2007 年 12 月 6 日 星期四 【颳風】

休息日…懶訓，冇起身去陪您返工。

下晝您話唔得閒同我食飯，咁我唯有繼續訓訓到飽為止啦…

訓醒o既時候已經就快五點，行去露台食支煙順手開熱水爐沖涼，發現佐咁美麗o既天色，於是忍唔住手拎個相機影低佢…


接您收工，再自己一個人食麥當當… =(

>>September 3, 2008 at 12:54:12 AM GMT+8

2007 年 12 月 5 日 星期三 【颳風】

我愛您！ >3<

您o黎接我收工，再去百里鮮打邊爐，好好味道。

無無聊時o係度諗，做愛o係一對情侶當中究竟有幾重要呢？如果冇愛做又會點呢？點解造物o既上帝要將呢樣o既交畀人，通過呢個過程先可以傳宗接代呢？

我絕不諱言，我好喜歡做愛。做愛時的眼神，很迷人。

做愛是一種親暱的感覺，是一樁甜蜜的經歷，是一種真摰的回憶。兩個人赤身露體毫無保留地纏結在一起，嫣紅的肌膚、滑動的汗水、喘急的呼吸、躍動的心跳、蹦緊的肌肉、翻騰的脈搏…

我覺得只要心底裡對一段愛情有些少動遙，都唔會想同另一半做愛。係咪咁o既呢？

>>December 15, 2007 at 1:42:15 AM GMT+8

2007 年 12 月 4 日 星期二 【颳風】

架車o既事真係煩得死人呀！

話說我同Kenji夾份o個架車11月尾到期要拎去驗車續牌簿，點知o係車房驗完晒車，正要去續個牌簿o既時候，先發現原來年頭買o個份保險有問題！

我o地買保險o個陣時，拎佐上一手車主個牌簿去買燕梳，出佐份cover note就去運吉處搞轉名，點知o個條友臨時又話想要返個車牌number，結果我o地就唯有即刻出佐個新車牌number啦，之但係轉佐number之後又冇update返保險公司喎，結果份保單一直都跟佐個舊number。

家陣走去續個牌簿，一拎份o野出o黎，先發現原來保o既係舊number，即係個新number根本未受保，架車冇燕梳cover，就續唔到個牌簿…

保險公司要收返四百蚊更改資料費，非常之唔抵，因為份保單仲有一個月就到期。另一方面，如果將架車轉落我個名，又要畀運吉處硬屈一千蚊，兼且我呢o的新牌仔保費仲要超級貴（分分鐘高達六千蚊一年！），而家大家都企佐o係度，都唔知點搞好…

究竟係買過份新o既保險好定係改資料好呢？如果買份新o既咁舊o個份NCB又可唔可以帶落份新o既燕梳o個度呢？

講開又講，之前份燕梳登記佐舊o既車牌number，雖然個engine number同底盤number係一樣，但係如果出佐事份單又保唔保呢？

妖！好很煩！

>>December 13, 2007 at 2:21:25 AM GMT+8

2007 年 12 月 3 日 星期一 【颳風】

同其中一個ex-KS老死Gary貿然離開物業管理界，去佐幫佢老婆手搞花店同event management，呢個對一個就快三十歲o既男人o黎講﹐簡直係佢下半生事業o既最大決定，但係難得佢份人真係超樂觀。有佢o係KS拍住上o既日子，兩個人互相交流同傾訴o下，確係為日常處理一大堆無聊且繁複o既公司文件o既原動力，亦係應付同化解o個個講就天下無敵、做就無能為力o既regional i/c無形壓力o既能量。

為佐支持o的老死，上個禮拜一早就訂佐大大札花送畀我最愛o既婆婆喇，不過上過禮拜五您下晝又出佐去開公司party，費事您拎住o個扎o野走來走去咁辛苦，結果改佐今日送點知o的時間仲o岩，o岩o岩就可以用o黎(乙水)返我上個禮拜鬧完交o既婆婆。

果然冇呃鬼喎，大大扎夠晒睇頭，不過佢老早都話佐畀我聽紫玫係會畀人一種好易殘o既感覺，或者花花咁短暫o既生命，先可以突顯出佢o既美麗同可貴呢…

我其實很愛您的！真o架！

>>December 12, 2007 at 1:17:23 AM GMT+8

2007 年 12 月 2 日 星期日 【颳風】

極忙碌…點解冇人幫到我手？

我都唔明點解o的人乜都要問我o架，我都唔明點解o的下屬咁冇用，做每件事都要問一大輪。呢o的o野我都唔想o架喎，但係我都制止唔到佢o地o架！您咪treat佢o地as廢人囉！

新翠o的operation staff最叻o既三不政策就係︰「唔知道」、「唔關我事」、「唔好問我」。佢o地係唔理三七廿一，點都唔會放過「有大食大」o既機會o架喎…唉…

真係o係呢度做人多少少責任感都會做o野做到死…但係又有邊間公司邊個site唔係咁樣o既呢？

>>December 12, 2007 at 1:02:25 AM GMT+8

2007 年 12 月 1 日 星期六 【颳風】

超勁忙…仲要同您吵大鑊！

呢個禮拜唔知做乜事，同您鬧完一次又一次…真係心都煩。加上一見面時就已經好冇默契，我出閘時您入閘，令到今日大家未見到面就已經唔係咁開心。

過埋今晚就係兩鐵合併o既日子，您話要同我去影低呢個咁值得記念o既日子。食完飯之後您見鬼咁多人排隊買東鐵單程票，您都想買返o的o黎做紀念。我見沙田條人龍水蛇春咁長，就提議去火炭呢o的少o的人去o既地方買，但係又因為兩口子言語間o既衝突，最後我都係冇買就走。

講唔掂數，大家都咁硬頸…唉…



>>September 3, 2008 at 12:56:36 AM GMT+8

2007 年 11 月 30 日 星期五 【颳風】

終於都放假喇！辛苦死我…

琴晚同酒樓泰哥索過o個班醉酒佬o既料之後，返屋企食飯，食完飯即時暈佐o係張床上面…zzz…

訓到咁上下起身出去挪正式o既車牌，但係架車個牌簿o岩o岩到佐期，要驗車再續，都係未有車駕…

搞掂就返佐公司做佐陣o野，再過旺角接您收工，您今日部門開party喎，政府部門真係好。同您行佐陣旺角再送您返屋企，之後我又返佐新翠食晚飯，點知…又鬧交…

嘩！好死cheap囉！有o的人扮晒豪咁話請人食飯仲要爭住畀錢，之後居然要問人挪返錢喎！錢就人o地畀，面就你挪晒，真係厚顏喎！

>>December 8, 2007 at 2:30:24 AM GMT+8

2007 年 11 月 29 日 星期四 【微冷】

做到不似人型，勁辛苦，又係精神不死，肉體疲倦o個隻…幾經辛苦先踩到完場收工…

案情有新o既進展！本來睇佐帶都冇乜特別發現，只見有其中一個同事畀班醉酒佬推撞，但係又好似見到係某一個同事首先「立架餐」出手先喎！條友o係件事發生之前仲居然公然o係counter度對住個CCTV打機！老趙同新老細都睇到，新老細決定o係呢件事情過佐之後，要出手KO首先動武o既人，佢話唔怕人手唔夠，就係唔可以畀o的害群之馬留o係度…mmm…新老細企企o地硬喎…

重溫又重溫o的CCTV片段，老細打電話問候o個位同事之餘，亦借勢話佢已經睇完CCTV，問o個位人兄份IR會唔會有o的o野冇寫落去，但係條友就死都話冇…oh…佢放棄佐自救o既機會喇…

講真，雖然話就話係佢傷得最重病假最多，但係佢一直都話自己冇事，又話人o地打佢唔痛，又吹到話自己未出手，如果一出手o個班人全部都會訓低晒…哦。

其實我都幾嬲，因為點睇都係因為佢出手「打」人（班醉酒佬只係「推」）在先，就累到另外兩個兄弟都畀人打，公司亦蒙受損失，此人真係留不得也。最重要o既係，根本搵唔到一個佢值得被公司留低o既原因。講就叻，做就唔見佢做，唔係一直唔夠人手，老趙一早就挪佐佢o黎開刀！

睇佢得把口又威得幾耐！一切都係佢自己挪o黎o既。

>>December 8, 2007 at 2:20:04 AM GMT+8

2007 年 11 月 28 日 星期三 【颳風】

大件事！公司三條友仔畀人圍毆！

當我正o係271回家途中，接到Kenji o既電話，話佢o地三個夜班o係公司畀一班醉酒佬圍毆！！初初我以為條友仔講笑，玩我。之後佢話自己隻左眼睇唔到o野，我先感覺到事態嚴重，出佐獅隧即時轉的士飛返公司！

返到去o既時候，只見公司門口停佐四架警車一架白車，入到去只見到個大堂成地都係食物，同埋張玻璃桌塊玻璃撞佐o係地上面，再望另一邊，有班人蹲佐o係地度，好多差佬，而佢o地三條友仔已經跟白車上佐醫院，公司就得我、Vicky同呀宏OT等CID到場查案，等佢o地o係醫院返落o黎…

結果o的CID睇完帶之後再挪埋帶就收皮，我o地三個人就清場善後…頂…成地油跡都唔緊要，我o地三個用綠水抹，但係倒瀉佐o個支紅酒就甩唔到…o的磚唔駛要喇…

捱到六點幾佢o地三個終於錄完口供返落o黎，Kenji畀人打瘀佐左眼，呀李就打爆鼻，呀進好彩就冇乜事，但係三條友個眼鏡都畀人打爛晒…

六點幾唔返屋企喇，去更衣室訓一陣又要開工…辛苦…

>>December 8, 2007 at 2:30:59 AM GMT+8

2007 年 11 月 27 日 星期二 【颳風】

新舊老細一齊食farewell晚飯…真係有o的不是味兒…

仲係豫疑緊究竟過唔過去幫老趙搞個爛site，而家新翠正係交接期間，真係冇乜心機去做o野，新老細過佐o黎兩日，兩日都係坐得半晝，又唔係好知佢o既管理態度同方法係點，只係從說話之中感覺到佢份人對某o的o野都幾執著，雖然係routine工作上佢會畀好大自主同自由度畀o的下屬，但係而家講乜都係言之尚早。

群龍無首，好多o野都pend住佐o係度…拖…拖…拖…

講返今晚個無聊飯局，就係上佐四樓酒樓打邊爐，好憎食呢o的政治飯，但係亦都可以見到唔少o野。例如英姐o係度扮晒親新老細啦，擦晒鞋講廢話之餘仲要扮晒熟，真係睇到都作嘔…又例如呀李唔知做乜無情白事都走上o黎「當值」啦；又o係新老細面前扮晒有意見，話要點樣點樣整好個場啦，跟住仲要好豪咁爭住畀錢請老細食飯添呀！真係「係人係鬼」，點都睇得出。

好在十點幾都散場嗟…如果唔係實悶死。

>>December 3, 2007 at 2:53:36 AM GMT+8