2004 年 1 月 30 日 星期五 【晴】

今日訓到10點先醒,起身成身散晒..腰酸背痛,手足疼痛,肌肉酸痛,仲有頭痛到不得了,跟住去左沖涼. 11點出去莎度,佢話今朝11點左右去飲茶..點知去到佢仲訓緊覺,原來佢都病左,我諗係因為個陸運會,我地都吹風吹得耐,但係又著得好少衫,又四圍跑,忽冷忽熱,加上操勞一餐所以病.. 跟住莎一路訓到6點幾,中間起身食左幾次藥又訓過.8點半同佢出左去食飯,因為腳痛既關係,我地兩個都行得好唔自然,食到9點幾番去,跟住餵佢食埋藥就番屋企.

>>February 1, 2004 at 4:15:16 AM GMT+8

2004 年 1 月 29 日 星期四 【晴】

訓左冇幾個鐘今朝6點半醒,好辛苦..腳勁酸痛. 跟住7點15分到sally樓下,sally同suyi都o係度,阿miu就未到,等到7點25分佢先黎,飛的番去都遲大到..番到去又急急掛banner,set旗.. 之後去點名,第二日既陸運動正式開始.我坐左陣就換褲落去等擲鐵餅,擲擲下聽到400米召集,3次機會擲左2次就走,一個foul一個成功,跟住跑過去跑400米,氣都未抖順就開始跑,跑到200米左右腳先後抽筋,結果跑唔到,分組最尾總成績第6.過左終點坐低左就行唔到,勁抽筋..俾人夾左過去坐,都坐左大半個朝早先緩步返看台.番到去問人借左按摩膏搽,搽完都冇好轉.. 跟住坐左陣又話要跑大隊接力,社際20x200比賽,我痛到唔想跑..不過要搵過人又煩,結果頂硬上.輪到我跑我以為會腳軟,點知我勁跑又唔覺痛同累,仲追近番前面既距離,跑完累到我訓左o係草地度,之後行過去睇成績,拎第二. 跟住頒埋男子組既獎牌就放lunch,放lunch先知我原來鐵餅入左final,不過我冇去擲到,因為果陣我兩隻腳都抽緊筋行唔到去,諗番早知唔去跑400好過. lunch個個都好趕,因為lunch就係到cheer比賽,d人開始換衫,化妝,練舞.. lunch完點埋名cheer就即刻開始,第一隊就係coral,發揮得好好,臨尾一齊嗌slogan就因為技術問題而甩嘴有d敗筆..睇埋其他3組跳完到特別賽事,不過我地都冇睇到..因為好驚張,coral贏第2既emerald 9分,如果cheer一輸可能俾人過頭. 到頒獎果陣頒左女子組d獎先,跟住就頒特別賽事既獎牌.我同阿正就拎定旗等coral睇下有冇得拎全場總冠軍.之後我地俾miss叫左去幫手還野俾場地既人,搞左一輪.最後番去發現d社旗冇晒!原來d校工拆左同摺埋左.我地去拎番果陣俾人鬧,d校工好惡,又唔知點解陸運會未完d校工就趕車走. 等左好耐,終於等到公佈結果,第一名係..CORAL!果一刻好興奮,即刻同阿正拎旗衝過去頒獎台影相,個個都好開心,話晒贏晒水陸兩運,莎莎好叻. 放學之後幫手執番d垃圾,5點零走,跟住同sally搭地鐵去九龍灣行左陣,掃街食野,之後送佢番屋企.番到去佢訓到8點醒,同佢落去食飯,食完飯去食糖水,之後番屋企.

>>January 30, 2004 at 7:43:44 PM GMT+8

2004 年 1 月 28 日 星期三 【陰】

今日係九記一年一度既陸運會,今年個陸運會比往年有意義,因為由我地lead成個house. 尋晚莎2點零打黎,佢同suyi佢地整到2點幾,跟住我地傾到3點零訓. 6點半就起身,換晒衫執好野就出門口,去幫手莎手拎野去釜出運動場.7點15分到佢樓下,跟住飛的去釜山運動場,番到去7點半. 一番到去就好有大戰在即既氣氛,我地即刻set晒旗擺晒d器具出黎,sally因為要去girl guide,coral突然冇左個社長.8點15分點埋名之後係運動員進場禮,因為sally唔o係度,由阿miu呢個副社長擔正,完埋宣埋誓陸運會就正式開始. coral一路o係第1同第2名之間徘徊,朝早我冇賽事要比賽,就成朝四圍跑做工作人員幫coral搵人搵鞋搵短褲..跑左起碼20幾轉,累到傻. 下晝訂左麥記做lunch,不過d薯條淋晒..食完佢地落去練cheer,我幫手睇,聽日就比賽,個個都好緊張. 下晝又來回跑左幾轉就走去玩標槍,結果兩死槍一生槍,但係唯一既生槍唔過standard,foul左,foul完我就番去繼續幫手,發現原來阿miu d sport好勁!睇唔出..100米,200米複賽之後到社際4x100接力,好大件事..因為每個社得4對釘鞋,但係社際4x100接力就分左男女同A,B,C grade,加加埋埋都成24個人跑,唔夠鞋分..結果唯有搵人幫交釘鞋俾下一組跑既人. 俾阿miu同阿ling點左我四圍跑,勁激氣.. 跑完4x100都放學.我地搭左10號返九龍城做最後一擊,同sally拎野上佢度,之後番去公園,去到好眼訓訓左陣,跟住練到8點零,之後就去九龍城廣場買野,買完野番sally度,上左整cheer d野,今晚有bonnie,suyi同jodi幫手,結果都係整到凌晨兩點幾先走得,個人虛脫咁滯,勁眼訓腳又酸痛. 半年快樂~

>>February 1, 2004 at 12:52:28 PM GMT+8

2004 年 1 月 27 日 星期二 【陰】

今朝訓到7點起身,同莎番學,番到去8點零,擺埋書包去拎書,拎完書番到去夠鐘. 第一堂中化,都係對下卷.第二,三堂中史,教番尋日派既notes.小息開始不停望錶,因為10點就係阿舜個葬禮開始既時間,尋晚聽d程序話好似會有儀式,儀式完左佢遺體就會送去哥連臣角火葬場火化..果陣大約12點半. 第四,五堂空堂,落左去睇書,開始心緒不寧,之後第五堂訓著左,訓到落堂前十分鐘先訓,跟住用library d電腦上左陣網,上到打鐘落堂. lunch上左去又一村7仔食,沿路不斷睇錶,因為就黎到..越行一步,腳步就越沉重,重到唔想行.去到7仔見唔肚餓,自己走左過隔離個公園仔坐,到左12點半,突然眼濕濕,一諗到阿舜將會化做一縷煙,d眼水就湧出黎.. 坐到12點40分就番去7仔搵佢地,跟住12點45分番學校準備on duty.番到去on duty到1點半,原來守3樓都幾好,可以望到好遠既風景,望遠d個心都舒暢d. 跟住兩堂空堂整coral d野,整足兩堂,最後一堂中化oral講番考試既成績. 放學幫手練cheer練到6點,跟住再去九龍城練到7點幾,之後去食野,食完野我就番屋企.suyi,小玉,bonnie,阿miu就上左sally度整野.

>>January 30, 2004 at 7:07:35 PM GMT+8

2004 年 1 月 26 日 星期一 【陰】

尋晚又好夜先訓,今朝訓到6點50分俾手機鬧鐘嘈醒.起身快脆換衫,好鬼凍..間學校唔知係咪有病,放幾日就要番學.今朝同莎番,等到好晏,不過今日番學都好快,因為都冇咩學生迫車,條路d車都少好多. 番到去8點零,打鐘之後落去早會,換左集隊線,因為學校中間個草坪成個剷左lu,雖然早o係聖誕剷左,但因為之前考試同落左日雨,所以直到今日先正式用. 之後完早會我地四個男仔(toto,左輪,主席同我)白白痴痴上左課室,miss潘跟住問我地係唔係prefect,我地以為佢以為我地冇on duty,冇理到..之後發現原來係雞同鴨講!我地見班得幾個人先發現原來prefect要早會後留低有野傾,嚇到我地四個即刻標落去..-__-" 白痴完一輪,頭兩堂英文,miss tang好好人咁名義上group discussion,實際上俾左兩個空堂我地玩.不過佢好賤問我同女友d野,又同我講"show me your girl friend",好無奈-__-". 跟住空堂落左去library睇《資治通鑑》. 小息同sally四圍頻撲,今年陸運會d名單印得好鬼混亂,錯漏百出.. 跟住兩堂文學,聽書,呢兩堂過得唔悶,楊sir又解釋點解今年個農曆假放得咁少. lunch同阿正,阿佬,suyi,小玉上左去又一村7仔食野,點知間野冇晒叉,最後迫住用筷子食杯麵. 跟住空堂,帶左本《放風》去睇,不過之後幫手整coral d野,完堂臨走到bonnie空堂,留左本《放風》俾佢. 跟住中史堂,miss yim因為見家長遲左大半堂先上黎,之後講左陣就落堂.最後中文堂,對下卷就放得學,因為今日既第9堂取消左. 跟住練cheer,練到6點飛番屋企.6點半番到去,俾阿媽質我食埋飯先出得..今次阿媽好好人肯俾我去,可能佢見好多舊同學今日打過俾我約晒我時間地點,迷信既媽媽就叫我要點點點做,我咁孝順當然聽佢話啦=P. 7點出去,等車果陣個心好驚..好驚一陣間會面對既野..o係車度,越近站我越覺得唔舒服,好想抗拒.. 7點20分到紅磡火車站,見到阿偉,阿浩同博爺到左.之後阿so都黎埋,跟住又撞到英華d老師,佢地都好有心..之後東源都黎左. 7點40分左右,小虎話就到,我地就行出去總站接佢落車,跟住齊齊行過去世界..一路行我個身不由自主咁一路震,唔係天氣凍..我一d都唔覺得凍,而係好驚一陣既氣氛,環境,場所..種種既一切. 上到去簽左名拎左d野就去拜一拜阿舜.番去坐低冇耐就開始追思禮拜,用基督教形式..唱下hymn,跟住聽牧師講道,讀經,祝褔..禮成,我地一路都keep到唔喊..不過d眼水忍唔住. 跟住同阿舜屋企人握下手問候下,之後有人叫我地幾個坐低先.原來佢帶我地見阿舜最後一面,行到去玻璃窗前,我個人已經震緊,好驚..唔知見到會有咩反應,帶果個人就一路解釋阿舜因為病,所以用左厚妝..話咁快行到去窗前,個個都唔敢睇咁..見阿so睇完,我都鼓起勇氣一睇..個心好痛,望住個曾經同自己生活過既人宜家冇生命咁訓左o係度,原來係會好恐懼,一諗到咁又好激動.. 走果陣我忍住唔喊望住阿舜媽媽點左點頭笑,佢都回左笑,跟住我都唔敢再望番轉頭,去到lift位我同小虎淨係識不斷抽泣,好想喊出黎..但係驚影響到身邊d fd,深左吸左啖,吞左個情緒落去. 出到去吹下風好番好多,我地食左粒糖,跟住佢地去食飯用埋個一蚊佢.我唔肚餓冇食到,坐o係度傾下計,都好耐冇聚埋傾下計lu..傾到10點就走. 佢地約聽朝出黎,因為聽朝阿舜遺體就會送去火化..但係我聽日要番學,送唔到佢最後一程..

>>January 27, 2004 at 4:43:10 PM GMT+8

2004 年 1 月 25 日 星期日 【陰】

突然覺得自己好失敗.. 今日訓到10點幾,之後11點半出門口,12點零到佢度,bonnie同兩個小妹妹都o係度食緊晏.食埋晏佢地玩左陣.1點幾開工,又一路整整整..5點出左尖沙咀搞cheer既野,7點零走,阿甄同佢個fd黎左,sally想食湯圓,跟住順便去佐敦買.之後同阿甄上佢度打邊爐,10點零食完又傾番sports day d野,個cheer搞到sally好困擾..唉,好混亂. 今晚俾人剷到飛起再黎兩個後空翻,不過都預左..最唔開心係佢地唔聽我解釋就鬧,鬧完我解釋番佢地又溫和番,次次都係咁,未知咩就鬧一餐先,慌死鬧少會蝕底咁.. 番到去就online,呢排忙整sports day d野少左online,博爺夜晚icq講聽晚有個追思會,我咩都唔知..知得好突然,聽日又要番學,cheer要練到6點,都唔知點算..唯有聽日一放就飛番屋企打俾人問下先.. 咩事都唔知,真係好失敗.. 唔經唔覺已經兩個禮拜..

>>January 26, 2004 at 5:31:55 PM GMT+8

2004 年 1 月 24 日 星期六 【陰】

今日訓到11點零醒,沖埋涼12點40分出去,1點左右到旺角地鐵站等snoce同大眼佢地.今日佢地約出黎聚,今時今日903既netmeeting已經唔似以往咁有10幾人出席,今日結果得4個,我地都好感慨..我同大眼,snoce先去食左lunch先,之後2點零去旺中既neway唱k,vivian 3點零黎,唱到4點40分俾人cut,都幾唔抵,又貴,搞到我破晒產..不過冇計啦,假期加上難得一聚都算lu.之後落地庫影左貼紙相,第一次影(係咪好out呢?),我不嬲都唔鍾意影相嘛..-__-" 跟住5點幾過sally度,同埋sally,bonnie,suyi,小玉,阿miu整sports day cheer用d野,因為時間緊迫,人手又有限,由6點零一路整到夜晚11點零,晚餐都冇食..11點落左sally樓下食左個麵,之後就走,番到去好累就訓. 幾日冇見過,靚左喎又~

>>January 26, 2004 at 5:10:51 PM GMT+8

2004 年 1 月 23 日 星期五 【陰】

今日赤口,冇拜年冇出街,匿o係屋企打機頹廢左成日..唔知有咩好寫,就係咁簡單!

>>January 26, 2004 at 5:05:52 PM GMT+8

2004 年 1 月 22 日 星期四 【陰】

今日訓到12點半,基本上尋日都拜晒年,今日可以話係冇野做,難得可以留o係屋企hae下. 起身覺得好凍,唔想起身..食埋晏番房打機,成個下晝玩三國志九,玩5點零停左睇下書,跟住玩左陣vos同上網. 7點零食飯,食完飯番房講左陣電話,今日個電話一路冇停過,阿爸同阿妹輪流由下晝用到凌晨1點幾.其間8點幾send隻fifa 2004俾二佬諗住同佢玩,隻game成1GB,send到11點先send完,又同梓為玩左陣cm,之後同二佬嘗試玩fifa 2004,發現越新既fifa,連線就越有問晒..搞左好耐都玩唔到就熄機去訓.

>>January 24, 2004 at 6:17:23 AM GMT+8

2004 年 1 月 21 日 星期三 【陰】

尋晚玩到1點幾訓,今朝11點先起身,跟住食埋早餐快快脆換衫.今年冇咩新年氣氛咁,仲要好鬼凍,凍到我都唔想出街. 之後阿媽佢地去左拜年先,因為去個唔熟既親戚度,所以我留o係屋企打下機就算.之後1點幾阿妹打黎我就自己拎埋d餅過阿姨度,去到1點半,見到舅父舅母都o係度,佢地傾到2點零3點,又一齊過另一個住附近既親戚度.o係果個親戚度睇左陣電視既賀歲波,之後因為果個親戚又有其他親戚黎,搞到好大棚人,迫到死..所以就走,好無聊既一個下晝,人大左都冇咩拜年既意欲. 4點零成班人搭巴士過阿婆度,5點零到將軍澳尚德.之後阿妹同班表弟表妹落樓玩,我見凍留o係屋睇電視同報紙,又勁食野,過完年一定肥鬼死我. 6點零表弟妹佢地番,之後幫舅父整電腦清下垃圾,因為佢話開機奇慢,清完真係明顯快左好多. 7點食飯,食完番房睇佢地玩電腦,越睇越眼訓,又凍,好想番屋企匿o係被竇訓餐飽.等到9點零走,出到去好鬼大風,吹到我變雪條..仲要等左15分鐘,好似俾人風乾緊咁..上到車暖好多,即刻恰下眼訓,到站俾阿媽叫醒落車,一路行番屋企一路眼訓.但係好神奇,番到去開電腦即刻醒晒,玩三國志九威力加強版玩到4點先訓..-__-". 各位恭喜發財!

>>January 23, 2004 at 8:46:14 AM GMT+8