2006 年 6 月 3 日 星期六 【雷雨】

■■■	同工相聚	■■■
唔知係米因為仇敵眼紅我地有咁多人信主，攪到我尋晚訓得十分唔好，4:00幾就醒左，跟住部手提明明放係床邊，竟然跌左落床下底，由4:00幾磨到6:00先再訓過，中間個腦不停諗野喎，諗下同工相聚講咩啦，諗下大家有d咩要進步啦。又諗下點幫d初信同新朋友啦。最後祈禱先再訓到7:00，因為我set個alarm係7:30，如果我唔執番個電話，個電話會不停響同越響越大聲，所以我惟有起身執番佢，因為係床下底，唔係話執就伸隻手就執到，但又加上個個都係訓緊覺，我要靜靜地咁執，要搬開床下邊d野，跟住先可以掃佢出黎，起碼攪左半個鐘，執番跟住出左廳又訓過。再訓到8:30先起身，因為要擘餅，所以起身後去左沖涼，因為感覺上好似冇訓覺咁。too bad。 擘餅聚會難集中，可能已經坐得後，又要霸位比姊妹，我又比人話我啦，1個人坐2行位。又係好唔好意思，10:00聚會開始啦都未見人。唔係好明點解會咁遲架。 下午的相聚，氣氛都幾好呀。起碼我知佢地d時間運用如何。有退休生活、也有忙碌過返學的生活。但無論如何，主真係好想我地學習如何去追求、如何去得著祂更多。無論你睇聖經也好，無論你聽信息也好、無論你睇屬靈書也好，到底都係想你認識明白祂更多。唔好浪費你有的時間及機會。好好把握。

>>June 12, 2006 at 6:44:24 AM GMT+8

2006 年 6 月 2 日 星期五 【雷雨】

■■■	福音聚會	■■■
星期五同今日一早都係不停講電話，因為今日係大牛有福音聚會。我地班F.5總共邀請到9位新朋友黎，真係太感動啦。為著佢地的落力邀請，我要熱烈地鼓掌。 今日因為亞姐冇返工(佢off)，所以冇咩特別野做，想做都唔會做。所以我準時1:00走。去到大牛食小小野等去2A霸位，其實都幾唔好意思，1個人霸2行，不停同人唔好意思呀，有人架。佢地D同學又遲黎啦，攪到我不停周圍望佢地。最後我陪左KINKI的一個同學，叫余香瑩。佢以前信左主，但又覺得自己會得唔好，唔會好有虔誠，再加上屋企人的反對，所以冇返聚會。今次同佢再傾，由4:30傾到5:30，佢心由唔明、唔知，到會試下祈禱同返聚會，我真的感謝神。 因著她，我也了解KINKI多左，也察覺她的改變係由心發生，體會她在別處教會所中的錯謬觀念，也體會她真正的改變。果時仲諗唔知佢驚唔驚我地咁樣的祈禱方式呢?估唔到今日佢同阿瑩講佢好鍾意同主耶穌傾計架，其實祈禱好簡單架咋。真的要感謝主。 傾完到都差不多5:45，等埋佢地一班去擘餅的B/S落黎之後，就傾下計，介紹下自己，又食下D奇怪野，好彩有子誠哥哥係度，幫我地分晒比人食。哈哈。 之後就開始我地祈禱的時間，不過由於覺得用左好多精力去傾計，當祈禱的時候，個腦都實晒呀。祈禱左一陣之後再同慧英一齊行去觀塘搭車，因為我估我自己今日會好疲倦，同埋最重要係尋日買左蛋糕返屋企，諗住今晚食架，所以我返屋企食飯。由於中午只食左一個包，所以我返到屋企已經不停講好肚餓呀，好肚餓呀。我最後竟然連細佬的小小飯都食埋，真係好嚴重呀。不過我估我要減肥啦，因為又肥左啦。哈哈。大家幫下我啦。ＰＬＥＡＳＥ。

>>June 5, 2006 at 10:37:13 AM GMT+8

2006 年 5 月 30 日 星期二 【乍寒還暖】

■■■	剪頭髮	■■■
31號原本話去踩單車，但一起身已知去唔到架啦，因為雷暴警告呀，再加上好大雨，如果好似星期二咁樣，我都會踩架，不過落住雨咁，我驚惠儀仔衝左落河呀。哈哈。 原本7:30起左身，跟住8:00call大妹姐同敏萍姐，傾完cancel左活動之後通知埋d姊妹之後就再訓過，因為真係太眼訓了，一訓就訓到11:00，起身之後亞媽就話去飲茶，因為亞爸係樓下匯景返工喎，就係咁同亞媽同細佬去飲茶，飲完茶就去觀塘剪頭髮啦，yeah，尋日剪唔到今日剪到啦。感謝主。 去到觀塘kinki話果工salon之後，其實都估估下咋，因為聽佢講係j salon後面，但眼見果間真係太舊啦，一入去，見到的全部都係師奶同亞婆，真係亞婆黎架，我估大約60-70歲，當問佢整負理子幾錢的時候，佢竟然搵左好耐，係一堆垃圾紙度搵一張咭紙出黎比我睇，有3種價錢﹕350、450同550，咁我問佢有咩分別的時候，佢竟然答我係冇分別架，你整350啦。跟住問我要唔要剪頭髮呀，咁我話梗係要啦。 洗完頭之後，佢問我有冇指定師傅，我就話冇，跟住原來又係佢幫我剪啦，佢又係門口位，又係招呼人，又幫我剪頭髮同夾頭髮都係，起初都未話唔驚因為佢剪頭髮的技巧實在太奇怪啦，將我D頭髮又後撥向前咁剪，跟住又叫轉身喎，但明明張CHAIR係郁得架喎，都唔轉，係都要我轉身喎，好奇怪。跟住又不停問我﹕小姐你睇唔睇到有明顯的分別呀，一邊係剪左架啦，係米好有層次呢?一邊係未剪架，D頭髮係米好多呢?當你話唔係好覺的時候，佢又再SHOW多一次比你睇，叫你睇清楚D，最後我惟有話係呀係呀。 跟住我見到坐係門口有個男人，其實佢坐左好耐架啦，佢上身係恤衫，下身係西褲，一幅金絲眼鏡，但最大問題係佢竟然著住對人字拖。起衫我以為佢係等老婆果D人，但原來唔係喎，佢原來係全間髮型屋最TOP的師傅，係幫我剪頭髮的那個人講架。真係奇怪呀。佢剪頭髮仲攪笑，又擘開2隻腳咁剪，我幾驚佢做一字馬呀。我果一刻即刻祈禱主，就算我入錯鋪頭都唔好剪得唔好靚呀，跟住我真係有D衝動問下KINKI佢果間SALON係米就係我果間，點解全部D客人都係D亞婆，仲要整頭髮都會訓著覺果D老人家，跟住去洗頭的時候，仲要人扶住去喎，我係最後生的那1個，除了個太太的仔仔之外。 不過佢夾果下都OK呀，好多間都試過夾得好痛，佢就未試過喎，唔知好唔好呀，不過都算啦，橫點長左頭髮可以再整過。但佢真係幫我剪得太多頭髮，我話剪1吋，佢就話1吋其實好少架咋，不如剪2吋啦，我話1吋，佢最後竟然話我幫你剪埋D開叉呀，所以剪多左。天呀，我話1吋呀，你你你竟然自己去剪，唉，又要再留過啦。 由1:30坐到5:30，我估我今次係最耐的一次，我都未試過坐咁耐去剪一個頭，我下次都係問清楚D先去剪。

>>June 3, 2006 at 3:20:00 AM GMT+8

2006 年 5 月 29 日 星期一 【雷雨】

■■■	與中五的一同慶祝	■■■
星期二果日約左班F.5姊妹一齊去親近主同食野，其實除左食野之外，都想佢地感受姊妹支持，同時也明白暑假究竟有咩做。 不過由於我星期一去左大陸開會，身體好疲倦，再加上媽媽買左個新枕頭比我，我要重新適應，所以星期一晚訓得唔係咁好，好似冇訓過咁，所以精神較差，我一精神差，個腦就唔識郁，又諗唔到野。真係幾辛苦。不過感謝主我約左慧英一齊去，有慧英係度我都會放心d，同埋佢會提我未傾d咩呀嘛。 親近主的地方係city，又係落雨天時常去的地方，約了10:30係地鐵站等，但雅婷又要拎番d雞扒比亞珠，所以遲左小小。而阿怡我已經10:00叫佢起身，佢都可以12:00先到九龍塘，我估下次要提早2小時叫佢先得。去到唱下詩歌，雅婷就照舊比d蚊吸血啦，當kinki相交未搵到野做的時候，吉野家就call佢啦，叫佢番工，都唔知是好是壞，其實我試過番暑期工同冇番暑期工過的暑假，其實分別真係好大，我指的係心靈方面，工將來返到你唔想返都得，但暑期未必年年都有放，為什麼要咁急搵野做呢? 金錢是否真係咁急需呀? 我要講的其實已講了，如當家庭真有需要，我不會勉強大家，只期望大家明白神的心意。 親近完主，因為趕住1:00去大久保，所以冇相交的機會，趕住去食野啦。其實食野地方都諗左好耐，都唔知去邊好，最後定的大久保，食物就麻麻地架啦，但價錢都ok啦，hk$48/person，ok啦。食野前講左月程同安排d聚會，之後食野啦。不過8丁人，竟然可以叫左20個手卷，不過都食得晒喎，因為阿怡食左4個手卷，kinki食左3個，真係越瘦反而食得最多，又唔見佢地話飽。跟住就不停講如果雅婷同慧珊出外，佢地2個一定有不少笑話，實笑死我地。之外，又玩度高。係間細房度，竟然做到咁多野。 之後因為d野好耐都未黎，碧茹就不停叫啦，最後一枱都係炸南瓜同炸番薯，不過用48蚊，坐2個鐘，又食左2件三文魚壽司同其他野，都叫ok架啦。 食飽之後就番大牛參加學生祈禱會，但其實我好想去剪頭髮架，因為都諗唔到何時再有時間去剪，我所謂的剪其實係叫整啦，起碼要4-5小時架麻，咁果一刻裡面我諗如果我唔去參加祈禱會又好似好衰，叫晒全部去而自己唔去，又好想去剪，但又好想參加聚會，最後我都係參加左聚會，冇去剪頭髮，最後我的決定係冇錯架，因為31號我就有機會去剪啦。 就係咁就過左1日啦，大約7:00幾番屋企，因為太早的話我亞媽會知我放假架，哈哈。

>>June 2, 2006 at 5:48:33 AM GMT+8

2006 年 5 月 28 日 星期日 【乍寒還暖】

■■■	返大陸開會	■■■
星期一又係例會的日子，不過今次我地就上到深圳開會，其實係冇咁的需要，但因為有老闆極力邀請我地去睇下佢新起的酒店同地方，所以米去一次羅，有得免費食同參觀，又由上年邀請到今年，我地惟有都係去一次。 原本我係坐會長的車跟會長秘書小姐一齊去的，但臨時會長一早有其他野攪，攪到我坐唔到會長的車去，跟住我就惟有轉去另一老闆度搭免費車啦，由於係免費所以係要付出代價架啦，就係要我1:45前到紅磡，又要拎2袋野，再加上一朝好忙，忙到我買的飯盒最後只食得幾口就要走啦，1:00搭的士去紅磡，去到竟然要我坐係reception等，個個都好望這女子為何坐咁耐都係繼續坐，因為老闆未返喎，叫我1:45到的秘書又食飯未返喎，同我一齊去的會計師又自己估住整自己d野，所以我惟有坐係度等，由1:45等到2:15先走人。 因為架車要去載多個老闆黎，所以一車4丁人唔計司機，就係咁上路了。我地竟然去到深圳都已經接近4:00，全程坐係架車度不停聽2個老闆講養魚，佢所謂的小魚其實係大到死的錦鯉，用左個15尺長的缸去養，又有專人打理，d設施多到嚇死你，一條魚話大約2萬蚊喎，真係d有錢度咁。係間屋度個位置掘地下，跟住裝修到有位置係地下坐係度睇魚喎，又話但係裝修費都幾廿萬，都唔知係米吹架，我就惟有笑同嘩咁羅，跟住又問我住邊架，我話住藍田，呀老闆又話係舊區黎架喎，你仲住果d徙治區呀，我真係想講你updated下啦，我竟然就話唔係lu，果d冇晒架啦，原區安置左，上左樓羅。果一刻我仲記得舊老闆話我一屋5人，住係600尺的地方，平均每人只得100尺活動空間，咁環境太差啦點住得人架。 終於去到要開會的地方，坐到我個人都暈暈下，因為太辛苦啦，坐咁耐又唔可以亂講野，又唔可以想講咩就講，真係命都冇呀。但原來我地係最早到的一批，佢地大隊果一批仲未到，所以d老闆去到呀老闆裡參觀。我就去安排開會d文件。等到大隊黎到都已經5:00，跟住就即刻開會，因為太趕啦d時間，由原本2小時的會議趕到45分鐘內完成，跟住就去食飯，d老闆自己一枱，我地秘書一枱，我地8個人一枱竟然又係食12人份量d野食，但實在太多啦，多到嚇死你﹕ 原隻乳豬 花膠湯 上渴龍蝦伊麵 魚頭煲 上渴匯走地雞+雞湯米粉=2款菜 豬骨湯匯娃娃菜=2款菜 生菜包住酥炸賴尿蝦 煎瑤柱包 金菇牛肉粒鑲響螺 煎咸魚(我唔知係咩魚，係咸咸地，但好大條) 2款不同的炒飯(鵝肝炒同咸魚炒) 芒果卷 生果 款款都多到嚇死你。飽到上心口咁濟，但因為又要即刻搭車走人，所以我都唔敢食太多。最後我地走先，因為D老闆自己係度飲酒，我同亞姐坐會長車走先，返到皇崗跟住再轉直通車返藍田，真係快喎，9:40開車，10:40返到藍田連埋過關。跟住再轉車返屋企，不過好疲倦呀，全日都係坐車同坐車。

>>June 2, 2006 at 7:13:03 AM GMT+8

2006 年 5 月 28 日 星期日 【暴雨】

■■■	主你我的夢想	■■■
主你無條件的付出，但你卻不求得著任何的回報 主你多麼渴慕與我有情愛的交流 從前只活在世界自我中 今天竟能與你永聯合 一切,一切都不是我能幻想得到 原來是你，原來是你渴想我能看到 寶貴你打開自己進入我內心 你的夢成為我的夢 惟有我才能完成你的夢 就算我無有，就算我微小 感謝你仍然話用我 感謝你呼召我，使我有異像 今日祂的夢 也能成為你的夢 今日祂同樣呼召你成為祂的用人 今日你也能看見也能踏上

>>May 30, 2006 at 1:41:11 AM GMT+8

2006 年 5 月 23 日 星期二 【晴】

剛剛少薇姐覆我呀，我有位去到camp啦，哈哈哈，不過請各F.5的姊妹記住，我唔會去做野架，如果要做，唔該幫我做埋，我想去參加聚會同玩下架咋。親近主都唔好預我預備喎，同我預備埋啦唔該。

>>May 24, 2006 at 10:26:28 AM GMT+8