2008 年 2 月 14 日 星期四 【乍雨乍晴】

今日係情人節，亦都係我同婆婆o既拍拖一周年紀念日呀！啜啜啜啜啜！

帶佐您去美麗華下面o個間Todai食自助餐，梗係要帶您去見識o下，食o下好o野啦！

好好味，多o野食呀！=p 最鐘意食呢度o的梳乎厘！yumi！

足足大半個月之前就要買定飛喇，仲要成四百幾蚊位，真係好過去搶。冇得訂位迫人買貴飛，慌死你唔o黎坐唔晒o的位會蝕錢咁。講真，七點幾落到去直至食完走人，佢咪又係坐唔滿！扮晒o野！

同您食自助餐呢就真係會蝕本o架，食咁少o野o既，點返本呢？食食食食食，要食個半人o既份量先得呀…有件頹cake送，不過酸到呀媽都唔認得，好心收得人錢就咪送o的垃圾畀人啦！cheap cheap！


食飽飽就送您返屋企…

>>September 2, 2008 at 3:45:33 AM GMT+8

2008 年 2 月 13 日 星期三 【乍雨乍晴】

男女符號（男）♂、（女）♀的來歷有兩種說法。

第一種說法：因為愛神丘比特的弓箭袋狀如「♂」，女神維納愛美，常持小鏡子形似「♀」，人們就用這兩個符號作為愛神和女神的代號，後來它們就被分別用來表示男和女了。植物學家借用這兩個符號來表示植物兩性花。

另一種說法：起初，這兩個符號並非表示男女的，而是植物學家先用♂表示雄花，♀表示雌花的。

除此以外，在介紹種子植物的繁殖和繁殖器官花程式和花圖式時，為方便表述和記憶，用字母、符號和數字表示花各部分的組成、排列、位置以及相互關系的公式。

字母：拉丁文的第一個字母K表示花萼，C表示花冠，P表示花被，G表示雌蕊群，A表示雄蕊群。

數字：0表示缺少或退化, ∞ 表示10個以上，寫在字母右下角。

符號：+ 表示輪數，() 表示合生，︰ 表示心皮與子房數隔開，如心皮︰子房。

＊ 表示輻射對稱（整齊花），↑表示兩側對稱（不整齊花）。

隨著遺傳學的發展，遺傳學家在研究動物遺傳學、人類遺傳學時，也用♂表示雄性動物和男性，用♀表示雌性動物和女性。

>>February 28, 2008 at 3:45:02 AM GMT+8

2008 年 2 月 12 日 星期二 【乍雨乍晴】

最近發現佐個巴士迷o既新聞組網頁，連續幾晚累都唔訓覺，係咁睇係咁睇… @_@

住香港島o既我，自細就係由o的又爛又殘又污糟o既中巴陪住長大，對佢o地o既感情好深厚…
巴士迷網頁︰香港交通網

中巴好得意o架，好鐘意買好多唔同種類o既巴士，好似o的手袋o既限量版咁，好多款都係得幾架，其中我最鐘意o既型號，就係Dennis Jubilant（中巴車隊編號︰DS），行內人叫佢做鴨車，中巴呢邊得三十架，我細個時主力係做柴灣o既8號同82號線，所以成日都有機會搭到佢o地。


佢o地係前置引擎，勁嘈，但係engine聲最特別。另外佢o地車身高，上車要行兩級先入到車廂。而且車頭條路好窄，落車門前面近住副engine有個單丁位，我就最鐘意坐o係呢個位度聽佢o既聲，不過勁熱…


另一個款中巴得一架，就係Dennis Dominator（中巴車隊編號︰DD），我個英文名都係參考佢而改o架！


多謝整呢個網頁o既人兄為我鉤起咁多回憶。
圖片來源︰中華巴士車隊相片集

>>September 2, 2008 at 4:02:25 AM GMT+8

2008 年 2 月 11 日 星期一 【乍雨乍晴】

好奇怪，唔知係咪因為冬天o既關係，呢件事每年到佐呢o的時候總係會發生！

發現有呢個現象其實都已經係早幾年o既事，o個時我應該讀緊大學，深夜o係屋企對住部電腦「咪」書o既時候。

究竟係咩事呢？

其實就係好多時都會聽到屋企附近o既某一家住宅深夜傳o黎女人o既呻吟聲。以我多年經驗分析，呢o的呻吟聲一定係做愛o個時發出o既！絕對唔係樓下o的貓o既叫春聲又或者係細路仔夜晚扭計o既喊聲！！！

住o係香港地有時又真係幾慘，o的屋密麻麻咁，兩公婆做o下愛玩得激o的，叫得大聲佐少少，都會嘈到附近o的隔o黎鄰舍，兼且冇晒私隱。秋冬時分唔開冷氣已經少佐o的噪音嘈雜聲，有時為佐空氣流通開佐隻窗又會傳佐o的私人聲浪出o黎，真係無奈…

>>February 26, 2008 at 2:16:00 AM GMT+8

2008 年 2 月 10 日 星期日 【乍雨乍晴】

寒冷o既拜年日…晨早流流未訓夠，四嬸就打o黎叫飲茶…嗯…好啦，見咁人齊，去啦…

呢個係大好機會見o下我o的親戚逗利是，梗係要預埋您啦，不過您話要見人要化好晒妝先出得門口，我沖埋涼駕埋車入大埔您都未得，琴晚仲要整唔見佐您對手套，您要四圍去搵。去百佳買手信之餘，睇唔o岩都畀您搵返對手套！mmm…乜您真係交佐畀我咩？！

之後您仲要去埋太古城，先買到份海味上我屋企拜年，但係買到手信人o地都等完位兼飲完茶喇！最終都係miss佐個家庭飯局…激死…

於是就改為上佐我屋企同我媽媽拜年，您話媽媽今日對您好有笑容喎，我不嬲都話佢冇乜o野o架啦，佢有唔鐘意您喎，您咁怕佢做乜呢？

之後再上埋去(女麻女麻)度拜年囉，搞掂就返入大埔，o係您屋企食飯。噢…新年假期就咁完結，又要返工喇…

>>February 26, 2008 at 2:09:04 AM GMT+8

2008 年 2 月 9 日 星期六 【乍雨乍晴】

初三放假喇，下晝入佐去大埔，諗住同您去街，點知您又掛住訓覺，咁我就駕車入粉嶺，同健健媽媽拜年先，點知一泊低架車您就打返畀我，話我唔帶埋您去… @_@

您話您o地有親戚o黎佐，叫我快o的返o黎逗利是。利是多少都唔重要o丫，最重要係見o下您嘛，同埋新年流流點都要o係您o的親戚面前蒲o下頭啦。

上到您度真係櫈都未坐暖，您就話屋企唔夠利是派，要我去大家姐度挪…咁都得？！ @_@ 挪完返o黎又一次未坐暖張櫈，您又話要落街訂位今晚食飯… @_@ 激死…

好在o係等食晚飯o既時候，都打佐陣麻雀，同老人家玩輸佐幾十蚊，都叫做有交代。您o的親戚好似有o的又未見過咁，有o的又好似好面善…mmm…我認人都幾差… @_@

之後出佐去百佳買禮物，美其名話去您大家姐屋企拜年，其實就梗係上去打牌啦。仲有o個個好乞人憎o既珠珠都o係度，難得有機會同佢打，今次一定要搵佢祭旗呀！結果我o地兩個人打佐四圈，居然贏佐三百蚊，lucky！珠珠荷包重傷，好o野！

可惜您姐夫要訓覺，打得四圈就要收皮，再駕車送返您o地返屋企…

>>February 25, 2008 at 2:43:48 AM GMT+8

2008 年 2 月 8 日 星期五 【乍雨乍晴】

初二呀又係要返工，我呢o的員工真係唔話得啦，畀晒o的靚假老細放。

不過初二呢o的大日子，基本上就冇乜舖開門做生意，同埋冇乜大事會發生，所以…咁就梗係要打o下牌啦！

唔知係咪舊年公司屎忽鬼多，有o的舊年有玩開o既同事今年都唔想玩，有所顧慮咁樣。不過正所謂「有強姦、冇局賭」，算數。一班人最忌就係唔齊心，你算我、我算你咁，都唔知為乜。

我就遊戲人間o既嗟，一於好少理。不過搞佐成個幾兩個鐘先夠四個人玩，仲要唔玩錢兼打得四圈，不過Kenji都輸佐成千幾分喇！唔多夠喉但冇法子…唉…新翠呢頭家，散晒，冇癮。

>>February 25, 2008 at 1:46:22 AM GMT+8

2008 年 2 月 7 日 星期四 【乍雨乍晴】

祝大家有個愉快o既農曆新年！新一年賺多o的！

年初一返工其實都幾好，冇乜舖開即係冇乜突發事件會發生，可以專心咁做我o既文件。做完兼交埋個outstanding佐成個月o既report之後，又開始要做每季最煩o既budget variance report，一睇睇盤數…大鑊！因為o的單太遲上，大部分年尾找數o既單都會入晒落2008年o既第一季…唉…好煩呀！所以我都話有單就最好即刻上，話知account o個邊點睇啦，老細話儲埋一堆先上，唔駛分咁多次做咁繁複係唔work o架！

做數就最怕亂，好在您都唔算係太早過o黎接我收工，係咪等到有o的悶親您呢？錫返您啦~ 我愛您呀~ 婆婆~ 大年初一開個年先啦！ccc！>3<

收工就走落銅鑼灣Sogo，但都係揀唔到合您心水o既禮物畀我媽媽…嗯…唔好理喇，一於去百里鮮食個飯先啦，要睇大老爺同謝皇上呀！畀您傳染佐電視精病添… @_@

>>February 11, 2008 at 4:10:59 AM GMT+8

2008 年 2 月 6 日 星期三 【乍雨乍晴】

話說您係新年前o既大掃除，千挑萬選佐一大輪後，終於都揀好佐一批唔要o既舊衫出o黎，決定要捐畀人。我提議求其搵個回收箱捐佐去就算，但係您個腦就不停咁轉，怕o的舊衫冇好歸宿又驚o的舊衫幫唔到o的真正有需要o既人… @_@ 經過琴晚一番爭辯後，最後選擇佐您心目中認為最正氣o既機構︰基督教勵行會。

不過呢間o野o的收集箱大部分都o係市區，大埔區就直頭冇，所以就引發佐晨早起身幫您車o的舊衫去回收…六點就要起身喇冇陰公！不過都好，可以令到您早o的起身早o的出門口…係都要拎去基督教勵行會，真係頂您不順！ @_@

今晚要去您屋企食團年飯喎，而您又除夕放早佐，於是就過佐o黎新翠等我收工（唔畀我OT遲到）。不過齋等好悶o既，早兩日o係沙田睇佐中條手鍊，今日o的金價又無端端跌佐，梗係要即刻買畀您，靚靚o架~ 要您做個貴婦嘛！

出出入入兩次大埔…今日真係冇得頂喇… @_@ 駕車駕到有o的累…

>>February 11, 2008 at 3:39:49 AM GMT+8

2008 年 2 月 5 日 星期二 【乍雨乍晴】

新人返工o既第二日，老細就開始放假喇，留低佢要我教佢做o野，九億個reports未做，新翠o係好幾個講outstanding list o既emails度都榜上有名，我真係得鬼閒教新人咩！

老細唔o係度，加上有o的新年氣氛，個人都有o的懶散。慢慢覺得個新人其實都醒醒o地，因為佢有時都識得偷懶，希望真係醒o的啦…

問佢o的Excel得唔得，佢又話唔係幾得…嗯…點搞呢？呢度好多reports都有spreadsheet要做o架喎，有o的算式一移佐位又要執一執唔係自動o架喎…教佢咩好呢？結果我叫佢幫我draft封reply letter畀公證行，等佢有o的o野做。不過佢draft完一睇…嗯…mmm…er…唉…

下晝個Regional I/C突然又落佐o黎，阻住晒做o野，仲要捉住個新人傾閒偈，好心佢冇o野做就早o的搭車上皇崗啦，唔好o係度煩住晒。同個新人傾完之後又捉住我傾，結果無端端畀佢搞佐半個鐘…頂！

>>February 11, 2008 at 4:00:42 AM GMT+8