2007 年 4 月 18 日 星期三 【微冷】

明明寫佐琴日同前日o既日記，但係今晚返到o黎唔見晒，點解會咁o架… :'(

今日唔知係咪我黑仔o既塞車日，九點半約佐學車，平時塞車最多都係坐半個鐘o既789，今日居然要o係架巴士上面逗留佐九個字，結果學車遲佐半個鐘，白白蝕佐半個鐘畀佢之餘，仲畀師傅勁鬧我冇精神…唉…

學完車返公司幫手，因為cash coupon單o野要trial run，但係公司又白痴，個system搞極都搞唔好，唔知想做乜…仲要快手整份handout出o黎畀o的同事去練，好煩…

下晝冇端端internal audit o黎check petty cash，不過我話我今日放假，所以唔畀佢check，叫佢聽日再o黎過，佢就反問我點解會o係度，當時我又諗唔到o的精景o野，早知答佢「因為我太熱愛公司」啦！冇o架，呢班友賤到死，係咁挖埋o的雞毛蒜皮o既o野o黎針住我o地，反而o的大事大非就睇唔到，一味就得個煩字，我今日放假，o係公司幫手，係做義工，如果我冇返公司，咪又係check唔到，所以我覺得冇需要畀佢check囉。

之後o係上環同您會合，行佐緊街就繼續黑仔，老點佐您上間坐佐個半鐘頭o既巴士，o係車上面訓到死豬o既我，冇留意到您越坐越唔舒服，真係失察…後尾我o地再o係新城巿行一陣，就去打邊爐，今日大家都唔係食得好多o野咋…

您個傻豬唔舒服，仲有精神同我o係度改花名，「椰菜花」個名好核突呀！我唔要呀！ >_<

平安咁送佐您返屋企，返到屋企上佐陣網，頂唔順冇沖涼都要訓喇…

>>April 20, 2007 at 2:12:28 AM GMT+8

2007 年 4 月 17 日 星期二 【雨】

（不明不白咁冇佐兩日日記，寫佐咁多o野冇晒，超無奈…唯有憑記憶補寫。）

婆婆永遠都係我最愛o既女朋友！

今朝您肚仔痛，又因為工作唔理想而唔開心，想轉工又未有方向，心裡面好困擾，我係明白o既，無論您有咩唔開心，或者我根本冇能力或者方法可以改變呢個事實，我都會o係背後默默咁支持您，耐心去聆聽您o既一切，用心去記住您工作上o既細節同埋clients o既一切。

您唔舒服都過佐o黎接我收工，我知道您好掛住我，o係o個一刻好需要我。我知道同您都係同一種人，愛情對於我o地o黎講係生命之中o既首位，永遠都會將自己伴侶放o係第一位。

您呢個甜菜頭永遠都係我咸菜頭o既最愛，您話您明白我真係一棵需要愛去生存o既植物，我覺得您都一樣，好需要我o既愛。我要o既愛，只有您能夠滿足，因為我唔單止係要被您o既愛去滋養，更重要o既係，我o係您身上，感受到「您需要我o既愛」o既感覺，我好喜歡呢種「被需要」o既感覺，兩個人o係愛中好貼近，您就係唯一一個我想同佢靈肉合一o既女人。 >3<

今晚坐車返屋企o既時候，唔知點解您不斷o係度傻笑，傻傻o地o既，但係我最愛o既就係您呢個傻婆婆~錫晒您！

>>April 20, 2007 at 2:00:43 AM GMT+8

2007 年 4 月 16 日 星期一 【酷熱】

（無緣無故冇佐兩日日記，已經唔係第一次，o係投訴版留言都冇用，真係只有嘆一句無奈，唔駛錢o既o野你唔可以要求咁多，唯有自己backup得密o的…）

連放佐三日假，真係玩到心都散晒，真係有咩要做o既都唔記得晒，唔係Wendy姐八點七個字打畀我，我都唔記得原來今朝要去總公司聽cash coupon o既briefing！急急腳咁用佐五分鐘刷牙面gel頭出門口，好在今日交通比預期暢順，九點三準時報到，仲早過Wendy姐o係公司出發。點知一坐低，就收到346舖譚小姐個煩人o既電話，弊！完全唔記得佐交帶低今朝有判頭同佢換冷氣，個判頭仲要遲到！send sms畀呀Man叫佢搵人，總算settle佐單o野…

個briefing勁無聊，吹到驚話o的cash coupon首日公開發售可能會有人排隊爭住買，真係唔知醜！白白咁就冇佐個朝頭早，無奈…

返到公司都冇乜心機做o野，好散漫咁完成佐部分工作o既某部分…

放工去接您收工，上您屋企食飯。今日得到您爸爸首肯上您度食飯，見佢o既心情都幾好，個人都輕鬆返o的…

菜頭婆婆我愛您！

>>April 20, 2007 at 1:42:31 AM GMT+8

2007 年 4 月 15 日 星期日 【酷熱】

訓佐十個鐘，訓到自己醒佐啦，估唔到您仲懶訓豬過我！

食完早點，沖好晒涼，就入大埔見o下我最愛o既婆婆。其實今日只係得幾個鐘頭短聚咋，點幾入到去，您帶佐我去食雞，再行o下街街，四點半左右又要坐返車出去學車。好慘o丫！

喂喂喂！您係咪鉤緊個cushion畀我！唔好講大話喎！您難逃我法眼喎！

師傅今日同我熟習o下考試路線，其實真係有o的難度，尤其係出o個兩個死人雙程路口…o的車係咁o黎，要把握時機先出到。師傅叫我放膽o的去喎，不過…總係有o的拗底囉…車來車往…

返屋企食完飯再去呀宏屋企睇佐場波先訓…放完三日又要返工喇…

以前老細Warren今日打畀我，話要做業主喇…頂！佢條友仔，唔聲唔聲咁原來媾埋女，仲要買樓同條女住埋，有冇咁突然，咁快速呀又？佢話人生充滿佐意外…嗯…或者緣份o黎o既時候，真係點樣擋都擋唔住、點樣避都避唔到…

>>April 16, 2007 at 2:39:11 AM GMT+8

2007 年 4 月 14 日 星期六 【晴】

低能o架！今日一起身，個死人鼻就開始失控，一直到下晝，食佐幾次葯都冇乜改善，真係超無奈。結果成日都留佐o係屋企上o下網咁，食完幾次o的抗敏葯之後，個人勁累，hea o下訓o下就到食晚飯…

晚飯食佐好多o野，轉頭又話要食蛋糕，妹妹送佐件褸畀我，不過要等今年冬天先有得著lu，因為o的天氣已經開始熱到嘔！媽媽年年都係講o個兩句，又話咩廿八歲要生性之類…唉…我又有乜唔生性呢？我都好努力工作啦，呢份工勝在「太」穩定，但我自問都唔係做sales o既材料，冇可能多勞多得之下變到好有錢啦…成日叫我搵o的o野學，我都想，但報佐名都要人o地收先得o架…未知之素，如果真係收佐，都要諗o下點樣儲舊學費先，政府o的高利貸loan我就死都唔會借o架喇！

十一點幾就爬佐上床攤，成日「零」生產力…

您話想抽隻新股「洛陽欒川鉬業」，嗯…都可以考慮o下o既！或者我o地都要諗o下方法，睇o下點樣可以有智慧o的咁聚積一o的財富，如果唔係齋打死一世工，單靠儲錢，真係好難搞到舊大錢出o黎買樓同結婚，我o地真係要傾o下先得…

今日係拍拖兩個月喇，第60日，我好掛住您呀，婆婆您知唔知？！

----------------------------------------------------------------------------------------------------------------------------

分裂
王菲（詞︰林夕）

分裂分裂
一面笑得天真無邪　一面看破一切
分裂分裂
一面愛得精疲力竭　一面甚麼都不屑

都是我擁抱過你　一點一滴留在手裡
都是你擁抱過我　沒有空隙讓我呼吸

分裂分裂
一面堅強面對一切　一面需要撒野
分裂分裂
守著一個人的世界　流著兩個人的血

都是那擁抱的禍　一半熱一半冷
都是那擁抱的禍（思念的細胞不斷分裂開去…）
一半天一半地（分裂分裂…）
都是那擁抱的禍（思念的細胞不斷分裂開去…）
一點我一點你（分裂分裂…）

都是那擁抱的禍　一點男一點女
都是那擁抱的禍　一面紅一面綠

都是那擁抱的禍（思念的細胞不斷分裂開去…）
若無其事呼天搶地（分裂分裂…）
都是那擁抱的禍（思念的細胞不斷分裂開去…）
驚天動地平平無奇（分裂分裂…）

一雙眼睛看著你一臉親切
張開了雙眼卻看到一臉輕蔑
靈魂隨你飛到另一個世界
身體卻像是斷了翅膀的蝴蝶
看著你我會變得目空一切
看不到你的時候
面對自己卻有一點點膽怯

分裂分裂
有時堅強面對一切　有時需要撒野
分裂分裂
守著一個人的世界　流著兩個人的血

分裂分裂
一面笑的天真無邪　一面看破一切
分裂分裂
一面愛的精疲力竭…

>>April 16, 2007 at 1:57:04 AM GMT+8

2007 年 4 月 13 日 星期五 【陰】

黑色星期五出世o既我，今日又重返黑色星期五喇！哈哈哈！祝我生日快樂~ 祝我生日快樂~ 祝我生日快樂~樂~ 祝我生日快樂！

琴晚十一點前就攤佐落床，同您講完電話就昏迷佐… @_@ 廿八歲生日o既凌晨，又o係半夢半醒o既情況下渡過…我知道您打電話畀我，我亦聽埋個留言，但係我好似拎起佐個無線電話冇撥電話就對住個電話係咁講o野，矇矓中又訓著佐…

四點九就自己醒佐，唔知係咪訓慣佐六個鐘就醒一醒，所以決定起身沖涼，入大埔接您返工。八點半都就到您都仲未落樓返工，搞乜呀？！原來您個傻婆今日偷偷o地請佐大假陪我，不過唔係您畀驚喜我而係我畀驚喜您，哈哈！

我o地去佐飲早茶，我好鐘意同您去飲茶，或者飲茶將會成為我o地下半生一齊做o既其中一樣最重要o既活動！生活本來就係悶，難得我o地有個大家都喜歡o既活動去做，唔駛無無聊周街蕩，其實已經好足夠！

之後我o地返屋企睇返您miss佐o既《寫意人生》同《最緊要健康》，累累o地就攬住覺覺豬，好開心呀！>3< 好喜歡同您有呢種最貼近o既感覺，您每一毫米o既肌膚都吸引我去細吻，冇其他人同事可以取代您o係我心中o既地位！ >3<

之後我o地去佐參觀之前賣「行」廣告o既H&M，車！o的貨其實好普通嗟！好似女人街、花園街o的旺角衫咁之嘛！呢間公司都好識得捉香港人o既心理o丫，第一價錢平，第二就懶係有名牌效應咁（另一個例子︰無印良品），第三係搵明星做代言人。您話我o地可能係唯一行出H&M而又冇任何收獲o既人，因為根本冇乜特別出色o既o野可以吸引到我o地兩個「厭尖」o既人。

然後您帶佐我去LCX o既Stage Cafe食晚飯，食物質素一般唔算差，但係呢度勝在有無敵香港島北岸繁榮夜景睇，氣氛相當唔錯。今年o既生日之所以係呢幾年以o黎過得最開心o既生日，唔係因為我o地有冇做過愛，亦唔係因為食佐一餐點樣好o既飲，亦唔係因為去過o的咩好特別o既地方，而係有一個好愛我o既人，傻傻o地咁唱佐一首最lum o既英文生日歌畀我聽，好耐冇人咁樣做喇，至少您係最近五、六年o黎o既第一個。您o既一曲我會永遠放o係心中，感謝上天為我帶來最幸福o既禮物︰就係您。

其實我有一句說話已經收埋佐o係個心裡面好多日，今朝第一眼見到您o既時候開心得滯唔記得佐同您講，之前有幾次含情脈脈時唔夠膽講，就係呢，我覺得您好靚，係您發自內心，o係愛情o既滋養下，散發出o黎o既靚，加上您o個個傻傻o地o既小朋友笑容，我覺得唔單止係今朝，最近無論您有冇化妝，您都好靚~ 您會話您自己係一個普通甚至醜樣o既女仔，但我覺得唔係，因為我唔係單單用街邊(目及)女o既角度去望您，要追求外表o既美係無窮無盡o既，唯有您呢種美，先可以攝住我o既心~

您問我之前有冇對您有好感，其實係有，但係我唔習慣去叉隻腳去人o地o既感情之中去搶，我會好好咁收埋，因為我知道萬一自己一開始投入佐落去，就好難抽返個身出o黎。好感係幾時開始我唔記得喇，但係我記得其中一次令我對您有好o既印象，係放學之後我o地坐地鐵傾偈傾到大家都鐘意食日本o野。如果冇好感o既話，後尾我又點會講咁多o野畀一個單單只係萍水相逢o既人聽o丫，傻瓜！

之不過係o個時大家相遇o既時間唔恰當嗟。冇過去o既經歷，又點會有而家o既我同您o丫，係咪？！

我愛您！啜啜啜~

>>April 16, 2007 at 3:20:30 AM GMT+8

2007 年 4 月 12 日 星期四 【炎熱】

今日都算勤力仔o架，因為將要放三日假，所以努力完成一o的雜務之餘，亦都「的」起心肝搞第三log o既signage review，真係一浪接一浪，冇得停呀，但係之前send出去o的報價邀請點解得咁少人回o架？！

琴日陪您去睇醫生o既時候，連埋o的衫磅佐一次，居然有百四磅？冇可能！一定冇可能，個磅一定係壞o既！返到屋企再磅過，都係得百三多o的o的之嘛…嚇得我o丫！

近期十三妹好似同佢男友鬧交鬧得火熱喎，佢兩個都係o的燥底人，都冇乜辦法唔鬧交啦。佢話男友當佢係小朋友咁，以為佢唔識照顧自己，其實佢只係想男友虛寒問暖幾句。嗯…我覺得當女友係小朋友咁湊都冇乜問題嗟，小朋友梗係要錫晒佢o架啦，仲要集中多o的注意力o係佢o地身上，如果唔係佢o地會曳，變佐百厭星o架！

好掛住好掛住好掛住我最愛o既婆婆呀，我聽朝就要「奔向您」~~

>>April 13, 2007 at 5:54:01 AM GMT+8

2007 年 4 月 11 日 星期三 【酷熱】

放假，又係學車o既日子。今日開始熟佐收放「極力子」，其實又唔係好難，不過之前交錢上o既堂就快用晒，好快又要畀錢喇…千二蚊學五日，好貴呢… >_<

學完車落佐老地方打機，等郵差食飯，食完飯打多陣機就返公司執埋o的手尾。冇法子，o的o野唔係您跟就冇人跟，就算有人跟都可能越搞越「禍」…

Handle完手頭上o的o野就落佐敦同您會合，行佐陣街，發現之前想買o個部電話已經開始冇人賣，但係個價位始終都跌唔到您心目中個銀碼，睇o黎都係唔駛買喇。之後同您去睇醫生先再返屋企。

您要乖乖o地食葯，有病一定要睇醫生先得嘛，公公會好擔心o架！

o係等您收工o既期間，去佐百老匯電影中心換免費飛，見到有一張由某個展覽印o既宣傳卡上面，印佐︰「一頓飯是生活、是家庭、是歡笑、是掛念、是回憶…是愛。」一餐飯，真係有齊晒佢所講o既o野喎，有意思！好想同您一齊飲茶，享受每一餐飯。

>>April 12, 2007 at 3:01:45 AM GMT+8

2007 年 4 月 10 日 星期二 【陰】

嘩，今日勁勤力仔呀，一返到去就完全唔搞其他o野，好專心咁開始工作。冇法子啦，因為有o的功課都仲係欠緊呀老趙，唯有努力咁做。

朝早搞掂o的rates，中午開始fax o的signage報價出去，之前已經試過用email出，但係o的人唔知係咪有生意都唔想做，定係根本個email只係擺o係度扮o野，一張報價都未收得返，今日再次用fax出，即時有人reply電話畀我，至少即係話佢o地收到我個報價邀請o丫…以後都係廢事用email喇，雖然方便，但冇回應；用fax係麻煩o的，但係收效，冇法。

放工前收到您電話話屋企冇飯開，咁就同您去佐您家姐樓下間「常相聚」食晚飯。呢間中菜館其實都幾得意，地方細細但係好有屋企feel。見好多人都係熟客，隔o黎台仲坐佐兩個一路飲紅酒一路吹水o既傻佬… @_@ 我o地食沙薑雞啦（日日食雞！yeah！）、賽螃蟹同埋椒鹽鮮魷，食到飽飽呀~

您問我覺得您對我好唔好？其實您已經對我好好啦，最唔慣或者最煩惱都係您發脾氣o個陣時嗟，不過個個人都有脾氣o架啦，所以暫時問題不大。如果我覺得有乜唔妥，我一定會話您知。

唔好再將之前失敗o既感情歸咎於您自己啦，我覺得根本係一段好普遍o既「移情別戀」事件，做錯o既人唔係您喎…

>>April 11, 2007 at 2:59:11 AM GMT+8

2007 年 4 月 9 日 星期一 【晴】

最近我好似肥佐少少咁，早兩日換制服穿皮帶扣o個時，駭然發現要穿開一個窿，即係個肚腩仔已經脹返出o黎…頂！唔要肥呀！但係同一時間，o的皮膚又好似差佐o的咁，成日塊面都爆瘡，點解o架…呢排都訓得幾多啦，日日都有十個鐘左右喇喎…

琴晚我係睇到亦記低佐您個戶口號碼，但係我知道您同我都咁硬頸，冇您o既指示之下，我係唔會立亂將o的錢入落個戶口度o既，所以您都唔駛咁憫爭o丫… @_@ 您唔啋我好慘o架…

好累呀，食完晚飯就即刻攤佐上床，冇熄燈就訓著佐。但記憶中好似傾過o下電話咁，印象中又好似自己半睡半醒o既時候唔知點解傻傻o地咁拿住個電話係咁喂喂喂… @_@

您病佐仲未好返，要休息多o的，咪再掛住整生日禮物畀我啦！嗯…我愛您呀！

>>April 11, 2007 at 2:07:07 AM GMT+8