2008 年 7 月 23 日 星期三 【清涼】

Red Cliff 《赤壁》

好睇旨數（十粒星係滿分）︰★★★★☆ ☆☆☆☆☆

屈機之戲！好在係用百老匯電影中心o既贈券去睇o既嗟！

佢老闆，成套戲都係拖長o黎做，打打打打打一大餐，一個人物打五分鐘，個個都係以一敵百打不死，係周瑜係咁二中佐支箭叫做傷佐少少咁樣，都係呢類型戲o既缺點之一。套戲…有o的悶…

滿以為終於都入肉要打赤壁之戰，點知…妖…

我事先冇睇影評之類o既資訊，唔知呢套戲係分開佐上、下集，只係知道套戲好長，兩個幾鐘，但係真係睇到最後最火滾就係見到呢兩個shots…真係乜粗口都爆晒出o黎。


原來呢套戲真係好似個戲名咁，係介紹「赤壁」呢個地方，並唔係打「赤壁之戰」，係我搞錯佐，對唔住。不過，再睇下集o既旨數（都係十粒星滿分）仍然高企︰★★★★★ ★★★☆☆

>>August 31, 2008 at 3:22:09 AM GMT+8

2008 年 7 月 22 日 星期二 【清涼】

Lost 迷失

最近真係為佐自己o既前途好迷失…好似做o野做到麻木晒，冇晒方向感…

本來諗住真係做埋今年就點都要走，出去闖又好，調o下site都好，但係而家雜務纏身真係唔知點走好…o的signage o既license已經批佐，但係冇時間搞呢壇o野o既LMS，個PA又冇乜潛質睇o黎都係發展有限，究竟我呢個包伏幾時先可以交畀下一個接班人？

日日做到八、九點，生活真係異常咁dry，新翠可以再學o既o野太有限，至少我連車場o既運作都未曾接觸過，點出去其他大場撈呀？！

另一方面，又想去考個地產牌，但係一直都冇「的」起心肝去報course同埋報考，又唔想畀錢去讀物管course…

點呢？究竟想點呢？可以點呢？

>>August 11, 2008 at 1:20:27 AM GMT+8

2008 年 7 月 21 日 星期一 【清涼】

Self-consolation 自我安慰

最近個前regional i/c（即係而家sub-regional i/c）成日講，話有o的以前跟開佢o既維修同事，最近見個市好就走晒出去做，話佢o地好蠢，原因係個市其實係走緊下坡，其實人各有志，人o地出去闖又關佢咩事呢？

物業管理呢一行，可以話係打公仔o既避難所，想睇o下個市道點樣，只要睇o下我o地呢行請唔請到人，人手緊唔緊絀，就會一清二楚。呢期公司真係廿個煲得三個蓋，o的o野好似做極都有，湧住咁o黎，抖不過氣…全因為人手不足。

我o地個sub-region就真係出晒名冇前途，因為有個「樽頸」位夠q住晒，佢係有佢o個套邏輯，但係好多時都唔多work，同佢講完一大輪，聽完佢o既一番「偉論」，結果都係推返個波畀你食，有咩事就話係我o地自己揀錯，o個時已經一早同我o地分析晒云云… @_@ o徙時間之餘亦影響工作心情，仲要畀佢把聲搞到嚴重聽覺受損，真係唔傾好過傾啦，畀o的時間我o地靜靜o地做o野啦唔該…

有時o的o野我o地真係決定唔到先諮詢o下佢老人家意見嗟，畀佢罵完一大輪都只係想佢畀個最後決定，點知最後佢都係又怕死又唔肯承擔，答案無棱兩可。最終過到骨佢就悻悻然，過唔到衰佐就又罵我o地一大餐，咁o既老細，真係唔該晒。

所以好難怪佢眾伴親離，佢手下其實有唔少猛將，但係都畀佢浪費晒同埋o係漫長o既日子裡面磨滅晒抱負、理想同意志，冇一個o係佢手下係唔希望離開佢，難道真係眾人皆醉佢獨醒？

人o地搵到好工走人又話人o地唔識貨，唔通真係成世跟住佢呢個冇出色o既老細，o係佢底下日日畀其他region o既人笑咩？！即管畀佢自己自我安慰一下啦，或者佢會覺得開心o的…

>>August 5, 2008 at 3:11:48 AM GMT+8

2008 年 7 月 20 日 星期日 【清涼】

Digital Camera 數碼相機

星期四同C & A食飯，席間有人提起相機呢樣o野，C話佢條仔肯幾萬銀買部相機，居然為佐食餐一千蚊o既飯而肉痛，A又話佢隻佬抵受唔住誘惑最終都買佐部單鏡反光機…

其實男人o既玩意多的是，包括有足球、車、音響、相機等等等等…好可惜，我唔可以o係以上幾項度深入搵到我o既興趣，最鐘意o既，仍然係女人。

各花入各眼，但係要玩到好專業咁影張相又唔係我o個杯茶。我都想換佐我而家o個部傻瓜機好耐，不過始終冇「的」起心肝，唔捨得駛呢份多餘錢。

講真，其實個人同公司都一樣，資源總唔會係無限量咁供應。最重要o既，係點樣o係有限度o既資源底下，做到平、靚、正、快o既服務或者貨品，四大原則缺一不可。冇經過思考咁不斷以資源補救唔識用腦o既呢個缺點，正正係而家新一代人比唔起上一代人o既重要原因之一。

傻瓜機影日落，攝於大尾篤路邊。


>>August 31, 2008 at 3:29:02 AM GMT+8

2008 年 7 月 19 日 星期六 【清涼】

RCW/RFQ (Request for contractor work/Request for Quotation) 外判/報價

最近老細講起，話幫我o係公司個「低能管理系統」度開埋用呢個function o既權限畀我，我即時耍手又拎頭，因為真係非常十分之好很唔想掂呢泛o野，一開始佐就冇得返轉頭，一入「憂」門沉似海…

我唔係唔想學唔想做，只係唔得閒學同唔得閒做。做佐半年o既PA仲係成pat屎咁，叫佢寄信入信封都可以兩封信調轉o黎入，搞到和記問我做乜寄水務局封信畀佢… @_@ 呢個function係維修o既同事用o既，我一直都只係read only，我實在唔想踩過界，做埋人o地o個份，我只想快o的可以調較返o的返工時間，唔駛日日做到八點半、九點幾甚或至十點幾先有得走…

開佐個function畀我係好，有時間o既話我一定會學，一定會做，不過，可唔可以真係畀我抖一抖先呢？我真係做到好累喇…

>>August 5, 2008 at 2:31:41 AM GMT+8

2008 年 7 月 18 日 星期五 【清涼】

On the Road 《向世界出發》

您咪以為我真係咁沉迷睇電視或者係好鐘意謝老四呀，其實我睇完星期三個集就已經冇睇喇，因為我o既目標已經出佐場！佢就係我最鐘意o既酒tequila。

難得有個墨西哥特輯講tequila，雖然只得短短五分鐘，而且講o既o野亦都唔多，但係都總好過只得相片同文字o既描述。



Cut佐出o黎放佐上youtube。


>>August 31, 2008 at 3:32:43 AM GMT+8

2008 年 7 月 17 日 星期四 【清涼】

Freshman 新人

今晚臨急臨忙同C & A食飯，我估有可能係我部電話虧虧o地，收唔到Carol o既sms都未定，又或者個電池蓋甩佐斷電搞到冇佐o的未讀o既sms都未定。

今晚得我o地三個，唔知點解o的話題又好似多佐，題材當然少不了o的男男女女問題，C最近發覺男友有o的變質，但係呢o的情況一般拍佐拖有一段日子就會係咁。究竟係佢身在福中不知福，定係呢個男人根本未達到佢o既「高」要求呢？我就真係唔識答。但係我o地都一致裁定，條友仔成日都側側膊唔畀錢，買自己o野就闊卓到死、但係買o野畀C就冇o黎心肝計住晒咁就係佢男友o既錯！

我o地講開o的新人o既工作表現，發覺而家呢一代請新人，要教識佢o地正確o既工作態度，真係痛苦到不得了。

而家o的新人真係好奇怪，做o野都唔放個心落去，前輩教佢o地野又當耳邊風冇心機學，結果就係o的o野做極都錯、學極都唔識，有時真係幾惡頂。呢o的唔安份o既新人，究竟係咩原因而養成佐咁o既工作態度，真係好值得思考。

工作散漫，精神唔集中，返工等放工，只問公司可以畀到咩佢，而唔會諗點樣可以貢獻公司更多，斤斤計較，叫佢做o野多多怨言，彷彿係八十年代中期出世o既人o既寫照。其實佢o地o既成長已經比起我o地幸福好多，我信相大部分都係o係物質不缺o既情況下讀書、長大，但係偏偏就係學唔到o個種態度，奇怪到極。

好似我公司個PA咁，返佐工半年，做o的routine o野都仲係甩甩漏漏，但係提起買文具就好開心。成日話office呢樣冇o個樣冇，又話電腦慢成日hang機，我用佐三年半都仲係用Windows 98公司最慢o個部機，亦試過用MS Word逐筆逐筆重新勾畫過個site o既floorplans…有人問我點解唔用AutoCAD畫，我答一來我唔識用AutoCAD，二來公司afford唔起一套咁o既software，只係為佐畫幾張floorplans。

我o地呢o的做員工o既，幾時都係諗，點樣盡用公司最有限o既資源，去做到最多o既o野，點都要撐住個雞頭，令到公司外表睇落風風光光，裡面所用o既心機同時間，難道我又要同公司逐分逐毫去計？！

>>March 30, 2009 at 12:24:06 AM GMT+8

2008 年 7 月 16 日 星期三 【清涼】

Cultivation 教養

首先我要當眾表明，我細個o既時候屋企o既家教都算係幾嚴o既，只係我唔受教，你o地先會見到今日o既我。

今日好嬲，因為帶完您個姨甥仔、女去遊車河之後，您個姨甥仔超級頑劣，上車o既時候係咁大大聲叫人開門，冇o黎禮貌，都算喇。同佢o地玩完去到佢屋企樓下落車，由於左邊路邊冇位，要騎住左邊架車停o係路邊，右邊只係o岩o岩夠一架車過，而後面亦有車o黎緊。

不過呢條友仔已經急不及待咁自己開門落車，咁都未算衰。我諗住先再帶佢上行人路，再行返去架車度接您同姨甥女，叫佢企定定o係行人路等我o地，佢係都唔聽，係要走出馬路！真係火都o黎埋！！！

第一次細細聲同佢講再拖住佢唔畀佢走出去，佢唔聽；第二次惡少少加命令式同埋攬住佢，佢都仲係唔聽；第三次再加強語氣鬧埋再抱起佢，佢都仲係要掙扎走出馬路！我真係火到幾乎要爆粗，但係最終都冇，費事佢學佐一陣返到屋企同佢老豆老母講，再話係我教。

您落佐車，帶返佢o地返屋企，我依然係好慶，因為呢個小朋友真係不知所謂，唔駛求我都唔會再有下一次。

教育一個細路，最重要o既，係聽從合理o既指示。今年九月就會升小一，斷估以佢o既知識同智慧，冇可能唔知馬路係一個危險o既地方，問佢點解係要走出馬路，得出o黎o既原因，居然係︰「我想閂車門呀！」哦。我x！你冇x o野呀嘛！

好！我就當你年少無知咩都唔識，但係好明顯，呢個細路o既服從性幾乎等如零。係，佢係好叻，識好多字，但係作為一個人，甚或至係一個小朋友，連基本對長輩o既服從性都冇，我真係唔知佢屋企人係點教仔（得罪都要講），定還是一味放縱，培養到佢今時今日以為自己想做乜就做乜。

我話過，第日如果要生細路，都想生個曳o的又夠醒o既細路，但係第一樣o野我要教識佢o既，就係一定要服從長輩o既說話，o係我o既範圍內，一定會有好多自由，但係如果我一吹雞就唔該佢要乖乖o地聽聽話話，叫佢做東就唔好走去做西，否則只會換o黎大把二把刮到佢聽話為止。

若果細個已經冇好好咁教養佢，第日大過佐都唔會係一個有用o既人。至少我o係爸爸媽媽o既管教之下，雖然我o係佢o地心目中唔係一個聽話o既仔，但係最少出到去做o野冇人會話我冇教養。我係曳、係賤，但係呢o的唔係我爸爸媽媽教我，只係我唔聽教自己學成咁。尤係有人講我爸爸媽媽半句壞話，我一定同佢死過！

嬲呀！

>>August 5, 2008 at 2:01:50 AM GMT+8

2008 年 7 月 15 日 星期二 【清涼】

Superhero Movie 《超低能特攻隊》

OMG！呢套o野真係爛到冇朋友！之前睇Roadshow o的預告好似幾搞笑咁，諗住又係o個o的無聊超搞笑串燒戲，今日終於都睇佐喇，結果真係好強差人意。好在冇入戲院睇咋！

「超低能」，真係冇改錯名，冇想像中咁好笑，唔似得o個o的咩「搞乜鬼門(手羅)命習作」咁過癮，硬板板咁搵o的o野o黎低能…些少失望。最好笑就係扮Batman低個o個時老豆老母畀人老笠殺佐o個一幕，呢個「蜻蜓俠」就係o係連環不幸之中自己殺死佐自己父母，勁無聊。


爛成咁，好睇旨數（十粒星係滿分）我只係畀佢︰★☆☆☆☆ ☆☆☆☆☆

>>August 31, 2008 at 3:36:51 AM GMT+8

2008 年 7 月 14 日 星期一 【溫暖】

Lightning 閃電

係咁o係個窗邊捕，又試過連拍亦試過影movie再以圖cut返條電出o黎，但係都係失敗佐，原因係部相機快門唔夠快？或者仲有一個更重要o既因素，就係閃電o個個位並唔係o係我個窗度可以望到… @_@


最近o既天氣好反常，唔係落雨落到山洪暴發，就係烈日乾煎，真係好恐怖。落雨，又怕架chiller噴白霧，好天又怕唔夠冷氣…有時真係唔知o係呢個site應該點做落去…唉…不過o係邊度做都總有佢o既問題o係度o既，不過目前面對o既問題，係咪應該由o的專業o的o既人去解決而唔係由我呢o的二打六去做呢？

維修呀維修，幾時先請到人？

>>August 31, 2008 at 3:43:05 AM GMT+8