2006 年 7 月 28 日 星期五 【晴】

今日訓到夜晚５點先起身，冇錯，係夜晚５點呀，訓左１５個鐘呀
幾乎將呢個星期唔夠訓ｏ既時間訓返晒，不過訓醒都仲係好眼訓

因為星期六冇櫃過黎，所以又唔洗返工
有ｄ無聊ｏ既一日，冇野做唯有打下機，出面又落雨，想出街都唔得
白白浪費左一日

>>July 30, 2006 at 6:33:06 AM GMT+8

2006 年 7 月 27 日 星期四 【晴】

今日又要返工，朝早冇咩野做，不過下晝有隻櫃入中電個倉，即係意味住我要入去ｑｃ
１２點就同阿賢跟阿明架車入去，好快又去到沙田

等貨櫃ｄ貨落晒黎，我ｏ既工作就開始喇
起初對張ｐｉｃｋｉｎｇ　ｌｉｓｔ，要睇２８隻「大炮」呀．．．
上次攪１９條大炮都幾乎做左一日，今次仲要得半晝
好彩之前做過，背晒所有ｉｔｅｍ，但係ｄ「大炮」又重，成２０幾ｋｇ
入面ｄｉｔｅｍ又亂晒，要逐樣搵，真係麻煩
仲要隻隻都冇問題，攪到我ｏ既工作好似可有可無咁

用左一個鐘ｑ左７隻，之後就去食下午茶，不過老闆唔ｏ係到，冇人請．．＞＜
返到去繼續做，ｑ到第１７隻果陣阿明同阿賢做晒野返黎幫手
佢地對付「大炮」，我對付其他
其他ｄ貨超簡單，又輕，入面又唔多野，基本上打開睇一睇就ｏｋ
最後做到５點幾終於做完，好彩有人幫手
之後坐阿明車返公司，然後就放工ｌｕ．．．

今日支力指數有７粒星星＊＊＊＊＊＊＊
隻手拎起個碗食飯都手震．．．

>>July 30, 2006 at 6:25:46 AM GMT+8

2006 年 7 月 26 日 星期三 【晴】

今日係返工以黎最舒服ｏ既一日，因為又唔洗入中電倉
上晝都係睇下報紙同雜誌，中午就幫老闆去交電話費同入票

然後就食埋飯先返，返到都係好悶，ｄ報紙又睇晒，財經都睇埋．．．
ｈｅａ左一陣ｃｏｎｎｉｅ就叫我再去長沙灣拎野
拎完返黎就走得ｌｕ，之後返屋企休息左陣，食左ｄ野，就出發去海濱花園打波，第一次～

我差唔多８點先去到，陣容有我，左輪，軒爺，昆，富華，方，音，肥雄，占士，ｋ樂
起初我打果幾場超準，準到不能再準，ｄ中距離通常一出手就知入唔入
但係今日好特別，明明ｆｅｅｌ到唔入都會入，穿針機會又高，爽～

不過呢個場有一個問題，就係ｄ人唔得，唔係球技唔得，而係種球品唔好
黎呢度打果ｄ人好多都係互相認識，變到好似佢地個「陀地場」咁
而我地一黎到就贏左佢地幾場，有ｄ踩場ｏ既感覺
可能佢地有ｄ唔高興，佢地成日ｏ係場邊多多野講，有時仲要大大聲笑
之後有ｄ後生仔加入佢地，有幾個都幾勁，我地開始輸返
而我亦冇左起初個勢，雖然唔想輸，但係都輸左，仲要跌親，碌左幾個圈，擦損左個「爭頭」

其實呢個場都唔錯，除左比較多蚊之外，四周環境都令人好舒服，又有飲水機，唔洗買水
最好就係多一ｄ唔識ｏ既人打，即係ｄ人係互不認識，咁果班阿叔就唔會乘機起哄，當個場係佢地咁

最後打刑１０點幾就走ｌｕ，好支力，日日都好支力．．．．

>>July 27, 2006 at 5:54:43 PM GMT+8

2006 年 7 月 25 日 星期二 【晴】

今日返工遲左ｄ，有ｄ唔好意思
之後跟ｔｏｎｙ車入沙田，要檢查７９件貨

不過今次要ｃｈｅｃｋ果ｄ好輕，得２組配件，冇上次「大炮」果ｄ咁辛苦
基本上只係拎出黎望一望就ｏｋ，最後ｃｈｅｃｋ到１件有問題，算係做到野
完成之後就坐４０ｘ返公司，返到去都食ｌｕｎｃｈ喇
今次又係老闆請，真係好～

下晝冇咩野做，ｃｏｎｎｉｅ姐就問我讀完書有咩打算，其實我都唔知點答佢好
我本身讀網絡，電訊果ｄ，老實講真係冇咩興趣，比我做呢行都做唔耐
而且呢行個出路又窄，搵唔搵到工都成問題
所以我讀完書都未必做電腦行業，至於做咩呢，暫時未有打算．．．
唯一ｏ既辦法就係接觸多ｄ唔同ｏ既工作，然後咩都試

傾左呢個問題好耐，之後就叫我送文件去長沙灣，因為之前去過一次
所以好快就完成，再打比ｃｏｎｎｉｅ果陣佢已經叫我收工喇
真係好，４點幾就收工

返到屋企好支力，訓到１０點先起身食飯，之後再訓過．．．

>>July 27, 2006 at 5:34:42 PM GMT+8

2006 年 7 月 24 日 星期一 【晴】

今朝ｃｏｎｎｉｅ話阿明架車有好多貨要上，叫我去幫手
所以今日做跟車，同阿賢跟阿明架車

我地去到醉酒灣個碼頭見到架貨櫃車已經等緊，我ｏ既工作就係將貨櫃車ｄ貨搬晒去阿明架車
但係今次ｄ貨冇得用「即車」推，要徒手搬，我見張收貨單上面大約有７００－８００箱野
佔左成個４０呎貨櫃幾乎２／３咁多位，睇見都驚

開始搬果陣有ｄ唔慣，就咁搬起隻手又包唔晒，放ｏ係膊頭又唔捱得好耐
放ｏ係地下又推唔郁，最後試左好多個姿勢，一個支力就換第２個
搬呀搬，搬呀搬．．．間唔中又停下飲下水，由９點搬到１２點幾終於搬晒
好彩阿剛同阿源做完佢地ｄ野都有黎幫拖，如果唔係，得我，阿明，阿賢都唔知要搬到幾時
第一次做呢ｄ工作，真係好辛苦，又支力，又熱．．．

做晒之後就跟阿剛架車返公司，同老闆佢地食ｌｕｎｃｈ，又係佢地請，真係好～
下晝冇咩野做，都係ｄ雜務，等到５點幾就放工喇．．．
下晝冇

>>July 25, 2006 at 5:19:44 PM GMT+8

2006 年 7 月 23 日 星期日 【晴】

今日跟阿明，阿賢入中電個倉ｑ貨，８點半就返到公司
坐阿明架車去沙田，去到有２架貨櫃車等緊，而我就負責ｑ入面ｄ貨

因為個倉已經有幾架車，架貨櫃車又要向後入黎，個司機試左幾次先試岩個位
其實都好講技巧，只係得１－２米比佢走盞，最後慢慢入，終於入左黎
之後大家就幫手落ｄ貨出黎，２隻４０呎貨櫃都幾乎滿晒，好彩係用「即車」
如果唔係一定搬到聽朝，佢地一邊搬，我就一邊對ｄ貨ｏ既號碼，然後拆開黎ｑ
起初我ｑ左ｄ「大炮」先，因為最多係佢，每隻都好重，入面又多零件
對左好耐，又數下入面ｄ野，成個上晝都只係ｑ左８隻

到左下晝，我幾乎背晒果隻「大炮」入面會有咩ｉｔｅｍ，每ｉｔｅｍ有幾多件
好快就ｑ晒１９隻，之後再ｑ其他，因為數量太多太多，我根本做唔晒
所以阿明都幫手，最後勉強完成

之後跟阿明車返公司，又打埋個ｒｅｐｏｒｔ，照返ｐａｃｋｉｎｇ　ｌｉｓｔ打
好快就完成，其他人都陸續返黎，老闆又請食下午茶，今日２餐都有人請，真係好～

今日比上星期支力好多，如果日日都係咁都幾辛苦．．．

放左工之後返屋企飲左ｄ水，換左件衫就去左青衣打波
陣容有我，左輪，圈，昆，肥雄，占士，軒爺，浩賢，音，ｋ樂，ｒｏｃｋｙ
我去到之後就打全場，唔知點解，成個人好似唔屬於自己咁
個腦有ｄ空白，一接到個波就冇咩意識咁射出去或者傳比人
係要跑緊果陣先清醒ｄ．．．．

今日買左２枝水都完全唔夠飲，大家都唔打到熄燈就走喇．．．

>>July 25, 2006 at 5:04:53 PM GMT+8

2006 年 7 月 22 日 星期六 【晴】

今日終於可以訓到好晏先起身，宜家基本上星期一至五都唔夠訓
係星期六晚一炮過訓返十幾個鐘．．．

大約下晝４，５點我先開始有返ｄ知覺，之後阿圈話去書展，咁我緊係去啦
夜晚就出發去書展舒展筋骨，等齊人之後坐地鐵去灣仔
陣容有我，ｋａｉ豪，ｒｏｃｋｙ，傻威，左輪，昆，ｃｈｅｒｒｙ，大佬，圈，ｂｕｂｕ
有新成員加入～
ｏ係會展買飛入場，入面都唔係好多人，我地先分開行
我，左輪，ｒｏｃｋｙ一齊行，第一個目標就係兒童天地
搵左好耐先比我地搵到，入面都係ｄ比小朋友學野ｏ既書，冇咩可以玩ｏ既
但係都搵到ｄ卡通ｄｖｄ同海報，仲有ｄ用木整ｏ既模型建築物
最後我買左個巴黎鐵塔，＄３２，不過之後搵到一間好似平ｄ．．．＞＜

行到１０點幾，大家都覺得好支力，可能打左２日波，對腳冇晒力
傾左一陣之後決定去食巴西燒烤，於是就搭地鐵去尖沙咀，都未坐定，大家已經出晒去拎野食
好似１０年冇食野咁，我起初食好多肉，食食下就食甜品，正～
雖然野食種類唔多，但係好味，又唔係貴，唔錯唔錯

食完就一齊坐地鐵回家了～

>>July 25, 2006 at 4:37:23 PM GMT+8

2006 年 7 月 21 日 星期五 【晴】

今日放假，唔洗返工，但係竟然有ｄ唔習慣，好想搵ｄ野做
起左身之後唯有打下機，到左夜晚先再出去打波

基本上都係琴晚ｏ既陣容，有我，阿ｐａｔ，肥濃，阿潘
今晚再加埋銳哥，就連ｉｖａｎ都有黎，好耐未同過佢打波
因為初頭唔夠人，大場又多人，我地就上左黑地打，點知黑地一個人都冇
我地只好自己人打，起初２打２，輪住打
到阿潘黎左先可以３打３，打左３，４場，打到冇晒力
直到熄燈為止都冇人上黎打．．．．

打完之後本來想一齊去飲野，不過打完波成身汗，唯有買野去球場飲
我地買左１枝煎酒同３枝汽水，諗住溝黎飲
我果杯份量好少，１份煎酒加５，６份汽水，飲落去都係汽水味
但係又有飲左酒ｏ既感覺，幾過癮～

我地又玩返講真話ｏ既遊戲，聽到唔少新野，哈哈～
最後坐下，傾下計，２點幾先返屋企．．．

>>July 23, 2006 at 8:06:20 AM GMT+8

2006 年 7 月 20 日 星期四 【晴】

今日又係返工，不知不覺返左５日喇～
朝早就先幫ｃｏｎｎｉｅ姐去旺角拎電話，因為佢琴晚拎左去整

我大約１０點半去到門市果度，但係維修部仲未開
於是我就等到佢開，佢開完之後又要排隊，排左差唔多半個鐘先到我
攪左一陣，終於拎返部電話，差唔多１２點先返到公司
好在之後都冇咩野做，都係跟張ｌｉｓｔ執ｄ貨，點下數咁

去到晏晝，ｄ司機又返晒黎打麻雀，同佢地一齊叫左外賣，佢地話個排骨菜飯好味
所以我又跟住佢地叫左一個，原來真係好正
果ｄ肉又唔似排骨喎，似豬排多ｄ，但係好香，好有口感
好食過我前幾日都幫襯ｏ既果間茶仔

下晝冇咩野做，又係跟張ｌｉｓｔ執ｄ貨出黎比司機車走
睇下雜誌，又睇下報紙，咁又一日

夜晚肥濃約打波，其實我有ｄ乏力，不過都出左去
有我，ｐａｔ，阿潘，同肥濃，去到大場超多人
每個場都５，６隊，最後唯上左去黑地打，但係都好多人
只係得返個細場比人射下波，之後我地就ｏ係果個場同３個ｏ靚仔打左幾場
贏得都幾輕鬆，因為我地高度屈晒機．．．

打到熄燈之後就玩左１ｏｎ１，同３分ｏｕｔ
今日我３分奇準，我發覺我間唔中就會有神來之筆～
玩左陣之後又傾多陣計，傾完之後就走ｌｕ，好支力．．．．

>>July 22, 2006 at 7:53:33 AM GMT+8

2006 年 7 月 19 日 星期三 【晴】

今日總算有多ｄ野做，上晝對晒成個倉ｄ貨同數目
要爬黎爬去，我諗之前已經有人對過，因為ｄ貨排得又好，數目又岩
ｃｏｎｎｉｅ叫我對一次應該想我熟識下邊ｄ貨擺邊個位掛．．．

搵下搵下，不知不覺就攪到１１點幾，之後做返之前個ｒｅｐｏｒｔ
又入返電腦，ｄ工作簡單不過重覆

打好晒之後就食ｌｕｎｃｈ，食完就去觀塘送文件同埋拎ｄ野
好快亦都完成左，多得以前做過速遞，對ｄ工商地方都有ｄ認識
我見冇咩野做，就去左波鞋ｏ既倉睇下，唔．．唔．．好想買，不過冇錢

睇左一陣就返去，返到去２個老闆都唔ｏ係度，我就ｑ下以前果ｄ貨
攪到５點幾就走喇．．．

返做幾日，工作方面沒有問題，但係附近就冇咩休閒設施，商場又遠
不過有一樣野就幾好，就係多年輕ｏ既女仔返工，有ｄ１６，１７歲都有
可能又係暑期工，做下打字咁樣掛，我見佢地有ｄ質素都唔錯，有氣質
同以前ｏ係新都會見果ｄ係２碼子ｏ既事
以前新都會果ｄ年紀大ｄ，佢地靚係因為化妝化得靚，著衫著得高貴
睇真ｄ就其實冇咩氣質可言，但係宜家ｄ工廠大廈又唔同喎
果ｄ後生女返工都係ｃａｓｕａｌ　ｗｅａｒ，好少會化妝，下下見真章
所以我一睇便知龍與鳳，咁唔知佢地又會點睇我呢？

係一個細個唔讀書，大個做運輸ｏ既人，定係一個勤力苦幹ｏ既年輕人呢？

>>July 20, 2006 at 3:56:00 PM GMT+8