2008 年 8 月 2 日 星期六 【清涼】

Unfairness 不公

Sub-regional i/c出晒面係要攬個廢人PA，仲要我星期日原本放假改為返工，為o既就只係一個完全唔合理o既理由！條友真係色迷心竅！

平時個sub-reg講o野總係有佢講冇人講，佢成日以為自己「諗」o個套就係真理，我o地呢o的做細o既有時都會頂佢唔順力撐到底，但係得到o既只係佢推卸責任o既答案，而失去o既係一個、甚至幾個鐘頭o既寶貴時間…

但係今次，佢完全脫離佐佢平時o個套「七個方位」諗o野o既多角度思考邏輯，完完全全信晒個PA o既一面之詞，認真失常。

試諗諗，香港有幾大o丫，有心要摷一個人出o黎打根本冇難度，駛乜仲等到星期日單獨相處o既時間先打佢o丫，都唔make sense o既。更何況香港點都係法治之區，之前玩到報晒警備晒案咁，若果佢真係有乜冬瓜豆腐，差佬實第一時間上門拍門捉人啦！咁都畀佢講得服個sub-reg畀佢賴皮唔返工，佢真係有一手，你話佢兩個冇o野真係講都冇人信啦。

今次呢單o野，若果個sub-reg有乜處理不公，真係分分鐘有人送佢上路…呵呵…又睇睇下個禮拜件事會發展成點先。

>>August 25, 2008 at 2:19:56 AM GMT+8

2008 年 8 月 1 日 星期五 【清涼】

Durability 耐力

初出口角，繼而動武！

o岩o岩幾日前先同憂憂傾完呢兩隻o野，今日兩隻o野又爆大鑊，居然仲玩到推開人o地張凳等人o地坐「無影凳」而跌佐落地，兩隻o野係咪真係低能成咁？！

又係因為一張form而起，幾時都話個槍口要對外，唔係用o黎自己人打自己人，呢兩隻o野總係唔明白…結果又浪費佐老細兩、三個鐘同佢o地兩個做和事佬，點知原來好戲在後頭。

當老細滿以為已經KO佐佢兩個之際，個PA行入老細房同老細講︰「唔好意思呀Joann，我屋企人報佐警…」晴天霹靂！只見老細一副無奈樣，等佐冇耐差佬到佐寫字樓，搞完一大輪老細又冇佐半個鐘，結果就梗係以和為貴啦，但係老細就被逼要OT做埋o的o野先有得走…老細真係慘…

不過原來件事仲未完，仲要鑊鑊新鮮鑊鑊甘！

十一點幾個sub-regional ic打電話畀我，話個PA打畀佢話好嚇畀人尋仇，星期日唔想返工，跟住sub-reg問我知唔知發生咩事，但係當我講完之後，條友就話由個PA講o既o野，覺得件事唔係咁簡單，條淫蟲信晒個PA所講o既o野，色迷心竅，我講乜都冇用，佢亦唔同我講，話要打畀老細。

於是我用九秒九o既速度即時打畀老細，話sub-reg畀我返工，同埋色迷心竅失去理智，我感覺到老細好似有o的嬲，因為呢個麻煩友PA居然跨過老細去搵sub-reg，痴男怨女死埋一堆…

講佐冇耐老細已經收到sub-reg o既電話，講完之後老細再打返畀我，話星期日由佢頂，老細真係好。最近個site唔係畀議員煩就係畀樓上班業委搞，仲要面對呢o的超級無謂o既「內憂」，真係「鄧」老細慘…唉…

>>August 25, 2008 at 1:42:35 AM GMT+8

2008 年 7 月 31 日 星期四 【清涼】

Hair Cut 剪髮

好搞笑，個個都問我做乜剪到o的頭髮咁短，我o既標準答案係︰熱囉！

其實剪頭髮最無聊o既一樣o野就係洗頭呢一個環節。唔知由幾時開始，所有髮型屋o既洗頭師傅都指定要問一個問題︰「個頭痕唔痕呀？」

好搞笑，我次次都唔會答佢o地，只係擰擰頭就算。如果我答︰「我個頭好x痕！」唔知佢o地會有o的乜o野進一步o既服務呢？會係拎支「特效止頭痕」o既洗頭水出o黎幫你洗頭？定係出盡全力用佢o地o既指甲狂刮我o既頭皮？

每次o係出面畀個頭人o地洗，都總會畀人洗到勁多頭皮，成個幾禮拜都唔會好返，因為我呢個死人頭真係超唔適應外面o既洗頭水，甚至o係屋企用「瀟灑」、「頭和膊頭」等去頭皮洗頭水，都好多時搞個死人頭唔掂，真係想問個頭︰「你想點呀！大佬！」

三千煩惱絲，真係煩。

>>August 25, 2008 at 1:26:40 AM GMT+8

2008 年 7 月 30 日 星期三 【清涼】

Batman: The Dark Knight (Batman Begin 2)《蝙蝠俠︰黑夜之神》

好睇旨數（十粒星係滿分）︰★★★★★ ★☆☆☆☆



唔驚唔覺，Batman已經玩到第六集，之前有Michael Keaton（米高基頓，1989、1992）、Val Kilmer（韋基瑪，1995）、George Clooney（佐治古尼，1997）扮Batman，二千年之後就Christian Bale（基斯頓比爾，2005、2008）擔正，我只可以講我最憎佐治古尼，其他冇乜意見。

呢套係Brokeback Mountain o既其中一個男主角Heath Ledger o既遺作，所以佢扮小丑一定要入場睇。確係做得唔錯，可惜英年早逝。另外雙面人都熟口熟面，以前都睇過佢o既戲，因為我認得佢副「鞋秋」面。


市長個樣勁似喬寶寶，一出鏡坐隔o黎個師奶居然問隔o黎再隔o黎個師奶呢個係咪喬寶寶，真係八十歲唔死都有笑話聽。


又一套o係香港取景o既荷李活電影，不過我估真係得個景囉，好明顯全部都係電腦特技o黎o既，包括日頭變晚夜。


>>August 31, 2008 at 2:27:39 AM GMT+8

2008 年 7 月 29 日 星期二 【清涼】

Anxiety 憂

今晚冇返屋企食飯，留o係公司做o野，做到九點幾十點，再駕佐車出去同小憂憂大刷一餐！

駕住架車四圍去，都唔知食乜好，最後落佐銅鑼灣鵝頸橋附近其中一間「橋底辣蟹」度食。講真，o的炒蟹都唔係特喇話好好食嗟，都唔知賣到咁貴做乜。或者係我唔識欣賞啦…

食完o野好好彩都冇畀人炒牌，之後就繼續駕車四圍去，小憂憂話想去o的佢平時唔會去到o既地方，於是我就帶佐佢去半山睇o下維港夜景，又去佐赤柱吹吹風。傾o下偈，講講公司呢期最hit o既PA大戰CCA，希望藉住小憂憂同個PA熟，有機會教o下佢o係呢行裡面o既生存之道，導化o下佢。

講o下講o下又講到小憂o既前途問題，其實佢o既情況定唔見得比Kenji好，唔做保安又真係唔知有乜好做。佢話日日咁樣賭落去都唔係辦法喎，但係又苦無其他出路，唉…真係慘…唔通做一世保安咩…唉…

>>August 25, 2008 at 1:16:57 AM GMT+8

2008 年 7 月 28 日 星期一 【清涼】

Air-conditioning 冷氣

部車冷氣又失靈，屎都滾！睇怕都好快成為第一個o係香港駕車中暑o既司機！

點搞o架車房太子！有時熟人介紹o既o野真係有好有唔好，好似今次搞成咁就真係幾火滾都有！第一次搞完又話得，結果就係得個吉，畀佐幾百就盡付流水，仲要索佐幾日雪種搞到個人暈暈o地。跟住冇時間再搞，直至上鑊炒車大修叫佢順手搞埋，點知唔夠一個禮拜又係乜冷氣都冇晒！！！！！

今次點都要佢搞掂為止！火都o黎埋！錢就識得係咁收，貨就交極都交唔出！拎佐去整，太子同老闆話整唔好唔收錢喎，問佢要幾錢又吞吞吐吐咁，九成有問題。

或者真係學呀偉話齋，係時候要轉會喇。真係令人失望。

>>August 24, 2008 at 2:15:12 AM GMT+8

2008 年 7 月 27 日 星期日 【清涼】

Sleeping Posture 睡姿

經過連續半年星期日就昏迷足全日係咁訓係咁訓之後，真係食飽就訓，訓飽又食，呢種咁o既非人生活，確實係委屈佐我婆婆！

我研究到點樣先係我訓得最舒服、訓醒唔會周身骨痛o既最佳睡姿喇！

原來唔係打側左上右下咁攬住o的o野訓，亦唔係扒o係度（o的口水會流晒落個枕頭度…），而係大字型攤平o係張床上面訓！

呢個睡姿幾好o架喎，可能係因為身體o既重量好平均咁分配o係張床上面啦。以前睇過書話側睡最好，但係我發覺打側佐唔只會搞到膊頭痛，仲會因為個枕頭o既高度而令到條頸都痛埋，認真唔掂。

為佐令到成日都唔夠訓o既我可以o係短o既睡眠時間內恢復最多o既體力去應付每日大量o既工作，大字型攤屍法會持續直至我再研究到更好o既睡姿為止。

>>August 24, 2008 at 2:07:31 AM GMT+8

2008 年 7 月 26 日 星期六 【清涼】

Rural Area 郊區

大熱天時，我o地兩口子都又係去佐燒o野食，係咪癲o架？唔係囉，只係因為今日又冇麻雀打囉…

突然之間興致大發，食飽飽小休之時走佐出去燒烤場岸邊o既紅樹木度行o下，發現o岩o岩退潮，有好多魚仔、蟹仔o係度走來走去，即時挪個相機影低先，仲有個好靚o既日落景，水中有倒影o架，大自然真係令人心曠神怡！

老樹盤根！


再見喇伯伯！


您話呢張相裡面好似有隻象企o係樹林前面…


>>August 31, 2008 at 3:13:31 AM GMT+8

2008 年 7 月 25 日 星期五 【清涼】

Hotel Rwanda 《盧安達飯店》

好睇旨數（十粒星係滿分）︰★★★★☆ ☆☆☆☆☆

講非洲、講黑人o既電影其實我都幾鐘意睇o架，因為通常呢類故事都比較寫實，同埋反映到現實上的確存在o既黑暗面，可以畀到機會自己反省一下，唔好身在福中不知福。

呢套好似o係某某電影節有上過畫，但係我冇去睇。一套講述非洲小國盧旺達內戰時期o既電影，其實我分開佐兩次先睇得完。一來有o的悶，二來套o野冇字幕，o的人講o的英文又唔係好聽得清楚，大大減低佐完成呢套戲o既興趣。


我o地實在太幸福喇，根本都冇經歷過打仗。故事主人翁相對其他難民其實都算係幾幸福同好運，有頭有面又有錢，無端端又變佐救人英雄，真係有o的矛盾，我覺得只係反映到當時極少數難民o既真正情況，一般啦。

>>August 31, 2008 at 3:19:37 AM GMT+8

2008 年 7 月 24 日 星期四 【清涼】

Promotion 升職

琴日region裡面一班老細開會，商討有關公司返長短週o既事，席間有一個好消息，就係老趙又再升一級，坐正PFM。

好突然，好快，好神奇，令我回頭又再諗一諗，究竟o係呢個region裡面，係咪真係有前途o係度o既呢？！

正當我做到隻「積」咁，日日返工冇得蛇之餘更加由上晝九點做到夜晚九點，放工返屋企累到死諗返成日都唔知做過o的乜總之就好忙o既時候，得到呢個消息，真係有o的沖喜作用。

我o地個region其實唔係好多個商場盤，而且有o既都只係o的偏遠o既場仔，可以講話發展極都只係有個譜，而我又唔想離開商場呢個工作範疇，咁係咪即係要去其他公司呢？但係老趙成日都話離開KS冇好結果o架喎…係咪要好似佢咁捱足十幾年先有咁o既地位呢？

Anyway，都恭喜晒老趙，因為佢同我o地個sub-regional i/c而家只係差半級咋！

>>August 11, 2008 at 1:31:35 AM GMT+8