2006 年 5 月 2 日 星期二 【晴】

■■■	多謝主提醒的祈禱會	■■■
星期二的祈禱會，志明哥查腓比書，當中所講的正正是我心的問題。也多謝主透過志明哥同星期三的etc課程令我更加明白。 星期三的etc課程中，兆良講左個故事﹕有一次某弟兄同大個的有爭執，大家都持有大家都認同的理道，某弟兄心裡好唔服氣，就走去同長老講，長老只講左一句﹕年幼的要聽從長年的。果一刻某弟兄因為要聽年老講，所以佢就忍住佢。之後再有一次機會，某弟兄終於發現同捉到那大個的痛腳，那那林去告發比長老知，話佢做得唔好，某弟兄原本諗住長老一定幫佢出口氣，點知長老又只係講左一句﹕那與你何干? 我不是講我去告發某人或者針對某人，但有時大家做法係會唔同，有時大家的焦點係會有不同，有時大家都覺得自己所諗的係最好，有時大家都會各執一詞，有時心裡更加會受仇敵的欺騙，有時心裡都會有驕傲的時候。 好記得兆良哥講﹕聖經中雅歌形容佳偶的背好像麥子一樣，佢話當麥穗成長時，會好直，但當有麥子時，會越來越彎，因為麥子會越來越重，當麥子成熟時，會更加彎。也正正等於我地事奉的心境--當人越來越成熟時，也當越來越謙卑。 尋日etc時，我看見一件小事--見到惠康哥哥幫兆良哥夾mic，跟住做左ok手勢比佢，話佢知ok啦。越成熟時可能最想有人服侍你，但原來在事奉中，你卻是越付出，就算單單做小事，你都要謙卑的去做，好似主一樣幫門徒洗腳。 星期二的祈禱會，志明哥講，就算人人都覺得佢咁講係愚蠢，但因著神佢都會照講，因為佢唔想有什麼野難阻神的工作，這是末世末時，我地要謹慎行事、儆醒禱告。仇敵唔驚我地聚會，但最驚我地同心合意的做每一件事，應當以基督的心為心，當你做每樣事情個出發點都係為主時，就唔會單顧自己的事，也不會比較。 這兩晚都為自己去祈禱，求主使自己降服在主同十字架底下。

>>May 4, 2006 at 2:46:16 AM GMT+8

2006 年 4 月 30 日 星期日 【晴】

■■■	撞見中學同學	■■■
5月1日原本話同d舊同事去踩單車，但因為覺得好似果2日放假都冇陪亞媽，再加上黎緊星期日又同亞媽去旅行，為左再打好關係，所以5月1日同左屋企人去飲茶。唔知點解家姐好似好唔想去咁，成日問係亞爸話去架，如果係我唔去架。不過因為係我叫亞媽去的，所以家姐都去。但就冇同亞爸講野喎，又唔知發生咩事。我都少理好D， 如果唔係家姐發火，我就真係驚啦。 飲飲下茶，竟然比我見到我的中學同學，佢塊面同以前係一模一樣。但下身就肥得緊要，再加上佢D衣著，比我覺得佢應該係一個師奶。果然比我估中，因為佢已經有一個9歲大的女啦。我果一刻真係嚇一跳呀，佢老公好似好老咁，而個女竟然已經9歲，我望住，又望下我。真係難以想像呀。因為我果日仲著住件卡通公仔衫，仲同屋企飲茶，好似十幾年冇變咁。哈哈。 對於我來講，佢好似仲好以果時咁的樣子，但原來已經變成師奶一名。而我......仍然係一個細路女咁，仲同屋企人一齊行街、飲茶。

>>May 3, 2006 at 10:09:06 AM GMT+8

2006 年 4 月 29 日 星期六 【晴】

■■■	科大親近主	■■■
我地約左10:30係科大門口等。我已經係10:10去到小巴站，但等到10:30先有車喎，我一次唔係觀塘上車，我會轉去坑口搭車架啦。 去到巴士站先知婷婷、司徒同麗香已經入左去，但麗香又唔記得左倩惠喎，果一刻佢先起身咋。咁我同sindy米自已入去羅。大妹姐負責等雅婷同惠儀仔。 我地一齊睇路加福音--主耶穌受試探。當中我叫佢地諗下主降生成為人為你、為我受試探。另外就係諗下宇宙七奇中，邊樣最令你希奇。點知佢地個個都話以為我講最奇怪。 當相交的時候，感謝主呀，佢地都ok喎。最攪笑的麗香講要慶祝d重要人物就會有紀念日啦，例如孫中山同老夫子。笑死我地呀。老夫子都要慶祝，咁大番薯梗加要慶祝啦。 相交完就食飯lu。今次有大大碟的炒野，真係抵呀。之後就開始無聊的玩意。不過好彩有東雄係度，佢建議我地去健身室喎。真係咁大個人都冇去過科大的健身室，幾好喎，有得玩我之前去gym玩過的器械，又有種衝動去玩gym，不過諗諗下都係如果要玩就入科大玩就仲花算。因為科大的係免費架嘛。

>>May 3, 2006 at 9:20:28 AM GMT+8

2006 年 4 月 28 日 星期五 【晴】

■■■	令人失望的家團聚會	■■■
其實每次預備星期六的家團聚會，都會預備好多野，同用好多時間。每次諗唔到野的時候，但會祈禱，又或者諗下佢地的近況，佢地的需要而再去思想。今次的星期六聚會也不例外，但卻令我真的有點失望。 其實我真係好想講比大家知，要學下尊重分享的姊妹，雖則講的不是什麼大道理，什麼新野，每次都係講主耶穌，每次都係咁的聚會，但如果換轉角色，當你嘗試做分享果個，我不停同人傾計，又或者自己攪自己野，你會怎樣? 你可知道每次的預備都用去不少時間同精力，也會令分享者緊張自己講的是否令人明白。但原來我的擔心只係我自己的擔心，因為大家都不在狀態，又或者你有你講，我有我講。雖說大家都是一家人，但我想這一點大家都會學懂。 果日真係令我唔多開心。但在擘餅的時候，我看見枱上的餅係一的，我只怪我少為聚會祈禱吧。

>>May 1, 2006 at 11:21:47 AM GMT+8

2006 年 4 月 24 日 星期一 【晴】

■■■	感恩事項	■■■
致﹕各同走天路的好姊妹、好弟兄 我已成功地邀請了我媽媽參加5月7日沙田家的成人家預工旅行。我真的感謝主聽我的祈禱。其實之前我沒有想到她會一口的答允，因為之前每次邀約她去任何的預工旅行，她會有不同的理由拒絕(要返工、腰骨痛、唔舒服等等)令我覺得她今次會去的機會率不大。 當我於4月份知道沙田成人家將會有預工的時候，因著甜美日程的影響，我每晚臨訓前除了感謝主外，都會提名為我家人祈禱，為他們的需要，為他們信主祈禱。今次真係經歷神的實在。當我開口邀請媽媽的時候，她竟然一口的答允，仲比我踴躍地要知道行程安排等等，因為她說有好些地方她並沒有去過。也有問我好多資料。果一刻我真係開心到不得了。因為我多次的邀請都不成功，竟然今次能約到媽媽去旅行，真係多謝主呀。 回想當中，主真係不斷的開路和出手，由我媽媽要星期日要返工，到4月她要更改返工時間，而導致星期日不用返工。我真係體會我所信的是活生生可經歷的救主。 我期望能得到你地代禱紀念，求主祝福當日的天氣、交通，(現時已full 了2架旅遊巴)。求主使一切安排都係妥當。祝福我媽媽，求主使她之前/當日都唔好生病，或者唔舒服，又或者用不同的理由唔參加。求主使當日有合適的b/s去接觸我媽媽。另外，慧英也邀請了爸、媽參加。求主使我們一同大大經歷祂。 by the way, 我媽媽的名字叫﹕麥浣霞 主內極需要你們代禱紀念的 琳琳

>>April 28, 2006 at 2:16:06 AM GMT+8

2006 年 4 月 22 日 星期六 【晴】

■■■	蒲台島環島一天遊	■■■
星期天去了蒲台島環島一天遊，唔好以為我去玩呀，係返工架。因為今次同左另外3個商會一齊攪，人數共有90人，屬最多的一次，我唔想仲有下次咁多人的活動，因為人太多，要控制實在太難。淨係安排遊艇都煩死，叫某老闆出船，佢又話自己的太慢，其實因為油太貴啦，所以唔願意出船。唔想叫另一老闆出船，佢就死要面話要出，因為佢隻太細啦，但最後我地因為人多，所以安排左4隻船一齊出發。 集合地點係皇后碼頭，因為我地隻大船泊唔到係銅鑼灣d淺水區，所以全部改晒係皇后碼頭。我地約係9:00集合，9:15準時出發，所以我約左亞姐8:00係中環等，原本諗住食早餐，但最後大家都遲左，所以改左買個包食，去到碼頭8:30，坐左一陣竟然就有老闆到啦，真係估唔到人地會d人咁準時到。之後就安排我地的工作，要貼label啦，原本要分帽同雨衣，但最後都冇做到，因為人已經陸續多啦。 當差不多到齊之後就上船啦，我有幸地能坐到大船，隻船係我見過老闆船最大的一隻，真係好似間屋咁，有廳、有廚房、有飯枱、下面仲有5間房tim。普通一隻船都係2間房，連會長都話佢隻船大。 差不多去到碼頭的時候，我覺得我對住的唔係一班老闆，而係一班小朋友。 1. 我要提佢地去定洗手間，因為去到蒲台島的地方環境比較差 2. 我要提佢地帶帽啦、帶遮、帶水啦 3. 我又要提佢地搽定太陽油啦 4. 我又要講比佢地知一陣間的路線、唔好帶太多無謂野啦 但係lee 班老闆就冇d小朋友咁聽話，叫佢地做的野就冇做，但之後又話要喎 1. 上到岸就話要帽、要水 2. 上到岸又話冇太陽油 3. 行左一陣就話唔行啦 起初行大家都ok啦，跟住再行，就有老闆頂唔住啦，去到個亭度休息的時候，竟然話要暈，嚇死呀。跟住就話我有冇帶雪梨呀，大佬，你估我開士多咩，雪梨都有帶，跟住又問我有冇帶白花油呀，lee樣我有帶，可想而知我個袋有幾多帶呀。 因為有人行得慢，所以我做最尾的果個，同亞姐帶頭的竟然相差成半小時的路，最大年紀的有70幾歲，最小的有3歲，真係辛苦呀我地，因為年紀大又驚佢有事，年紀小的就擔心佢地會跌親。回程的時候就出事啦。因為d老闆唔聽話 1. 叫左某老闆唔好舉咁高去影相，雖說自己係攝影發燒友，但年紀唔細啦，仲舉咁高，一跌落黎就撞到個頭，流血多到嚇死你。因為我要照顧另一個抽筋的亞太，所以行先，最後我又要用9秒9的速度拎埋d紅藥水跑去事發地方，其實唔知相距有幾遠架，只係一路跑，一路見到人就問有幾遠，個個都係答我繼續跑啦。差不多跑左300米就見到佢地啦。原本話安排隻船載佢番碼頭先，佢又唔肯，話自己冇事。但最後又話要暈、又要嘔，所以都係安排隻船載佢番碼頭，送佢番屋企，叫埋家庭醫生先走得，不過lee個就交比另一商會的男同事做lu。 2. 一個亞太都叫佢唔好拎咁多野架啦，竟然個背包裡面有3套衫褲(老公、佢同小朋友)，3對鞋、又有3條毛巾，又有3欂水、2把遮。嚇死人呀。所以回程的時候，佢就腳抽筋啦。又問我有冇按摩高，大佬﹕我重申我唔係士多。 安排d人上船後就去南丫島食海鮮，真係正呀，可能消耗不少，所以食得都幾多，食飽飽又再上船回程啦。原本話如果仲有人想玩，可以繼續，但最後大家都係選擇回家休息。 我返到屋企都差不多半死呀，飲左2碗湯，1杯水，沖埋涼，8:30就上床訓啦。真係好疲倦，連對腳都好酸痛呀。救命呀，明天仲要開會，又要著對高~Z鞋，辛苦死啦。

>>April 27, 2006 at 4:46:36 AM GMT+8

2006 年 4 月 17 日 星期一 【晴】

■■■	科大親近主	■■■
星期一約了F.5的姊妹去科大親近主，所以又一早出了門口，但因為日日都咁早出門口，攪到我都好疲倦。原本諗住食早餐，但唔知點解變左行去觀塘喎，咁惟有諗住行去觀塘食早餐啦，點知又唔夠時間喎，因為約左10:45係科大等。咁惟有最後變左買個包啦。去到小巴站已經10:25啦，點知一等竟然等到10:55先有車。不過我知點解要我等咁耐，因為我可以等埋芬芬，佢大約10:50到小巴站，咁10:55就有車，所以擺到明係主安排我等埋佢啦。 入到科大，已見碧茹同雅婷，但未見慧珊，其實我唔係好明，10:00起左身的慧珊，竟然等到佢11:20先到，足足遲左半個鐘，最後去到平時親近主的個亭都已經12:00啦。唱下詩歌，親近下主都差不多12:45，又接到少媚話黎喎，個個都唔知點用時間，如果考試就一定唔會遲啦。最後我地決定去食野先，跟住等埋少媚去相交同祈禱。 在祈禱前的相交，雖然天氣凍凍地，但雅婷的相交又幾感動喎，如果佢真能持續落去咁愛主，我想他日佢一定成為有質有量的家團長。不過就唔可以成日話小可、小可咁啦。如果真係比我搵到個吹氣公仔，我一定會送比雅婷。唔知有冇人知係邊度有得買呢?哈哈。 相交完祈禱完，其實我已經疲倦都死呀，個頭又痛，個人直頭虛脫。唔係講笑呀，我真係要休息下先得，前幾日冇得好好休息，日日都咁早起身，又走黎走去，真係疲倦架我。 最後返到屋企都已經半死咁，快D上床休息下，食完飯就訓LU。咁就過左我4日的假期LU。

>>April 19, 2006 at 7:33:25 AM GMT+8

2006 年 4 月 16 日 星期日 【晴】

■■■	大牛camp	■■■
第２朝起身，又要預備落大牛啦，因為約左12:45一齊親近主，其實有時我想就算得1個人陪我親近主都好好架啦，更何況今日有幾個姊妹落到黎，佢地仲要係F.5架喎。心裡更寶貴同欣賞佢地。 親近主的時候，我再望出窗口外，再想起昨日特會中，有一姊妹的相交，她與主x漱漇慜滌囮@，想起佢就想起自己，以往都好以為睇聖經要好長時間先有得著，又或者唱詩歌係叫WARM UP，但反而越時間越少感受，好似冇得著咁，但往往自己又唔甘心冇得著，跟住我就會覺得係自己做錯啦，或者自己太疲倦啦，所以冇感受，但原來我的方法係錯，我自以為係方法的方法又係錯，今日我已與主聯合，我係主的，主難度會唔理我嗎? 當我親近主舉手同跳躍時，我體會與神的關係好左，感受神多左，就算只係默想宇宙七奇之一，已經令我十分希奇，也已令我好甜甘，並不需要太克意要迫自己睇聖經才可以有得著。 擘餅中當唱我所得的實在太美好時，我真係能跳起，以往真係好介意別人的眼光，但今日我知道我的對象是主，難度見到情人時，心裡唔應該高興同歡呼嗎?真係唔同，真的感受不同，大家不妨試試。 擘餅後的遊戲實在太好玩啦，尤其係大電視，估唔到敏萍姐扮演全身抽筋做到好似鬼上身咁，跟住的驚天動地又係好似全身抽筋咁，幾驚要驅魔呀。哈哈。而倩惠的演出又係另一傑作，佢做"敏"臭腳直頭似到十足十呀。之後玩"咁係麻，咁容易"，主持人問當你見到主時，你會講咩呢?倩惠又一傑作，佢竟然話﹕讓我們擁抱吧! 笑死我地呀，我地話如果係主，佢應該答﹕來吧! 玩完d遊戲都已經疲倦到死呀。 晚上的相交，都幾好呀，起碼個個都講到野，倩盈喊住的相交，雅婷的體會，妍妍的相交，都令我難忘。相交完後其實都已經12:00，係時候要走啦，多謝啟賢車(的士)我地返屋企。 第2朝一早又起身啦，又去泥涌親近主+BBQ，搭車的時候係最嘈的，落車又係最嘈。最攪笑的係倩惠，佢已經破壞晒佢高貴的形象，2隻手那住隻雞翼咬，食到個咀好污漕，又成日講屎，跟住當我地回程的時候，因為我地行最尾，我地已經講如果有小巴就要追小巴架啦，倩惠果一刻就話，下個小巴站咁遠，點追呀，如果要追我一定跑得好慢，又因為佢著住對高跟涼鞋，所以佢話佢一定跌係街啦，點知一講完就有車，我地見前面d人已經追車架喎，咁就叫倩惠跑啦，佢即刻就叫啟賢唔好阻住佢追車，好大聲咁叫﹕唔好阻住我呀，我要追車呀。好似個大陸人咁，好攪笑。 上到車，倩惠就坐最前，我地坐最後，其實全車都聽到我地講野架，最攪笑的對話開始﹕ 婷婷﹕我冇錢tim 倩惠﹕我有，我入左6蚊先 婷婷﹕呀，我搵到啦，我都有 倩惠﹕我入左啦，我有6蚊喎 婷婷﹕我入啦，唔洗啦 倩惠﹕我入左6蚊啦，咁點呀，你要唔要呀 司機﹕不如你坐低先啦 倩惠﹕我入左6蚊啦(仲企係度喎) 我地﹕倩惠，你快d坐低先啦 我問﹕倩惠你都跑得好快喎 倩惠﹕係呀，我著對高~Z鞋係跑得快d架 我話﹕下，咁不如你PE堂換對高~Z鞋啦 倩惠﹕好呀，如果運動會有高~Z鞋跑步比賽，我估我一定第一呀 我地﹕笑到肚痛 坐坐下，我問美蘭姐 我問﹕究竟我地係邊度落車 美蘭姐﹕下我唔知喎 我話﹕下咁點算呀 美蘭姐﹕係馬鞍山巿中心落羅 倩盈﹕下，乜唔係沙田落咩 美蘭姐﹕下，架車只去馬鞍山架咋喎，點去沙田呀 我話﹕我想係藍田落呀，得唔得呀 倩盈﹕得，你叫司機羅 慧英﹕前面有架89D喎 司機﹕(我估佢係留意我地講話)，佢竟然話﹕係咪要追前面架89D呀，咁要快D喎。 我地﹕唔係，唔洗 跟住再問路比啦 我地﹕路比，究竟我地係邊度落車呀 路比﹕下，乜你唔知咩 我地﹕你知呀 路比﹕其實我都唔知喎 美蘭姐最後問司機，話我地想係馬鞍山巿中心落車，司機話得啦，前2個站都可以落啦 倩惠又再發言啦，佢竟然話要係馬鞍山巿中心個中心落車喎。 我地全部都笑到死呀。 跟住佢又話﹕亞媽叫我係度落車跟住搵佢喎，咁即係係邊度落車呀。 最後有個乘客終於忍唔住搭咀，叫我地係下個站落車，跟住行入去商場就見啦。 全程都笑到死咁濟。多得倩惠唔少呀。

>>April 19, 2006 at 4:07:32 AM GMT+8

2006 年 4 月 13 日 星期四 【颳風】

■■■	特會	■■■
星期四的特會，其實已經一早同亞姐講我想準時放工架啦，但係亞姐竟然話，你估可以咩?起初我都覺得可以架，但點知，一個打電話黎話cancel，一個打電話黎話改機，一個又叫我地幫佢再book多2晚酒店，其實原本都好快攪掂，但唔知點解台灣果邊d酒店全full，想book果間又冇，想book另一間又貴到嘔，竟然一晚酒店要2240港幣，係普通的標準房咋，貴到嚇死人呀，不過d老闆有錢，有機票，冇酒店都冇辦法，迫住要住啦。 之後我忡有本團刊未整，所以果晚攪到成8:30先走人，冇左一晚的特會啦。 14/4特會 一早起身已經9:50，嚇死，第一時間諗究竟幾點等，但我竟然諗唔到喎，所以都係打比慧英，叫佢留番個位比我，我11:00先到。 早上特會 經歷比我們更confirm聖經的話 可能周圍的人，令你覺得你所做的是徒然無功 但你卻要透過默想，去改變你的想法 怎樣保守心思 要每天想最榮耀的事，才能有推動力去追求神 當有唔好的意念時，要cut，快d cut 下午特會 衝擊心靈的可能只係一件芝麻綠豆的小事，又或者只係一個無謂的意念，就可能令你失去堅持，又或者令你改變意志去做左另一件事。但其實主沒有一刻的不愛你。不是只係教會中才能做神的兒女，你要想到永恒中有人一直想念你，分分鐘需要你。要將心歸主，主24小時都與我們同在，我們今日不只得我一人生活，是與主聯合，你有冇真的感覺主與你一齊生活嗎? 志光--向主歌唱、歡呼 今日己經有一條得勝的路指引給你我，就決定我究竟行唔行。 返到屋企，由於家姐去左旅行，得我一個係床上望出窗口的時候，我求主比我知道甜美日程的寶貴，如果當我真係操練的時候，我求主比我經歷同感受到真係好唔同，而使我能繼續持久下去。

>>April 18, 2006 at 10:06:52 AM GMT+8

2006 年 4 月 11 日 星期二 【晴】

■■■	彷彿做左旅行社咁	■■■
4月頭終於定到個台灣團，日期由原本的19-20，改為18-19號，即係假期後即去，所以要係13/4前攪好晒d野。由問d人去唔去，到今日為止，竟然都有人話去，每日聽到有人話去，我都唔係好想接，因為實在有好多野跟住要做，(團刊、機票、酒店)全包服務，仲要係d老闆好乖咁答晒d問題喎。 由於去台灣唔係係人都去到，又要問佢之前有冇去過啦，又要問佢個passport個出生地寫邊度啦，因為如果係香港/澳門就冇問題，但如果係中國出生，就一定要去過台灣啦。又要問佢之前個入台証有冇係手啦，要正本喎。一連串的問題，不停問。問完啦，又要佢填form啦，又要比資料我地做團刊。幾忙碌呀。 我負責幫佢地攪晒d野，一手包辦，所以每日都要祈禱，求主幫助同使我做的工作順順利利，因為我真係唔想放假仲要返工呀，因為亞姐話如果趕唔切就要返黎做啦。所以我又要求主比我有快手筆，使我能做得快而準。但d老闆每次都玩我咁，一時又話要改航班，一時又話要改坐商務，一係就話由商務改番坐經濟，一係就話要改時間，個團得16人，但已經有4班唔同時間的人去台灣，當講酒店的時候，一個就要book多2日，一個就住另一間，一個就之前住第2間，果日又住第2間。玩咩。 由於有唔同時間d人去台灣，所以又要搵車去接，一個就係機場接，一個就係台灣某度接，真係5花百門。 今日仲攪野係個老闆的passport過左期喎，唔夠半年有效期，不過感謝主的係，我之前叫佢秘書幫佢做左簽証先，所以佢係上網果度做左簽証先，咁佢今日call我話我知佢老闆做唔到，因為佢個passport過左期喎，嚇死我呀，因為已經幫佢book好晒d機票同酒店，佢仲要係坐商務架tim，但我只係幫佢check佢之前有冇去台灣果d，冇幫佢check passport有效期，果時即刻又幫佢去問BNO果邊，又問下人係米有資料啦，邊度有得問啦。最後叫個老闆自己去領事館果邊去攪快証，睇下佢得唔得。

>>April 12, 2006 at 10:49:14 AM GMT+8