2008 年 7 月 3 日 星期四 【清涼】

《分手》
陶傑

大學一年級，是許多女孩子摔掉舊男友的時候。

一般發生在剛進去之後的一個月內。人生的新階段，大家都該冷靜地想一想。你的高考成績竟然比他好，自從八月放榜以來，你們已經心有靈犀，你進了大學讀法律，他只報讀了副學士。彼此心中有一根刺，這是攤牌的時候。

「我沒有嫌棄你，真的，不要那麼。」你鼓起勇氣，在皇后碼頭圍板之外，吹涼涼的海風，你告訴他你的感受：「我覺得我們的志趣畢竟有點不同。不，讀酒店管理也很好的，你的那一系，兩年之後還是可以跟一個Degree銜接的，希望你振作好好唸下去。」

你沒有告訴他全部真話。因為你忍受不了他目前的地位，有一個「副」字。繼續跟他發展下去，周圍的朋友是會笑你們的。他沒有說話，頭別過一邊，凝望維港兩岸的一片燈海。剛下過幾天雨，海港的夜景洗滌得一片澄澈，該是雨過青天的時節，很奇怪，這時候卻是一對戀情的終結，你開始意會讀英國文學的那一科，老師所說的戲劇境況的反諷（Irony），到底是何所指。

但你不想再拖沓下去。與其搬進宿舍之後，跟他漸行漸遠，慢慢令他知道你的立場，不如脆一些。在生物世界，所有雌性動物只仰慕比自己強的追求者，而不是相反。他已盡了最大的努力，你知道，但第一次戀愛，男女都同年，由一起讀F4開始，最終都要面對這樣的考驗。

對他的愛，一切毋可置疑。他由於對你神魂顛倒，會考溫習時才無法專心。媽咪的態度反倒很開明：這個男仔也不錯嗎，至少他很老實。他唸副學士，我和爸爸商量過，認為不是一個障礙，不過，一切隨你喜歡。只因為帶過他到羅便臣道的家中晚飯過一次，他很狡獪地討了你父母的歡心。但不，不可以的。一顆心變了，主意已經拿定，一切不可以再回頭。

一艘貨輪在港海緩緩駛過，響起一聲啞啞的汽笛聲。不知何故，你的眼眶也噙滿淚水，他伏在欄杆上，嚶嚶地啜泣起來。你的手機響起了，是「他」打來的電話，那個三年級的醫科生。你走到一旁，打開電話，低聲說：「我已經告訴他了，回頭我再Call你。」他的背部在痛苦地抽搐。你悲哀地走上前去。這一夜的港海為什麼如此明麗？你憐憫他，有一點點憎恨這樣的Situation。

貨輪去遠了，依依又傳來另一響笛聲。

----------------------------------------------------------------------------------------------------------------------------

因為會考成績唔同，變成有唔同o既出路，最終分手收場。咁老土o既故事，其實真係o係我身邊o既朋友發生過。

人性就真係好現實o既，尤其係今時今日呢個咁物質o既社會。咩情呀、咩義呀多數都放埋一邊o架啦，唉…

>>July 15, 2008 at 1:25:01 AM GMT+8

2008 年 7 月 2 日 星期三 【清涼】

Prospect 前途

今日婆婆o係度計o下儲佐幾多錢，計計埋埋都仲係雞碎咁多，睇o黎都真係要重新考慮一下前途、前景o既問題。

點解無端端又會諗前途問題呢？因為就快人到中年，又見而家o的經濟過熱就快又去到一個爆破調整o既時候，眼看樓市好大機會o係年尾大幅回落之際，但係銀行戶口居然冇錢入市畀首期買樓，真係灰過泥灰…

話晒都已經係適婚年齡，而家o係物管裡面磨o下磨o下都唔係辦法，日日做過冇停手，一個星期最少四日返工返多過十二個鐘，但係回報都只係萬六蚊一個月，身邊o的保安仔、幫唔到手o既PA，個個都準時放工拍拍蘿柚走人，我就做到死o下死o下咁…

o係呢度已經開始第四個cycle，繼之前幾年熟佐公司operation、cleaning、promotion、customer services o既o野之後，打從呀Mi走佐之後，接手公司admin、leasing同accounting o既o野已經忙到嘔茄，呀Man走佐之後又要跟多佐maintenance o既o野，彷彿做極都唔完o既o野，真係有o的頂唔蒲，究竟轉site定轉公司好？年尾前應該要做個決定。

我愛您！ >3<

>>July 22, 2008 at 12:30:38 AM GMT+8

2008 年 7 月 1 日 星期二 【清涼】

Sense of Direction 方向感

呀偉成日都話我認得o的路好犀利，究竟點解會認得o既呢？

其實我自細就有鋪睇地圖癮，雖然係紙上談兵，好多地方都冇機會親身去探訪，但係我仍然係鐘意睇，鐘意挪o的新舊地圖o黎比較o下，睇o下一個地方o既發展同變化，自得其樂。

另一方面，我亦都好鐘意坐巴士，當有機會坐任何交通工具去到一個我以前未去過o既地方，我就點眼訓都唔會訓覺，留意o下o的地標、地形、方向等。久而久之，好多路或者地方，都印佐o係我個腦裡面。

對於一個地方點樣去，只要畀我有機會去一次，o個個地方就會印佐o係我個腦裡面，約莫點樣可以由大路去到o個個位置o既附近，基本上對我o黎講係冇難度。如果遇著o的小路或者好多橫街，咁就要花多少少時間，經過三、兩次，咁我點都可以讀佐條路入腦。

而且香港o的路其實好易行，只要o係心裡面有個方位，知道自己約莫o係地圖上o既邊個位置，向緊邊個方向行，o的路就多數都互通，只要大方向冇錯，差一、兩條街就點兜都可以兜得返去目的地。

無論當我搭車或者駕車行過一條新路，返到屋企我都會做一次賽後檢討，睇返自己經過o既地方，再深化腦裡面o個幅地圖o既印象，到下一次再去同一個地方，就可以減少誤差。

當走遍晒全香港o既路之時，可能就係開始認道路名、地方名同大廈名o既時候。或者有機會o既話去考個的士牌都未定！

>>July 22, 2008 at 12:20:27 AM GMT+8

2008 年 6 月 30 日 星期一 【酷熱】

Boxing Day 拆禮物日

您o係新年挪o黎拜年o既禮物居然到佐今日先至畀我媽媽拎返出o黎拆…所以您唔怪得我冇留意您送畀我媽媽o的禮物o既去向，因為真係無從稽考… @_@

媽媽話我o地畀人呃，下次唔好再買o的咁o既o野。個禮盒裡面o的海味得面頭薄薄一層，下面就墊住一層厚厚o既海棉。我話呢o的咁o既新年禮盒，個個買得o既都預佐畀佢呃o架啦！邊度有得咁計o架！再唔係下次咪去南北行街自己掃貨囉！


成日將o的禮物收埋唔拆唔食，結果就係發現o的乾瑤柱裡面居然有蟻！媽媽仲話「凳」o下佢就冇事… @_@ 之後又發現o的冬菇「林」晒，我就話咁擺法柴灣咁潮濕乜都死啦！媽媽就辯稱o的冬菇唔靚所以先會「林」…吼！

整體氣氛良好並於歡笑聲中渡過。心情靚靚！

>>August 31, 2008 at 5:50:34 PM GMT+8

2008 年 6 月 29 日 星期日 【雨】

Reimbursement 償還

今日由您o既口中聽到一個好消息，就係您已經將讀書年代差您兩個家姐o既錢還清晒，真係無債一身輕！個人認為起碼有時有爭嗌起上o黎，都少佐樣痛腳畀人捉住，o係屋企講o野都可以有力些少。

而家仲差o的死人政府loan還埋就可以安安樂樂儲錢搞結婚o既o野，真係諗起都開心，嘻嘻…

唔知我o地個基金而家儲佐幾多錢呢？可唔可以報個數o黎聽o下？一係買返一、兩手匯豐、恒生、新地咁，到結婚時咪放佐去囉，我估咁樣都幾好，可以考慮o下o丫…

點呢？點呢？

>>July 1, 2008 at 4:53:46 AM GMT+8

2008 年 6 月 28 日 星期六 【雷雨】

Circular Road Shuttling 環迴公路走幾遍

原定星期三安排o既節目「環迴公路走幾遍」，因為天雨o既關係同埋車房傑少唔能夠準時交車而順延至今晚。原定plan好佐係由柴灣出發，先入元朗再經新界環迴公路去西貢作結，但係因為幾架車都去佐唔同o既地方，唯有各自各入元朗集合。

今晚係整好架車之後第一次正式出去玩，心情都幾興奮，因為有班friends一齊陪我行o的我唔係成日行o既路，仲有人帶我行新路，今晚行程可以話係盡興而歸！

四架車o係元朗集合，食過o下o野再出發，呀豪話帶我o地由沙頭角經鹿頸入新娘潭。其實早前都同婆婆駕車去到鹿頸，仲同隻牛牛影佐幾張相添，估唔到我o地o既行程，據聞又係畀牛牛搞到滯留佐o係鹿頸一陣。

有架車o係鹿頸話因為避隻牛而跌佐落海喎，真係信不信由你。過佐車禍現場，先發覺原來上次同婆婆去到o個條橋o個間廟，就o係o個度！噢…原來上次幾乎去到沙頭角！

一班人行行停停，結果四點左右出到太和，食個麥當當之後，呀豪因為唔o岩路就北上歸家，我同Kenji就送埋呀偉返西貢先再返柴灣，玩到天光先返屋企… @_@

9號幹線︰城門隧道↔大圍↔沙田↔馬料水↔大埔↔粉嶺↔上水↔落馬洲↔元朗↔洪水橋↔屯門↔深井↔荃灣

今次淨係玩佐環迴公路上半截，下半截第日再玩過！


>>August 31, 2008 at 5:53:51 PM GMT+8

2008 年 6 月 27 日 星期五 【陰】

Photography 攝影

我諗，我同我其中一個朋友都同時憎恨攝影。

其實我自己唔係特別鐘意影相，只不過有時候有o的情境實在值得留念，所以會影低。同埋工作需要，隨身邀帶相機已經成為佐我o既習慣。

其實o係咸封年前，o係lab度遇到條賤人，世界真細小小小，呢條粉腸，居然就係成日搞住我其中一個最要好o既朋友o既女朋友o既pk，條友為人討厭，一味就係識得擦老細鞋，我見到呢o的人o既背脊就憎到佢個胸口。呢條友有樣嗜好，就係影相。

若干年後，又有一條影相o既茂里出o黎搞搞震，雖然一條鎖匙就敲唔響，兩條鎖匙先會噹噹響，但係作為大部份正常o既男人，都唔會明知人o地有仔都仲要cheap到去搶人o地條女咁低庄，事關大部分男人都有自大狂心理，唔會為佐一棵樹而放棄成個森林。

唔通某o的photographer都擁有同樣o既特性，鐘意搞人家o既女人？真係奇怪。

足足浪費佐我一年幾o既時間，冇心一齊o既一早就唔好搞住晒啦！我追求o既係一生一世o既愛情呀！

>>July 1, 2008 at 4:54:11 AM GMT+8

2008 年 6 月 26 日 星期四 【雨】

Reborn 重生

架車就已經整返好喇，大致上都靚靚仔仔，係右邊車尾o個度仲有o的瑕疵，不過而家連整車加扮靚，都已畀佐六千五喇，非常之肉痛。

其實今個月原本諗住可以慳慳o地，儲返多少少錢，平時都特登畀cash唔碌卡，等o的卡數唔好o係我一出糧o既時候就咬佐啖去，點知無端端自己戇xx，平時o係公路點多車點快、落狗屎或者幾大霧都可以駕馭到，同埋呢期都係玩碌車錫住架車多，但係就偏偏衰佐o係行得最慢o既停車場，條氣仲係有o的唔順！

車頭就大致上整好，車身o的無厘頭核突拉花亦都撕晒，但係當年Kenji撞凹o既右車尾就仲衰過之前，車房少東唔知有心留條後路畀我再去幫襯，定係屈服o係佢老豆o既淫威之下唔敢幫我搞，唯有再等下一次有機會有藉口先再整啦。



>>August 31, 2008 at 5:52:08 PM GMT+8

2008 年 6 月 25 日 星期三 【驟雨】

Game 棋局

早排，親戚飯局，等開飯。

兩個表侄拎左盒中國象棋出黎玩。hmmm，兩個六歲靚仔大對決，我又湊熱鬧去睇下佢o地捉成點。

表侄B仔我一向知佢聰明，不嬲都話頭醒尾。佢o既對手大舊，講醒目講頭腦，應該唔係B仔果皮。所以我o地班大人暗地開左個盤口，個個都買呀B仔贏硬。

點知睇到咁上下，大家都發覺落錯注啦。大舊呢，以一個六歲靚仔o黎講，棋藝真係幾有章法。行每一步都有佢o既用意，而且一o的都唔衝動。相反平時響大人面前醒醒目目既B仔，o的棋亂晒籠，而且仲好多時忍唔住衝動亂行。

大舊一步一步咁進逼，終於去到將軍，而且將到B仔冇棋。B仔勉強將隻「帥」移歪，正當大家都以為大舊會一o野搵隻「車」食左佢之際，大舊居然冇咁做，仲行佐隻九唔搭八o既棋，睇到大家莫名其妙。

搞左一大輪，大舊主動提出，呢鋪棋不如當打和啦。B仔聽到，拿拿臨應承左，仲鬼死咁開心。

眾人散去之後，我坐佐埋大舊身邊，靜雞雞問佢：「你頭先特登唔贏呀B仔o架，係咪？」

大舊點了點頭，露出了一個細路仔獨有o既天真笑容。

「點解呀？」我問。

「B仔如果輸左，佢會唔開心。」大舊答。

「咁你唔想贏咩？」我好奇又問。

大舊個樣好似傻下傻下咁，又露出佢果個招牌笑容，跟住拎左拎右拎頭，就走開左去搵呀B仔玩。

我忽然諗，好多o野，贏輸其實都唔係最重要，最緊要o既係，個遊戲會繼續有人肯陪你玩。

至於真正o既輸贏，邊個先係技高一籌，其實自己早就心裡有數。

贏在心還是贏出面，你會點樣選擇？

細路仔o既兒童智慧，有時比機關算盡o既成年人，有時，仲要勁。

----------------------------------------------------------------------------------------------------------------------------

估唔到新聞組o既「性」版都有人寫o的咁有意思o既o野，網上o既世界真係乜都有。

遊戲人間，人間遊戲。

>>June 26, 2008 at 3:44:25 AM GMT+8

2008 年 6 月 24 日 星期二 【驟雨】

Typhoon Duty 風更

今年第一次掛八號風球，搞到返佐屋企食飯之後又要再返工…真係好慘！

本來以為呢個無聊風好快過，點知天文台唔知發乜癲，夜晚十點九掛到第二朝十一點幾先肯收皮，結果就由今晚十一點一直踩到第二朝十點半…shit…

買定四份杯麵同烏龍茶返公司，夾埋我今晚有四個人當值。估唔到要返風更，返風更就即係戇居居等個風走，撞o岩呢排o的o野做極都做唔完，今晚真係最好時機。對手好似開turbo咁係咁o係個keyboard上面飛馳，一直係咁作作作、回回回、做做做，靈感不斷有…

做到五、六點，真係搾乾搾盡，開始冇心機做o野，咁就唯有hea住等時間過，食o下早餐行來行去…等到九點，老細都仲未返，其他人又唔駛返工，好辛苦，伏佐o係台上面恰佐陣，訓到手到痹晒老細仲未返…頂唔住，蛇佐入去更衣室訓，十點半終於等到老細返o黎…

踩完一個十二碼又一個十二碼，真係鐵人都game over…本來諗星期三放假夜晚可以出車，結果呢日假就咁o徙佐…唉…

咁辛苦，都唔知為乜…

>>July 1, 2008 at 3:16:15 AM GMT+8