2005 年 12 月 18 日 星期日 【晴】

■■■	提早做冬	■■■
由於22號我就飛啦，所以亞媽提早做冬，咁q阿姨又打比問我地幾時做節喎，而我地2個表弟又剛剛係英國回來，所以星期日全部阿姨同舅父上晒黎我屋企，總共有22人咁多，由於媽媽已經好耐冇煮大獲飯啦，所以佢唔記得煮幾多飯，當齊人食飯的時候，竟然食晒飯煲裡d飯，要再煮，跟住d送，全部食晒，但由於得冇再煮，所以就連湯渣都食埋，個個好似10年未食飯咁，我2個表弟就更加啦，1個人食左2個大碗飯，枱面d送全部掃晒，跟住飲2碗湯，都話未夠。嚇死人呀。 之後就開始整湯圓啦，又由於媽媽唔夠粉，所以每人得4粒湯圓，又係唔夠分，但佢地又食晒，今次食飯真係好驚呀。我仲諗住帶飯tim，但唔洗啦，因為一粒米都冇呀。

>>December 20, 2005 at 10:21:55 AM GMT+8

2005 年 12 月 18 日 星期日 【晴】

■■■	第3家族玩遊戲	■■■
星期六，第3家族一齊玩遊戲，起初只見2-3人坐低，以為氣氛麻麻地啦。但當我地join埋之後，氣氛較好。遊戲玩左2個，一係個估歌仔，但由於我地果組叫win硬隊，有子誠、少薇姐、大妹姐等高人係度，我地叫左雅婷、惠儀仔同妍妍去答問題，原來佢d歌大部份都係亞薩d歌，所以好多一估就估到。而第3組d人，大部份都未聽過，所以得0分，最後的那一題係我地同第1組之爭，當佢播那首歌的時候，我即係知道係每天親近主或者叫每天親近你，因為那首係我第1首學的歌，我地估估下都比我地估中，真係win硬呀。 第2個遊戲係演話劇，我地3組分別寫左7個人物同地點，原本諗住比人地做，所以寫迪士尼果d野，但最後竟然比番自己組做，仲要係大悲劇，我地簡稱係史上一大大悲劇。故事講﹕有一日小碧同司徒去迪士尼，一心一意諗住見下白雪公主、巴斯光年同米奇老鼠，但點知去到竟然見到佢地逃亡，因為佢地工作超時，人工又少，白雪公主又走晒樣，變左黑雪公主，當佢地逃亡諗住去長洲的時候，途經灣仔地區的時候，竟然遇到反世貿人士示威，由於言語不通，所以佢地比人推左落海，係lee個時候，子誠哥哥一家竟然路過喎，見到佢地跌左落海，就抛左個水泡比佢地，點知個水泡穿左，佢地最後死晒。真係史上一大悲劇呀。

>>December 20, 2005 at 10:15:10 AM GMT+8

2005 年 12 月 18 日 星期日 【晴】

■■■	執行李	■■■
尋日提早返屋企，1因為夜晚做冬，叫晒d阿姨黎食飯，2.我要執下我d行李，因為19同21都要開會，我其實21號係唔洗去做接待架，但亞姐話要我做埋個接待，因為會計唔識國語，佢又要攪其他野，最好就叫人地21號黎，我去接待，咁咪好羅。就係咁lee個星期都好忙架。 所以尋日諗住早d返屋企執下d夏天衫，因為家姐已經將佢放晒入床下底，我要拎番出黎係好好好麻煩的，我已經諗住要攪好耐。當我返到屋企的時候，竟然見到我細佬訓左係床度，咁我即係執唔到啦，咁我就諗不如睇下個櫃家姐留左幾多件短袖衫啦。當我一搵就比我搵到6件短袖衫，剛剛就係我要帶去的衫數量，起初我諗住帶d好樣果d衫啦，但記得果時去著得越好，比人打劫的機會率會越高，再加上著衫姐，都冇所謂啦，又免卻我打開個床下底去執衫，我一執又會比家姐話我架啦，所以我就算啦，原本諗住帶番d薄d的褲，但又係係床下底，所以最後帶3條牛仔褲去，如果個行李箱放不下，就再抽番d出黎，因為我有1大袋物資要帶過去呀。 但由於我地要自己搭車去安邦，由新加坡去馬來西亞的新山，跟住再搭車去吉隆坡，之後再轉車去安邦聚會地方，基本上我地22號係全日搭車，搭飛機去到新加坡都已經大約下午3:00，之後再轉車，再轉車，再轉車，計算後去到安邦的時間係凌晨2:00，嚇死人呀。 前日開始我已經勁祈禱，求主保守及祝福，也免卻一切意外同疾病。

>>December 20, 2005 at 5:05:53 AM GMT+8

2005 年 12 月 15 日 星期四 【晴】

■■■	氣氛怪誕	■■■
自從與家姐吵大穫之後，佢lee幾日都係12:00先返屋企，跟住又一粒聲都冇講就訓覺，第2朝又一早起身自己返工，所以我都冇同佢講過野。 尋晚我早返屋企，返到屋企阿媽煮緊飯，又見4對筷子我就知家姐唔返黎食飯，由返到屋企到食飯的時候，全屋人都冇出過聲，氣氛怪得緊要，不過當食飯的時候，阿媽講番佢去睇演唱會d野，氣氛較為好d，不過大家都好似避談家姐件事。不過我知家姐佢自己有間屋，所以我唔擔心佢安全，但唔知佢會堅持幾耐姐。 由於我22號去旅行，所以阿媽話改係星期日做冬，唔知家姐果日會唔會返黎食飯呢? 沖涼的時候，我都再為lee件事祈禱，求主使大家心情平復，同相親相愛。

>>December 16, 2005 at 7:42:11 AM GMT+8

2005 年 12 月 13 日 星期二 【晴】

■■■	呆等姊妹	■■■
尋日問惠玲要唔要星期日出黎禮物比馬來西亞的b/s，但因為佢星期日唔得，所以改為尋晚去。但其實我又唔係好想尋晚去的，因為我實在太眼訓啦，前晚先同家姐嘈完，根本上冇覺好訓，所以尋日好冇精神，再加上我諗住星期六我拎左執事室果袋物資之後，星期日可以比到亞珮，但惠玲話佢約左志邦同亞珮都ok，而亞珮又想我去，所以我最後都去左。 由於亞珮話佢5:00可以走，又唔想等我太耐，所以我約佢6:30係旺角啦，佢仲話我知佢一個鐘就去到旺角架啦，叫我唔好遲喎，不過由於尋日亞姐冇返工，所以我那那林係6:15走人，去到旺角剛剛6:30。 但我企係約好的位置等，等到6:45都唔見人，就call佢啦，點知佢個電話飛落留言，咁我惟有留言啦，但打到7:00都冇人聽電話，等又等左半個鐘，咁惠玲又未放工喎，佢放7:00，黎到旺角都要8:00，而志邦又要遲黎，咁我惟有去睇左水壼先，跟住再CALL惠玲，話佢知，我好眼訓呀，等唔到亞珮，睇左水壼啦，好想返屋企訓呀。跟住惠玲答我﹕我好快就到架啦，你等下TIM啦，你自己行下先啦，亞珮朝早話我佢電話冇電呀。咁冇辦法啦，等下啦，好快架啦。 等到7:30，又問惠玲係邊，佢話係九龍城，好快架啦，估計7:50就到啦，又係咁又等左一陣，終於8:00等到惠玲啦，其實果一刻話佢知，我就死啦，由6:30等到7:00，又到7:30等到8:00，我早知就唔咁早出黎啦，好眼呀。其實我仲想話佢知﹕我好想而家返屋企呀。但因為見到佢咁趕，所以都係冇講，最後買左想買的2個水壼，跟住原本諗住去買小禮物，但原來旺角D野都好貴，所以最後都冇買到，改左比惠玲買，又諗住買禮物比曾太祖，但因為搵唔到心水，所以又冇買，果一刻亞珮就CALL黎，話佢自己有去到旺角，但因為佢臨時有事，所以大約6:55先到旺角，可能佢黎到我又剛剛走左，咁佢又行上去路面搵，但因為太多人啦，搵唔到，又搵唔到有人借個電比佢叉，佢又唔記得我地d電話，所以佢最後返左屋企。 我都好大量咁原諒左佢，之後同志邦食飯，原本佢都去馬來西亞架，但因為突然嫲嫲去世，所以去唔到，咁我地惟有安慰下佢啦，點知原來佢都冇事。 食飯食到10:00，我終於頂唔住話要走啦，返到屋企11:00，跟住沖涼訓覺，都差不多12:00啦。

>>December 14, 2005 at 4:49:41 AM GMT+8

2005 年 12 月 12 日 星期一 【乍雨乍晴】

■■■	到我同家姐吵大穫	■■■
尋晚返到屋企的時候，見到我件黑色大褸又比人拎左出黎，咁我就話﹕邊個拎左我件褸出黎呀。就係LEE句就同家姐開始左2小時的罵戰。 家姐佢一聽左LEE句之後，就叫亞媽唔洗熨，即刻話掛番入櫃，又話唔好叫佢亞媽熨，又話我唔比佢著褸，跟住又話自己要慳番D錢黎佢孝敬父母，又話自己好窮，但又要儲錢黎到碩士，又話我地要佢亞媽做野，明明可以退休，又要佢做多幾年。跟住又輪咀又話我每個月有成萬蚊人工，都只係比小小家用，佢自己有2萬幾蚊就要比咁多，又話上次食飯，5個人食800蚊一餐飯，佢都好肉痛，又話咁，又話咁。 跟住我見佢講到咁，我即刻反駁，洗唔洗分得咁開，你亞媽，我亞媽，如果我唔係你亞媽生的話，咁就唔該你收聲，又話大家都係一家人，一家人D媽都要分開，係你玩分化。又講到自己好偉大，唔該你啦，孝順，我唔見喎，次次都係你開戰先架，又話比幾多錢，又話自己窮，我諗你D鞋同D化妝品多到嚇死人，我買褸件件都係特價果時買架，你果D鞋對對都過千啦。再加上我唔係唔比你著我D褸，但你係咪應該問過我先呀，我唔係話唔借，但次次都著我果D褸，咁我著咩先，我開會就梗係著黑色褸，黎緊凍就係著白色果件羽裓啦，就係咁簡單。 跟住又到佢講啦，又話佢自己而家拎屋企人D野用都要申請呀，洗唔洗填表呀。又話自己一早要開起呀，因為佢自己勤力喎，又要讀書，又要改卷，所以咪早過我起身羅，我起身的時候，你仲訓緊覺，我唔好意思叫醒你問你借唔借得件褸黎著，你咪唔好借比我羅，又我凍死羅，因為我冇褸呀嘛，又話自己因為孝順，所以唔買褸，因為我見你有10幾20件褸，所以咪諗住借你一件半件都冇所謂羅。佢又話我喊原來講野可以大聲D，咁佢又喊喎。又話自己好辛苦架，年年都自己拎錢出黎請佢阿爸、阿媽飲茶，食飯，又話我地一蚊都冇比番佢，好似馮旨咁。今次問番你地比番小小錢，又要我講點解要500蚊，要唔要開單呀。 我話都冇野好講，1. 飲茶、食飯果D，係你原本話唔洗我地比，你今次問我地拎番，我冇問題，但係咪應該話我知點解要500蚊呀，細佬又唔係好多錢，佢今個月先剛剛出糧，佢又要做兄弟，你係咪要問下佢有冇錢先呀。尋日又問，今日又問，係咪等錢洗呀。咁你有冇顧及人地感受呀。我覺得你好有問題羅。2. 我D大褸都係得過2件，唔係10幾20件，有D係其他季節著的，另外果件係阿姨送的，你自己又唔係冇褸，係因為你買果D唔靚咋，你咪著我果D羅。3. 唔該你唔好再玩分化，你係屋企唔係話晒事架，比面色人地睇，你唔好當我地係你D學生啦。4. 我只不過想問清楚D數咋，我點知你點計出黎，我有冇比錢先，我有比喎，咁我了解番條數都有問題呀。 跟住阿爸，阿媽出聲啦，又話又為錢而嘈做乜，又唔係冇錢，次次都係咁。阿爸就話如果要夾錢請佢，佢就唔去啦，佢唔會再要我地D錢。阿媽就話家姐又講番幾10年前的事，錢係咪都用左啦，講咁多年做乜呀。 之後我地都理佢，佢自己又係度將D事重重複複講幾次，又話又係咁啦，冇人出聲啦，又冇人講野啦，又去訓覺啦，又話我地慣性唔出聲啦。係屋企冇溫暖呀，冇關係，冇感情呀。 我最後都冇理佢去沖涼，當沖涼的時候，我祈禱求主使我心裡的怒火能止息，求主幫我。當我沖完涼之後，阿爸、阿媽去左訓覺，細佬自己攪電腦，家姐又係自己坐係同佢男朋友講番整件事，佢一講竟然講到1:00，大大聲聲係度講，好似要講比我地聽咁，我明明係訓左都比嘈醒。不過我冇理會佢。 今朝佢出門口的時候，又大大聲聲咁講野，又好大力咁閂門，又嘈醒人。

>>December 13, 2005 at 7:15:04 AM GMT+8

2005 年 12 月 11 日 星期日 【晴】

■■■	外星人降落科大	■■■
特別報告﹕上星期日，12月11日，科大發現外星人，5名外星人降落地球，第1名外星人樣貌似男性，第2名外星人空降時失去平衡，差d跌倒，第3名外星人空降後突然攻擊途人，第4名外星人與地球人發生碰撞，第5名外星人小朋友竟然接受本台獨家訪問。 原來外星人來地球的目的是為左借廁所用，但由於溝通困難，出現左類似抗議世貿事件，有地球人為左難阻外星人抗議手法，而身受重傷。另外，紅腸妍為左研究外星人語，所以放棄了原本無乜興趣的會計，而轉讀外星人語，仲可以與外星人溝通，其目標係與貌似梁惠儀的外星人能用法文溝通。 本台獨家報導

>>December 13, 2005 at 3:50:00 AM GMT+8

2005 年 12 月 8 日 星期四 【乍雨乍晴】

■■■	睇燈飾	■■■
尋晚小組，我地去了尖沙咀睇燈飾，我大約6:30走人，但當走的時候，收到個壞消息，心裡為由默默地為姊妹祈禱。 去到尖沙咀，由於上年我地去果一度食飯，食得太耐，攪到冇時間去行，所以今年我地決定食麥記，快D食完，可以快D走人。由於下午並沒有食得太多野，我同麗香好似餓X咁，叫左好多野食，但最後當食完杯雪糕後就好飽了，麗香仲有個紅豆批TIM，好似我冇叫咋。 食完之後，我地就行啦，影得最多相的咁梗係大妹姐啦，佢行到邊影到邊，淨係個海運中心都影左OVER30張相(全部人)，大妹姐就更加另外再有單人相啦。 在此，要多謝麗香提供的笑話，其實佢唔知果D係笑話黎架，但當佢講野的時候，真係帶比人無限歡樂。影每一張相都會話﹕嘩...好靚呀。嘩...好靚呀，張相可以參賽呀。但其實係手震影到張相化晒咁，跟住我地話係呀，可以參賽呀，咁一定係落選果D啦。哈哈。 跟住行海旁的時候，我地又停留左大約20分鐘，只係為左影一張對面岸境，麗香果時又話去對面影好D喎。跟住我地就即刻話係呀，麗香不如你自己游出去影番我地啦。哈哈。 沿路行就沿路笑，因為麗香有頂兒童周刊送的聖誕帽，係AILEEN借比佢的，我地一路話頂帽可以著燈，麗香又信喎，仲問我點樣攪TIM，我之後仲話佢知其實你一戴頂帽，頂帽仲會有煙花TIM呀。哈哈。 去到尖東，AILEEN借左佢自己戴果頂帽比麗香戴，麗香一戴，我就好似畫家，但美蘭姐即刻話係年青的畫家，係未成名架，所以我地叫佢扮係街邊幫人畫畫。之後我地就幫佢影左張相睇相，麗香又係果句﹕嘩...好靚呀。但當佢幫AILEEN同師姐影之後，因為唔係太靚，所以麗香用左好平淡咁講﹕好靚呀。果一刻我地發現，麗香原來咩都會話靚架。 最後我地去到噴水池影最後一張大合照，當影完的時候，啟賢的相機就冇電，我地話係主安排，因為我地要回家了。 但我總結，尖沙咀的燈飾係唔靚的，如果係去不如去中環睇啦。

>>December 13, 2005 at 3:24:54 AM GMT+8

2005 年 12 月 7 日 星期三 【乍雨乍晴】

■■■	爸爸媽媽退休了	■■■
尋晚屋企大邊爐，打完邊爐，媽媽話要開家庭會議，原來佢公司有個肥雞餐計劃比就黎退休的人，媽媽佢如果做到60歲先退休，咁即係話佢仲有8年的時間，咁公司會計番比佢，如果佢應承，咁就有大約29萬拎番，但如果佢唔應承，咁就冇。咁媽媽就問我地意見。 當我計算後得知係唔花算架，因為佢係政府機構，所以公積金公司係同佢供多d，所以如果佢做多3年工作，咁就差不多有20萬的收入，比果計算少9萬。另外，就係媽媽自己都覺得突然唔做野，會冇左寄託，d時間唔知做咩好。阿爸就叫佢做多1-2年，因為爸爸係2007年就一定要退休，因為佢果時已經65歲。 家姐就贊成佢地2個都退休，因為根本上佢地唔需要辛苦，間屋已經供完，我地3個都已經有自己工作，佢地2個又有高血壓，又容易病，所以不如多d時間休息下，去下旅行，做下家務。原本都諗住請番個part-time家務員，如果阿媽退左休，咁佢就專做家務。又話阿媽辛苦，5:00起身洗衫，7:00出門口番工，5:30放工就去買送，又要煮飯，之後又要接衫，又要掃地，星期六、日都冇得休息。所以佢贊成退休。 咁我地最後結論係叫佢番去問清楚，如果計劃係1-2後先落實，因為而家係諮詢緊民意，如果大家都贊成，咁就要遞交委員會通過，要攪長時間，如果係1-2年後先實施，咁就問應承，但如果話係1-2個月後就實施，咁就再諗下。因為1-2個月又太急得濟，阿媽突然冇野做，我地驚佢仲有更多病痛出現，又冇人陪佢過d時間，我地又驚佢會悶死。 果一刻我係度諗，原來轉眼阿爸、阿媽都老啦，我真係把握時機，將福音傳比佢地。如果唔係我驚我後悔。之後訓覺的時候，我都默默地為家人去祈禱。

>>December 8, 2005 at 2:20:49 AM GMT+8

2005 年 12 月 6 日 星期二 【乍雨乍晴】

■■■	樂富格仔山祈禱	■■■
星期日上了樂富的格仔山祈禱，其實心裡有些抗拒，因為我唔係太鍾意上山，我較為喜歡下海多d，但感謝主呀，環境幾好呀，係大風d羅，因為天氣報告為得14度，但我竟然著得好少衫，所以好凍呀我。 上到山之後，由於我地行得太慢，所以要到11:00先到山頂，但又趕住係11:30祈禱，所以得番半個鐘去安靜，找個晒的位置坐下來，因為如果唔係晒住我，我估我會仲凍。當坐下來的時候，竟然比我望到獅子山，我那一刻唱了首歌，咁梗係唔係獅子山下啦，係我要向高山舉目，在冇雲的天空下，望著獅子山，又有風吹過，真係多麼舒暢。 感謝主用微風告訴我知，祂有多愛我 感謝主用高山告訴我知，祂的愛是永不改變 感謝主使我能享愛片刻的寧靜 好舒服咁去親近主，越來越寶貴咁樣去享愛祂愛的時刻。我也十分珍惜這小小的時光。 當差不多親近主時，我見幾個姐姐圍住個姊妹，咁我就知有個姊妹可能唔舒服，跟住見敦萍姐拎住小可妍果袋，咁我驚唔知係米佢有事呢?上山的時候，明明佢冇野架喎，跟住再望下麗香，佢只得同司徒一齊親近主，又唔見小可妍喎，嚇死我呀。但當行埋去望的時候，原來係明歡唔舒服，心裡放下大石，原來唔係小可妍。我都擔心其他b/s，不過擔心自己團果d都好正常呀。 當親近主後，我地就一齊祈禱，算起來，這次是我第一次join的聚會，因為整個11月都好忙，未能機會去認識其他b/s。今次多謝葉惠帶的遊戲，但因為人太少，又係戶外，所以難集中精神。當大妹姐分享的時候，其實我已經急急地，因為上山前冇去廁所，所以當大妹姐分享完後，我就同麗香同司徒佢地去廁所，再加上後來的妍妍同惠華。感謝主使我地去廁所都能認識到，又多謝麗香自製的笑話。 去完廁所之後又上番山，當少薇姐分享完後，我地就分組祈禱，可能我第一次join，我真係要識應下。完左之後就下山啦。寶貴今次能與珮詩同師姐一齊食飯，因為原本定的同工相聚，由於師姐要趕住走，所以改為一路食飯一路相聚。整個11月都少見b/s，又整個11月都少同同工相交，寶貴今次能與她們一同分享自己的經歷。 食完飯之後，我地就走lu。

>>December 8, 2005 at 2:06:33 AM GMT+8