2007 年 7 月 17 日 星期二 【清涼】

今日您個頭仔好痛，所以放佐工我都盡快閃人，去佐九龍灣陪您返屋企。天氣實在太悶熱喇，而且本身今日都冇諗住出街，所以冇著去街衫返工，結果就係波衫波褲人字拖咁去見您。唔好笑我核突啦，我係大埔居民o黎o架！

臨收工媽媽先打畀我話今晚屋企冇飯開，屋企冇飯開變相我又多佐鬆動o既時間，可以送完您返屋企之後去睇Planet Terror（港譯︰《索女‧喪屍‧機關槍》）。


呢套戲未上畫已經引起佐好多人o既討論，上佐畫之後就更加多人討論。先唔好講o下o的人點睇套戲同埋我自己覺得套戲點，交待o下套戲o既少少背景先。


Robert Rodriguez（羅拔洛迪格斯，左邊呢條友）係Planet Terror o既導演，本來呢套戲o係美國係同Quentin Tarantino（昆頓塔倫天奴，第一次聽到有人同我老細個英文名一樣，勁！）o既Death Proof（港譯︰《玩命．飛車．殺人狂》）夾埋o係Grindhouser呢套戲度一齊兩個幾三個鐘，但係o黎到香港因為太長畀人cut開佐做兩套戲，但係可以睇做「下集」o既Planet Terror居然o係香港上畫先，睇完下集先有得睇上集，兩套戲互相連貫o既效果盡失…失望。


認識Robert Rodriguez o既原因，係因為佢之前拍o既Sin City，勁重漫畫feel o既拍攝手法，我非常受落，不過我第一套睇佢o既戲，居然係四年前o既Once Upon a Time in Mexico（o個時我認識佐Johnny Depp），o個時覺得佢拍得實在太過誇張，估唔到而家又會愛上佢o既戲…


好抵死，套戲一開始就玩o野，播佐套叫做Machete（字幕譯做《大砍佬》）o既fake trailer，勁爆笑，佢仲要話呢套戲係X級，呢個大砍佬有幾勁，一句講晒︰"If you hire him to take out the bad guys, make sure the bad guys aren't you!"笑死…


講到明係《索女‧喪屍‧機關槍》，索女一定係第一個出場o架啦，喪屍同機關槍就再順住咁出場。個戲名係誤導人o既，因為個女人隻腳裝佐機關槍只係o係套戲o既最尾部分，而喪屍死o既方法我大致分為四大類︰畀槍射死，畀刀吉死，畀車撞死同埋畀o野炸死。


超級血腥同埋核突，可以想像呢個低成本製作，其實對於喪屍o既化妝亦落佐一定o既功夫。不過您就唔o岩睇o架喇，睇完您一定會成晚訓唔著。


估唔到仲搵埋Bruce Willis客串軍官，掂！男主角Wray其中一句"I like the way you say 'fuck'."，好有味道，不過呢類片始終都係少數人喜歡o既片。網上面有人話呢套係典型o既cult片或者B片，充滿血腥、色情、暴力、無厘頭、黑色幽默等多方面元素，我覺得鐘意睇咩戲咪睇咩戲囉，o的人o係網上面係咁你一句我一句，好無聊。又唔知點解睇o個時o的人每逢聽到fuck就笑，其實有o的根本就唔好笑…有o的人又品評到套戲點好點好…唉…真係唔好以為o係百老匯電影中心睇o既戲就係高檔o的先得o架…雖然我鐘意佢o既style，但係其實套戲真係好鬼爛呢…


Wray: Did you find what was in the pocket?
Cherry: Fuck no.
Wray: Look for it.
Cherry: [searches through one pocket]
Wray: No, the other one.
Cherry: [searches through the other pocket and takes out a box with a ring inside it]
Wray: I was gonna give it to you, but you left me. 'Cuz you took the jacket...
Cherry, Wray: ...and I looked for it for two weeks.
Wray: Read it.
Cherry: Two against the world.
Wray: Remember that?
Cherry: I never forgot it.

[as Wray is dying]
Cherry: [crying] No... you can't go. Two against the world, remember?
Wray: There will be, I promise
Wray: [touching her stomach] I never miss.

"Two against the world"，希望我同您都可以好似男女主角咁，至死不渝。

>>September 15, 2008 at 2:16:29 AM GMT+8

2007 年 7 月 16 日 星期一 【清涼】

我o地兩個有時就糖黐豆，有時就水溝油，點解會咁o架呢？>3<

其實o係本質上大家o既內心都係愛對方o架喎，不過唔知點解好多時都會有好多言語上o既誤會或者只係想o係言語上佔到對方一o的便宜，結果就係兩個硬頸o既人互不相讓，唔肯先認低威。小小事都可以鬥氣鬥一大輪，不過其實心裡面呢又好掛住對方喎…

其實今日六點鬆o的就收工，仲諗住過去接您收工添，點知又畀您佔佐先機，過佐o黎接我收工（都唔知係咪心急挪上個禮拜買o個對鞋又怕我唔驗o下對鞋就收貨所以先特登走過o黎新翠呀！）。送佐您返屋企再返屋企食飯，好夜喇…zzz…

係咪好想攬住我覺覺豬呢？我都係喎~

而家連朝早同夜晚都熱到死，點頂呀？

----------------------------------------------------------------------------------------------------------------------------

香港40年後恐無冬天
《星島日報》7月 15日 星期日

昨天晴空萬里，酷熱持續，天文台錄得今年最高溫的三十四點四度，海灘泳池擠滿弄潮兒。天文台預計明天風勢增強，氣溫始會稍降；有醫生提醒市民於酷熱天氣下，每天最少應喝二點五公升水、並注意補充體力以防中暑。天文台台長林超英指全球暖化，早年研究估計冬天會於世紀末消失，他擔心這會推前至世紀中期便出現；換言之，現在的年輕一代，將會見到沒有冬天的香港。

不少市民昨日都撐傘遮擋猛烈陽光，南區海灘等泊車位亦「爆滿」，大批市民跳進海裏避暑。天文台昨錄得最高氣溫三十四點四度，為今年最高紀錄，當中上水更高達三十六度，赤~P角、西貢、屯門亦錄得三十五度；反映猛烈陽光的紫外}走頔⑹疚F十二。天文台於昨午二時三十五分發出酷熱天氣警告，提醒市民提高警惕慎防中暑。

天文台科學主任謝淑媚昨表示，近日陽光充沛令天氣酷熱，昨日且風勢微弱，故錄得今年最高溫。謝淑媚說，今天會持續天晴炎熱、最高氣溫達三十三度，預計待明天風勢增強，氣溫才會稍為回落。

早年天文台研究曾指本世紀末將沒有冬天，但天文台台長林超英昨出席電台節目時，引述今年二月政府間氣候轉變專門委員會推算百年氣候轉變的報告，指即使全球立即停止二氧化碳排放活動，全球溫度亦會續以每年半度的幅度上升二十年。

本港受全球暖化影響、加上高度城市化，林超英料本港未來二十年的氣溫較全球上升速度快一倍，每年會上升一度，擔心以此走勢，到世紀中期就會沒有冬天，「寒冷日子下降得快而穩定，以現在的走勢，恐怕不用到世紀末，到世紀中甚至之前，也可能沒有冬天。」

林超英說，暖化最顯著影響是夏季時晚間氣溫不會下降，如現時氣溫高於攝氏二十八度的晨早便較七十年代多。

熱浪可殺人於無形，主要影響長期病患者，天文台正研究推出熱壓力指數，計算溫度、濕度及風力對人體健康的影響，並已把氣候變化對公共衞生影響的報告交予衞生署。

林超英呼籲市民奉行儉僕生活，減少開冷氣暖氣、洗澡時盡量少用水等，減少浪費及能源消耗，以減慢二氧化碳排放速度及暖化速度。

民政事務總署由昨晚十時半起，開放九間夜間臨時避暑中心，供有需要人士入住。

>>July 17, 2007 at 2:01:15 AM GMT+8

2007 年 7 月 15 日 星期日 【清涼】

郵差話要參加公司o既麻雀王大賽，希望以佢o既技術起碼都可以贏返個殿軍啦…

您send佐個好長o既sms畀我，講返琴晚唔記得拎o野o既事喎。其實我都冇因為您o既語氣而嬲或者唔開心，反正您一向都係咁o架啦，而且呢期您心情唔好，我係明白o既。事實上您畀佐袋o野我拎我係好應該好好咁保管，唔記得拎確係我o既過失。好在，袋o野您最終都o係今朝去挪得返，件事總算告一段落。

----------------------------------------------------------------------------------------------------------------------------

又消滅佐desktop上面一套戲︰Music and Lyrics。爛西片一套，本來都冇諗住去睇，o係電腦睇都要分開三次先睇得晒，曾經兩次想放棄確實頂佢唔順，劇情唔創新之餘進度亦好慢…Hugh Grant同Drew Barrymore一個作曲一個作詞，撻著佐之後又鬧意見，最後男o既作首歌道歉…OMG！（OMG係我老妹成日講o既三個英文字，即係Oh My God！）


Sophie Fisher: A melody is like seeing someone for the first time. The physical attraction. Sex.
Alex Fletcher: I so get that.
Sophie Fisher: But then, as you get to know the person, that's the lyrics. Their story. Who they are underneath. It's the combination of the two that makes it magic.


>>September 15, 2008 at 1:57:25 AM GMT+8

2007 年 7 月 14 日 星期六 【清涼】

如果要您陪我睇戲係一件咁辛苦o既事，我寧願自己一個去睇好過，免傷和氣。寶貝呀，您真係唔好勉強自己去做一o的您唔鐘意去做o既o野，睇戲呢樣活動可以好個人化，唔駛為佐陪我而令您咁難受。

今日去佐睇Harry Potter And The Order Of The Phoenix（港譯︰《哈利波特─鳳凰會的密令》），但係一o的都唔開心。唔開心唔係因為套戲差，哈利波波睇佐咁多套都冇乜邊套有咩驚喜，預佐差。入去睇只係因為係西片同埋您想睇，唔開心亦只係因為您。


十一點半起身，搞得一輪十二點半出門口。今日超級熱，仲要幫媽媽挪把舊風扇去救世軍個平價中心，真係未行到一半路就已經聞到自己有汗味…討厭！過海o個架巴士好似冇冷氣咁，熱到坐o係度都出汗！之後入大埔o個程車仲衰，o係馬路邊等佐四個字先有車都唔止，仲要full house冇位坐都不特止，架車o的出風口吹出o黎o的風又係好似冇冷氣咁！頂！真係未乜試過坐車坐到留晒汗…好唔容易兩點半前先入到大埔同您飲茶…


飲茶本身冇乜o野，不過唔知點解埋單o個時已經三點十，原本姿姿游游o既plan已經亂晒。行去巴士站途中您又o係度歎慢板好似要shopping咁，去到個時不斷話︰「不如打牌唔好去睇戲啦！」究竟您係咪真係想睇戲o架？哈利波波係您自己揀o架喎，琴晚您臨訓前仲千叮萬囑我要買飛，之前我話佐睇戲而冇買飛，結果就畀您話我冇計劃，今日買好晒飛您又想唔去，您係有心考驗我忍耐力，定係覺得我有好多閒錢去揮霍？

加上特長o既等車時間，結果四點三先上到車，不過套戲係四點八開始…塞o下車停o下站，落車時已經五點有多，行到去電影中心，挪完飛o個一刻睇睇錶︰五點二。好失落，好唔想入場睇。繼上次《魔盜王》遲入場睇唔到套戲頭o個段再一次遲入場，今次仲要破晒我一生人o既紀錄，遲入場半個鐘，唔知幾時先有得用其他方法睇返，個腦一片空白…

我真係好唔開心，因為我最憎睇戲遲入場。您冷不在乎o既語氣、態度，我真係好難接受。您o係戲院裡面叫我唔好嬲，其實我都唔知可以畀咩反應您，反正其實我都已開始冇乜o野。我只有好似星期三咁，已經唔想再講任何o野，您就唔好再o係我面前提起套戲唔好睇（expected）同埋好短（哦。）…

我知道您唔係一個鐘意睇戲o既人，假若您真係唔想出街o既活動係睇戲，您真係唔駛遷就我呢個極鐘意睇戲o既人，我唔想您咁辛苦，您一入到戲院好似好唔自在咁，甚至悶到訓著覺。我o地去做其他o野囉，您唔駛就我，我都預佐我就您o架啦。好幾次關於睇戲o既安排最終都係唔開心收場，一直冇辦法figure out解決方法，我o地就放棄呢一樣活動，去做o的令大家開心o既事啦，我唔想因為咁而再令任何一方唔開心喇。

睇完戲心情平伏多少，去佐Langham Place行街，入廁所冷靜佐一輪，心情好返好多，大家再去行o下街，最後入返沙田再行街之後打邊爐。可能今日實在係晏佐，我o地走o既時候好趕冇留意拎齊o野未，結果送佐您返屋企之後先發覺漏佐袋o野o係酒樓，白白冇佐百幾蚊…

知道都冇乜機會拎得返o架喇，因為o的goods係o的冇記認o既o野，不過都即管落去酒樓睇一睇，點半落到去都已經拉晒閘，就當係我破財擋災啦，或者我今日都係黑仔o架喇…

>>September 15, 2008 at 1:55:25 AM GMT+8

2007 年 7 月 13 日 星期五 【清涼】

呢個禮拜已經忙o架啦，下晝仲要入上水training，您話死唔死？唔玩死都累死…

好在同一個region都有同事一齊去，咁都叫冇咁悶。約埋一齊入上水食完飯先去上堂，佢都結佐婚有一段日子喇，成日都話出o黎飲o野都成唔到事，今日終於都有機會坐埋一齊傾o下偈。

其實我對結婚呢樣o野真係有o的暇想，單純咁諗兩個人相愛好自然會諗到會結婚，原來當真真正正要承擔起上o黎，都唔係一件睇落咁簡單o既事。

話說佢同老婆只係識佐九個月就結婚，當時我聽到都覺得好突然，因為佢同我都係同年o既，之前亦冇乜聽見過佢話搞結婚呢味o野，只有講句恭喜云云，未知箇中o既辛酸。

佢老婆o係學識好高廿歲就大學畢業，而且屋企仲有o的銀紙，o係CityU freelance教translate之餘仲開埋間花店，我以外人o既身分睇就梗係好犀利啦，原來好多o野都只係你睇我好、我睇你好…

可能係因為佢老婆實在太叻同埋一直生活得好順利，雖然花店生意o岩o岩起步，就已經畀佐好大壓力自己，加上有o的內分泌失調，結果每日都好易情緒波動，甚至乎我同事返緊工都好多時要take care住佢，來電不斷要情緒支援。呢個同事本身都已經係鐵人o黎o架喇，但係有時真係鐵人都要抖o下氣啦，真係未見過佢個樣可以頽成咁（最幾日連請三日病假，真係兩年幾以o黎未見過佢病得咁甘…），個心又可以累成咁，我頓時覺得佢好可憐，不過做男人o既就點都要頂住o架啦，如果佢都collapse埋，咁佢老婆點算？

做老友o既點都要撐撐佢支持o下佢o既，等我幫佢老婆賣o下廣告啦，雖然我個blog都冇乜人睇…click入去買花喇喂！



>>September 15, 2008 at 1:52:43 AM GMT+8

2007 年 7 月 12 日 星期四 【清涼】

死也不抽煙【禁煙運動的本質．二之二】
梁文道
2007年1月25日《明報》

二手煙對人的傷害已是一項不用爭論的事實了，這個事實引致了兩個問題︰一個牽涉到社會成本，另一個則與平衡煙民和非煙民的權利有關。讓我們先來考慮第一個問題。

吸煙對煙民來講固然是一種享受，但這種享受卻為他人帶來巨大得難以承受的後果，使非煙民暴露在高度的風險之中。假如這就是我們要逐步收緊吸煙自由的原因，那麼我們應該怎樣看待空氣污染與車主的關係呢？

根據本地學者組成的Air Quality Objective Concern Group去年發表的一項報告，因為空氣污染，香港每年有1600宗死亡個案（平均一天4宗），64,200次住院，由此導致的經濟損失則至少達到了20億港元。而且這種污染的源頭是可以追溯出來的，除去珠三角的工業污染和本地兩大發電廠之外，其中一個空氣微粒的主要來源就是汽車了。眾所周知，汽車排放出來的廢氣不只有害於人體健康，還會影響整個大氣環境。可以說汽車之患不只不亞於吸煙，甚至是有過之而無不及；它不只影響附近居民的身體，並且危及人類整體（這就是為甚麼某些進步環保組織如「綠色和平」不討論吸煙問題，卻處處針對能源產業的理由了）。車主得到了方便和滿足，但它帶來的成本卻是包含非車主在內的全體市民都要負擔的。尤其近年流行的SUV（多用途汽車），更是爽了車主，害了地球。

比起控煙的雷厲風行，政府在禍患更大的空氣污染問題上卻軟弱得可以，光是在量度空氣污染的指標上就嚴重落後於國際水平了。至於交通管制，雖然車主付出的各項費用也極為可觀（類似於煙民在煙草稅上的開支），但仍然及不上倫敦甚至新加坡（最起碼我們的電子道路收費計劃還在一個民間議論的階段）。對著電力公司等大型企業，政府更是顯得無力，只能搞搞「藍天行動」之類的文宣活動。

請勿誤會，我不是要主張「既然不下決心對付汽車，就更不應該針對吸煙」之類的幼稚園道理。正正相反，我們絕對應該控制二手煙，但是也要依循政策上原則一貫的邏輯，更認真地處理空氣污染的問題。而這點根本的公平原則，卻在有關 禁煙的討論之中完全闕如，或許是因為大家都忙著妖魔化煙民吧。

說到妖魔化煙民，我們不得不佩服始自美國的這一輪禁煙運動的成果。首先它成功地把煙草在致癮性物品的光譜上往硬性藥物那一端移近了不少，使得煙草幾乎成了毒品，而煙民則變成了有道德缺陷的隱君子（並且是會殺人的那種）。然後它在煙民數目開始下降之後形成了滾雪球的效應，令煙民變成一批日益孤立的群體。根據社會學家Patricia Erickson的說法，禁令針對的人口數目愈少，其地位愈低，禁令成功的機會就愈大。吸煙者如今就是這種地位低下的少數派，比起飲酒的人要糟得多了（雖然適量的葡萄酒有利於預防心臟病，但不要忘記酗酒產生的社會問題和治安問題其實相當嚴重，而肝硬化等疾病的治療更要耗費大量醫療資源，可是我們從未打算控制烈酒的消費）。

所以比起控制汽車，控煙對很多人來講是一種比較不影響自己利益的善舉，何樂而不為？儘管如此，煙民仍然有在不影響非煙民的情況下吸煙的自由，政府的立法也應該在這條原則上著手，一方面不干預煙民的生活方式，另一方面則保障非煙民的權益。

然而，近日施行的室內禁煙條例卻不一定符合這種現代政治精神。衛福局長周一嶽在這項條例生效當日公然宣布︰「是煙民該戒煙的時候了。」言下之意，政府似乎不只是要維護非煙民的權益，而是要逐步取締煙草。如果這條法例的目的是後者的話，那就非常值得商榷了，因為它涉及到政府可以做甚麼與不可以做甚麼的根本問題。我再重申一遍，政府可以為了非煙民的自由禁止煙民在室內公共場合吸煙。但這和政府為了不讓人抽煙而禁止大家在室內公共場合吸煙是截然不同的。前者依據的是現代自由主義原則，去盡量平衡不同群體互相衝突的利益訴求，保存各種既存的生活方式選擇；而後者則體現出一個家長式的政府心態，以為自己比人民更清楚他們需要甚麼。

不只是周局長的個人意見，這條法例的部分內容也很有這種家長風格，例如在大學範圍內全面禁煙就十分可議了。先莫論政府是否有權替大學決定他們的校園管理政策；縱觀全港9所大學，幾乎每一所的面積都比一般康文署管理的公園要大，假如康文署轄下的公園都有吸煙區，為甚麼大學不能有呢？難道一個教授或學生在中文大學的某個角落吸煙，就會影響全校師生嗎？莫非大學的地理構造就如此特別？說穿了，這項禁令的目的無非就是為了徹底實現「無煙校園」的口號。當「無煙校園」擴展到了主要以成人為主的大學裏，就不再是為了防止少年吸煙，也不僅是為了平衡煙民與非煙民的權益，而是一種視煙如仇的意識形態了。這不是家長心態，又是甚麼呢？

在人類控制煙、酒、茶、咖啡、大麻和一系列毒品等致癮性物品的歷史裏，從來都不缺意識形態的作用。綜合我們前面所說的，可以發現在吸煙導致的公共開支問題上，我們並沒有充分開展其中的種種複雜論證；在煙民與非煙民的利益平衡問題上，我們也沒有完全搞清楚政府應該扮演的角色。即使如此，社會主流意見卻依然認為禁煙是大勢所趨，勢不可當。可見我們對煙的仇視可能已不限於健康的範疇，而是一種糅合了道德偏見的意識形態。

當這種偏見走到極端，就會出現非常荒謬的現象了。上個世紀的90年代，美國得州奧斯汀市有一名死囚的臨刑遺願是抽一根煙，因為自他入獄以來已有很長一段時間沒抽過煙了（很明顯那是一間無煙監獄）。但是當局還是拒絕了他的最後要求，理由是「吸煙對你有害」。

----------------------------------------------------------------------------------------------------------------------------

我懷疑呢條友都係煙民，不過政府確係低能兼無能。

>>July 14, 2007 at 4:39:26 AM GMT+8

2007 年 7 月 11 日 星期三 【清涼】

已經好耐冇試過要連返五日，頭兩日都有o的頭痛，今日係第三日，真正o既頭痛就冇乜，係勁多o野做o個隻頭痛就好嚴重…六點半放工，但係已經比預計之中放遲佐，您下晝過佐港島區開會，五點半就已經散band，真幸福…

有o的唔開心，因為損失佐一張交佐會費o既戲飛。放工即刻趕落電影中心，原本諗住換星期五o既Planet Terror，您唔想睇我就自己一個人去睇啦，點知佢話張coupon唔可以換expiry date之後o既飛，換句話說，張飛今日到期，最終就只可以換今日o既飛。失望而回，一張價值最高可以去到六十五蚊o既戲飛泡湯…

當您知道我張coupon換唔到飛，您居然話︰「咁咪好囉！快o的o黎陪我！」有幾好呢？雖然又唔應該賴您，但係我都忍唔住畀佐o的說話您聽。想講您知，我原本真係plan佐可以用張coupon同您去睇戲，咁就可以慳返o的錢啦，點知您又好似上一次用coupon睇戲咁，揀來揀去都冇戲想睇（結果係上次總算o係過期前用佐o黎自己一個人睇Cashback），每次都推o下又遲o的推o下又遲o的咁，我好唔鐘意。

最後我o地同一架車分開坐咁返入大埔食常相聚，心情平伏返喇…

----------------------------------------------------------------------------------------------------------------------------

成為百老匯電影中心會員︰
1) 入會/續會即贈百老匯電影中心贈券一張
2) 於生日月份可獲贈百老匯電影中心贈券一張
3) 百老匯電影中心購買正價戲票八折優惠，其他百老匯院線戲院購買正價戲票八五折優惠
4) 凡於百老匯院線戲院/網上以原價或會員折扣購買正價戲票，均可享有5%之消費積分回贈

之所以我咁唔鐘意去UA院線睇戲同埋成日都要去電影中心，只係想用最少o既資源做最多o既o野。

http://bc.cinema.com.hk/zh/privileges.jsp

>>July 15, 2007 at 1:22:52 PM GMT+8

2007 年 7 月 10 日 星期二 【清涼】

未返工先頭痛…頂！一出門口就頭痛，雖然冇琴日咁痛，但係降低佐我工作o既efficiency。趁老細今朝開會，做o下o的無聊sorting o野，放鬆一o下個精神先，因為下晝仲有大把人要見。

下晝防止罪案科同埋畀人老爆o個間舖o既operation manager都落佐o黎，係咁招呼呢班大帝。之後時間廊又有人落o黎夾還原，大公司即係大公司，一講到扣按金o既問題，佢就好大方咁話交晒畀我o地搞，信我o地冇問題！人o地根本唔係在乎錢唔錢o既問題，而係非常尊重合約精神，明白個舖還原至bare shell o既原則，亦知道租務係會用呢o的手法「掠水」，亦無謂拘泥於o的小節，時間即係金錢，寧願花多o的時間去諗點樣搵多o的錢。真係高人，佩服佩服！

之前138舖個師奶終於打o黎追退按金，佢o個盤數好鬼煩，因為佢之前個個月都拖租，交租時間又亂又彈票，搞到我都唔想搞，一見到佢盤數就心煩，亦冇咁多空閒時間坐低慢慢同佢計，不過今日最終都係要計喇…頭痛…

放工您過佐o黎接我，您好耐都冇過o黎接我收工喇，錫錫！送佐您返屋企之後再試新o個個黑椒家鄉雞，一般嗟，lower than my expectation！

好想同您… :P

>>July 11, 2007 at 1:11:27 PM GMT+8

2007 年 7 月 9 日 星期一 【清涼】

唔想面對都要面對o架喇，工始終都係要返…

其實老爆單o野都未至於衰到貼地o個隻o既，最起碼全世界都知係康業玩o野，佢o地唔肯做o野，同時諸多阻撓，令到我o地做唔到任何防盜o既工作。上個月中第一次老爆之後，我o地搵晒判頭o黎睇o下點加窗鎖o係間舖o既窗上面，亦都研究過點樣o係外牆加CCTV，發晒通告畀o的客叫佢o地小心門戶，亦寫佐信畀康業叫佢做o野，事關差佬查完之後，話個賊有好大機會係由康業o既地方走入我o地商場（事實上我o地個場除佐7-11一間舖之外，要進入我o地管理o既任何地方，都要經過康業管o既住宅地或公眾地！），呢班pk放縱班業委o係度玩o野，應做o既又唔做，唔應做o既又做到足，康業即係康業。

不過如果再o黎多鑊o既話，都唔駛旨意o係新翠再見到我同老趙喇…

下晝我同Kenji走去出事現場度諗住加o的圖釘o係條膊度等個賊冇咁容易爬上去，點知做做o下就畀康業班x樣阻止（其實都已經做到尾聲，ccc！），話如果個賊因為o的釘而跌落o黎受傷或者死佐，到時都唔知claim邊個咁話。老實講，我覺得呢o的咁o既事有商確o既餘地囉，有冇得賠真係打過官司先知！雖然老趙話有先例個賊claim物管公司賠償而又成功佐，但係我覺得點都要睇o下個官點睇，話晒o個個位都唔係好人好者日光日白會爬上去，真係審過至知有咩結果！

唔知係咪琴晚訓得唔好，定係作病，返佐工冇耐已經開始勁頭痛，食飯o既時候同老趙傾開，原來佢都有經常頭痛o既問題同埋長時間流血難止o既徵狀，好有可能同我幾年前經常流血難止o既原因一樣︰經常服食panadol一類o既止痛葯！

我都已經有成五至六年冇食panadol（睇醫生o既葯就間中例外），讀大學o個時可以話係必需品，而家就戒甩佐喇。原因就係家姐話畀我知panadol之中有某o的成份o係長期服用之後會令人有傷口就好難止血（有文獻話服食過量有可能會肝衰竭，所謂不傷腸胃，其實傷肝！），我覺得經過幾年o既調理，身體總算正常返，所以成日都勸人有頭痛就去訓o下覺休息o下，千祈唔好食panadol。

不過老爆呢單o野之中亦有o的趣聞，就係之前玩o野寫信上總公司告佢上司o個個技工，o係琴日入個舖度整o的臨時窗鎖o既時候，條木梯斷佐，佢就o係第一級木梯度跌佐落地，聽聞話佢即時面都青晒，真係笑爆咀。今朝個regional i/c知道呢件事，居然爆佐句「遭天譴」出o黎。雖然呢句說話真係唔多應該由一個高級經理講出o黎，但係真係講出佐全村人o既心底話！

>>July 11, 2007 at 3:08:04 AM GMT+8

2007 年 7 月 8 日 星期日 【清涼】

琴晚打通宵牌，打到六點先散band，送埋您返屋企最後八點前返到屋企，即訓…

zzz…訓到下晝三四點，清醒之後第一個得到o既消息，係上個月畀人老爆o個間舖，琴晚又畀人老爆多一次…心情一沉，只諗到︰pk，星期一返到去實死梗，唔知點交代…

聽日勁唔想返工…可必偏偏選中新翠？是否硬膠的？灰…

>>July 11, 2007 at 2:41:06 AM GMT+8