2006 年 5 月 16 日 星期二 【晴】

■■■	澳門訪問團	■■■
全個星期晚晚開ot就係為左個澳門訪問團，晚晚大約去到9:00先走人，雖然係夜d，但因為今次係去澳門，所以船飛果度較為容易d，但d老闆都係麻煩d架啦。 今次去澳門只係1日來回，行程十分緊密，我d時間就仲緊密，因為要安排埋做其他野。早上7:30出門口，去到港澳碼頭大約8:15，跟住食左個唔好食的早餐，另外買左個包tim，之後就去等亞姐啦。點知亞姐仲遲到tim，跟住等等下就有老闆啦，真係早到呀。等到亞姐黎就去中旅比埋船票錢，之後就call d唔準時的老闆啦，因為大部份都係唔準時的一群人。 9:45分終於集齊人啦，諗住上船的時候，又唔見左一個老闆，又要去搵番佢，我幾驚上唔到船呀，因為話明上船前15分鐘唔比入閘架嘛，我驚係我入唔到閘咋。終於比我係間茶餐廳搵番某老闆，佢仲同我講因為未食早餐，太肚餓，所以去左食左喎，真係激死呀。果一刻那那林入去，最後入閘係我地2個。跟住我第一次試用e道入境，果真好快喎。因為老闆們全部都係豪華位，所以佢地可以坐係一間房裡面等，之後就有不同的職員問我﹕佢地個個都好錢架喎，我識果個，認得果個，上過報紙啦，星期日電視都有介紹啦，係咪好有錢架，好似話有2百幾億喎。........夠啦，我知佢地係有錢架啦。 去到碼頭，d老闆好似又係小朋友咁，成日都唔明，船程又唔係好耐，個個都話要去廁所，跟住又要周圍走，一個又整爛左副眼鏡，仲問我邊度有眼鏡鋪呀，大佬呀，我邊知呀，我都要問人架。你keep住先啦。 第一站﹕去拜會經濟財政司司長，一落車，又有老闆話唔見左部相機，叫我同佢去搵，邊度唔見先得架。跟住佢話我知佢留左部相機係船度，叫我同佢拎番。下.......係隻船度，唉....叫左架啦，唔好將d野周圍放架啦。 去見面的時候，又有個老闆唔見左個名牌，又要去到幫佢整，跟住又要同個老闆搵相機，又要幫老闆秘書接電話，都冇坐低過。最後部相機終於比船公司d人搵到，真係感恩呀。但問題係要去碼頭拎番。 之後就去食lunch，果間餐廳有20年歷史架啦，係最好味的一間，但食飯之前，我首先安排左老闆去整眼鏡，之後再去碼頭拎番部相機，再番去食lunch，去到比番部相機老闆的時候，佢好攪笑咁講﹕真係多謝呀，真係好啦。 食完lunch就去參觀何生企業之一，角子老虎機公司，真係多到嚇死你。入到去見到d人其實好悶架，係咁按下d制，跟住等佢轉，睇下幾時有jetport，唔會聽到d人好嘈咁講野，因為個個都好似個機械人咁，不停按制，果一刻我諗d人點解會咁無聊，坐係度不停按制打發時間但又要用錢架喎。跟住去見到d好似電視果d 21點咁，但呀經理話而家好先進架啦，唔洗真係有個人係咁派牌，講野，全部機械化，但做莊果個其實都係電視裡面d機械人，跟住唔會真係見到d牌，你只會見到個螢光幕，螢光幕裡面就有你d牌，果一刻又諗好似有好多"人"，但其實果d都係機械人，我諗黎諗去都唔明，點解澳門有咁多賭場，裡面原來同係電視見到果d係唔同，係好好好悶的玩意，但又會有咁多人去玩。 參觀完之後就去見特首，特首真係親切得緊要，連粗口都講，我真係估唔到，可能佢都係工商家出身，有果句講果句，句句都加d粗口，句句都轉晒彎係度踩香港特首，不過都証明佢係實際地為澳門做緊野，由原本安排的30分鐘，足足去到1個鐘，我地走的時候，佢仲係門口等我地上車同say goodbye tim。 由於我地book 左6:30船飛走，所以我地都幾趕架，去到碼頭都已經6:15，又要那那林入閘同過關，跟住就要上船啦。我連一盒杏仁餅都冇買到，碼頭就去左4次呀，都買唔到手信，唉。都係叫啟賢買好d啦。 最後番到香港，d老闆自己食飯啦，我同亞姐走先，我寧願返屋企自己食好過。番到屋企都差不多9:00了，食完飯沖涼之後即訓呀，因為太疲倦啦。

>>May 18, 2006 at 7:20:53 AM GMT+8

2006 年 5 月 12 日 星期五 【晴】

■■■	寶貴的偉良哥同月娟姐	■■■
寶貴的偉良哥與女娟姐黎左大牛呀，真係好開心呀，令我又想到上次出外時與月娟姐的傾計時間，其實真係素未謀面，第一次去新加坡聚會地方，仲記得果日係星期日，擘完餅，食埋飯就番聚會地消磨下d時間，影下相咁，就係果時見到月娟姐同偉良哥同佢個仔仔，好溫柔呀月娟姐，雖然知道佢身體有疾病，但都同我地坐低傾下計，問下我地d情況，又講下佢d野比我知，又叫我地小心呀。真係好到不得了。佢的溫柔我估我一世都學唔到呀。 今次見佢又瘦了。真係難得佢地仍然為主的擺上，寶貴的偉良哥，令我又記起上年去南洋大團聚的時候，他唱的一首詩歌，我要似向日葵，個樣仲要擺埋向日葵的花。真係父的親孩子呀。聽他們的相交，心裡更加佩服佢地的信心同信任主的帶領。 今次月娟的出現係因為佢要係香港做手術，請見如下的信件，也請各位多為他們祈禱﹕ 感謝主對我們那份深情熱愛，不斷向我們打開衪的心懷，寶貴能同享父、子、聖靈至高愛的團契，并且能與主、與歷代的弟兄弟妹一同去建造并完成父永恆的心意–教會。 為了使我們能更深認識衪，經歷衪，和更像衪，主從永恆以前就為我們這短暫的人生設計了最精采、最動人、最有意義的旅程。衪對我們所懷的愛念比海沙更多，因此衪設計的，衪容許的必是最有智慧，充滿衪的恩惠、祝福。 自1990年我發現患上紅斑痕瘡病(S.L.E)以來，屢次有生命危險，但主藉著弟兄弟妹的禱告，愛心的關懷、幫助、使我每次都安然經過。由於長期服用類固醇，導致94年時，兩邊髖關節壞死，行動艱難，痛楚非常，但主竟然在這最艱難的日子，使我懷孕。醫生預期我要~概阞膘鴠芠ㄐA但主奇妙、大能的手托著我，使我不單不用~概氶A反而行動不斷有進步。主的作為使我們更體會衪的恩惠、慈愛是天天、隨事隨時的伴著我們，我們應該活出正常神兒女的心態–不背擔子，不為明日憂慮，而是充滿信心、喜樂面對一切。 在這十六年病患中，充滿了主的看顧，我仍可用雨傘當拐杖走路；并仍可服侍衪，照顧家庭。現在我的髖關節已磨損嚴重，行動已很困難，故決定於今年五月十九日及九月一日在香港聯合醫院，有兩次手術，分別在左邊及右邊換上人工關節，感謝主使負責的醫生都是很有經驗和盡責的，現請弟兄姊妹為以下的事項禱告﹕ 1.使我在兩次手術前，健康有明顯的進步，以便能應付手術及以後需時幾個月的康服。(由於十多年服用類固醇、抗癌藥并間中進行化療、身體特別腸胃，循環系統都比較弱，吸收力差，睡眠欠佳) 2.手術能完全順利、成功，人工關節能安得合適。此外特別祈求沒有併發症及傷口發炎。(若傷口發炎，便需要重新開刀拿走人工關節，清洗傷口，等傷口痊癒，才再安放人工關節，而傷口發炎不單要在手術前後避免，還要終生小心，特別我有紅斑痕瘡病，就比其他人容易患上炎症。) 3.求主保守我的紅斑痕瘡病完全被控制、醫治、不會復發，否則就會很危險，也求主為我預備有愛心、有智慧經驗的內科醫生跟進我這個病。 4.康復期能順利進行物理治療，學習走路，不生發枝節，如人工關節移位等。由於我多年行動不良，大腿肌肉已有萎縮，沒有多大力量，而人工關節是需要大腿肌肉的力量去穩固，并藉此運動。 5.我的兒子，頌樂(今年十一歲)會留在新加坡讀書，沒有我在他身旁照顧和跟進學業，盼望他能更學習倚靠主，更懂事、成熟、獨立、支持爸爸，願這些日子，使他生命更堅實美好。 6.我們預算若手術及康服都順利時，便能十二月下旬回南洋參加大團聚。在這幾個月裡，偉良就需要新加坡、香港兩邊走，除了侍奉，照顧我和在教會中，還要額外多負起照顧頌樂的工作，因此他會較辛苦，請為他靈魂、體、精神多禱告，他過往這幾個月，試過有四次頭暈，加上他的肝臟比較細，又有一條重要的肝門靜脈血管完全栓塞，晚上睡眠也不好，因此他是不適宜過份操勞，故此，在此也呼籲，若有勞苦忠心，又可停留南洋最少兩、三個月的弟兄姊妹，請過來南洋一起奮鬥，一起追求，一起歡呼收割。南洋需要你們！！ 我們一家都渴望前面有強健的身體、雀躍、甜美的心靈，與你們一起完成榮耀的託負，迎接主的再來！願我們都為主有最強、最美的靈、魂、體，清純貼近主！活出衪自己！建造衪的家！ 〈我的神要以慈愛迎接我〉(詩59:10) 主及你們愛中的偉良、月娟

>>May 20, 2006 at 4:16:23 AM GMT+8

2006 年 5 月 7 日 星期日 【清涼】

■■■	沙田預工旅行	■■■
尋日同左媽媽去了沙田果邊預工旅行，全部人數有接近150人，同車的有慧英同佢爸、媽，明歡一家同惠玲，全部大牛的坐埋一齊。 星期日晚返到屋企都差不多10:30，因為同左大佬盛食飯，但等到12:00媽媽同家姐都未番屋企，所以就打比媽媽同家姐啦，因為我估佢地通常都係去街啦，但2個都冇人聽電話，果一刻個腦就諗好多野，會唔會有意外呢?會唔會唔返呢?媽媽會唔會唔記得呢?究竟咁夜去左邊呢?原本諗住訓覺的啦，點知去到1:30都訓唔著，又望下條街啦，睇下見唔見到佢地2個啦。最後等到2:00，再打電話比媽媽，果一刻先知媽媽去左樓上人地屋企打麻雀，差不多返到門口，果一刻終於知道答案，而家姐就係去左宿營。跟住問媽媽記唔記得明天去旅行呀，媽媽話佢記得喎，唔洗擔心佢會訓過鐘喎。所以尋晚我只係訓左5個鐘。 尋日一早7:00就起身，跟住就換衫，之後就約慧英8:00係觀塘巴士站等，再轉89B去沙田，去到沙田都差不多8:45，我同媽媽就食早餐，跟住9:00去集合地方集合，上車等到9:30出發。行程都十分豐富同趕，每處只停留大約45分鐘咋。 上車本來唔多出名的媽媽，竟然因一個遊戲而令眾人都識得佢叫梁太。個遊戲就係點蟲蟲，即係捉蟲咁玩。車長問邊個嬴得過2次或以上，全架車係得媽媽一個人舉手，所以車長就叫我介紹下自己同媽媽喎。就係咁全車都識得佢，又或者咁講啦，大部份媽媽都較年紀大，而我媽媽就比較年青同又係返緊工。 第一站的嘉道理農場，逗留時間大約1小時，媽媽最鐘意睇的環節，因為未黎過，又多野睇，仲識埋惠玲同有恒哥哥TIM，有恒同媽媽講話識我10幾20年，媽媽話﹕咁你都識佢好耐喎。咁多年啦。 第二站的分衣車場，逗留時間大約45分鐘，我地同樣覺得冇野睇，因為只得一個場，其餘大部份都改左BBQ場。影左幾張相就想上番車，因為天氣實在太熱了，行幾行已經好熱，唔想郁。 第三站就係LUNCH時間，但因為間類似酒樓的酒樓冷氣唔得，一坐低就熱到死呀，媽媽直頭熱到塊面紅晒，之後原本諗住可以玩下遊戲咁啦，但都因為太熱，所以冇玩，只係D子女出黎唱左首歌之後就走人LU。 第四站食豆腐花同飲豆漿，起初以為係參觀豆腐花廠，但間廠已經迫遷左，最後係只能係一地方坐低食豆腐花同飲豆漿，但又幾好喎，好滑架。起初我同慧英都諗免費比你食咁好，佢米冇錢賺，但原來佢有另外D製成品比你買，例如﹕腐乳、辣椒油呀果D，我亞媽梗係加入行列去買啦，慧英亞媽又近住買，所以話豆腐花唔賺到錢唔緊要，另外果D有錢賺呀。 第五站最後一站都趕去黃金海岸，起初媽媽問有恒係米冇得去黃金海岸呀，而黃金海岸係媽媽最想的地方，而有恒哥哥話盡量安排啦，但驚時間唔夠喎，最後都去到的時候，媽媽話有恒哥哥好好人喎。去到媽媽就梗係唔放過任何影相機會，我就充當攝影師，不停影，不停影。 最後就坐車返沙田了，返到沙田再轉巴士，再轉小巴，返到屋企都差不多7:00。全程都熱得要命，但媽媽的反應都比眾人知佢玩得好開心，果D地方又冇去過。返到屋企又同家姐講，都幾開心。 希望下次再約佢去預工或者聚會的時候，佢都會黎啦。為左今次的預工，我真大部份時間都為媽媽祈禱，又連續晚晚為屋企人祈禱。願主嘗還我的心願。坐車的時候，覺得自己平時都好少表達，又或者同媽媽去街，以往星期六、日都係顧住返聚會，未懂得取平衡，好想同媽媽講一聲﹕我真的愛你。

>>May 8, 2006 at 8:31:10 AM GMT+8

2006 年 5 月 5 日 星期五 【晴】

■■■	開心的星期六聚會	■■■
星期五聽完慧英講佢訓得唔好，4點又醒、5點又醒、6點又醒之後就輪到發生係我身上。尋晚訓得唔好，直頭好似慧英咁，我下次都唔聽佢講啦。不過今朝起身個人又ok喎。 今日星期六因為係亞姐短週的關係，所以我同會計都冇心情做野，做下其他野，print下簽到表同相交遊戲的問題後就等放工。下午去到大牛都係2:00咋，真係好呀。 今日聚會係3c，子誠哥哥講追求聚會，不過因為係第一次，所以只係講番追求聚會會講d乜。起初因為雅婷同慧珊想讀書，而唔join聚會，但我真係好想佢地聽架。我真係想大家一齊追求，同埋2小時的聚會得著的比起用2小時去溫書所得著的，實在太大啦，因為聚會有主的同在，有聖靈的感動，可能一次聚會已經改變你追求主的方向。寶貴當我講的時候，佢地都因著主已去聚會，我想佢地必定得著大大的祝福。 擘餅聚會又係一個感動的聚會，真係寶貴係聚會中主的同在。擘餅完後的分組遊戲，其實冇諗住玩得咁投入同個個都玩，因為我諗F.5的唔知會唔會留低，因著佢地的留低，果然氣氛唔同晒，個個都笑得開懷，尤其多謝惠儀仔的對答同雅婷的回應啦。 6:30之後同左幾個同工一齊祈禱，多謝慧英的提出，令大家能集埋一齊祈禱，雖說話半小時的祈禱，但個個講下野之後竟然去到7:30先完，但我寶貴有一班並肩作戰的同工，一齊祈禱的重要真係令大家彼此通透及更同心。 夜晚再同大佬盛同弟兄一齊食飯，為補祝大佬盛同關心下佢，但食飯時因為坐得太遠，所以講唔到幾多句。

>>May 9, 2006 at 6:08:39 AM GMT+8

2006 年 5 月 5 日 星期五 【晴】

■■■	又係科大親近主+黃昏營	■■■
今次又係去科大親近主，唔知點解又去科大，可能佢地發現左新奇又好玩的玩意--gym room。 今次都出得幾多人架，有官中一邦=5kai組合、唔似dgs的倩盈、f.5仍出親近主的碧茹，加上曾大英、我同敏萍姐同埋埃賽俄比亞的新移民佩茹、同埋溫哥華回港的君蔚。 今次大家都幾準時，起碼唔洗等好耐。但因為落完雨，所以去到亭就冇得坐又有蚊啦，但寶貴大家都忍左半小時，之後我地玩左個都幾無聊的遊戲，扮動物，但都ok啦，起碼係一個熱身運動，因為大家都係熱血青年嘛。 之後的唱詩歌同敬拜都幾正。親近主的時候頂唔住那種悶熱的天氣，入了冷氣地方涼快下，之後的相交也幾ok呀。倩盈已經成為應屆會考生，但碧茹都未考完。 食飯時又不停攪笑，婷婷就扮細食，佩茹比人點5蚊的野飲都叫貴，咁唔該幫我搵一杯1蚊的凍檸茶呀。大英同皇太后果碟大到嚇死你的唔好食炒麵同炒飯，我地迫佢地食晒佢，如果唔係我地會叫佩茹叫晒佢鄉下d埃賽俄比亞同鄉黎架。 食完飯之後，又去我地的新賣點--gym room，今次大英設左個局比何童，就係話原本同倩盈一齊踩5分鐘的單車，唔知點解何童踩到20分鐘都未踩完，最後大英話佢根本就唔識校，可能唔係5分鐘，而係60分鐘喎，笑死我地。而司徒就繼續行catwalk。 我地因為要入黃昏camp，所以3:15就走了。去到科大門口，竟然見到架小巴喎，當我地想追的時候，大妹姐就打比敏萍姐，而令到大家都追唔到車，而大妹姐就話比敏萍姐知架西貢車好耐先有架架喎，果一刻我地先擔心，究竟我地要等幾耐呢?因為我地架專車係4:15就開出，當我地計劃緊的時候，就見到有巴士啦，感謝主。但當架車開出的時候，小巴又到，証明西貢小巴唔係好耐先有架。去到集合地點好彩都未齊人。 入到去麥理浩，個人有小小暈，都係架車問題。跟住我地的黃昏camp，我只係玩左桌球同壁球，原本壁球都冇得玩架，但比我地見到少薇姐，係佢手拎張飛先有得玩。玩到6:00就食飯，之後7:45的相交聚會，但因為要安排地方等等問題，相交聚會要8:45先開始。我地原本諗住9:30走人，最後去到10:30先走，我地車國章的車去到寶琳，再由寶琳轉地鐵，去到藍田再轉巴士，返到屋企都已經係11:40啦，真係辛苦呀。 當中最攪笑係﹕大妹姐又攪錯地方啦，大妹姐又話我地知去西貢戶外康樂中心。不過好彩今次早d知咋，因為叫師姐打聽下黃昏營幾點入啦，點知東雄話4:15先有車入喎，咁我地就話唔洗車，搭小巴去到跟住自己行米得羅，跟住東雄又話搭小巴入唔到架喎，自己行有排行架喎，跟住開始大家好似九唔搭八咁，最後發現大家講緊唔同地方，原來係麥理浩呀。

>>May 6, 2006 at 5:01:16 AM GMT+8