2004 年 1 月 13 日 星期二 【陰】

尋晚4點零訓,今朝訓到11點醒.起身上左一個鐘網,12點去沖涼,12點20分去煮野食.搞到1點先出門,其實有d想逃避今日,結果有好錢咁飛的番學.番到去岩岩好1點20分,入到課室冇耐阿sir就黎左,今日考文學既作文. 1點半開始考,考3個鐘,以為有好多野要作,原來只係要作1篇長文同1篇短文.一開始作篇短文先,題目係『藍色的聯想』用左20分鐘做完.跟住有2個鐘頭零40分鐘俾我作篇唔限字數既文,就慢慢寫大綱睇下點作,有2個題目揀,我揀左題『假設你走進時光隧道,你會選擇回到從前還定通向未來呢?』之類既題目,我揀左回到從前,寫寫下一時間多大感觸,因為我諗起阿舜,結果唔開名寫左同佢同小虎,阿蘇d野,一口氣寫左1400零字,唔知有冇離到題,不過都算,寫完篇野好滿足,好想即刻拎去影印一份黎自己keep..做完先3點半,修整下個結尾都係3點55分,跟住自己由頭到尾再睇一次通唔通順同有冇錯別字,改改埋埋岩岩好4點半. 考完出學校見到sally,佢驚我唔開心黎左等我放學.原來佢4點先訓醒,佢醒左沖埋涼就趕過黎..傻既,我都冇事..不過多謝你.. 之後佢話同我去散心,同佢去左旺角睇鞋.5點零去佢度,夜晚o係佢度打邊爐,食左唔多野. 番到屋企hety打黎,傾左陣就番房online同睇下網頁.

>>January 14, 2004 at 5:49:32 PM GMT+8

2004 年 1 月 12 日 星期一 【乍雨乍晴】

肅剎既一日. 今朝起身好凍,天氣異常寒冷..朝早寒風刺骨,我雙手冰冷,身體都不由自主顫抖. 番到學校都8點零,入到有人氣既課室坐低個身先至慢慢暖番.今日考中史,由8點半考到11點半.一收到卷,d題目都還可以,不過因為要3個鐘做4題論文,自己驚住做唔切,一開始就落筆勁寫,計住45分鐘一題,結果做到11點15分做完,仲有15分鐘淨,出乎意料之外.. 放學同莎同大麻行落去九龍城搭車,因為尋晚溫到勁夜,下晝又勁訓一餐..睇黎都係要較番岩d時間先得,結果訓到7點幾先醒. 夜晚食埋飯洗碗,跟住番房睇書,睇到12點左右諗住訓,小虎同阿蘇打黎,前晚俾小虎話完之後,我都諗過過幾日考埋試打俾阿蘇阿舜佢地睇下佢地呢排點,或者新年約出黎聚下都好. 但係收到噩耗..果刻我唔敢相信,手震晒,接受唔到..小虎話夜晚打俾阿舜果陣,佢阿爸話佢今朝過左身..聽到果刻我淨係諗到"唔好講笑啦",我覺得係小虎同阿蘇夾埋黎玩我,我到呢一刻都希望係..傾多陣就收左線,之後我有諗過打去搵阿舜,捉佢同我傾一餐,但係結果我都係冇勇氣打. 舊年既一月份失去左犀牛,但因為同佢唔算好熟,只係覺得好可惜..但係今年好唔同,好大感受..原來人真係好化學,話冇就冇左..仲有係唔等得,諗住考完試搵佢傾計,結果係無了期..人應該把握時機,唔好浪費時間,原來你以為有大把時間,其實時間係唔會等你去慢慢用. 宜家一切就只有回憶,就算佢真係唔o係度,佢都仲o係我回憶入面,直到我死果日,所有野先會灰飛煙滅..http://hk.geocities.com/chiu_0422/otherfanz.htm quote from阿舜info 『等了又等； 期待過後， 還是期待。 有很多東西不懂珍惜， 失去了就沒有。 我想每個人都有這樣的經歷 但最要緊的是： 要懂得在錯誤中學習， 不要讓你珍惜的東西一次又一次的失去， 不從錯誤中學習， 你的人生將充滿很多「失去」。 但我還在學習怎樣懂得珍惜。』 阿舜,sorry.. 我冇去珍惜我同你既友誼,以前有你日記,我都仲可以o係日記知道你既生活,但係你日記冇左之後,我依然好耐都唔搵你一次..我唔係唔重視你..我對個個fd都好疼錫架,但係只怪我懶打電話搵朋友,我又被動,唔識主動去關心人..你病左之後十次有七次都係你打俾我搵我傾計,諗番起我都真係唔識做,可能我真係個唔合格既朋友啦..記得次次同你傾電話都傾得好開心,因為我地d諗法都差唔多,好易有共鳴,就好似講game可以講一個下晝,講人亦都可以講到歡天喜地,大笑過後先收線..好懷念我地以前日日放學一齊搭車番屋企既日子,你同阿蘇,小虎黎我屋企打機既日子.我仲記得我將我地每人個名抽左一個字出黎改左過叫『佬舜蕭蘇』(魯迅燒鬚)既組合名. 我既人生又多一個「失去」.. 祝你旅途愉快, Forever Friends,蘇蕉蕭舜

>>January 13, 2004 at 5:49:30 PM GMT+8

2004 年 1 月 11 日 星期日 【晴】

今朝7點半出門番學,今日考中化甲部既卷一同卷二.卷一由8點半考到10點,3揀1做一篇實用文,結果做到9點40分做完,覆埋卷抖左陣.10點半再考第二份卷,今次係速讀.考一個鐘,做六篇閱讀理解,岩岩好收卷前做得切. 下晝又勁訓,夜晚溫中史,勁溫勁溫溫到4,5點先訓,不過個腦空空地,仲係好似咩都冇溫過咁..

>>January 14, 2004 at 4:30:11 PM GMT+8

2004 年 1 月 10 日 星期六 【晴】

尋晚同莎傾通宵,冇訓過,今朝7點零沖涼,之後online on到10點幾,就過左去莎度,佢叫我11點過去叫醒佢溫書,我11點10分去到佢莎,去叫醒佢,佢竟然照訓-__-"!!枉費我唔訓既心血..嗚嗚..T.T. 結果訓到3點幾再叫佢先肯起身.佢起身之後整理好就同佢出左去吉之島,去食雪糕同買下野.6點15分去返到去,跟住食左d野就去上網,傾下計,之後落左百佳行,9點零走.

>>January 11, 2004 at 4:07:00 PM GMT+8

2004 年 1 月 9 日 星期五 【晴】

尋晚陪莎研究整gif到5點半先訓,今日訓到下晝4點半先醒,大昏迷.. 醒左莎打黎同佢傾陣,跟住去拖地,之後上下網,今晚阿爸去飲阿媽加班,結果同阿妹要自己搞掂今晚果餐,6點半出去買晚餐食,7點打番俾莎同上網.9點零阿媽番買左d壽司番黎,食完番房整網頁,諗住整左midi先,點知整整下心血來潮去左整vos d歌,就整左成晚,整到11點幾. 之後online打日記.

>>January 10, 2004 at 5:47:09 PM GMT+8

2004 年 1 月 8 日 星期四 【晴】

尋晚結果整到5點幾6點,總算暫時搞掂. 今朝10點起身,快快脆沖個涼10點半就出去,今朝約左莎同佢姐姐去飲茶.11點零去九龍城廣場頂樓既馥苑飲茶,飲到12點零走.之後上莎度,1點40分出去,番去考中文oral.去到見到toto,jaffen,bonnie,suyi,阿show,d氣氛勁怪勁緊張..之後又見到小玉,左輪黎左.2點零到我做,勁驚..完左果10分鐘準備時間,行過去考果陣真係一步一驚心.考完岩岩好用左3分鐘,個miss話我內容好好不過就好緊張..-__-". 之後到sally考,等佢考埋就走,跟住去左又一城換野,行完搭火車落旺角新世紀,先發現原來果陣都有得換..跟住又去左Ikea行,行完就走.走果陣撞到阿正,阿佬同carrie,香港真係細~ 之後就同莎番去,我好眼訓訓著左,自從尋晚教完佢整logo,佢就好興致勃勃咁一路整,6點幾我醒左幫佢改語法放上日記,大功告成,見到佢咁開心我都好滿足.. 夜晚同佢去左百佳逛左轉,之後就番屋企. 當你好想去做一樣野,但係又發現個腦d細胞唔受自己控制,唔肯聽話,扭計,其實都係幾頹既一件事.. 好憎自己咁大個人仲係咁,連自己覺得岩,應該做既野都怯. 只怪我冇用. 我好想改變自己內向既性格,我一路都以為自己慢慢有所改善,原來都唔係,呢一刻我真係覺得好心灰,好無助,我好想逃避呢個世界.. 我認識到自己呢個缺點已經好耐,但係就係一路都改唔黎.. http://hk.geocities.com/chiu_0422/introduce.htm

>>January 9, 2004 at 2:58:31 PM GMT+8

2004 年 1 月 7 日 星期三 【晴】

尋晚陪莎溫geog溫到5點,佢成日都臨急抱佛腳-__-".之後去訓,10點零起身沖涼換衫,跟住出去接莎,11點半到學校出面,等左陣見佢出黎,跟住同佢落旺角,行左陣就送佢番屋企.之後齊齊買lunch上左佢度食.下晝勁訓一餐,夜晚玩富甲3同傾下計. 之後番到屋企夜晚俾左個日記sally整,初初睇住佢整到好cute,睇到我心慌慌-__-.. 不過其實都幾期待同開心,唔知個日記會俾佢整成點呢?

>>January 8, 2004 at 6:25:57 PM GMT+8

2004 年 1 月 6 日 星期二 【晴】

今日7點幾起身,沖完涼就開機上網,唔敢訓番,驚一訓會訓過籠,今日10點半考英文oral,結果9點零莎打黎話考完,同佢傾到9點45分我就準備執野走人,番到去10點25分,諗住趕得切,點知遲到!個個到晒坐晒o係度,我記得張通告寫10點半個喎..不過算啦,有冇遲到都好,要大家等我我都覺得唔好意思. 坐低條氣都未順就開prepare,可能趕得滯,個腦一片空白,跟住就唔理三七二十一抄晒篇野落去張note card,prepare完就開始,miss tang話完開始冇人理佢,d人真係斗膽.等等下先發現原來係我先,我竟然做左candidate A,我仲以為我學號最後實做candidate D添-__-".突然要我開始搞到我亂晒籠,又抄得太多野,講到過晒鐘..全組得我一個完成唔到-__-",有d欲哭無淚既感覺.之後個group discussion仲衰,諗唔到野講,又跟唔切angues,bonnie同casper既節奏,佢地跳黎跳去講,搞到我陀陀擰,個topic講environment,佢地撻左唔少geog野黎講,我d geog都生疏晒,今年冇take,有既都諗到講唔到,今日個oral簡直死得壯烈. 之後考完11點帶住哀傷既心情同大麻搭車走.. 夜晚食完飯洗埋碗去睇左陣報紙,之後就番房online同icq,估唔到rebecca同我一樣遭遇,同病相憐..好慘T.T.睇hety send俾我既日記嚇個半死,佢都算行運喇,好彩冇點整親,小心d啦.

>>January 7, 2004 at 3:54:38 PM GMT+8

2004 年 1 月 5 日 星期一 【晴】

今朝6點50分醒,7點半出去同莎番學.今日測英文,第一份卷由8點半測到10點,結果做唔切-__-"..第二份卷我快手左做,抄到手軟,由10點半做到12點15分,最後有5分鐘淨番,不過今日考果兩份都唔太滿意..唉. 今日睇到句野講得幾岩:死亡之可怕,只源於你對生命的執戀.

>>January 6, 2004 at 5:06:36 PM GMT+8

2004 年 1 月 4 日 星期日 【晴】

今朝6點50分醒,7點半出去同莎番學.番到去睇多陣書,我發現toto同我一樣冇帶notes番去溫,真係難兄難弟-__-".考完讀本,10點放左個break,之後考埋聆聽,聽唔切寫唔切,前幾日整到隻手指甩皮,今日寫字寫一個就痛一下,所謂「十指痛歸心」,真係好鬼痛,最弊係今日d卷又多野寫又少時間.. 考到11點15分,之後去莎度,下晝因為尋晚夜訓好眼訓而勁訓,訓到6點幾先醒,7點幾就番屋企.番到去食埋飯8點零睇電視,睇完番房,上左陣網阿媽走黎叫我幫佢填野,呢排佢為左信用咭d禮品勁睇邊張咭有so,猛叫我填表,但次次填完又唔交.. 跟住阿爸見咁就冷言冷語左阿媽幾句,阿媽又沉唔住氣反駁,結果又嘈一餐,勁煩..

>>January 5, 2004 at 4:08:13 PM GMT+8