2006 年 1 月 18 日 星期三 【晴】

■■■	ETC晚間訓練聚會	■■■
星期三出了第一次的ETC晚間訓練課程，其實當我一睇到個TOPIC的時候，我已經好想參加架啦，個題目係﹕神的工人。所以我想問下人有冇興趣同我一齊報，點知我都未問，師姐已經問我啦，好野，有人陪啦，仲有麗香TIM。另外個課程仲要係6個月內返6堂，平均一個月一堂，對於我來講﹕正呀。 當中士培哥哥話﹕有人不曾祈禱過想比神用，有人曾經祈禱過好想比主大用，但卻沒有行動去配合。如果你真係想比神大用，那麼你就要去追求神的話，如果唔係你就好似一隻紙杯咁，比神用一次就難左，因為你敵不過仇敵，我地要訓練又要加上追求神，那麼必能成為神貴重的器皿。 係聚會度，深刻幾個points 1. 神的用人要經得時間考驗 2. 神的用人要多藏在主裡--多親近主 3. 神會用好長時間去使一個人成長

>>January 20, 2006 at 10:28:30 AM GMT+8

2006 年 1 月 16 日 星期一 【晴】

■■■	祈禱會的得著	■■■
尋日去祈禱會係搭地鐵的時候，想起首歌﹕每當我想起你。跟住係地鐵，心裡唱這歌。點知去到祈禱會，又係唱這歌。真係同比一個聖靈所感。 係祈禱會中，子誠哥哥講到我地要決心計劃自已的甜美日程。有時我地好想去一件事，但因為沒有計劃，往往都達不到，正如我地考試想去溫好D書，都要有一個好好的時間表啦，如果唔係都係只得個講字，冇實際行動。故此，我立定心志，就算冇人陪我，我都要好好地做好我的甜美日程，當我將我的負擔與敏萍姐講時，佢都話好呀，佢仲話不如比少薇姐睇下小組可唔可以推動下。GOOD IDEA。正如我所講，每個人都要做好甜美日程。 係祈禱會中，志明哥講﹕男性在教會中的領導角色。哈哈，佢咁講，我都FEEL到佢想講咩啦，一眼望去弟兄的數目只得1/3，志明哥強調不是公平與否的問題，而係角色上的問題，我完全明白喎，有D野真係要弟兄去做先得，志明哥仲話﹕如果有個弟兄係姊妹帶領下成長係會似姊妹架，有邊個鍾意女仔型的男仔呀?哈哈... 係聚會中，志明哥真係好有負擔想D弟兄起來去事奉神，佢話如果再過5年全部都姊妹作帶領的話，教會係唔榮耀架，我都要令身邊的弟兄起來先得。

>>January 19, 2006 at 10:23:14 AM GMT+8

2006 年 1 月 15 日 星期日 【晴】

■■■	相交聚會	■■■
星期日，我地係地鋪度親近主同相交，原本諗住好多人出，所以相交好似聚會咁，但後來計算過又唔係好多人咋喎，所以改為親近主後接著相交。情況較易掌握及控制。 10:00到大牛，只見妍妍一人，跟住我地就學習唱新歌，首歌都幾好聽架，就係我日記板的音樂。我同敏萍姐學下唱，順便等埋雅婷食埋早餐，當雅婷食完早餐的時候，又到司徒黎到，我地繼續唱下首歌，因為又要等司徒食早餐，當佢食完早餐，又到慧珊到，唱一首唱左幾次，就係等人食早餐啦。不過好開心架首歌，都幾好FEEL。 當我地睇聖經的時候，就麗香、曉琳、佩茹到，開始多人啦，而地鋪下面因為用黎作初信聚會，所以我地只好係樓上親近主，樓上地方真係麻麻地，望唔到風景，TOO BAD。 當開始相交的時候，因為我一早已叫慧珊同雅婷預備大團聚的信息，我對佢地有信心，所以好放心咁，因為我知佢地一定會預備有野講，而講的內容也不會亂吹，因我知她們真正有得著。果然呀，我欣賞她們每一個相交，就算連話冇野講的倩惠，我覺得佢所講的也是她的經歷。我特別喜歡妍妍同雅婷所講的。 妍妍的相交內容，我彷彿好似冇聽過咁，哈哈，可能大團聚果日我實在唔留心啦。每個人都要有夢想，我欣賞妍妍對自己人生有一個清晰的方向。只有主同主的工作-傳福音。另外，我也欣賞雅婷，近期睇見佢身上所發的榮光，令我也羨慕，當一個人時常與主近的時候，她會不自覺地比主改變，雅婷的相交因為時間問題而比我CUT短左，其實佢都好有料架，希望下次佢再作補充啦。真係唔好意思啦。因為時間關係，仲有4個未相交(包括我在內)，惟有留待下星期日的再作相交吧。希望個個好似聖經咁講﹕ 我們將所看見、所聽見的傳給你們，使你們與我們相交。我們乃是與父並他兒子耶穌基督相交的。我們將這些話寫給你們，使你們（有古卷作：我們）的喜樂充足。 食飯的時候，同左曉琳同雅婷一齊坐，當中相交自己對她們的期望，真的，我真渴望每個能發揮得最好，每個都有自己的恩賜，怎樣互相配搭，怎樣能比興起，真係好重要。同時，我也渴望她們每個都厲害睇見自己的缺乏與盲點，學習去事奉神與神的家。正如我早前同雅婷講過，如果神的家有需要，你願意為主付上嗎?當你問願意的時候，主好歡喜，但仇敵同樣會眼紅你，你要學習在艱難中去成長，這樣主會大大的比你得著更多。學習有智慧去得著或去引導妹妹成長，係身邊咁多需要幫的人群中，要學習忠心去牧養同教導主比你的妹妹。 相交完左之後，因為文員果D已經去左食，所以要不斷吹佢地盡快去食飯，盡快食完，我驚師姐CALL我話我地仲未食完又要等呀。因為下午係生日會呀。 生日會的主角係大妹姐、敏萍姐同倩盈，因為幾驚冇人同倩盈慶祝生日，所以又要CALL定D人，不過都玩得好開心呀，大妹姐發晒癲咁玩，D遊戲雖然又係果D，但好攪笑呀。玩完之後，我就約惠玲去買野，因為阿媽話要買個水煲，去到鑽石山但係冇得買，只買左個水樽比亞蘭，之後佢就走啦，因為佢約左5姊弟同美蘭姐(阿媽的妹)食飯，而我就去APM JOIN番家姐佢地，因為阿爸要買風褸去日本旅行，所以睇左又買左，之後就番藍田食飯啦。

>>January 19, 2006 at 2:40:50 AM GMT+8

2006 年 1 月 13 日 星期五 【晴】

■■■	小組-慶祝生日	■■■
我地星期五去了佐敦食日本野，為了慶祝大妹姐同敏萍姐的生日，其實日期係大妹姐定的，而小組食野又係大妹姐定的，為了是慶祝佢生日喎，個個都忘記了敏萍姐的生日，好攪笑。 原本唔係我約架，但唔知點解又改為我去聯絡咁，不過冇所謂啦，由於招兄話果間野好FULL，只可以比我地由7:30-8:30一個鐘的時間食野，所以我地約7:15，仲要叫D人唔好遲喎，我地個個都冇遲呀，不過最遲係大妹姐呀，我地仲驚佢唔知係米去左金鐘或者轉左車去左九龍塘，因為佢係地鐵痴，當打比佢的時候，原來佢已經到了。 當係地鐵站等大妹姐的時候，美蘭姐又問我究竟去邊間野食呀，我就話其實我都唔知架，好似叫大成喎。咁問招兄啦，佢就話唔係呀，係大盛，但佢讀音讀出黎係叫大成喎，咁我地就話﹕都冇分別，你講的大成同佢講的大成係一樣喎，錯左咩呀，最後要招兄拎張咭片比我地睇，原來係大盛，但一望之下，我就知我黎過，就係上次同D舊同事慶祝JANICE生日果次食過的，又係大妹姐話好想去新蒲崗果間的總店，招兄又攪笑講﹕新蒲崗果間唔好食架，唔好去呀，跟住美蘭姐就問佢點解果間唔好食，招兄跟住話﹕我冇講唔好食呀，我地個個LOOK住隻眼望住佢，話佢知﹕你頭先剛剛講架喎，又唔記得。招兄話自己近期SHORT SHORT地喎。 去到大盛的時候，果真有好多人，果然出名呀。不過好彩招兄book左位，一坐低就即刻叫野食，發板人係啟賢同招兄，果然最明白大妹姐，大妹姐話叫10碟三文魚，佢地就叫8碟，因為一定知道食唔晒。小組出席者有﹕美蘭姐、sindy，麗香、啟賢、招兄、歡歡、小坤、師姐、我同大妹姐同敏萍啦。叫到一枱都係野，因為d野叫得快，又黎得快，務求我地能盡快食完走人。d壽司真係好大架，我估只有惠儀仔可以一口食晒。之後仲有煲啦，三文魚頭煲、咩烏冬煲，又有天婦羅啦，又有凍烏冬呀，不過佢地唔識食啦，最好味的凍烏冬竟然冇人搶住食，我食到好飽架啦，最後食埋件帶子壽司，真係好滿足呀。 食到8:20，啟賢就埋單啦，因為我地只可以坐到8:30咋。一埋完單，食埋粒雪米騚Nbye bye lu。我會再黎架。出到門口，大妹姐就問係米走啦，個個都冇反應，行到去轉彎位，大妹姐又問係米走啦，招兄就問有咩心願呀你地，根住師姐就話﹕下，講心願係條街度講架，招兄就話﹕不如去九龍公園啦，果一刻敏萍姐就話﹕咁不如你同大妹姐去九龍公園啦，我地走先啦。好攪笑架d情景，之後我地都係走返屋企，返到屋企都係10:00咋，真係早呀。

>>January 17, 2006 at 10:20:57 AM GMT+8

2006 年 1 月 12 日 星期四 【晴】

■■■	亞姐叫做的野	■■■
近期亞姐唔知發左未癲，竟然要我將係會度的紀念品逐一影相同mark低係幾時邊度送的，但係會度的紀念品大大話話有成100幾件，又要搵番係幾時送，真係好大獲架。亞姐仲要話我知佢想係新年放假前攪好d filing同資料喎。你估我係萬能咩。 講完影相，跟住又話要將過去影過的相重整，要有個sytem咁，係電腦裡果d就要放入櫃，又話係新年前攪好。d相由1998年開始影架啦，又想我死呀。 講完d相，又話要將cd或者video放入櫃同排好，按次序咁喎，又要新年攪好。嘩.....做死人咩。 最後就到d filing啦，其實好早前我已經file好我自己果d，但會計就未file啦，咁亞姐叫我file就職典禮果個喎，成個咁大的活動要file梗係要時間啦，但無奈地又係要新年攪好喎。

>>January 16, 2006 at 6:02:47 AM GMT+8

2006 年 1 月 7 日 星期六 【乍雨乍晴】

■■■	星期六、日的聚會	■■■
星期六的聚會分開左3個聚會，初信、興奮同追求，原本我諗住等kinki佢黎之後同佢傾下計，而惠儀仔係興奮聚會都ok。咁我就暫時留係追求聚會啦。因為我食野所以遲左入3A，但一開門，我幾驚我去錯呀，得幾個人坐係度，圍左個小圈喎，果一刻我諗，唔通我入錯房。但又見到美蘭姐佢地喎，咁就照入睇下點先啦。 當子誠哥哥睇到我地咁少人的時候，佢話不如改為相交聚會呀，講下大團聚的得著，果一刻我諗唔係掛，相交，個個雖然識姐，但唔係好熟喎，再加上大團聚的信息都未消化，講咩呀。跟住子誠哥哥話輪住講啦，咁即係個個都要講呀。好攪笑架，因為大家果一刻都好驚咁，冇那那明明係聽信息的聚會改為一定要講野的相交聚會。 麗媚講完之後就係我講啦，因為個個都pass，但我個咀生左5粒飛滋，我真係唔想講野，不過感謝主呀，迫我去諗同思想，再加上真係有感動的，咁就分享左小小，如果換左係大堂的相交聚會，我一定唔會出去講，但而家人小小，講到係一個好好訓練機會，再加上我一路都覺得子誠哥哥好nice，冇架子，又玩得，所以唔係好驚佢。 相交聚會途中，大約有20個b/s入過黎，但一見到我地圍圈，個個的反應都係﹕我搵人咋、我出一出去先，我一陣就返黎，又或者唔講野走左，雖然子誠哥哥不斷講﹕入黎啦，入黎啦。但都係咁。哈哈，好攪笑。 擘餅聚會改係3A舉行，坐滿間房，但因為慣係3C，要習慣下3A先得。聚會中，由於5粒飛滋攪到個咀好痛，仲要流濃TIM呀，不過流左就會好快好架。就咁冇咩心機聚會。聚會完左之後，原本諗住回家食野，大妹姐又嘹左碧茹同惠儀仔去食飯，所以同左啟賢、歡歡、小坤同佢地食，我都冇咩點食，叫左碗麵，仲要等碗麵凍左先食得，因為熱的話粒飛滋會仲痛。 回到家，沖完涼，搽埋藥高就訓LU。因為明天要早起。 ----------------------- 星期日去了地鋪親近主，由於10:30先開始唱詩歌，所以睇聖經的時間得番小小。D人又要出出入入，麻麻地。之後就係第4家族的祈禱會，今次係第一次集埋一齊祈禱，但由於地鋪係長方型的設計，所以頭同尾就睇唔到，又熱，但中間位置就凍。又係麻麻地。但感覺幾好，起碼多人開聲祈禱呀。 食完LUNCH，就番上大牛3C點名，之後就好無聊，好似等時間過咁，我都好羨慕敏萍姐果邊可以一齊祈禱、相交，但無奈地我果團只得我一個，我要興起D妹黎做同工先得。

>>January 13, 2006 at 3:56:51 AM GMT+8

2006 年 1 月 4 日 星期三 【晴】

這天，一位過世的掃地老婦人靈魂來到了天國。

在天國裡，老婦人碰到了耶穌，她低著頭，滿臉羞愧。最後，她終於忍不住哽咽地說著：「主啊！對不起！我這個人沒有用！我不像別人這麼好，我在地上的時候沒有為您講過一次道，沒有寫過一本書，沒有轟轟烈烈的見證，甚至人們根本沒有把我給放在眼裡，我只是個掃地工，我沒有能幫您做什麼。」

老婦人越說越慚愧，幾乎快哭了出來。

耶穌卻回答說：「不會啊！我覺得您的生命非常的傑出、精彩。」

老婦人瞪大了眼睛，不敢相信自己聽到了什麼！

耶穌說：「妳很努力的做好自己份內的工作，不管有沒有人看見，有沒有加薪，妳都會堅持認真地把地給掃好、擦好；妳也有一顆單純、善良的心，這是許多人所沒有的...。」

耶穌又說：「我不管世界上的人怎麼評價妳，在我眼中，妳是一個非常傑出、優秀的孩子。我以妳為榮。」

什麼叫「傑出」？

定義可以有很多種！

聖經上說：「當以基督耶穌的心為心。」

在耶穌的眼裡，那位不起眼的老婦人的生命竟是如此地優秀、美好。

在現代的社會，我們似乎已習慣於透過某些框框來定義「傑出、優秀」，習慣透過名與利的框框來界定傑出與優秀，其實，如果能跳脫功名主義的框框，可能會看見許多我們平時所看不到的傑出與優秀。

學習換顆心看世界，以基督耶穌的心為心，您也將會看見許多「平凡的偉人」。

【上帝的小叮嚀】

你們當以基督耶穌的心為心。（腓2:5）

清心的人有福了！因為他們必得見神。（太5:8）

>>January 5, 2006 at 3:38:05 AM GMT+8