2008 年 5 月 4 日 星期日 【酷熱】

Stubbornness 倔強

有時您梗係會怪責您個男朋友點解會咁倔強咁硬頸，話極唔聽又唔肯妥協，執著o係一o的睇o黎毫不利己o既決定上面。

不過我都唔知點解。只可以講，您所堅持同我o既執著，各有利弊之處。

「別人笑我太瘋癲，我笑他人看不穿。不見五陵豪傑墓，無花無酒鋤作田。」唐寅《桃花庵歌》

>>May 8, 2008 at 2:43:15 AM GMT+8

2008 年 5 月 3 日 星期六 【雨】

Serenity 安寧

星期六，深深感受到有車o既自由同埋方便。試問好人好者你會唔會搭車或者踩單車去烏蛟騰或者鹿頸呢o的咁o既地方o丫？

雖然好晏先入到大埔，苦無頭緒唔知有乜地方好去，兜來兜去繼而決定不如又去「親親大自然」燒o野食（又去…可能已經燒上癮…）。不過呢個所謂o既「親親大自然」都只係人工o既「親親」，所以今日我決定要勇往直前，行一o的未行過o既路，去一o的未去過o既地方！

今日o既天氣唔係太好，天陰但冇雨，對於我架爛鬼車o黎講，反而係天公做美，絕對適宜出街o個隻。新界區o既空氣通常都比市區清新，駕車入到公路兩旁都係樹o既地方，不單止心礦神怡，就連空氣o既溫度都顯著比市區低一兩度，亦冇繁雜o既噪音。

過佐大尾篤之後轉入新娘潭，真係聽就聽得到，講亦講得多，終於都有機會第一次涉足，雖然唔係行山遠足或者踩單車，但係駕車經過亦都令人有點滿足。沿途車少即使用每小時三十公里o既速度駛駕，亦都冇人會嫌你阻住地球轉，多好。

除佐樹景、湖景（船灣淡水湖）之外，沿途更發現到一o的魚塘、釣蝦場等等。呢o的咁o既地方真係第一次「經過」，真係眼界大開，亦對身處o既香港，多佐一分認識。

中途我o地又經過烏蛟騰，又係讀書時聽得多，一個真係連o係地圖邊一個格裡面都唔識搵o既地方，o係車上經過當然冇乜特別，但至少真係未落車玩過都可以話自己去過。再沿路北上去到鹿頸，又係聽新聞話o的人單車比賽o既地方，今日又有幸經過。我o地o係間廟前面就調頭冇再前行，折返去BBQ。

經過見到一個島，島上面有好多白鷺呀！雖然唔係遠距離隔海觀看，但係個感覺都好似好近，可能o係呢一息間，我已經親親大自然當中。


冇理由車路度有牛屎見唔到牛o架，真係見到隻駝背牛喎！


盡興而回，不枉此行。

>>August 31, 2008 at 8:54:10 PM GMT+8

2008 年 5 月 2 日 星期五 【陰】

Torch Relay 火炬接力

o的人搞到好似有今生冇來世咁，區區一次咁o既火炬接力，居然要用到一百二十個人去轉，認真誇張。

奧運聖火究竟有咩咁神聖呢？我唔知道亦唔覺得。全世界有咁多個國家，點解又唔係走混晒o既呢？點解只係小部分地方可以接受聖火o既「洗禮」o既呢？真係唔公平。

只有有錢有面有人贊助先有得參加火炬接力呢個show，有機會掂o下把火。有o的人又會o係把火經過o既地方示威，有個港大學生妹仲搞笑，搞埋藏獨，對政治冷感o既我，覺得超無聊。

不過經過一日沉悶o既工作後，唔係有o的咁o既無聊人出o黎娛樂o下大眾，生活又點會易過o的呢？



>>August 31, 2008 at 8:56:15 PM GMT+8

2008 年 5 月 1 日 星期四 【酷熱】

Breaker Tripping 跳掣

大鑊！最近留意到Vicky好似又想o黎料，跳跳o地掣，情況都幾令人擔心。

今日返工o係counter度坐佐一陣，發覺個女做o野好急、講o野好快，仲周不時發o下脾氣咁，而且不停打電話或兜口兜面追問我某o的工作上o既o野，異常認真咁…

Kenji話佢呢排夜晚成日都唔肯訓覺，真係搞佢唔掂兼唔知佢想點…為佐(乙水)佢開心，Kenji琴日仲一出糧就同佢一齊去揀佐個新Burberrys手袋…（佢o地情人節先買佐新袋咋喎…真有米！） @_@

究竟又因乜事令個女咁緊張呢？

>>May 5, 2008 at 12:53:46 AM GMT+8

2008 年 4 月 30 日 星期三 【酷熱】

Aspiration 心願

十八歲，o係某雜誌換佐本駕車旅遊手冊。學車，可以話係我之前十年以o黎想做而冇去做o既事，其中有好多原因令我一直將呢件事推遲，直至舊年年尾考到車牌。

令我「的」起心肝報名學車o既當然係同上一次失敗o既愛情有關，目標達成而家亦有車可以載您四圍去，當然美滿。但係o係我心裡面o既終極目標，其實係要方便接載我o個個八十幾歲o既婆婆四圍去。

婆婆個膝頭哥真係退化得好緊要，要屈曲真係好困難。我細個時佢更曾經中過風，開始要用柺杖幫手行。而行動不便更直接影響佢o既社交生活，所以佢好少出街。

自從送佐婆婆去安老院，我就錯失佐陪佢佢睇醫生覆診o既機會。加上工作忙而放假又懶，探婆婆o既次數絕對唔係多。今晚難得一家人同婆婆出去食飯，我o既心願終於達成。

食飽飽係時候送婆婆返安老院，我就主動提議開車送佢返上去，佢老人家居然唔怕我呢個新牌仔，仲好開心咁添呀。不過我架車個後座又確係窄佐o的，唔多適合老人家坐，上車落車時都顯得有o的辛苦。不過如果婆婆唔介意，我以後都願意提供免費而又安全o既接送服務o架！

嗯…或者第日要換架七人車先得喇。

>>May 2, 2008 at 2:45:05 AM GMT+8

2008 年 4 月 29 日 星期二 【酷熱】

Concerns 顧慮

聽日原本下晝要去CityU interview個master，但係諗左諗右最後都係唔想去，蝕佐一百蚊報名費畀城大。

同舊年一樣，冇時間冇心機去準備；同舊年唔同，今次冇去獻醜打擊自己。

心裡面盤算住好多o野，包括而家o既財政狀況、若要上堂o既時間分配、挪CIH重要o的定係地產牌重要o的、係咪應該先將儲錢結婚放做第一位…等等等等…

財政狀況︰今年同舊年唔同，要自己一力承擔架大發仔o既起居飲食。面對一個月最少加三、四次o既油價雖然已經變得麻木，但係短期之內仲有o的o野要整，好似換冷氣泵、換turbo、整返車尾個凹位、拋光打蠟同埋加返盞車尾燈。之前兩個月已經畀佢閹佐兩o野，希望下個月可以回一回氣…

時間分配︰正如之前所講，新PA o既工作進度未如想像中理想，一個字︰「慢」。加上老細無心長留新翠，預計唔準時放工o既情況會持續，加上有部分堂相信要o係星期三或六上，讀書同上堂時間根本就唔會排o係我心目中o既高位。雖則一心諗住頹讀同碌過就算，但世事亦未必如想像中簡單，因為City出名功課多。

專業資格︰直至目前為止，property management仍然畀唔到我有前途o既感覺，大不了都係餓你唔死同埋超級穩定。即使挪到CIH，o係呢個咁細少o既region裡面亦冇用武之地。反觀如要跳糟外面做prop. mgt.好多都要有地產牌，順勢做埋租務。但係以我咁鐘意安定生活o既KS die hard fans，又有幾大機會會跳槽呢？

共諧連理︰結個婚大大話話最少都要廿萬，之後仲要搵地方住等等，都唔係講玩。睇返您而家屋企o既情況，要您繼續堅守落去真係分分鐘搞到精神崩潰。辛苦粗勞佐成日，返到屋企都只係想靜靜o地休息o下，舒緩返一日所受o既氣同壓力…搬走，可能係唯一解決o既辦法。

諗諗諗諗！諗咁多做乜o丫！訓陣覺罷啦！

>>May 6, 2008 at 2:08:50 AM GMT+8

2008 年 4 月 28 日 星期一 【陰】

Dilemma 兩難

自從老趙同呀Mi相繼閃人之後，每月平均OT 2000幾分鐘，公司請著我真係抵之餘，我亦一面對私人時間被剝削o既問題。不但影響到我o既食飯時間，更加影響到我同您之間o既感情。

彷彿已習慣八點後先可以走人，返到屋企八點半九點，屋企人留飯，食埋個飯又十點半，仲要洗返自己o的碗，搞搞o下都成十一點。

您習慣每晚都要抽時間講電話，但十點半左右就要上床覺豬，有買趁早。

兩難問題出現喇。

好似今晚咁，早佐少少返到屋企食完飯，碗都未執好，您o既電話就到喇。食完飯自己洗返自己用過o既碗碟乃係天經地義理所當然o既事，如果換著係媽媽見到我唔執o野o係度講電話，最多都係哦多兩咀，最後洗碗o既責任都係落返o係我身上。但係由於今晚媽媽去佐返學，結果就係我o個個做完成日o野返到屋企，仲要抵唔住頸o既爸爸執晒o的碗去洗…多不孝。

佢唔會出聲亦唔會秋後算賬，你叫佢放低留返自己洗佢都唔會理，直至做完。爸爸就係一個咁o既人，行動勝於一切。內心頓時有所羞愧。

無奈o既係，時間寶貴您又趕住要訓覺，您唔鐘意聽到我一面洗碗一面講電話o既碗碟碰撞聲，您呢排心情唔多好又有o的唔舒服又無謂太逆您意而行…

唉…只有嘆息︰忠孝兩難全。

>>May 2, 2008 at 1:20:06 AM GMT+8

2008 年 4 月 27 日 星期日 【陰】

無事獻恩勤，非奸即盜！

琴日又到Cyman當值，據小道消息通知，個regional i/c繼上次星期六佢一個人當值時走落o黎「教佢o野」之後，琴日又o黎「複桌」！

所以我早兩日都同Cyman講o架啦，所謂一不離二就二不離三，條粉腸九成係有o野，又唔見佢當年特登星期六下晝唔「北上」走落o黎教我o野！九成九「生滋貓入眼」，狗上瓦坑有條路！

條友o既行為操守好有問題！之前已經約Cyman單獨去睇花展，而家又專揀o的單獨當值時間落o黎搞搞震，咁樣玩火法，真係遲早就出事！

幾時都話︰唔好呢度食呢度屙。佢咁大個人搞乜春春呀又？！咪玩啦！

>>May 2, 2008 at 12:23:21 AM GMT+8

2008 年 4 月 26 日 星期六 【陰】

放假了，孖day。

十二點幾起身，睇埋琴晚套戇居居大結局先出門口，入到大埔都兩點半… @_@

今日係您o既shopping day，真係港九新界都行到暈晒，行到我腳都跛…有時做得咁辛苦，搵得到o個個人工，又真係唔怕駛錢o既，偶然放縱一下，可以平衡o下個心理。

o係樂富吉之島都係買返同一副收銀機玩具，點知去到Sogo發現套麥當當收銀機大特價，比正價平佐三十幾個巴仙，真係唔得佢死…妖！

本來諗住放孖day可以準備o下星期三去CityU interview o既o野，但係最終都係冇… @_@

>>April 28, 2008 at 2:43:02 AM GMT+8

2008 年 4 月 25 日 星期五 【雨】

唔知點解好鬼多o野做，做極都做唔完咁…o岩o岩作完四封信，心裡面仲有好多封都未得閒搞…唉…

人o地放佐工我先有得埋位搞o的租單，點知做到一半公司電腦又收機，逼住要走人咁。唯有搞佐o的唔駛上機check o既租單先，希望可以早o的出畀o的客，完成任務又一個月。

我o既目標係︰所有租單都唔駛上system check完再印再copy咁o徙時間，幾時得？

冇得做就去佐油站，呀偉o係五金舖買佐支新o既去跡蠟水o係度同架車打蠟，跟住仲要玩我架車，搞到個「頭扲」o的色一撻一撻… @_@ 要同我架車全車打蠟起跡，恐怕要一日時間先搞得掂… @_@

>>May 4, 2008 at 3:26:09 AM GMT+8