2006 年 2 月 1 日 星期三 【晴】

■■■	新界一日遊	■■■
今日一早去了元朗食壽司，因為有人話d壽司好大舊，要去試下喎，就係咁入左元朗食，入到去其實一望就望到果間鋪，因為全條街得果間鋪有好多人排隊，我地仲以為會等好耐，點知當我地一去到果間鋪，d人就開始入去，我地先知原來間鋪頭未開門，當我地入到去坐低的時候，就見後面d人已經冇得入，因為全間已滿人了，第1樣感謝主的事呀。 果d壽司真係好大舊，我果食2舊已經等於半碗飯，我地叫左1碟三文魚，1碟帶子，已經係2碗飯啦，跟住我見人地果d蟹子沙律仲恐怖，因為佢唔係用碟上，而係有個盆上，仲要係有隻大湯匙，好似'不'湯果d咁，我估要4-5個人先食得晒。 食完壽司之後，我地就去搵地方安靜，當行行下的時候，其實已見到一個運動場，原本諗住係果度安靜，但因為太晒啦，冇地方可以坐，所以又再去搵下其他地方，又行行下的時候，又想不如去屯門安靜，但又唔知邊度好，所以最後都係冇去屯門安靜，因為某人話地圖上見到有一大公園，再行下tim啦，所以又再行下，當一上到去的時候，竟然真係見到一大公園，而果個公園仲係我地大牛學生某一年暑假去過親近主的公園tim。果一刻好感謝主呀，因為比我再次黎番lee個公園，佢就係元朗公園啦。 因為當中的經歷確實太深刻啦。果次仲記得同晶晶同婉冰一齊親近主，仲係個元朗公園個塔度親近主tim，感受良多。今次竟然唔打唔撞咁比我去番果度親近主，2樣感謝主的事呀。 親近主後就去屯門行下，原本諗住搭巴士，最後我地都係決定去搭輕鐵，因為對上一次搭輕鐵係煒韋同我地去元朗聚會地方camp的那一次搭過，之後就冇lu，所以今次再搭，當等緊車的時候，竟然發現背後有一招牌，寫著﹕香港神的教會。哈哈，咁都比我搵到元朗聚會地方喎，係第3樣感謝主的事呀。 去到屯門行左一陣，跟住就去delifrance坐，因為大家都覺得好眼訓。飲左杯野之後又再行，但買唔到野，因為費時拎住咁完，因為之後我地去舊同事janice屋企~O利是同食飯。 由屯門搭番車去大老山跟住再轉車，全程大約50分鐘，我可以係車度訓著覺tim。去到大埔剛剛係6:10，我地約左6:00係janice屋企，時間剛剛好呀。經過一輪吹水之後，就食飯，之後再去一間基督徒開的甜品鋪頭食甜品，食晚都唔洗比錢，因為晚飯例牌係亞明請，甜品就係溫小姐請，仲有利是拎tim，因為我果盒糖果係係屋企拎的，所以係冇本生利。有利是有錢同埋食一餐tim。 食完飯就回程了。當返到觀塘差不多10:00。

>>February 6, 2006 at 10:14:34 AM GMT+8

2006 年 1 月 31 日 星期二 【晴】

■■■	海洋公園一日遊	■■■
今日同b/s一齊去海水公園，人物有﹕大妹姐、碧茹、惠儀仔、雅婷、啟賢、小志強、小坤同我，共8丁人，原本仲有燕瑜架，但因為佢果日突然肚痛，所以最後都冇黎到，大妹姐就話lee個係燕瑜特登攪出黎的"春日局"。對上次我地又係同大妹姐一班同工去，仲記得曾經玩過D乜TIM。今次去希望好好玩啦。 9:30係金鐘mrt 恒生等，等到佢地之後就上去排隊，當一上到去就見people mountain people seas.....多人到嘔呀。果一刻曾經諗過唔去，但如果唔去，又唔知去邊好，所以都係去駁一駁啦，因為我地仲有3個係未買飛的。 去到海水公園門口的時候，又唔係好多人咋喎，買飛果度一排就係啦。係門口梗係要黎張大合照啦。一入去就即刻玩滑浪飛船，排隊大約排左45分鐘就玩到，第一隻船係雅婷、大妹姐、小志強同小坤，其實LEE個配搭係我諗，我一早就佢地2個一定會玩水，為左避免我地濕晒，所以惟有犠牲雅婷同大妹姐啦，哈哈，果然佢地一上船就濕啦，玩完之後，我估全場最濕係佢地2個，因為雅婷整條褲都濕晒。哈哈..... 第2個遊戲就係排隊玩越礦飛車，我地大約估計排左1小時，LEE個係第2樣玩最開心的遊戲，我同碧茹一架車，一上車，死人小坤已經捉住我D頭髮話係扶手喎，真係激死呀。BUT LEE個都好好玩呀，驚得黎又OK喎。 之後我地就去睇左鯊魚館，之後就睇海洋劇場，但因為我地坐果D位實在太晒，惠儀仔當場黑左，一坐就坐左30分鐘，班弟兄就好寶貴啦，佢地唔睇就去左買M記野食又等位比我地坐，我地親佢未完之前就走啦，因為全場FULL晒呀，如果等全部人一齊走就有排等啦。去到搵到弟兄之後就等左一陣就有野食，真係太好啦，但其實我都唔係好肚餓，因為估住玩呀麻。 食完就排隊玩第3個遊戲﹕海盜船，LEE個係最好玩的遊戲，亦係排得最快的一個，大約排左30分鐘，原本我地諗住我地坐最尾，點知比個師奶霸住全行位，攪到我地坐係佢對面，但其實佢又好驚架喎，次次望親佢我同碧茹都笑過不停。由於我地唔驚啦，再上加啟賢同小志強係出面同我地映相，所以我地扮左好多個唔同的姿勢，好攪笑架。 之後又排隊玩第4個遊戲﹕過山車，大約排左45分鐘，原本我諗住會好驚架，因為佢安排左我地坐第2卡，好前啦，但起眾人都覺得唔好玩，又快玩完，又冇FEEL。 玩完LEE個之後，惠儀仔同雅婷就去玩千秋，而我地就去左睇海洋館，十分好睇，但實在人太多啦，要同D大陸爭過，我同碧茹就扶住啟賢個袋咁行，而啟賢就不停影相，我仲問佢影咁多短片係米用黎做screensaver呀。我估啟賢係最鍾意lee度架啦，因為佢一個遊戲都冇玩過，185蚊入黎只係幫我地影相同霸位，實在太寶貴啦。 睇完之後我地就排隊搭纜車走人啦，又係排隊的時候，我估大約排左45分鐘啦，當過到去的時候，就睇左動感影院，lee個係最少人排的，因為每位要比10蚊入場架。 之後就去玩雪啦，其實佢有規定一段時間先入得場，我地差不多果一場尾先入場，所以即刻入得去，唔洗排隊，入到去影下相，佢地就開始雪戰，戰況好激烈架，首先係雅婷比小坤用雪洗頭，之後就係碧茹d雪入頸，跟住就係惠儀仔、大妹姐同小志強，最後又係小坤中招，個個都玩得好開心。 之後我地就排玩最後一個遊戲﹕水泡滑梯，排左大約45分鐘，果時大約8:00架啦，玩埋之後就走啦，因為我地驚全部一齊走又係要排隊，玩晒咁多野就坐車返觀塘，去食沙嗲王，十分開心，但我其實唔肚餓，因為係睇動感影院之前，我地每人買左隻雞脾食，19蚊一隻呀，開天殺價，仲要係4分鐘之內食完，因為要趕住睇戲。 今次去海水公園玩得好開心呀，多謝班弟兄d笑料啦，多謝雅婷協助d笑料更加好笑，又多謝海水公園d工作人員提供咁純正國語比我地估，仲要多謝咁多自由人同我地迫。 食完飯之後，我地就走人啦，真係疲倦到死呀。沖完涼就上床訓覺啦。但因為今晚得我一個係屋企，個個都去晒旅行，所以有d驚，訓得唔係咁好。

>>February 3, 2006 at 9:34:56 AM GMT+8

2006 年 1 月 28 日 星期六 【晴】

■■■	年初一、二	■■■
今年的年初一與往年的也是一樣，因為我媽媽是最大，所以係坐係屋度等d親戚黎賀年，一與以往，食完中午飯就開始換衫，第一個到的是3姨一家，跟住我地去就5姨同6姨度，因為佢地都係係隔離座，坐左一陣就回家，因為又要等simon姨一家人到。之後例牌食下蘿白糕同年糕，我有提住自己食少d，但一見到佢地就發左癲咁食，不能停止，之後就睇左the creditable，又再睇一次，悶到就死呀。因為姨丈要睇波，佢地掛住打麻雀，d細佬同我就惟有睇碟啦。 睇完碟simon姨就落左5姨度食飯，而我地就食番團年飯果d送。咁就一日啦，明天就係等舅父到。 ============================================================== 年初二的一早，其實都唔係一早啦，訓到10:00先起身，當食緊bruch的時候，舅父就call黎話黎緊，所以又係一食完飯就換衫等佢地黎，黎到後傾左一陣佢地就落去5姨度，跟住家姐的男朋友就黎賀年，當中好攪笑的，因為媽媽諗住用果小小時間執下行李，咁家姐又冇講話佢男朋友黎喎，咁開晒d野係個廳的時候，佢男朋友就上到啦，咁亞媽就話﹕咁鐘意係人地唔得閒的時候黎架，又唔話我知，攪到而家咁，我唔理架，我照執野，佢自己坐啦。咁開左門的時候，亞媽就即刻話﹕咁錯擋呀。入黎坐下啦。轉晒臉喎，攪笑。跟住佢男朋友就提議不如將亞爸件columbia衫分開佢先，裡面果件就放入:琚A咁亞媽就叫佢拎黎啦，咁佢就將整件衫拎比亞媽，咁亞媽就話﹕你醒小小啦，你自己提議分開佢，咁你係咪要拆埋比我呀。果一刻家姐男朋友即刻o晒咀啦，因為冇諗住幫你做埋野啦，咁我就話﹕亞媽，人地黎賀年架咋，唔係黎做野架，咁亞媽先知同笑死人咁。 之後亞媽自己一丁人去賀年，因為去d輩份好高d親戚度，去我5伯婆屋企賀年，我地就冇跟去，我就自己出街啦，因為今晚去人家屋企食飯，買左d禮物去。晚上食到超勁飽就回家啦，仲有拎野走tim，真係抵呀。

>>February 2, 2006 at 4:23:38 PM GMT+8

2006 年 1 月 27 日 星期五 【晴】

■■■	團年飯+晚會+行花巿	■■■
今晚食的團年飯有阿姨黎左我屋企一齊食，所以送比之前多d。不過都係果d鮑參翅肚果d，同去飲差不多，哈哈。 今晚食飯的時候，主要題目係阿媽去旅行，阿媽又話唔講比人知去旅行，點知又係佢自己爆比阿姨去旅行，攪到題目就係要買咩、準備d咩、要帶d咩去。跟住媽媽就話﹕行李都未執呀，但唔知帶咩去。 之後就係咁講行李啦，講到食湯圓都係講緊。不過我地食飯咁好快架，一食完飯就會拎d生果出黎食，當你食緊生果的時候，就會煮湯圓，跟住時間剛剛好，就會拎d湯圓出黎食，一人食3粒或者5粒，不能食4粒的，當我食完湯圓就出門口啦，因為今晚係大牛有晚會呀。 去到大牛已經開始左啦，好彩有位坐，玩d遊戲都ok喎，多得雅婷佢地帶遊戲，果然我地cobblestone係出色過人，不過我都要低調d先得，免得招人妒忌。因為我地玩咩都win，冇辦法呀。大妹姐又失控啦，好攪笑呀。 完左晚會先係我地戲肉，因為我地去左行花巿，問題就出現啦，因為少薇同阿怡著左對新boot，少薇果對著得佢好唔舒服，佢由大牛行去地鐵站都行左30分鐘，跟住我地等埋啟賢先開始，由地鐵站開始行，行到去amp足足又用左半小時，當去到apm的時候，少薇佢地就要坐啦，又係apm坐到2:00。跟住再行，但因為少薇頂唔順，所以回家了，得番我、大妹姐、阿怡、碧茹同啟賢繼續行，行到花巿其實已經3:00幾，但都好多人喎，最後終於買到碧茹要買的花，啟賢都係冇買野，晶妹屈左大妹姐買左幾支花，最後食埋燒賣就走啦，但係大妹姐竟然話不如去飲茶喎，幾攪笑呀，得啟賢回應佢咋。因為係年初一呀，所以要回家先得，如果要飲茶又要等架。 返到屋企都已經4:30啦，亞媽仲我陪佢去觀塘再行tim，我真係採佢先傻，所以即刻換衫訓覺。

>>January 31, 2006 at 1:40:34 PM GMT+8

2006 年 1 月 24 日 星期二 【晴】

■■■	氣管炎	■■■
尋日又係起身喉嚨痛，又係飲左杯蜜糖水先出門口，今日返到公司全日不停咳，咳到連把聲都變埋，嚇死人咁，所以我諗住放左工之後要去睇醫生呀，快D醫好過新年。 由於今日精神狀態唔好，攪到我比亞姐串，話說我寫張REMINDER比D老闆，提佢地夜晚去中銀食飯，咁我用返舊果D資料，所以日期係2005年，跟住我仲係冇睇到人地果張REMINDER，時間原來係7:00，咁我就寫7:30。就係咁比左亞姐睇，佢睇完之後就話我啦，你真係做野好唔小心喎，你自已睇下錯左D咩，你自己改番佢啦。跟住我一睇，亞姐用左勁大個圈圈住2005年啦，嚇死我咩咁大。 改完之後，執埋D DVD碟，執埋房果D雜物就攪好啦。跟住下午再FILE埋其他文件就等收工啦。放左工就去睇醫生，我同醫生講咳到我死呀，醫生竟然叫我唔好咁緊張，放鬆D，我幫你聽下，其實我冇緊張架，只係你問我咩事，咁我米講羅。 跟住我順便叫醫生寫張收據比我，比我去CLAIM番D錢，咁果時醫生竟然問我要唔要假紙呀，其實我又唔係好覺好唔舒服，只係把聲變左，不停咳，又冇周身骨痛果D，不過醫生話寫一日假我去休息，咁我梗係接受，橫點又冇咩特別野，所以米放一日假啦。 返到屋企同亞媽講啦，亞媽竟然叫我咁可以陪佢去開茶會啦，因為佢地去旅行開茶會，佢又唔知係邊，又話家姐有好多問題喎，要我記低，跟住我就話﹕我病喎，要休息下。亞媽竟然話我知﹕果度D西餅好好食架。真係九唔搭八呀。 夜晚食完D藥就訓啦，但係因為有一隻藥食左會心跳加速，所以訓得唔係咁好，好似人地食左D安眠藥咁，一落床就訓著左，但係個人好似暈下暈下咁。 2006年第一次睇醫生，係06年的第一件大事。

>>January 25, 2006 at 4:21:29 AM GMT+8

2006 年 1 月 22 日 星期日 【晴】

■■■	好似病+開會	■■■
星期日一早喉嚨勁痛，好似火熱咁，咁一早已經飲左杯蜜糖水，好番好多。跟住拎左支馬來西亞蜜糖返公司沖黎飲，超正。出門口的時候，亞媽又話我﹕新年留留就唔好病啦，小心d先得架。我就答佢﹕我都唔想病架。 返到公司，唔係好想食野，喉嚨好痛。求其買左碗粥食，跟住就沖蜜糖水黎飲。到而家差不多飲左半支啦。原本諗住今晚去睇醫生，但因為今晚要開會，所以冇得去，如果情況再差就明天去睇啦。 一早攪埋亞姐比我d文件，其實佢冇講低架，只係放係我個tray度，跟住又冇講喎，到我整其他野的時候，佢就話要整左佢果d先喎，跟住我話我整好架啦，佢話副會長會果d都未整，跟住我話﹕我冇資料喎，佢先同我講放左係我個tray度好耐啦喎。擺明陰我姐。 整好佢果d都差不多食飯啦，因為要print d彩色圖，亞姐又等唔切，所以只佢3份佢佢就走左，但其實佢又冇講佢自己幾時走，我都唔知佢等我架。連會計都唔知發生咩事。 食完飯，我繼續print我d圖，但因為我地4:30要開會啦，我print唔切咁多份，3:15就走人啦。去到中總，又係d老人家聚會的地方，竟然開會的地方後面係廚房同廁所，真係攪笑呀，不過冇辦法啦，因為係我地榮譽顧問book，所以個個都冇問過。 4:30-5:00開PR MEETING，郭生一味吹水，都唔係開會，一路講要攪好我地果D知名度，又話要比傳媒多D人知道我地會，又話要攪茶聚，又話要主動發放資料比傳媒，真係比佢激死呀。因為我地今次MEETING的主要目的係傾3月果期的季刊，咩都有講過，一味講自己有D咩好，一味講要點攪。全部其他要傾果D野都冇講過，我提佢的時候，佢竟然話不如下次再約出黎傾啦，我就話時間唔夠啦，因為2月份返黎就要出信比D嘉賓架啦，如果仲未定係好難係3月尾出到本書架喎。佢又話得架啦，冇問題架啦。就係咁吹左45分鐘，咩都冇結果。 到5:15-7:00就係開執委會，D老闆好興一日裡面開晒D會，又唔知會做死人喎。開會期間我就出左去睇下佢地夜晚食飯D野SET好未，因為今晚係榮譽顧問請食飯，D坐位同SETTING要攪好好睇睇。當返去開會坐低的時候，冇那那郭生就叫我寫低我地開會的MAIN POINT，我想講其實係冇POINT，只得一個，吹水2個字。不過我最後都寫左3個所謂的POINT比佢，跟住又叫我寫低會長講果D野，又叫我匯報下季刊的情況，其實明明係佢負責，之前已經提左佢，佢又話唔知係邊果份野，又要我講，真係呀。 開完會之後，就係食飯時間，例遲D人，所以由7:15話開始，攪到7:45先開始。仲要係有D人未到喎。跟住我安頓好佢地之後我就坐低食同影下相，原來每圍要5500蚊架，但我同會計都覺得唔值5000，因為都係果D例牌野。食完飯就等會長簽埋D支票就走啦。因為全晚不停咳，真係咳死咁濟。返到屋企食左粒幸福就訓了。

>>January 25, 2006 at 4:07:16 AM GMT+8

2006 年 1 月 21 日 星期六 【晴】

■■■	凍到死的親近主+團年飯	■■■
星期日約左早上去朱記親近主，因為麗香幫我地預備左團年飯比賽的布甸，所以我約左佢係大牛等，整好後再去朱記，當係地鐵站的時候，比我見到曉琳喎，咁我就知佢唔知約係邊度等啦，又去左大牛，佢連時間都唔知喎，仲話要搭地鐵過去tim，但果時只係10:00鐘，我地約左10:30係地鐵站等。咁我就叫埋佢去大牛啦，一齊整埋先過去。 係大牛離開的時間剛剛是10:20分，去到地鐵站係10:45，大妹姐打電話話我知冇人喎。咁我就話等多一陣就見到我地啦。當齊人的時候，大妹姐竟然話去食早餐喎，冇那那走去食早餐，但其實只得大妹姐同雅婷未食，慧珊就買左野食，但大妹姐話有好多時間喎，所以又係等佢地食埋早餐先去朱記。所以攪到親近主的時間得番1小時。 當唱完詩歌之後，突然覺得好凍，當相交的時候，個個都係圍埋一齊，跟住相交後就即刻走啦，因為我地要番大牛參加第四家族的團年飯。 下午的團年飯比賽，我地果團的彩虹般的布甸梗係拎獎啦。有惠儀仔同雅婷不停的吹水，吹到個木槺布甸好似食左會感受到彩虹般的情愛咁。哈哈。再加上我地擦晒鞋咁落力推銷5大要素，梗係拎獎啦。 食左小小就唔想再食，可能全部都係飯、麵、烏冬，全部都係飽肚的。再食埋布甸，FULL晒。當玩遊戲的時候，我就要落力咁填申請CAMP SITE的FORM，填完送曉琳走，當回來的時候，遊戲已差不多玩完了。 玩完遊戲就玩寶寶，將全部旺旺放入GUCCI袋度，又幫佢細佬改名，細佬叫麥旋風，妹妹叫麥提莎，真攪笑呀。之後我就去剪頭髮啦。

>>January 24, 2006 at 9:58:16 AM GMT+8

2006 年 1 月 19 日 星期四 【晴】

■■■	去配眼鏡	■■■
星期三去了配眼鏡，因為幅眼鏡框已經花左又甩色，再加上覺得睇得唔係好清楚，所以去配過。 之前其實已經係鑽石山果間野睇中左一幅，佢寫話298一幅連鏡，咁抵配下都抵啦。果日再去睇啦，又比我睇中另一幅仲靚架，咁米諗住配啦，咁個sales就話啦，好平架咋，配啦。咁我就話我好深近視架喎，咁個sales就話咁可能要配玻璃喎，睇下同check下先啦。 一check之下，因為我近視成700度，散光又有250度，咁個sales就話，小組你近視好深喎，一定要配玻璃啦，散光又過左250度，要另外特別訂造，所以又要加錢呀，而家我地有個plan，連框一幅618，但你散光過左250度，每隻再加100蚊，咁即係818啦。我即刻話﹕下...唔係掛298變818 呀，我冇諗住咁貴喎。咁果個sales係女仔黎架，就不停話冇辦法啦小姐，你近視深呀，又有散光又深，咁要特別製架。果一刻我就諗唔配啦，但我又望到另外有一個plan係418，咁我又問個小姐418個plan你冇講架喎。果個小姐就話﹕418唔"琝A架，係普通鏡黎架咋。好厚架。咁我就問佢厚幾多呀，超薄又薄幾多呀。果個女仔sales可能係近黎，唔識，所以叫左另一個男仔黎。咁果個男仔sales就話﹕418係超薄，我就話﹕一個就話係普通，一個就話係超薄，邊個"琝r。咁果個男仔就話﹕個女仔新黎架，唔係好識，418係超薄，618係特薄，聽完我真係覺得比人玩咁。咁我最後都係配左，最後價錢係618，都幾貴呀，但因為我近視加深左，冇計啦。 當驗眼的時候，又比個驗光師玩死呀。對答如下﹕ 他﹕你讀下第2行黎聽下 我﹕5...跟住睇唔到 他﹕睇唔到(好誇張咁講)，你應該話睇唔清楚，睇唔到就好緊要啦，你試下讀啦 我﹕5.....跟住好似6或者9 他﹕都好，不過係8羅 我﹕.................. 他﹕你睇下紅色清楚d還是綠色清楚d 我﹕你講紅色同綠色d顏色呀 他﹕我係講d數字呀，數字呀，數字，明唔明(重覆又重覆咁講) 我﹕明呀，d字呀麻，紅色啦 他﹕我係講d字呀，紅色呀，咁係咩字呀 我﹕3同4呀麻 他﹕你真係明白喎 我﹕...................... 他﹕試下望下出去，係米清楚d，有冇浮下浮下咁 我﹕係喎，好清楚喎 他﹕咁梗係啦，你唔覺你而家果幅睇得唔清楚架咩，你加深左50度呀，你楂車架 我﹕唔係呀，我都唔識 他﹕咁冇理由到咁大，近視仲加深架喎 我﹕.......................

>>January 24, 2006 at 4:53:39 AM GMT+8