2005 年 9 月 9 日 星期五 【晴】

琴日出左糧，今日緊係去買下野啦
因為之前ｄ糧都冇買過自己ｏ既野，果陣還左＄２０００比媽咪，之前佢借錢買電話
又交左＄３０００學費，返工又要食飯，結果頭２個月ｄ糧冇咩點剩．．．
只係買左一對＄１８０咖啡色出街鞋

今次ｄ錢就真真正正係屬於自己，好有大個仔ｏ既感覺
因為我想讀書果度由自己親自負責，所以都比左＄１０００媽咪補返佢出果份學費
跟住我就出左去買野，先買左一個背囊（因為冇書包返學）－－＄１７４
之後又買左條橙黃色波褲－－＄９７（好似貴左ｄ）
最後買左對黑色籃球鞋（第一次擁有自己ｏ既籃球鞋）－－＄４１９
好有ｓｈｏｐｐｉｎｇ　ｏ既感覺～

其實仲有好多好多野想買，不過都係慳返ｄ先
等以後讀書有ｄ成績再買野黎鼓勵一下自己

>>September 10, 2005 at 5:54:52 PM GMT+8

2005 年 9 月 8 日 星期四 【晴】

今日係我出糧ｏ既大日子
一早起身就出發去葵興公司，行返條路真係有ｄ懷念
返到去好多人都執緊件，個個都係咁叫我幫手．．．＞．＜

今次出左５０００千幾蚊，我只能夠話區長真係好人，夠義氣～
詳情呢度唔方便講喇，但係真係好ｈａｐｐｙ

之後行去新都會恒生拎錢，順便幫ｄ同事入票
跟住就返屋企訓覺．．．ｚｚｚｚｚ．．．

>>September 9, 2005 at 6:48:47 PM GMT+8

2005 年 9 月 7 日 星期三 【晴】

琴晚好夜先訓，今朝又要一早起身去ＩＶＥ聽講座
９：００出門口，９：３０岩岩好去到
今次係聽Ｄ有關我個課程Ｄ資料，都係好悶ｏ既一個早上
果度坐左４１３０４同４１３０４ａ兩個ｃｏｕｒｓｅ總共４班ｏ既學生
出席講座大約有７０人啦，但係只有４個女仔，而我果班就有２個
其中一個註冊果日見過，ｏｋ靚啦，我見佢係咁比ｄ男仔搭訕
不過佢好可惜，我係讀書人，對返學識女仔冇咩興趣，哈哈．．．

之後就有派ｔｉｍｅ　ｔａｂｌｅ，同遊覽下成個ｉｖｅ
最後１２點先走得，之後返屋企ｓｌｅｅｐ

一起身個胃就開始唔舒服，唔知係胃定係肚，好似塞住左咁
可能係琴晚打邊爐食太多野，消化唔黎，去到６點幾好返ｄ
之後食左ｄ野就出去青衣打波．．．

今次冇上次咁準，而且冇咩ｍｏｏｄ
打到１０：３０熄燈就走喇

>>September 8, 2005 at 5:37:03 PM GMT+8

2005 年 9 月 6 日 星期二 【晴】

今日下午２：００要去ＩＶＥ迎新，所以我１：３０就出門口喇．．．
去到搵左一陣先搵到Ａ１０９室，之後入去聽野
我最初以為迎新係好輕鬆，而且有野玩果種，但係示來只係齋聽

聽呀聽，聽到３點幾就填問卷調查，咁我又冇帶筆，唔知點算好
隔離個男仔又問我借筆，我就話我冇喇
之後佢問前面個女仔借，個女仔就借左比佢；咁我都試下啦，又問個女仔借，但係個女仔話趕時間，唔借．．．＞．＜
跟住隔離果個男仔填完之後仲笑住同我講拜拜．．．
唉，我真係冇女仔緣．．．

返到屋企之後阿Ｐａｔ打比我，話同我補祝生日
其實都過左成個月啦，補唔補都冇咩所謂，不過有餐飯食下，又可以聚下舊
本來我諗住打比左輪話今晚唔打波，但係咁ｏ岩左輪又打黎話聽晚先打，實在太好喇

我７點去到新都會搵佢地，有我，ｐａｔ，銳哥３個
之後決定去荃灣打邊爐，因為未夠鐘，所以我地去左南豐ｋｆｃ果度坐
而且銳哥識人，可以有免費野食，食左雞翼，薯塊同汽水

去到９點，我地搵到一間叫彩年華ｏ既酒樓打邊爐
一開始係咁食肥牛，同ｄ餃子
食完再寫，寫完再食，又叫左ｄ奇怪野
食食下越黎越飽，ｄ野食又係咁黎，都唔知點算好．．．
最後食到１１：３０，食剩好多野就走左

之後同由荃灣阿ｐａｔ行返去，佢行返葵盛，我行返葵芳
半個鐘都唔洗就返到，咁就慳返＄３喇．．．

>>September 7, 2005 at 6:43:41 PM GMT+8

2005 年 9 月 4 日 星期日 【晴】

今日成日ｏ係屋企都冇咩野做
之後左輪約我打波我就出左去喇．．．

得我，左輪同軒爺３個
我地去左青泰苑打，果度好多人，但係好多都係細佬仔
打左一陣先有人黎跟隊

今日又係好準，我次次離開閩僑就會好準，唔知點解．．．
加上ｄ人閩僑同文娛咁勁，冇所以大部份時間都贏波
最後４點幾打到７點幾就走喇

>>September 5, 2005 at 5:56:20 PM GMT+8

2005 年 9 月 3 日 星期六 【晴】

琴晚ｋａｉ豪約我今日去７ｂ聚餐
咁我以為一定有好多人就應承左喇．．．
但係我１２：３０去到地鐵站發現一個人都冇，仲以為我遲大到ｔｉｍ
原來佢地去晒ｐｉｚｚａ　ｈｕｔ果度

今日７ｂ聚餐有我，ｋａｉ豪，ｙ文，ｍｉｋｅ，ｆａｎｎｙ，ｓｔｅｌｌａ，ｌｉｎｇ，ｋａｒｅｎ，ｃｉｎｄｙ同ｍａｙ，１０個人

又係一個比較冷門ｏ既陣容，我去到都唔知講ｄ咩好
我地叫左２個大批，２個飯，１個意粉，一個麵包條，２ｊａｒ汽水
之後又傾下計，又講下有關大學ｏ既鬼故事
有個就有關飲牛尾湯，點知ｓｔｅｌｌａ講左牛鞭，超好笑
不過我諗緊如果果陣個女仔係煲牛鞭湯個男仔一定好補

最後食下食下，食到３點幾就走喇
佢地好似仲有地方去，不過我都係返左屋企訓覺．．．

>>September 4, 2005 at 5:48:54 PM GMT+8

2005 年 9 月 2 日 星期五 【晴】

今晚去左青衣打波，食左ｄ野先，６：３０出門口
打左成晚都係同自己人打，賣野飲個阿嬸又冇黎．．．
最後打到１０：３０熄燈就比傻威拉左去搭ｍｔｒ
我成身汗，條褲又濕，又走去迫地鐵攪到超尷尬．．

>>September 4, 2005 at 5:50:15 PM GMT+8

2005 年 8 月 31 日 星期三 【晴】

今日去左青衣城睇戲，有我，圈，ｋ樂，ｒｏｃｋｙ
我地３：３０去到，最後決定左睇「驚心洞嚇」．．．

講一班人去一個洞探索，之後遇到．．．．

最後套戲好似留左ｄ伏筆，應該有第２集
睇完之後去左買麥當勞雪糕，跟住去左海旁玩

玩到大約７點就走喇．．．

>>September 2, 2005 at 12:01:46 PM GMT+8

2005 年 8 月 30 日 星期二 【晴】

今日本來諗住阿昆屋企，但係一起身背脊好似著左火咁
所以就唔去喇．．．
之後ｏ係屋企一邊ｆｕｌｌ冰一邊打機

>>September 2, 2005 at 11:54:05 AM GMT+8

2005 年 8 月 29 日 星期一 【晴】

今日係去赤柱玩ｏ既日子，我大約１０點幾起身
起身之後先執野，之後再食個杯麵，１１點幾就出門口
搭ｍｔｒ去到荔景之後我先知原來我係最後一個．．．

我地話咁快就去到金鐘，等埋ｎｉｃｏｌｅ之後就齊人喇
有我，圈，傻威，左輪，ｒｏｃｋｙ，ｋ樂，ｙ文，大佬，ｂｅｔｔｙ，ｃｈｅｒｒｙ同ｎｉｃｏｌｅ．．．

跟住我地坐ｂｕｓ去赤柱，落車之後就買水同ｄ包就去沙灘喇
原本諗住去聖司提反灣，但係行錯路去左正灘
冇辦法啦，好過冇
我同ｄ男仔一去到就換衫游出浮台，去到超舒服，晒左陣太陽．．．
之後我，ｒｏｃｋｙ，左輪同傻威就游返去，輪到我地睇住ｄ野
我地玩左一陣車大炮，然後傻威又游返出去
結果我地只係晒太陽同傾計．．．

一晒就晒左２個幾鐘，成身都有ｄ痛
見佢地咁耐都未返，我地就決定整蠱佢地．．．
我拎左傻威同圈個袋去第２度，諗住嚇下佢地
但係我又想快ｄ落水，於是又拿拿聲拎返個袋比佢地

之後得返我，ｒｏｃｋｙ同左輪游水，其他人去左霸爐同買野
我地見到好多海參，成個海床都係，不過我覺得好核突
跟住我又去搵石仔，但係冇咩特別貨色．．．

游左一陣我地都上返岸沖涼，ｄ水好凍，不過好正
沖完之後就去ｗｅｌｌｃｏｍｅ幫手拎野
返到沙灘就開始ｂｂｑ喇．．．

好彩隔離有人走，我地爐都唔洗起
燒到天黑之後有個阿伯黎ｓｅｌｌ火水燈
佢話＄８０一晚，我地還價＄５０，咁就ｏｋ
我咩都燒左ｄ，又飲左好多汽水
燒呀燒，燒到大約１０點幾就返去喇．．．

我地坐ｂｕｓ，坐完ｂｕｓ坐ｍｔｒ
１１點幾先返到屋企．．．

（背脊好痛呀！！！！＞．＜）

>>August 31, 2005 at 6:06:22 PM GMT+8