2006 年 6 月 15 日 星期四 【晴】

經過琴晚ｏ既比賽，結果只係中瑞典果場，令人失望
我諗我係時候收手喇，要見好就收，如果唔係會輸返轉頭

因為最近好少訓覺，所以今日一訓就訓到下午５，６點先起身
起身之後已經食夜晚果餐，總共冇左２餐．．．
食完就去青衣打波，最近都只係得６，７個人
而今次有我，左輪，占士，阿方，富華，圈，軒爺，ｒｏｃｋｙ
不過今日水準好唔穩定，贏過１０比０又輸過１０比０
總括黎講都ｏｋ．．．．

另一方面，我根據ｃｍ入面ｏ既數據分類，將佢地轉為籃球ｏ既數據，自己加減左一ｄ
以下係我自己評估ｏ既數據，２０分係最高（大概都可以去到ｎｂａ水準）


技術－－－－－－－Technical
－－－－－－－－－－－－－－－－－－－－－－－－－－－－－－－－－－－
運球－－－－－－－Dribbling...............................................＞２
過人－－－－－－－Crossing..............................................＞２
假動作－－－－－－Feinting................................................＞１
命中率（上籃）－－Shooting Accuracy(running shot)......＞５
命中率（籃底）－－Shooting Accuracy(lay up)................＞８
命中率（中距離）－Shooting Accuracy(mid dist)..............＞１１
命中率（三分球）－Shooting Accuracy(3 pt)....................＞１
搶籃板－－－－－－Rebound.............................................＞７
傳球－－－－－－－Pass Accuracy...................................＞８
偷波－－－－－－－Stealing...............................................＞２
封波－－－－－－－Blocking..............................................＞４
防守－－－－－－－Marking...............................................＞７
－－－－－－－－－－－－－－－－－－－－－－－－－－－－－－－－－－－
體質－－－－－－－Phyiscal
－－－－－－－－－－－－－－－－－－－－－－－－－－－－－－－－－－－
身高－－－－－－－Heigh.................................................＞１１
身位－－－－－－－Body..................................................＞８
彈跳力－－－－－－Jumping.............................................＞４
速度－－－－－－－Movement..........................................＞５
爆炸力－－－－－－Asseleration......................................＞３
反應－－－－－－－Relax.................................................＞５
力量－－－－－－－Strength............................................＞８
平衡－－－－－－－Balance.............................................＞１１
柔軟度－－－－－－Flexible..............................................＞４
體能－－－－－－－Stamina.............................................＞７
－－－－－－－－－－－－－－－－－－－－－－－－－－－－－－－－－－－
意識－－－－－－－Inelligence
－－－－－－－－－－－－－－－－－－－－－－－－－－－－－－－－－－－
創造力－－－－－－Creativity...........................................＞６
判斷－－－－－－－Decision Making................................＞４
走位－－－－－－－Positioning.........................................＞７
視野－－－－－－－Vision................................................＞１０
合作性－－－－－－Teamwork.........................................＞７
集中－－－－－－－Concentration....................................＞１１
戰術性－－－－－－Consistence......................................＞５
領導才能－－－－－Leadership........................................＞２
－－－－－－－－－－－－－－－－－－－－－－－－－－－－－－－－－－－
心理－－－－－－－Temperament
－－－－－－－－－－－－－－－－－－－－－－－－－－－－－－－－－－－
勇氣－－－－－－－Bravery.............................................＞１１
信心－－－－－－－Confidence........................................＞１４
侵略性－－－－－－Aggression........................................＞１０
服從－－－－－－－Obey..................................................＞１１
－－－－－－－－－－－－－－－－－－－－－－－－－－－－－－－－－－－
天份－－－－－－－Talent
－－－－－－－－－－－－－－－－－－－－－－－－－－－－－－－－－－－
天才（進步速度）－Flair....................................................＞３
潛力（進步空間）－Potenial..............................................＞７
可塑性－－－－－－Versatility..........................................＞５
－－－－－－－－－－－－－－－－－－－－－－－－－－－－－－－－－－－

ｏ係ｃｍ入面技巧同體質就最易提高
而意識係靠經驗，心理同天份就好難改
所以我ｏ既目標就係提高運球同埋過人，其他就慢慢鍛鍊
我宜家已經成為ｃｍ入面ｏ既一個球員

>>June 17, 2006 at 5:02:16 AM GMT+8

2006 年 6 月 14 日 星期三 【晴】

今日係考最後一科ｏ既日子，就係ｄａｔａｂａｓｅ
因為上星期黑雨，所以宜家先補考．．．．

講返琴晚真係犀利，我終於明白點解睇波會心臟病發，果ｄ人一定有買波
之前南韓反敗為勝唔講啦，突尼西亞對沙特阿拉伯果場心血少ｄ都唔掂
本來２隊１：１ｏ既時候，我心諗又可以過一關
點知沙特阿拉伯個艾查巴８４分鐘入多一球，睇到我成個彈起左
誰不知突尼西亞最最最後一擊一頭頂入，追平２：２，真係好彩～

之後睇埋德國對波蘭果場，我買左德國讓１球和波蘭
呢場波都幾精彩，德國其實都唔係差，佢入４強一ｄ都唔出奇
去到９０分鐘雙方都仲係０：０，德國又有攻門
先係高路斯射中楣，波歷克補射再中楣，我心諗：咁唔好彩！？不過冇得怨啦，中２關上天已經對我不薄
但係之後奧當高補射入網，我即刻叫左出黎，好呀～又中３串７喇！！！
點知個球證原來吹罰左先，入球無效．．．．真係一啖砂糖一啖屎．．．
直到我心灰意冷之際，奧當高右路出波，紐維利門前撞入
ｏ係果一刻，我反應出奇冷靜，睇睇係咪越位先（通常呢ｄ情況好易越位）
唔係喎，奧當高落到底線先出波，應該冇越位喎
球證又冇吹罰喎，咁係咪即係入左呢？
係呀！！入左喇～入左喇！！！
今次食完砂糖，再食完屎，終於又食返砂糖喇．．．

之後我一直訓唔著，等夠鐘，沖個涼就去考試

講返考試先，對於呢一科本來好有信心，但係最近都冇咩時間溫書，有ｄ驚
去到試場冇睇座位表就入左去，我最初以為好少人，一望就知坐邊
但係今日就好多人，好難先搵到個空位，於是我就坐左埋去喇
跟住考試開始，我就開始做啦，做做下個阿ｓｉｒ黎ｃｈｅｃｋ學生證先知我坐錯位
之後ｏ係眾目睽睽之下帶我去返正確個位，個個都望住，真係好尷尬．．．

今次份卷比以前ｏ既ｔｅｓｔ難好多，有ｄ都冇諗過佢會出，ｄ題目唔係咁正路
最後用左１個鐘多ｄ就完成喇，因為唔識就唔識，迫都冇用
我諗應該合格，但係唔會高分．．．．

回家途中又去左馬會整多條３串７，最近都唔知行咩運，買左９關中左８關
如果一個人ｏ既運氣係有限的話，咁我恐怕已經去左一截．．．．
另一方面，因為第一次買果陣我家姐同細佬都有夾錢，而第２次就用第１次贏ｏ既錢買
第３次就用第２次贏ｏ既錢買，所以３次派彩都好唔願意地比佢地分左一筆
今次又黎，買左：
厄瓜多爾ｖｓ哥斯達黎加－－－－－－－－＞和（３．２５倍）
瑞典ｖｓ巴拉圭－－－－－－－－－－－－＞瑞典（１．９５倍）
墨西哥（－１）ｖｓ安哥拉（＋１）－－－＞和（３．５０倍）

（到截稿為止，第一關已經過唔到．．．＞＜）

返到屋企訓左一陣，訓醒之後就出左去打波，同阿ｐａｔ，銳哥，銳哥個ｆｄ
我地去左大場打，可能係唔夠訓ｏ既關係，個人軟綿綿咁，手脚酸痛，跑得又慢，成為隊中ｏ既負累
最後打左５，６場啦，打到熄燈就走喇．．．．

之後返到屋企沖個靚涼，開定汽水諗住睇英格蘭對特立尼特和多巴哥
但係部電腦ｌｏａｄ極都ｌｏａｄ唔到，等到我火都黎
最後一個ｍｉｎｉ　ｓｅｃｏｎｄ都睇唔到．．．．＞＜
踢完大約１５分鐘啦，又ｌｏａｄ到入去喎，可能係場波太多人去睇

宜家等緊睇瑞典對巴拉圭．．．．

>>June 15, 2006 at 7:04:19 PM GMT+8

2006 年 6 月 13 日 星期二 【晴】

世界盃！！！世界盃！！！世界盃呀！！！！
一齊感受世界盃ｏ既熱情啦！！！

最近個心都只有世界盃，仲有一科ｄａｔａｂａｓｅ要考都唔理喇．．．
不過冇人陪我出街睇波，宜家淨係留ｏ係屋企用ｐｐｓｔｒｅａｍ睇
但係好似越黎越多人睇，ｃｏｎｎｅｃｔ都要ｃｏｎｎｅｃｔ幾個字
中間又好ｌａｇ，如果有球員長傳會見到好多個波．．．

雖然係咁，總好過冇啦，ｃａｂｌｅ－ｔｖ咁貴，係佢迫我咁樣做架．．．
除左睇波，最近運氣好，都有買下波，之前６關中左５關，超爽～
所以琴日又執返劑，又係３串７：
南韓ｖｓ多哥－－－－－－－－－＞南韓嬴（２．００倍）
突尼西亞ｖｓ沙特阿拉伯－－－－＞和（３．２０倍）
德國（－１）ｖｓ波蘭（＋１）－＞和（３．６０倍）
已經又過左南韓果關，哈哈～～

>>June 14, 2006 at 4:21:03 PM GMT+8

2006 年 6 月 11 日 星期日 【晴】

今日又要考試，考最難ｏ既ａｄｖａｎｃｅｄ　ｐｒｏｇｒａｍｍｉｎｇ
亦係我溫得最少ｏ既一科，因為無從入手．．．

琴晚雖然睇晒ｄ　ｎｏｔｅｓ，但係就好似發左場夢咁
１０點鐘起身背左ｄ重點，食少少野就出發喇
去到遲左ｄ，冇諗過等車果陣等咁耐
之後打開份卷，係２種好極端ｏ既題目，一ｄ係送分，一ｄ係根本我知識範圍入面毫無資料
先做晒送分果ｄ，計計下都有差唔多３０分，跟住果ｄ就只好發揮我ｏ既創意
最後寫左ｄ我自己都唔明ｏ既ｐｒｏｇｒａｍ出黎，阿ｓｉｒ睇到可能嚇死佢．．．

考１：３０至３：３０，做完仲有時間剩，又唔想早走，唯有等收卷
之後同ｄ同學去左食下午茶，都冇人知道ｄａｔａｂａｓｅ幾時補考．．．
食完就返屋企訓覺，訓到７點先起身，因為要出席小學同學ｏ既聚會

我差唔多８點先去到，真係唔好意思
今次聚會係去荃灣食韓燒，出現ｏ既有我，大勝，牛志，華子，絲襪女，阿君，倩娜
好似越黎越少人咁．．．．．
本來想大擦一餐架，不過生「飛滋」，淨係食好少肉，食左好多魚生同泡菜
大家好快就食甜品，我食左豆腐花，涼粉，西米露各一，但係我懷疑西米露有問題
唔知點解一食完就好飽，唔再想食其他野．．．

之後個個都掛住睇「火舞黃沙」，睇得好投入，而我就一邊食雪糕一邊睇
不知不覺食左３輪，每輪３－４個球，但係好味，冇辦法
睇完「火舞黃沙」之後，亦係我地埋單走人ｏ既時候

最後返到屋企都１１點幾喇．．．．

繼上次買波之後琴日再度出擊，又係買左３串７
葡萄牙（－１）ｖｓ安哥拉（＋１）－－－－－＞和（３．５５倍）
澳洲ｖｓ日本－－－－－－－－－－－－－－－＞和（３．１０倍）
美國ｖｓ捷克－－－－－－－－－－－－－－－＞捷克（１．９０倍）
最後中左葡萄牙同捷克２關，有＄１１８，哈哈～好過冇

>>June 12, 2006 at 6:22:53 PM GMT+8

2006 年 6 月 9 日 星期五 【晴】

琴晚睇完德國之後，心情久久不能平伏，唯有溫返陣書先
不過因為開住電腦ｏ既關係，都集中唔到溫書，掛住玩ｃｍ足球經理人
發掘ｄ世界盃球星，我諗我中左世界盃毒，不能自拔．．．．

結果去到朝早先覺得眼訓，之後先去左訓覺，訓到夜晚６，７點先起身
之後諗住約人去搵地方睇英格蘭，點知阿ｐａｔ就打黎話一齊去肥濃屋企睇波，太好喇～
跟住同阿ｐａｔ一齊去長沙彎再等埋趙銳先上肥濃果度
上度去其他人都未到，得肥濃同ｐｏｌｙ，懷著緊張ｏ既心情等待英格蘭對巴拉圭開波

之後９點正準時開波，打左幾分鐘英格蘭就已經有波入，碧咸開罰球，巴拉圭ｏ既甘馬拉擺鳥龍
本來以為英格蘭會大勝，但係之後佢地踢得好保守，兩隊都有ｄ老鼠拉龜
最後１：０完場，而我又過一關，真係皆大歡喜

跟住等下一場果陣我地打左陣麻雀，打友誼牌，有我，ｐａｔ，肥濃同ｐｏｌｙ
淨係玩做掌上壓，肥濃最慘，佢輸又要做，ｐｏｌｙ輸又要佢做，哈哈～～
不過ｐｏｌｙ好鬼攪笑，有一次阿ｐａｔ出銃唔食，食左肥濃，可能佢睇唔到阿ｐａｔ出啦
肥濃就慘啦，自已女朋友手指拗出唔拗入，唯有當減肥啦
跟住又有一次我好認真咁叫佢打白板（其實講笑），點知佢真係打比我食，攪到我都有ｄ唔好意思．．．

之後瑞典對特立尼達和多巴哥開波，家偉，阿ｍｉｕ同麥狗都黎左，好熱鬧
呢場波都幾好睇，兩隊ｄ攻勢都好入肉，比英格蘭果場有過之而無不及
雖然係咁，但係我地都淨係掛住打麻雀．．．
結果０：０打和，有ｄ意外

最後係阿根廷對科特廸瓦，如果我阿根廷贏一球咁我就中晒３關喇
起初我支持阿根廷，但係基斯普同沙維奧拿入左２球之後，我就轉去支持科特廸瓦
好彩杜奧巴夠朋友，臨完場之前幫科特廸瓦追返一球，哈哈～哇哈哈哈～
好波，真係好波～

睇完之後其他人都訓覺，而我，ｐａｔ，趙銳就得到６點搭車走，返到屋企就狂訓．．ｚｚｚ

>>June 11, 2006 at 11:19:57 AM GMT+8

2006 年 6 月 8 日 星期四 【晴】

今日係４年一度世界盃開波ｏ既日子，雖然冇有線，但係心情好興奮．．．
最可惜最近考試，簡直大煞風景
不過今日黑雨，考試取消，哈哈哈～～～

夜晚去左青衣城睇戲，經過馬會，忍唔住買左注３串７
德國（－１）ｖｓ哥斯達黎加　＜－－－－德國（１．６５倍）
英格蘭（－１）ｖｓ巴拉圭　＜－－－－－和（３．３５倍）
阿根廷（－１）ｖｓ科特廸瓦　＜－－－－和（３．３倍）
只係買左＄７０，但係中晒有＄５００，希望發返個橫財～

之後去麥當勞搵埋佢地就入場喇，今日出場陣容有我，ｋａｉ豪，左輪，阿昆，傻威
去睇變種特攻３之兩極爭霸，好似幾正咁
整套戲都好精彩，好緊湊，最後狼人殺左阿珍有ｄ意外
如果我有飛行ｏ既能力就好喇，可以飛去德國睇世界盃！！！

睇完之後去左麥當勞坐一陣，傻威講ｄ野實在太好笑，笑到停唔到
坐到大約１１：３０就走ｌｕ，因為要返去睇世界盃

返到去之後開定花生等開波，開波６分鐘德國就有入波，係拿姆！！
我玩ｃｍ果陣成日都買拿姆架，估唔到佢表現真係咁好
不過好快就比雲祖柏追返一球，但係高路斯又拉開２：１
１７分鐘就有３個入球，真係扣人心弦，抵睇！！！

上半場亦以呢個比數做終結，距離我買果注仲差１球，德國要ｏ趙多球先掂
好在下半場高路斯又整多粒，３比１，諗住穩陣過關ｏ既時候雲祖柏又攪亂檔，追返２：３
不過德國始終技勝一籌，芬寧斯８７分鐘射左球「謝拉特式」ｏ既世界波，４比２
哈哈～～哇哈哈～～～順利過到第一關！！！！

精彩，世界盃真係精彩，到宜家完全感受到世界盃令人廢寢忘餐，拋妻棄子ｏ既魅力～

>>June 9, 2006 at 7:15:44 PM GMT+8

2006 年 6 月 6 日 星期二 【晴】

今日考ｎｅｔｗｏｒｋ，因為琴晚去左打波ｏ既關係，只係局部溫左一ｄ
大約溫左５成啦，如果出中就發喇．．．

返到學校之後竟然搵唔到考試個課室，我都唔知點解，結果遲左３個字先入到去
之後開始做喇，ｓｅｃｔｉｏｎ　ａ出果ｄ有好多我都有溫，不過唔多記得
ｓｅｃｔｉｏｎ　ｂ　３選２，但係就有２條冇溫過
最後答左溫過果條同是但一條，我目標好明確，就係希望合格啦

夜晚阿ｐａｔ打比我話好想打波，咁我就出左去打啦
點知佢只係去黑地打，仲要得佢一個，淨係得訓練射波
不過有２個女仔一齊射波，哈哈～～仲一齊玩ｏ．ｕ．ｔ
但係佢地好早就走ｌｕ，我同阿ｐａｔ亦打多一陣就走

接住落黎星期五考ｄａｔａｂａｓｅ，算係最有信心ｏ既一科～

>>June 7, 2006 at 7:38:08 PM GMT+8

2006 年 6 月 5 日 星期一 【晴】

今日唔洗考試，休息一日，聽日再考ｎｅｔｗｏｒｋｉｎｇ
所以訓到好晏先起身，訓訓下個電話響，於是我就聽
又係「卡里福尼亞」打黎．．．

因為之前ｒｏｃｋｙ張紙寫左我個電話，所以我都估佢地會打黎
點知竟然係上次果個ｖｉｖｉａｎ打黎，佢應該唔知我係上次果個ｐｅｔｅｒ
如果唔係一定唔會咁好禮貌．．．．
今次佢又約我去西菜街果間搵佢，我心諗：睬你都傻，嘿嘿～～
上次已經見識過，況且張咭已經到手
不過我地有緣會再見，或者會碰頭，考完試去玩一次先～

夜晚去左文娛打波，有我，大贊，浩暉，聰聰，肥仔，ｋ樂，阿滔同波神
初頭去左同幾個阿叔打，唔知點解咁都會輸，我次次打親第一場都表現好差
之後都係自己人打自己人，終於有ｄ改善，但係同佢地唔係好夾
不過有樣野唔知點解，我ｏ係文娛可以將射程拉到三分線以外，ｏ係閩僑最多只係罰球線

打呀打，我至少打左７，８場，好耐未試過一次過打咁多
之後終於熄燈，我地就玩３分ｏ．ｕ．ｔ
今日我３分超準，應該有５成，就連我自己都冇辦法相信，不過都係要輸

最後買完野飲就走ｌｕ，話時話，０６年以黎都未去過文娛打波，上幾次都落雨
以後要黎多幾次先．．．

>>June 6, 2006 at 6:17:49 PM GMT+8

2006 年 6 月 4 日 星期日 【晴】

今日考第一科，考ＣＣＴ，全我都唔知係咩黎．．．
之前只係溫左一晚，有ｄ　ｔｏｐｉｃ都溫唔晒
不過都冇辦法啦，唯有聽天由命啦

入到試場坐低之後，見到個監考阿ｓｉｒ好似李樹鈿，都唔知係好事定壞事．．．
一派份卷，一睇左一次已經心知不妙喇，我溫果ｄ都唔中
ｍｃ有超過６成係撞架，ｓｑ又唔識，係ｌｑ出返我溫左果ｄ
到最後做左９個字就做完，對多１次就走ｌｕ，因為再坐落去都冇意思

之後同坤爺一齊行去搭ｖａｎ仔，同佢對下ｄ　ｍｃ
佢都話自己有ｄ係撞，但係對返ｎｏｔｅｓ，佢撞果ｄ又岩喎
我撞果ｄ幾乎錯晒．．．唉．．．＞＜

希望有５０％啦，因為我ｃａ好低分，一定要靠考試拉返高ｄ．．．．

>>June 6, 2006 at 5:55:15 PM GMT+8

2006 年 6 月 2 日 星期五 【晴】

我做寬頻果陣，認識到一種人，就係唔會登記但係又係咁問你野，賴死唔走
歷史上稱之為「橡皮龜」，同「兔仔」係完全相反，我都唔明點解ｄ行內術語要咁攪笑
但係今日，我竟然成為左「橡皮龜」．．．．

話說ｂｅｔｔｙ之前介紹我地去「加里褔尼亞」（健身果間）去試玩半個月
咁傻威，ｒｏｃｋｙ同我就約埋一齊去旺角拎張咭
首先我地去錯左一間，之後去返西洋菜街果間先係真
之後入左去搵阿何生，ｇｉｌｂｅｒｔ　ｈｏ，但係佢唔ｏ係度，變左由ｖｉｖｉａｎ招呼我地
佢一開始好熱情架，係咁問我地想有咩效果，又帶我地去參觀四周圍
我心諗：拎張咭ｏ者，唔洗咁麻煩掛．．．
之後ｖｉｖｉａｎ終於開始黎料，ｓｅｌｌ我地一個ｐｌａｎ
＄１９９入會費，＄４９９手續費，＄４９８月費，嘩．．．貴到嘔呀！！！
呢ｄ果然係有＄人ｏ既玩意，唔岩我．．．
我地當然話唔入會啦，點知佢都係咁ｓｅｌｌ，又問點解呢？
其實都估到唔會咁好啦，試玩半個月一定焗你入會架啦
網上行ｄ計劃都有啦，送ｍｏｏｖ比人玩一個月，之後唔ｃｕｔ就當你繼續用，收你＄＄
最後我地都係堅持唔入會，大家開始左一場比較智力，同忍耐力ｏ既生死戰

其實我地都唔想浪費佢時間，佢比左張咭我地咪冇事囉，點解佢要咁做
與此同時，我地又唔想白行一趟，睇下ｖｉｖｉａｎ仲有咩板斧都好
點知佢竟然「吹雞」，搵左個教練ｐａｔｉｃｋ黎左
大家一見面就楂楂手先，出到楂手呢招，好明顯佢ｏ既技巧比ｖｉｖｉａｎ高出好多
而且佢豎立左一種權威ｏ既型象，講一句影響力比ｖｉｖｉａｎ講１０句更大
佢先同我度脂肪比例，２３．１．．．．唔．．．唔．．．
比標準高，但係都ｏ係「可接受」範圍入面，之後又幫ｒｏｃｋｙ同傻威量血壓
又指出佢地唔少問題，就話做ｇｙｍ可以解決，又話學基本野要３ｗｅｅｋｓ
識得玩要３－６個月，咁講即係唔入會等於冇用啦
不過我地立場堅定，只係要求試玩，之後ｐａｔｉｃｋ好做作咁同ｖｉｖｉａｎ講左ｄ野就走左
而ｖｉｖｉａｎ又繼續ｓｅｌｌ，令到我地好想連試玩都唔要就走
不過佢地ｏ既做法即係講緊唔入會＝冇試玩ｏ者，令我好不滿
本來都唔想貪小便宜，但係為左啖氣，我地再同ｖｉｖｉａｎ周旋落去
目的只係想佢乖乖地拎３張比我地，我地亦乖乖離開，唔浪費佢寶貴ｏ既時間
之後佢終於忍唔住我地果種ｈｅａ佢ｏ既態度，同另一個同事拎３張咭出黎
然後又叫我地寫低朋友個電話，跟住又走開ｌｕ．．．

咁我地就亂寫左幾個電話比佢等佢返黎，點知佢一直都冇返過黎
直到有工作人員問「邊個同事幫緊你地架？」
我地就話ｖｉｖｉａｎ，之後開咪叫佢，佢先捨得返黎
不過佢竟然問我地「你地未走咩？我以為你地走左ｔｉｍ」
但係張咭佢又未簽名，都未用得，我地點走呀？？

最後佢終於幫我地簽返個名，我地就拎張咭走ｌｕ
足足攪左２個鐘呀！！！！

之後見到有人派咖啡，我地又排隊拎左一罐，本來諗住想拎多一罐架
但係竟然有工作人員認得我後面個阿叔拎過，唔派比個阿叔
所以我地打消左呢個念頭．．．．

飲完之後我地去左食吉野家下午茶，食完就返屋企喇．．．
（估唔到咁普通ｏ既一日，日記都打得咁長，因為要表揚ｖｉｖｉａｎ，冇辦法
不過我唔係暗串佢，佢ｏ既表現都唔錯，只不過係遇人不淑
希望我地走左之後佢開返幾張單啦）

>>June 4, 2006 at 9:10:56 AM GMT+8