2008 年 6 月 3 日 星期二 【陰】

Yuanyang (Coffee with Tea) 鴛鴦

中學時代酷愛o既飲料，諗返起都已經有十一、二年冇飲過。

中四、中五年代有一班friends一個星期五日上堂都玩玩玩，放學又會一齊打波，下晝亦都會去同一間茶餐廳食飯。各人有唔同o既喜好，惟獨就係冇人鐘意飲鴛鴦。o個時我o係佢o地班人之中都算係幾突出o既一個，除佐考試成績係最好之外，亦係粗口講得最多o既一個，又係最強出頭o既一個，最鐘意搞事o既一個。為佐配合我呢一身o既型象，所以我選擇日日飲凍鴛鴦。

鴛鴦其實冇乜好飲，通常較濃o既咖啡味已經支配佐成杯o野o既味道，茶、奶、糖水、冰等o既味道都好淡。不過我呢份人都好易養成慣性，冇乜特別問題就唔會無端端作出o的乜改變，既然飲完個肚都冇乜唔舒服，所以就繼續飲到中五畢業同班friends各散東西。

我知道佢o地有時都會約出o黎食飯，但係我都冇乜去，即使食飯，亦已經用凍檸水代替。或者再見呢班friends o個時，都只係結婚擺酒o既時候，仲可能只係得最friend o個幾個。其實我都幾掛住佢o地，不過實在冇時間搵佢o地…

補充一句啦，鴛鴦少啡多奶走甜，係我教車師傅最鐘意o既飲品之一喎，我成日都請佢飲o既，所以師傅咁錫我教我咁多o野，呵呵。

>>June 16, 2008 at 1:55:54 AM GMT+8

2008 年 6 月 2 日 星期一 【陰】

Obstinacy 盟塞

真係未見過o的咁執著o既人，仲執著過我，唔罵叉佢一o野都唔得！

琴日駕緊車o個時Vicky打o黎話同Cyman鬧交，累到死晨早訓佐Cyman又打o黎話Vicky義賣條數好有問題云云…兩個女人好地地，真係唔知佢o地搞乜…姨媽到？失心瘋？

放佐兩日假成台都係o野，一返到o黎就做，九點幾，見Cyman一面鬧呀南哥一面行入寫字樓，我就真係忍唔住要罵句︰「夠喇！你嘈x夠未呀？！」

下晝，特登捉住佢兩個連埋南哥入房，諗住幫佢o地扯o下線做和事佬，點知都入失敗收場。兩個各執一詞，但係指控人o個一方又冇證據，一味就係話自己會查到，一口咬定對方利益輸送畀自己o既熟客… @_@

最慘就係真真正正去點數o既時候，o的貨o既數目居然係多過記錄o既數，但係o的人仍然一口咬定人o地做錯，又要人o地道歉云云，痴x線的嗎？！未見過人執著成咁。

白白浪費佐一個下晝去搞呢兩個女之間o既屎，最終都係白費心機。我唔玩喇，將個波pass畀老細好過…

唉…

>>June 17, 2008 at 12:48:11 AM GMT+8

2008 年 6 月 1 日 星期日 【陰】

Lift Trapping 困電梯

今日下晝要去完麗平o既婚禮，又試大遲到… @_@ 超多人，結果只係可以o係個門口度裝裝o下，第有人開門我先「鼠」入去，一入到去就見到Patrick，仲有好多以前教會o既人，不過都已經成為點頭之交。

完佐個婚禮就返柴灣，順手同Kenji遊佐一轉，遊完返o黎泊低架車，離開停車場之際就出事！玩玩玩，玩出禍喇… @_@

平時o係架lift裡面點跳點"un"都冇事o架，今次就偏偏遇o岩Kenji要開工先o黎出事，架lift停佐o係二樓同地下之間冇晒反應…shit！

按極救命鐘都冇人應，十分鐘後先有個呀伯問係咪有人困lift，話搵緊電梯公司o黎，結果我o地兩個就o係lift裡面玩佐半個鐘…mmm…



>>August 31, 2008 at 6:06:33 PM GMT+8

2008 年 5 月 31 日 星期六 【雨】

Fibre-optic Broadband 光纖寬頻

真係好似香港寬頻個廣告所講咁︰「豈有此理！」

公公正在婆婆屋企用緊婆婆部陳年notebook上網，公公見婆婆行緊埋o黎，就同佢講︰「您睇o下！」婆婆︰「睇咩呀？」

公公︰「您睇o下，您條電話線上面好多蟻呀！呢度又係o個度又係…嘩！連部電腦上面有好多蟻呀！」婆婆︰「無聊！」

特登搵佐班蟻送畀您，真係坐o係度等部機load o野等到訓著佐幾次，最後真係頂唔順佢咁慢，坐佐去梳化上面坐住訓覺。



>>August 31, 2008 at 8:36:32 PM GMT+8

2008 年 5 月 30 日 星期五 【雨】

Mouth Ulcer 復發性口瘡 / 飛滋

簡介︰「飛滋」正式名為復發性口瘡或復發性口腔潰瘍，是一種經常復發而又可以自己痊癒的口腔黏膜潰瘍。它通常出現在唇、面頰或齒齦等的口腔黏膜，形狀為圓形或橢圓形，邊界清楚，周圍的黏膜紅而微腫，並造成局部灼痛。

病徵︰飛滋通常在口唇、舌頭、喉嚨或其他口腔黏膜出現。當口腔黏膜的表皮層出現損傷時，口腔黏膜即會腫脹，凸出表皮下的結締組織，形成如「火山口」般的圓形或橢圓形小泡。小泡的邊緣呈火血環狀，中間呈白色或黃色，一旦觸及會構成痛楚。

成因︰一般認為其誘因可以是遺傳因素、口部黏膜創傷、女性月經前、精神壓力、失眠或因內分泌失調而造成的低免疫力等。更有醫學報告提出，飛滋是由病毒感染所引致的；而這些病毒是潛伏在人體免疫細胞內，到身體疲倦或免疫力差時便會發作。

預防方法︰要避免生飛滋，除了要改善以上所提及的誘因之外，健康飲食亦十分重要。許多人生飛滋也會同時出現便秘的情形，所以日常應多吃蔬果和喝水以確保排便通暢。此外，還要攝取足夠的維他命B2，促進黏膜細胞健康。最後當然要保持口腔清潔以減少細菌滋生，和減少進食燒烤、過熱或油炸等食物，以免黏膜損傷。

治療方法︰飛滋一般在七至十天，最多兩周內自然痊癒，但若患者的飛滋持續個多月都未能痊癒，或許是口腔黏膜病變或免疫系統出現問題等的先兆，應立即求醫。如想紓緩患處痛楚，患者應避免進食刺激性食物，如鹹、酸、辛辣及粗硬的食物；又要避免在刷牙時讓刷毛刺激患處；而市面上部份對付飛滋的藥物有局部麻醉及止痛作用，但「治標不治本」。患者要徹底清潔口腔，避免細菌感染。

是否有季節性︰否

壹蘋果健康網

-----------------------------------------------------------------------------------------------------------------------------

今日同同事食飯o個時講起「生痱滋」，佢話會好痛，不過我真係冇辦法感同身受，因為諗落原來自己從來都未生過痱滋… @_@

>>June 6, 2008 at 12:34:12 AM GMT+8

2008 年 5 月 29 日 星期四 【清涼】

Tea with Sweetened Condensed Milk 茶走

曾經有一個舊女友，o係茶餐廳食飯時飲熱o野通常都會叫「茶走」，以前我就唔鐘意飲熱o野，通常都係飲凍檸水。奶茶不嬲都唔係我o既favorite，唔係怕飲完會急屎，而係我覺得茶同奶兩樣o野根本就唔多夾，所以亦好少飲茶走。

年頭自己一個去買美心食，就通常只會飲汽水。不過呢幾個月下晝有新同事一齊食飯，佢就淨係會叫奶茶，而我就可能係習慣佐同您去飲熱o既普利茶，所以亦開始試o下飲茶走。雖然唔算好好飲，但係我個人又真係乜都冇乜所謂，我估點都好過飲咖啡咁刺激呱。

茶走，即係紅茶唔落淡奶，而係加煉奶落去咁解。因為係煉奶，所以一定係熱飲，如果唔係o的煉奶唔溶，煉奶本身甜，所以唔駛加糖。有o的人話呢種配搭係上一代人o既飲法，因為佢o地話落糖攪溶o的糖杯茶會「入風」，對身體唔好喎。

諗o下諗o下，原來呢個傳統o係我屋企一直都流行o架！原來我屋企開熱飲一向都唔係加奶加糖o架，而係落煉奶！而我，細個就係飲媽媽每朝開畀我飲o既「Horlick走」大o架！

不過無論乜o野「走」都好，我都好接受呢種飲法，因為唔駛特登落糖，實在o岩晒我呢類懶人！ccc！

>>June 10, 2008 at 1:21:37 AM GMT+8

2008 年 5 月 28 日 星期三 【清涼】

Resignation 辭職

天氣好熱，但係無論個天幾黑都硬係落唔出雨…咁悶熱o既天氣，其實又有o的似今日o既心情…今日朝早收到個壞消息，就係呀Man辭職唔做喇…

我一再強調我係一個收風收得好慢o既人，因為我唔八卦，做o野我行我素，故此好少主動出擊去收風。今朝就由第二個site o既人爆料我畀聽，原來呀Man做埋六月就走，原因話係要返屋企湊仔，不過我就唔係好信，硬係覺得有o的o野，如果唔係唔會令呀Man作出咁大犧牲。

老實講，呀Man一日返到o黎，其實都冇乜o野做，傾o下偈、講o下電話、上o下網、睇o下書咁又一day，每日工作o既時間唔會多過兩個鐘。返到o黎都係齋"R"時間，一個月出一次糧我估都有二萬蚊，實在冇乜原因要放棄一份完全冇壓力個個月等出糧o既工，所以我覺得一定內有玄機，只係佢唔肯透露而矣。

又o黎另一個人接手，又要從新夾過，呢個人會係邊個呢？會唔會勤力o的呢？

>>June 10, 2008 at 12:38:21 AM GMT+8

2008 年 5 月 27 日 星期二 【清涼】

Perfunctory Performance 渣流撻表演

琴晚出佐去遊車河，您實以為我實會訓到日上三竿先識起身，不過我o地約好佐要去參加您姨甥仔o既幼稚園畢業禮，所以都真係不敢怠慢，晨早起床趕入大埔。

大熱天時駕住架壞佐冷氣o既車都真係幾辛苦，香港車太多樓太高，路面空氣差氣溫高，真係好驚駕駕o下車o係車裡面中暑暈佐… @_@

而家o的細路都幾叻，上台表演都只係一般料，但係一大篇英文都可以記熟晒咁背出o黎，真係巴之閉。我就最鐘意睇o下一班人裡面有邊個唔認真表演，好過癮，我相信其實唔係個個細路都係自願上台表演，好多時都只係成年人一廂情願咁挪o的細路o黎玩，o黎滿足佢o地o既虛榮心。唉…o的細路真係慘，冇得揀。

您姨甥仔都有上台表演，不過就大部分時間o係度「渣流撻」（即係敷衍、馬虎、得過且過咁o既意思），冇o黎認真o係度玩，人o地個個舉手o個時，佢唔係垂低手就係求奇fing起隻手就算，真係冇乜紀律可言，要教返好一切都已經太遲喇…

食完飯行佐陣街再返屋企hea一陣，有冷氣o既地方真係好舒服呢~ >3<

唔記得send個email去您姨甥仔間幼稚園話畀佢o地知一個句子裡面用佐although係唔可以再用but o既添！

>>June 9, 2008 at 11:53:11 PM GMT+8

2008 年 5 月 26 日 星期一 【清涼】

Somatization Disorder 身心症 / 軀體化症

簡介︰
身心症屬情緒病的一種。

病徵︰
由情緒引發的病徵，身體不同部位出現「無病因」的功能失調或痛症，部份情況極端的病例，患者甚至因而喪失工作能力。

成因︰
當情緒受困擾或長期受壓，又得不到適當的紓解，身體就會出現不同的反應，最常見受影響部位有頭、頸、胃、肚。患者的身體會發生無病理因素的異常現象，例如頭痛、心口翳痛或腸胃不適，而這些不適全因心理因素造成。

治療方法︰
情況輕微者只需接受心理輔導，嚴重者則需配合長期接受心理輔導輔以藥物跟進治療。

是否有季節性︰
否

資料來源︰壹蘋果健康網

>>February 24, 2009 at 3:09:19 AM GMT+8

2008 年 5 月 25 日 星期日 【陰】

Wenchuan Earthquake 汶川地震

網上又流傳佐一o的報導，就係話o係汶川地震之前，o係中國各地o既上空都見到所謂o既「地震雲」，o的解說話地震前地面附近積聚佐好高o既能量，呢o的能量會以某一種頻率釋放熱量出o黎，隨住水份蒸發而做成一層層咁雲。不過，未有正式科學根據話呢個解釋就係事實。


又o係網上見到一朵紙花，等我送畀地震遇害o既人，祝佢o地一路順風…


溫家寶真係好o野，成個慈祥老人家咁，贏盡民心。不過佢即時出巡探望災民o既表現，確實令人感動流涕…


>>August 31, 2008 at 8:38:35 PM GMT+8