2007 年 9 月 25 日 星期二 【酷熱】

中秋飯，因為星期日我屋企已經做佐節，所以今晚就去您屋企食。

食飽飽不過始終都係冇牌打，我o地就去佐大埔o既花燈會，但係都冇乜o野好睇o既，只係極之多人連地下都冇多個位可以畀人坐低咁樣，無無聊走返去昌運Rainbow食糖水好過熱到死o係公園度行。

點樣先可以擁有一個浪漫o既中秋節呢？嗯…

爸爸媽媽聽朝出發去廈門玩四日，祝佢o地玩得開心o的！不過要三點幾起身出發，又未免太辛苦呀嘛… @_@

>>October 1, 2007 at 4:48:31 AM GMT+8

2007 年 9 月 24 日 星期一 【酷熱】

挪月餅！挪月餅！

今日放佐工冇返屋企食飯，見琴晚大家鬧佐兩咀，放工就過去接您收工安撫o下您啦，點知您今日居然會冇帶手提返工，拍佐拖咁耐都係第一次，真係咁唔想聽到我把聲咩？

過到九龍灣等佐您一陣，自從公司加佐您人o地工同您老細當面出您個同事唔努力搵placements，個個月畀唔夠quota之後，您做o野就更加積極同出力，成日都搞到過晒鐘都唔收工，真係未見過有政府部門係咁，您都可以話做壞晒政府部門o既規矩喇！

其實去接您收工都冇乜目的o架咋，都係想見您一面囉。您大家姐叫您去挪月餅，點知今日原來係last day（其實新翠美心琴日已經係last day啦…），好在大埔中心o個間有得挪，但係都已經八點幾九點，去到人o地都收佐舖… @_@ 有個好心o既的士司機叫我o地拍o下道閘，話之前有幾個人都係拍閘但係都仲換畀佢，我咁咪試o下囉，又唔駛死o既。點知真係得喎，呵呵，唔駛o徙佐o的月餅券啦！

都唔係好面懞嗟！亦唔係o的乜偉大o野喎，舉手之勞…但係兩盒月餅真係可以好重o下… @_@

夜晚再返佐公司睇一睇美心裡面條消防喉個位，要快o的開波做喇，o的喉轆冇佐成個月消防水…

>>October 1, 2007 at 4:01:52 AM GMT+8

2007 年 9 月 23 日 星期日 【酷熱】

冇陰公！新車落地一個月咋！無辜辜就做佐三文治…或者有時世事就係咁無常…

架車係健健o架，對上個月佢先開開心心咁話我知供新車，點知琴晚打畀我，話佢呀爸畀後面個盲炳撞，推前再撞到前面o架車，做佐三文治。好明顯係後面黑色車條茂里唔o岩啦！


好在個人冇事嗟…不過架車搞成咁，又唔係total loss，冇得換過架車，撞過車整過，二手價錢又會跌佐…陰公…


>>September 15, 2008 at 3:35:08 AM GMT+8

2007 年 9 月 22 日 星期六 【酷熱】

今日好開心呀！

講真，其實今日並冇乜o野特別事發生，一如以往放假o既日子，訓到十二點起身沖涼，再入大埔同您飲下午茶，再行o下大埔，我o地就坐車出佐去銅鑼灣行街街，口渴就坐低飲杯o野，肚餓就去搵o野食… @_@

發現佐依利莎伯大廈有間酒樓有得打邊爐，銅鑼灣價錢貴少少，但有電視睇o岩晒您個電視精啦！

其實今日真係冇乜特別，不過唔知點解一見到您就心情特別興奮，而您心情又好似幾好咁，畀我激佐幾次都仲咁大人有大量冇發脾四…呵呵呵…

我o地其實係可以和平共處o架，睇o下今日過得幾開心~

啜啜啜~

>>September 25, 2007 at 4:11:58 AM GMT+8

2007 年 9 月 21 日 星期五 【酷熱】

今日得到兩個消息，都係關於我o既朋友。

第一個係Kenji話諗住做到年尾走人，又好似明仔咁去賣眼鏡喎，香港果然係世界最大o既出口眼鏡o既城巿，佢話有commission喎，我就梗係希望佢可以賺多o的有發圍啦，不過賣眼鏡真係咁好賺咩？！

第二個係前o係MHV做時識o既朋友Ken仔已經o係澳洲坐完監（移民o個隻）返佐o黎香港喇！仲自己搬佐出o黎o係元朗住，真係估佢唔到！我o地想約佐下個禮拜五出o黎見面，佢話佢肥佐好多喎，仲畀o的相我睇，OMG！佢真係fat as shit…

佢就好啦有個自己o既地方，我都想有個自己o既地方同婆婆搬出o黎一齊住呀… >_<

>>September 22, 2007 at 3:55:45 AM GMT+8

2007 年 9 月 20 日 星期四 【酷熱】

今日都頗空閒，衰就衰在晨早溜溜好x煩o既regional i/c打o黎問長問短，o係度追究返個已經出佐o既email裡面o既內容。頂…人o地個email問乜我o地咪答乜囉，唔通無情白事打去問返人o地係咪問錯問題咩！低能！

下晝終於搵到個leasing同事跟進我o地個場過佐九個幾月期o既license review，呢位小姐佢以前都o係新翠做過PO o架喎，真係勁。輾轉之下又入佐去SHKP租務打滾，都係為名氣嗟…希望呢單o野可以o係佢o既幫助底下極速完成啦…

早兩日Angel話︰「海運餐廳o係過時過節先去食o架咋！」其實又係真o架喎，對於我屋企o黎講，大部分時間都煮晚飯，成家出街食o既機會真係少之又少，而海運居然仲成為佐其中一個去得最多o既地方，所以海運o係一般柴灣巿民心目中o既地位超崇，唔講得少o架！


>>September 15, 2008 at 3:34:26 AM GMT+8

2007 年 9 月 19 日 星期三 【酷熱】

連續返佐八日工，今日終於都放假喇！今朝都係頂唔順，太累冇去接您返工，訓到十二點先身沖涼再同您食lunch。食完lunch您就繼續努力，我就去佐老地方跑馬仔，o的馬仔好生性，贏佐好多credits，要走o個時都仲有六、七百個，結果搞到要您落銅鑼灣會合我添… @_@

同您銅鑼灣行落灣仔，再由灣仔行返去銅鑼灣，您呢個買鞋怪又四圍出動去尋找獵物…好在今日只係買佐件衫未有心水o既鞋，都唔知第日個屋企要有幾多千尺先夠您放晒o個o的買佐又唔著，著舊佐又唔捨得丟o既鞋… @_@ 救命！

我o地o係綠野仙蹤食飯，o個度唔知幾耐之前搞埋中式小菜，今晚上到去，先知道原來個佛跳牆要預訂（真誇張！），結果叫佐小菜同住家湯，一邊睇電視一邊食。o的o野都幾好味道喎，最緊要又唔係貴，冷氣又涼又唔係多人坐得幾舒服。睇完電視十點半先返屋企，估唔到307都幾快，唔駛九個字就返到入去。

人o地想同您坐埋一齊親蜜o的o丫嘛！到我扭計呀！人o地最享受有您枕住o係我膊頭o既一程車o架嘛！ >_<

嗯…原來今日係拍拖第218日喇！

>>September 20, 2007 at 3:49:19 AM GMT+8

2007 年 9 月 18 日 星期二 【酷熱】

馬桶改變世界
文：梁文道

人類最偉大的發明是甚麼？毫無疑問，沖水馬桶就算排不上第一，至少也要名列前十位之內。

請想像一下，要是沒有抽水馬桶，你的日子該怎麼過？像傳統農村一樣，跑到戶外的茅房蹲坑嗎？就算不怕髒、不怕臭，也不怕摔下去滅頂，你至少也會嫌麻煩吧。用便桶和夜壼嗎？先別說家裏和辦公室總會因此充滿了一股古怪的異味，我們現在動輒二十幾三十層樓的大廈，那夜香該怎麼收呢？有了抽水馬桶之後，不只我們的生活環境變得乾淨、衞生了；連上廁所辦事也不再是一件令人厭惡但又必須的生理需要，說不定它還是個令人愉悅的樂事呢？

請再仔細看看你家裏的抽水馬桶，那是一項何等聰明又何等簡單的設計呀。有沒有想過，為甚麼沖完廁所之後，裏頭的水位總會回復原來的高度呢？打開水箱，注意到那些鏈條和槓桿了嗎？它們是怎麼運作的呢？是誰發明了這麼具效率的裝置？為甚麼我們今天這麼熟悉一堆明星設計師的名字，但課本裏從來不談發明抽水馬桶的偉人？（他當然是偉人，課本當然要教，不是嗎？）

幾乎所有你想知道的馬桶故事，你都能在《廁神：廁所的文明史》（The Porcelain God: A Social History of The Toilet）裏面找到。作者朱莉‧霍蘭（Julie L. Horan）本來是位空姐，後來立志研究廁所，花了八年的功夫，寫成了這本書，也拿了一個博士學位。嚴格來講，這不是一本科普書，它是一部歷史書。但是我很少見專談馬桶的科普書，偏偏這又是個非常重要的課題，所以我們不妨從這本書開始鑽進馬桶底下的世界。

英文裏的「Crap」有糞便的意思，引伸出去就是廢話和廢物；當然它也是個動詞，直指拉屎這個動作。其實它只是個很年輕的美式俚語，起源是第一次世界大戰，駐紮在英國的美國大人兵發現倫敦的抽水馬桶通常都印上了「湯馬斯‧克拉普」（Thomas Crapper）公司的商標。自此之後，他們就把「Crapper」或者更簡略的「Crap」當作「大便」帶回家了。

可憐的湯馬斯‧克拉普本是個堂堂爵士，封爵的理由是他改善了馬桶沖水裝置。今天我們那種只要一拉鏈條就能讓水沖出來，再引得水管裏的水位上升去代替管子裏原有空氣的裝置，就是他的傑作了。自從他在1884年發明了這種抽水方法之後，抽水馬桶的基本格式就定下來了，百多年來再玩鉅變。就算是最用心於廁所的日本人，也只能為它錦上添花，加上洗屁股和烘乾的功能。

但是，這位「糞便先生」還不是發明抽水馬桶的第一人。

根據考古學家的發掘，早在三千多年前，地中海克里特島的克諾索斯王（Knossos）王宮就有了第一套水廁系統。它的原理是在屋頂裝上一個收集雨水的蓄水盆，讓流水經過彎曲的陶管，緩緩沖進樓下的廁所，而廁所的坑道上還有個木製的座圈讓人安坐。真了不起！可惜它一來水流不斷太不節約，要是遇上沒雨的旱季難免就不夠水沖廁了，最嚴重的問題是那些廁所連着下水道和糞渠的廁所不可能不溢出惡臭。所以它還不算是我們熟悉的抽水馬桶。雖然這套系統一直有後人沿襲使用，但直到十八世紀，習慣了坐便壼的歐洲人還是覺得它古怪，甚至「荒謬」。

終於，時代的轉捩點在十八世紀晚期出現了，經過倫敦鐘錶匠卡明斯（Alexander Cummings）和聰明的布拉馬（Joseph Bramah），抽水馬桶漸漸成形。先是卡明斯想出了「水閥」的主意，使得便盆可以和糞渠隔絕開來，永遠停在一個水位的清水代替了空洞盆底的臭氣的污跡；然後是布拉馬發明了嶄新的供水方式與可以活動的下水管活板，令馬桶沖水時有強力的漩渦狀轉動，也讓糞便變得可以輕易沖去。

他倆加上後來的克拉普，都是我們應該紀念的名字。但千萬別忘了，人類的技術史不只是一連串偉大發明家的故事，一種新發明的普及要靠社會的支持和生活環境的改變。請再想想你那心愛的馬桶，它依賴的是一整個城市的供水系統與排污渠道，這是何等浩大的工程，何等鉅額的投資。為了得到我們想要的清潔和舒適，我們全都付出了一具馬桶大得多的代價。

原文載於新鴻基地產「新地開心閱讀」計劃刊物《讀書好》第四期18-19頁（2007年9月）

>>September 21, 2007 at 12:38:22 AM GMT+8

2007 年 9 月 17 日 星期一 【酷熱】

今晚又係我同Carol、Angel o既飯局，今晚David加班o黎唔到，但有位新朋友Anita加入。

Angel帶o黎o既新朋友都唔係孤僻o既人o丫，言談之中有都講有笑有發問又回應，學Angel話齋都算係正常人，但係偏偏就拍唔到拖。究竟係因為Angel所講佢要求高一心要搵老公o丫，定係當事人所講o既生活圈子細冇乜朋友，定還是我以男人o既角度覺得佢o既樣貌平平冇乜吸引力（男人有想識一個女人o既衝動，大多數都係睇樣睇身栽睇打扮呢o的外在o野行先…），就真係要佢參加多o的我o地o既飯聚傾多o的偈先知。

今晚Carol繼續帶o黎佢o既愛情故事，估唔到一次比一次精彩。據我認識o既Carol係好慢熱o既，但居然會做佐o的咁破格o既事，仲要係人生o既第一次（而且感到內疚），都算幾意外。希望佢盡快處理好呢段關係，雙線發展好危險，唔值得鼓勵，只係冇辦法o既見步行步而已。

今晚o既爛gag係︰Carol所謂o既「生命中的男人」。不過我都係o個類會幫女朋友「督」檸檬，帶紙巾出街o既人喎！

飯後話題越講越有，講到人o地「泉章居」都打烊，唯有下回分解。

散佐之後，我再同Angel去佐麥當當傾多一陣，大家傾訴o下大家目前面對o既問題同煩惱。十一年朋友，頓時又發覺原來我o地都有好多好多年冇面對面兩個人傾過密偈。原來風光o既背後係有咁多付出，艱苦經營後，不怕可惜嗎？我覺得最重要o既係，唔好令自己o既生命徒添遺憾。

男女關係，總係令人煩惱… @_@

好愛您對我o既諒解，其實我都好掛住您o架，如果食完飯係返我o地o既小天地，再攬住您覺覺豬，咁就prefect喇！

>>September 22, 2007 at 12:52:36 AM GMT+8

2007 年 9 月 16 日 星期日 【酷熱】

係咁update o的ISO文件…

牙肉痛，仲有o的口臭，睇o黎都係時候要book洗牙喇！但係又好似係隻智慧齒搞事喎！

其實我o係度諗，兩個性格互相配合o既人，可以成為一對，係一件好難o既事。真係若要人似我，除非兩個我o既嗟，呢個世界o既人咁多種性格（你估真係九型人格咁簡單咩…），如果有兩個人同你講佢o地兩個真係完全夾就呃你o架嗟。

之前我有試過性格上都好夾，諗o野模式亦都似，加上好幾次無意o既心靈相通，兩個人有唔同o既生活圈子私人空間，一齊時亦感受到對方o既濃情蜜意，但係最終都係分手收場！所以我而家只求一個內在性格，就係忠誠。冇佐忠誠就算兩個人性格點夾、外貌點襯都係o徙氣！

我愛您！

>>September 20, 2007 at 3:37:18 AM GMT+8