！

您過佐o黎接我收工，好開心o架~ >3<

最近我o地開闢佐新o既打邊爐天地，就係依利莎伯大廈o既「百里鮮」喇。您話呢間o野o野食物比沙田娛樂城間o野新鮮，其實我就唔係好識分，因戈為煮熟佐都好似係一樣o既… @_@ 但係沙田o個間o野又真係好似越做越頹，係得個平字囉！尤其係o的雪糕，真係畀人搞到成pat屎咁，點食呀？！

呢間百里鮮仲有樣o野好，就係坐低就會送碟生蝦畀您，仲識郁o架，可以睇住o的蝦o係o的滾水度條尾郁o下郁o下，幾變態呀！哇哈哈！

>>November 20, 2007 at 2:03:21 PM GMT+8

2007 年 11 月 7 日 星期三 【陰】

今日學車麻麻o地…唔知點解突然之間失去佐o係斜路開車o個種感覺，一日到黑都o係度「溜後」，個「極力子」釣得勁差，點搞？！

識佐您二家姐都半年有多喇，有時真係好唔明，佢大您咁多年，點解好似您照顧佢多過佢照顧您咁o既呢？古古怪怪咁，佢而家決定搬返o黎屋企住，就搞到您好苦惱，您怕佢返佐o黎之後屋企冇晒清靜o既日子。

其實佢之前搬得出去，都係因為頂唔順您爸爸嗟，唔係去到窮途未路，我估佢都未必肯返屋企住o既…當佢第日搵到工做，一定又會再搬返出去。您講得o岩，佢咁樣搬來搬去係會令到其他人好煩，不過冇辦法啦，鬼叫佢係您家姐咩…

但係以佢一貫o既搵工作風，睇怕又真係有排都未搵到… @_@ 要知道一個人最緊要就係知道自己o既能力去到邊度，要睇(食送)食飯先得。明明自己o既qualities唔能夠達到某份工o既要求，又偏偏妙想天開人o地會畀錢請你，又確係太過無知喇。要知道一個副學士而家o係香港暫時都仲係廢到無淪，單憑一個副學士資格同社會上千千萬萬o既大學生同埋o的大陸專才競爭講學歷又唔夠人工，講人工又唔夠人o地寫得低，我真係睇唔到佢而家有咩優勝o既地方。

講到尾，好人好姐有手有腳搬佐出去，最終又係要死死地氣搬返屋企住，其實對佢o黎講都幾冇面同失敗o既，咁咪畀個下台階佢落台囉，不過以後就辛苦您呢個「和事佬」喇…

>>November 18, 2007 at 5:39:44 PM GMT+8