2008 年 6 月 13 日 星期五 【雨】

Black Friday 黑色星期五

放工打牌食飯，打完十二圈再night check…成晚打個和，淨係畀佐飯錢… @_@

呀Ken已經依時六點幾過o黎押我走，因為Irene姐自從上次等佐我成個鐘之後，次次講電話都話因為等我而上次十二圈打到四點。你估我想o既咩？好似你o地咁個個都搭正六點就拍拍羅柚走人咁爽咩…六點之後其他人收晒工先至係我工作o既黃金時間。

今晚都唔算咩黑仔，係o的牌成日都四色雪糕咁乜都有，爛有爛做終於都捱得到完場。跟手再同呀Ken返公司night check，咁又一day…

放孖day，有排訓喇…

>>June 17, 2008 at 2:14:09 AM GMT+8

2008 年 6 月 12 日 星期四 【雨】

Transdermal Patches 膏葯膠布

以前細個見爸爸就用得多，o個時覺得一陣葯味好鬼臭，不過大過佐又對o的葯味冇乜感覺。今次係我有生以來第一次用呢o的o野。

捽佐幾日冬青油，發覺右腳小腿同左邊後頸都仲係扯住痛，見屋企有「脫苦海」同埋「撤隆巴斯」o既試用裝，就即算挪o黎試一試，不過我o既結論係︰冇乜效囉！

塊貼身膏葯貼佐o係頸背度，係有o的熱熱o地咁囉，但係郁o既時候都係痛，o的肌肉都係扯住咁，效果一般冇乜大改善。又睇o下貼過夜會唔會好o的啦…

您今日都係頂唔順，射佐波去睇醫生，食佐葯就好好多。下晝仲返佐公司做埋聽日講talk o的手尾o野，真係駛唔駛咁辛苦自己？！本來想放工送您返屋企，不過實在公務纏身…shit…

>>June 17, 2008 at 2:06:16 AM GMT+8

2008 年 6 月 11 日 星期三 【雨】

Vomit 嘔吐

小寶寶唔舒服，嘔吐大作真係擔心死人！

今日我放假，但係都訓到晏一晏先肯起身，因為之前「訓矮頸」，條頸好似想斷咁滯咁，個人又好似畀o的工作搾乾搾淨咁，總之就係唔想郁，想躲懶。

條頸咁痛今日都唔駕車，因為擰唔到後去睇左邊，改為坐地鐵去接您。之後我o地去佐旺角行佐陣波鞋街再去唱K。

今日比平時早佐上去所以都食多佐o野，雖然只係o的頹o野，但係畀佐錢就食得唔好o徙。唔知係o的o野食唔乾淨，定係您食佐兩樣唔可以混埋一齊o既o野，坐車返大埔一落車您就嘔到九彩咁，所有食過o既o野都嘔返出o黎，見到就覺得辛苦。

雖然我好少嘔，但係我都好憎嘔o既感覺。記得對上一次嘔應該係零六年尾自己隊佐自己半支tequila，隊到不醒人事o個次，真係嘔到胃到反埋幾日唔想食o野，自此之後亦到好少再飲酒，真係連啤酒都少飲，費事自己辛苦。

可憐o既婆婆，希望您快o的好返…

>>June 17, 2008 at 1:58:46 AM GMT+8

2008 年 6 月 10 日 星期二 【酷熱】

Acute Fibrositis 落枕/訓矮頸/急性頸椎關節周圍炎

有沒有試過朝早起身後發現脖子又僵又痛，且幾乎無法轉動，苦不堪言。如果有，那您可能得了「落枕」，廣東話稱為「訓捩頸」，西方醫學稱為急性頸椎關節周圍炎（acute fibrositis），是一種睡眠後出現的頸部僵直性疼痛。

引起「落枕」的原因有：
1) 睡眠時枕頭過高或過低，使頸部肌肉長時間處於不良姿勢而引起疼痛。
2) 睡眠時頸部受到冷氣刺激而引起頸部肌肉疼痛。
3) 上呼吸道感染或感冒時，更易因頸部周圍肌肉群輕微發炎而出現落枕。

大多數落枕疼痛一般持續2－3天，不作治療亦可自己康復。但若反覆性地發生落枕情形，則須注意在肩胛、後背或前臂、手指等處有沒有麻脹的現象；如果有，則可能是頸椎病的初期表現所致，最好能向醫生求診。

「落枕」的預防︰
1) 選擇合適的枕頭，枕頭高度要符合個人的肩寬，仰臥時枕高約一拳，側臥時枕高應為一拳加二指。
2) 避免不良的睡眠姿勢，如頭頸部過度屈曲或伸展等。
3) 避免受涼，晚上睡覺時一定要蓋好被子。
4) 要經常適量活動頸椎。

保柏健康雅集

----------------------------------------------------------------------------------------------------------------------------

嘩，唔知痴乜線，今日一訓醒左邊頸背到左手雞翼位扯住扯住，好鬼死痛！唔知關唔關之前兩晚訓o係床上面睇波，個身側埋一邊擲住一邊身，定係個枕頭晾得太高搞到條頸歪佐…shit！

>>June 24, 2008 at 12:30:17 AM GMT+8

2008 年 6 月 9 日 星期一 【酷熱】

Put on the Table 擺上台

o係其中一個我成日都去睇o既粥谷（Joke Newsgroup）裡面，有個網友貼佐張相出o黎，主題係《原來有o的o野…真係要擺上台傾！》，真係即時笑佐出o黎！


係有o的意識不良，不過咁搞笑o既o野一定要貼o係度留為記念。我估呢張相o係係大陸某夜店影o既，Kenji睇過話個樣唔得，不過我再一次提睇佢張相o既重點係o係對波上面。

橫睇掂睇都有o的怪怪o地，要咁樣頂住對波o既下面而令到有呢個爆奶現象，爆得o黎又唔露點亦見唔到件tube-top，真係奇怪至極，難怪您問我張相係咪假o既…

>>August 31, 2008 at 5:59:25 PM GMT+8

2008 年 6 月 8 日 星期日 【酷熱】

Flooding 水浸

pk喇！又o黎料，真係兩年一閏，呢個場點做呀？頂…

兩年前水浸以為係趙生黑仔，點知原來係新翠地運欠佳，琴日朝頭早掛一掛黑雨，搞到o岩o岩攤落床兩個鐘又要起身仆返去幫手。真係今年勝前年，o的水高過膝頭哥，浸o既範圍亦都多佐遠佐…頂…


同上次一樣，成個迴旋處都係黃泥水，外圍浸晒水深有兩呎。o的水由街舖o既後門同埋我o地o既門口湧入o黎，美心出面條走廊又邊佐水塘，其他通道不斷有水流入，流到鬼死咁遠… @_@

好在o岩o岩呢個時間係早、夜班交接，叫做多幾對手用o下，但係o的水咁多，結果都係由六點幾七點一直搞到十點幾先收皮…

而家可以做o既，就等人o地claim我o地錢囉…有理冇理，返屋企抖抖訓返陣先…

累…腰酸背痛…

>>August 31, 2008 at 6:00:57 PM GMT+8

2008 年 6 月 7 日 星期六 【颱風】

The Chronicles of Narnia: Prince Caspian 《魔幻王國：卡斯柏王子》

好睇旨數（十粒星係滿分）︰★★☆☆☆ ☆☆☆☆☆

期望？冇乜o架喇，因為冇乜邊套戲拍續習係會好睇過第一集，不過都諗唔到會係嚴重失望而回…

四周圍都水浸，訓醒佐坐巴士入去同您屋企人食飯，再去沙田睇戲。

佢老闆o丫！套戲講到明係「卡斯柏王子」，點知o的戲份都仲係嚴重傾向o個四條細路，真係有點兒那個…呢套戲最無聊o既一部分就係o的貓貓狗狗老鼠隻隻都識打仗，懶係電腦特技咁，懶搞笑咁。


跟住又有玩大自然力量扮鬼扮馬扮人像，打打打又一大餐，不過一o的都唔好睇。


終於都有我最鐘意睇o既大型打仗場面，o的盔甲、戰車係行貨o的，不過好過冇啦…


>>August 31, 2008 at 6:03:33 PM GMT+8

2008 年 6 月 6 日 星期五 【雨】

Black Coffee 齋啡

曾經有一段長時間，鐘意飲o的味道好濃o既o野，齋啡就成為佐深受喜愛o既飲品之一…

開始長期飲齋啡，都應該係入佐中大之後，搬佐出o黎住間房距離超級市場九哩咁遠，無論買罐裝或樽裝o既飲料都只係會拎餐死，水可以講話係最重拎得最辛苦o既o野，所以買powder返去用水喉水沖，再放入微波爐叮熟，可以話係最方便最懶o既方法。

好多人都覺得齋啡好苦好難飲，其實我覺得凍o既齋啡先至係真正難飲，飲落會覺得酸味特別強。相反，熱o既齋啡除佐提神之外（對我o黎講幾濃o既齋啡都唔可以提神，早已免疫，飲未照訓到死豬咁…），仲可以通鼻塞。齋啡o既啡味留o係喉嚨，會有一種好似食完煙後o既味道同感覺，所以我鐘意。

而家我間中都會飲齋啡，不過如果有得揀，我會揀飲茶好過。畢竟好多研究都話飲咖啡太刺激對身體唔好，雖然對我o黎講暫時都冇乜副作用，但係都係唔好日日飲為妙。

唔飲過你係唔會知，飲完咖啡之後，屙出o黎o的尿會有好濃o既咖啡味o架，好搞笑！

>>June 16, 2008 at 3:27:46 AM GMT+8

2008 年 6 月 5 日 星期四 【酷熱】

Parental Guidance 家長指引

大佬搞唔掂，就唯有叫呀媽出手。老細即係老細，一返到o黎發功就搞掂兩個女。

有時做site i/c都幾慘，面對住兩個short short o地o既女，連counseling都要做埋，成個社工咁。好在老細有一仔一女，對付呢o的細路女脾氣真係卓卓有餘。

其實我都好明白，一個新人入行，總係有團火，乜都要做到十全十美，四年前入行亦有咁o既衝動，見好多o野都唔順眼。今時今日，我都見好多o野唔順眼，不過唔會特登走去撩o的o野出o黎搞，一來自己冇咁多時間，二來係睇化佐，明白有o的o野唔係一瞬間憑一個人o既力量就可以改變，要慢慢o黎一步一步，欲速則不達。

欣賞佢仲有呢種衝勁，但係佢仲要好多時間去磨練，因為物管呢行，最重要o既係「關係」，千祈唔好搞到自己犯眾憎咁，因為山水有相逢。今日你幫人，第日人幫你。

凡事太盡，緣份誓必早盡，呀女…

>>June 16, 2008 at 2:33:49 AM GMT+8

2008 年 6 月 4 日 星期三 【陰】

Homework 功課

為佐親情您屈服o係您家姐o既淫威之下…唉…為佐令您有覺好訓，我都要出o下手…

1) 誰也沒料到一場大災難正在降臨…（否定句）
2) 我的家園就在三分鐘內被地震移為平地…（被動句）
3) 我和妻子立即從田裡奔跑到建於山上的學校…（陳述句）
4) 這就是兒子唸書的教室嗎…（疑問句）
5) 求你救救我們的兒子…（祈使句）
6) 我還是不會輕易的放棄啊…（感嘆句）

----------------------------------------------------------------------------------------------------------------------------

實在作唔到落去喇，太忙喇，冇時間幫您家姐作。

都係o個句，每個人都應該要知道自己o既能力去到邊，先去作出自己能夠完成o既抉擇同行動，否則o徙x氣。

>>June 16, 2008 at 1:57:49 AM GMT+8