2008 年 3 月 25 日 星期二 【微冷】

有見過咁幸福咁靚o既女人嗎？

實在忍唔住，唔好意思，偷一兩張相都要post出o黎喇…

You are so beautiful~


您問我點解要封成三千蚊人情畀我「契」家姐？其實我覺得只係小數目嗟，又何足掛齒呢？或者您會好似o的一般閒人咁諗，我同佢以前一定曾經有過路啦，如果唔係邊會咁厚禮o丫。不過講真o係我識o既人之中，都只係得兩個人我會咁厚禮o既嗟，琦琦家姐係其中之一，另一個係我最好o既朋友健健。

家姐係我最好o既女性朋友。當年讀大學時，我o地o係第一個學期同一班上英文堂，其中一樣功課要兩個人一組去做presentation，我o地兩個人都係人o地o既「揀淨尾」，咁o岩又坐埋一齊，咁就順理成章成為一組，而我o地就係因為呢份功課開始熟。

o個時因為我遲佐去註冊，冇機會同其他同學一齊讀英文bridging course同埋去o-camp，所以唔似得其他人咁o岩o岩開學已經一堆堆咁坐埋一齊，加上我個人都唔鐘意主動識朋友埋堆，我就好自閉，唯獨得佢係我成雙成對o既好朋友。

之後o既時間，我o地o係讀書上都係互相照應，o係生活上亦都互相照顧。又由於大家都係基督徒o既關係，所以就更加諗熟，因為當時o係信仰方面跌倒，只得佢呢個基督徒明白我、扶持我，所以我o地係主內o既姐弟，佢係平時多多照顧我o既好家姐，而我就係有事即刻幫手o既好細佬。

家姐o係感情路上經過咁多兜兜轉轉，終於都搵到一個好歸宿喇，真係好安慰，感謝上帝，願上帝賜福畀佢o地一對新人，白頭到老，永結同心。

>>September 2, 2008 at 2:40:05 AM GMT+8

2008 年 3 月 24 日 星期一 【微冷】

Yumiko到新翠喎，那星！又畀佐大半日佢…

呢個新翠商場推廣部真係冇好帶挾，明明諗住個復活節會順利過渡冇乜o野搞，頂盡都係搵條女o係扮o下兔女郎派o下波，點知又臨時拉呼搵佐呀Yumiko同鍾舒漫o黎，真係做唔死人都偷偷笑…


今日呀Yumiko都冇甩褲又冇露點，除佐佢係特別高之外，都冇乜特別，人流亦唔見得特別多。

問︰點解推廣部好似淨係請到英皇o既人o黎新翠表演o既呢？

>>September 2, 2008 at 2:48:03 AM GMT+8

2008 年 3 月 23 日 星期日 【微冷】

今日要返工喇，好在係返十二點嗟…琴晚幫Carol諗o野諗到十一點幾，再返過香港o個邊，o係天后擺低架車轉由Angel駕返佢屋企，呢條友仔考佐個牌咁耐都冇駕過車，白白畀政府呃佐挪車牌o既錢，幾蝕桌呀！

諗住假日可以慢慢自己一個人做LMS o的o野，點知都係得個吉冇得搞，因為有好多濕碎o野要離開個位去跟…唉…

放工都算幾準時，行到去漁灣村o既一條村路，發現有隻貓o係度鬼鬼鼠鼠偷蕃薯，原來而家o的貓仲係會捉老鼠o架！真係估佢唔到！

估佢唔到o既原因之一，係o個度經常都有o的「好心做壞事」o既人帶晒o的貓飯罐頭去餵o的流浪貓，照計o的貓都唔駛餓到要食老鼠；估佢唔到之二，係原來而家o係城市居住o既貓咪，居然仲未失去佢o地o既覓食本能，令人安慰。

初初見到隻貓慢慢咁行埋舊石屎薹度，我都唔知佢想做乜，以為佢可能玩蟑螂（之前見過），跟住佢突然加速，飛撲埋o的o野度，再用口咬！即時調頭快速走貓，我就見到佢個口係咬住隻老鼠仔，仲要「吱吱」聲咁叫…心裡暗叫︰o的貓真係勁！

不過繼續行返屋企之時，諗返貓食老鼠，咁咪好污糟好多病毒細菌囉？會唔會搞到貓轉人o架！

>>April 14, 2008 at 2:10:18 AM GMT+8

2008 年 3 月 22 日 星期六 【雷雨】

Carol突然吹雞急急腳咁約出o黎食飯，話有o野要我o地幫手喎！

雖然今晚個飯局係去大角咀打邊爐，但係您唔想去，咁我就訓醒入佐大埔陪您先啦！到佐您又話未出得去，上到樓原來您連涼都未沖，真係畀您激死…沖好晒涼又想睇埋套電視劇先出街，唯有訓住等啦…zzz…快o的錫返晒我呢個睡王子啦… >3<

因為您姨甥仔整爛佐您個電話，終於都可以買部新電話畀您喇！部機真係由等到佢出再等到佢跌價，由等佢跌價再等到佢絕跡咁滯，好在都買到嗟。左揀右揀都係揀返最早想要o個隻藍色，幾百蚊當係玩具都抵買，壞佐買過部都唔肉痛。

送返您返屋企之後，就飛出去大角咀。三、四年前o係大角咀返工返佐約莫一年，都唔發覺大角咀有咁多打邊爐o既舖頭，我諗應該係呢幾年先至開o既。

David仔淨係講佐條埃華街我聽，以前o的路就真係行路行得多，但係駕車就真係第一次入去。o的舊區o既路左穿右插，條埃華街又咁長又分開兩段，其實真係幾難搵。雖然有palm個地圖，但係都要兜佐幾個字先去到。妖！原來係馬會o個度！早講嘛！噓！

o的報紙雜誌電視介紹話呢度o的火鍋點好食點新鮮，可惜我對食又唔係好厭尖，不過個價錢就真係貴佐些少，食落肚都係變做屎，有時求其o的都得啦…


Carol轉佐工之後，而家幫公司搞training o個類o既conference，全部o野都係由佢一個人去搞晒，有時真係不得不佩服佢。講真，以我呢o的懶人，真係日日返工日日呻悶都求神拜佛唔好要我搞o的乜creative o野，簡簡單單安安定定即使加班亦冇乜所謂，總之咪叫我諗咁多o野…諗諗諗諗諗…頭都爆！

Carol呢條友仔，真係夠晒有種，做樣樣o野都係向難度、向自己挑戰o既，睇返自己又真係有o的不知進取同怠慢…唉…

>>September 2, 2008 at 2:50:23 AM GMT+8

2008 年 3 月 21 日 星期五 【雷雨】

攪笑轉載

阿拉伯半島電視台對拉登的最新採訪 。
拉登說： 中國是全球唯一絕對不能惹的國家！
原因是這樣的：基地組織曾派出6名精英恐怖分子襲擊中國各地。結果：
1人在炸公車時沒法子擠上車；
1人在炸超市時，炸彈遙控器卻被人扒走了；
1人在炸政府大樓時被保安截住狂揍：「叫你討薪，沒叫你上訪啊！」；
1人成功地炸煤礦穴，死傷數百人，潛回基地後，半年都沒見有任何新聞報導這宗事件，基地組織以為他虛報，遂判以「撒謊罪」處決了；
1人曾經嘗試炸廣州，結果剛一出火車站，炸藥包就給飛車黨搶了，半天還沒定過神來；
最近又派1名女恐怖分子去炸河南 ，卻被人騙去了做媳婦！

>>February 24, 2009 at 3:53:15 AM GMT+8

2008 年 3 月 20 日 星期四 【陰】

十三妹又去台灣喇，仲問我拿老董牛肉麵個地址！

好想食呀！


>>February 24, 2009 at 3:35:12 AM GMT+8

2008 年 3 月 19 日 星期三 【陰】

今日係婆婆o既見工日！接送呢o的o野就梗係唔少得啦！著住高跟鞋四圍走好辛苦o架嘛！見完工公司有o野要搞，結果返佐新翠，同埋順便買埋副新眼鏡畀您！紫色框o架，咁咪同我o個副襯晒囉！情侶裝呀！

另外，今朝早車Kenji去送文件之餘，亦都去佐搵之前學車o既楊師傅。其實我都搵佐佢幾次o架喇，但係次次都撞佢唔到，冇乜緣。學車o個時有次同師傅去過北角o既「德成號」買蛋卷，我知道佢鐘意食，所以特登去佐買o黎送畀佢，佢收到之後都不知幾開心！


咁o岩今日佢又帶住兩個學生去試場，佢一見到我，就o係兩個學生面前「show qual」，問我考佐幾多次合格，咪一次過pass囉！佢老人家即時o係兩個學生面威晒喇，冇計啦，鬼叫佢真係掂咩！

其實我係買佐兩盒蛋卷o架，另一盒拎佐返屋企送畀我媽媽食，媽媽問我點解有盒「德成號」蛋卷，話好貴o架喎（媽媽細過o係北角大），我答佢咪買畀您食o架囉，佢都不知幾開心，仲話o岩o岩琴日o係車上面聽到兩個老人家講，話新年o既時候o的人o係「德成號」排晒隊咁買蛋卷添呀！

呵呵呵！送o的老餅o野畀兩個老人家，兩個都咁開心~ happy~

>>September 2, 2008 at 2:53:35 AM GMT+8

2008 年 3 月 18 日 星期二 【微冷】

終於都放假啦，係兩個孖day即係連放四日呀！

婆婆正在o係屋企努力預備佢聽日o既interview，加油呀！

----------------------------------------------------------------------------------------------------------------------------

陰道和荷包
高慧然
《蘋果日報》2007年11月9日

上海有一個奇怪的案例，一個女人被三個男人輪姦，後跟其中一個男人拍拖，拍拖後，「男朋友」盜用了她的信用卡，碌掉三千多元。女人憤而報警，在錄口供時，無意間提及曾被人「欺負」，始揭發輪姦案。法官後來分別判涉案的另兩個男人七年及十年一個月刑期，卻對案中已經成為受害人「男朋友」的罪犯網開一面。法院的審判極具爭議性，不過這不是我想討論的，我反而覺得案中女事主的心態十分弔詭。

一個女人，通過手機短訊結識了一個男人，第一次見面便被三個男人輪姦。被輪姦後，女人並未報警。這不是新鮮事，很多強姦案或輪姦案的女事主，鑑於巨大的心理壓力，選擇把傷痛收藏在心底。奇怪的是，那男人後來要求拍拖，她居然答應了。更奇怪的是，兩個人拍拖後不久，男人盜用了她的信用卡並去超巿大肆購物。這一次，女人想也不想便報警了。

在某些男人心中，有一條奇怪的公式，他們相信搞掂了女人的陰道，就搞掂了她的心，搞掂了她的心，也就搞掂了她的荷包。那個上海男人就是這麼做的，先輪姦後拍拖，然後大安旨意用女人的信用卡碌卡購物。他以為她下半身收緊的時候握著荷包的手就會鬆開，沒想到在她心中，三千塊錢比她的陰道和尊嚴重要得多！她不介意尊嚴受損，卻絕對不允許荷包受損，這差不多也是整個民族的價值取向。

張愛玲今天再寫《色，戒》，結局可能會變成王佳芝享受了床上的快樂之後，若無其事拎著易先生的頭去邀功，陰道荷包兩不誤。

>>April 13, 2008 at 5:31:55 AM GMT+8

2008 年 3 月 17 日 星期一 【炎熱】

身為美心o既die hard fans，都真係要投訴呀！下晝食完個美心碗仔翅加豬皮蘿蔔魚蛋之後，個胃好似畀o的o野頂實晒咁，超唔舒服！吼！

自問腸胃都唔算係太差，只係偶然對某o的豆類製品有過敏會搞到肚屙，估計都只係條腸受唔住o的豆渣纖維或者某o的豆類酵素o既激刺，但係個胃就絕對ok in good condition，真係乜q垃圾都食得一餐，估唔到食完呢個美心咖哩之後會有咁o既感覺，真係唔認老都唔得…

最近有個廣告好得意，係賣一種防止胃酸倒流入食道o既葯水，擺到明就係倒層油落個胃度去隔住胃裡面o的o野等佢唔到倒流，話咩舒緩「火燒心」o既感覺，確實又真係幾戇居。我想問︰如果我飲完葯水攤佐o係張床度，個胃同食道唔係呈九十度，咁又防唔防止到「火燒心」呢？

嗯…

>>April 8, 2008 at 2:35:57 AM GMT+8

2008 年 3 月 16 日 星期日 【炎熱】

好想同您一齊出席我家姐o既婚禮，不過您係都唔肯…唉…

每個人對於愛o既體會同要求都唔同o既。對於您o黎講，寂寞係唔可以見到自己所愛o既人；但係對於我o黎講，寂寞係唔可以同我愛o既人分享我o既快樂。

有時夜晚同o的朋友出去食飯、遊車河或傾偈，都想有您o係我隔o黎陪住我。我並無意認咩叻，又或者人有我有想有個跟得夫人咁。只係返工返到悶悶o地，放工出去release o下，又或者同好耐冇見o既朋友聚舊，我覺得都係一o的令我好開心、好開懷o既事，我好想同您分享我呢一份喜悅，好想同您分享我o既笑聲。

而且「人」就真係唔怕識得多，唔一定話要做朋友o既，亦唔一定要有咩利益關係。有時要有交流先有個人進步，先可以擴闊自己o既眼界同空間，大家可以係泛泛之交，不過o係交往o既時候中總會有o的得著。有o的咩需要幫手時亦可以「吹雞」搵到人幫手搵到人問，唔駛咁頻撲。

話分兩頭，我都體諒您係唔可以太自由咁出街玩o既，您估您唔想陪我o既咩，不過您都要顧住爸爸o既感受嘛，明白o既。得閒出o下o黎囉，有機會的話，好好玩o架！


>>September 2, 2008 at 2:55:15 AM GMT+8