2006 年 10 月 28 日 星期六 【晴】

今日又係打手球ｏ既日子，對手係南華
聽個名都知係勁野，係上年ｏ既第一

可能因為琴日燒完野食，訓得一般，起身之後都好似唔多夠訓
食左少少野之後，大約１２點半出門口，去到１點多ｄ，睇到卓麗對南青
元朗會同南青係今年ｏ既升班馬，如果我地要留ｏ係甲組就唔可以輸比佢地
不過呢個任務可能會好艱難，元朗會係勁我地已經知道
點知南青都唔差，就連卓麗都只係贏到佢地幾分
今年應該比上年更難打．．．

２點鐘到我地開波，今場有正選打，心情興奮
開波果陣我地都算有板有眼，打左１５分鐘南華都冇咩甜頭，佢地都只不過係贏緊５：２
當中我有２個黃金機會架，有一球傳到空晒，我淨係對住個龍門，不過射中佢隻腳
仲諗住可以聯賽開齋．．．

上半場之後ｏ既時間人地開始發力，我地兵敗如山倒
雖然感覺上佢地ｄ進攻冇之前打過果２隊咁有壓迫感，但係好有效率
而且防守好硬淨，我地ｄ進攻都打唔入去，結果上半場輸４：１８

到左下半場情況都係冇咩改善，始終連入９公尺ｏ既機會都冇
不過我終於都開到齋，係打快攻入，不過我更加想係打ｃｅｎｔｅｒ位果陣入
最後全場輸１０：４２，輸左足足３２分

如果計得失球，我地第一場輸３３分，第二場輸１８分，第三場輸３２分
總共係負８３球，上年比今年好得多．．．＞＜

打完之後就檢討，換衫，之後食左ｄ野又去睇比賽
係勇毅對元朗會，兩隊都好勁，以今日ｏ既表現黎講，元朗會比我地好唔少
不過我地並唔係上甲組玩下就落返去，我地顧超文會不斷進步

睇完波之後就返屋企休息，食左ｄ野又去左旺角買野
買完都成１０點幾，終於可以波屋企真正休息

>>October 30, 2006 at 8:10:05 PM GMT+8

2006 年 10 月 27 日 星期五 【晴】

今日係ｂｂｑ日子，興高采烈咁執野出發
當我３點９去到荔景地鐵站ｏ既時候，我仲想因為遲左３個字向大家道歉
點知佢地一個都未到，等左好耐先齊人

恐怕呢ｄ就係報應，係我成日遲到ｏ既報應．．．
最後到左ｏ既人有我，ｒｏｃｋｙ，ｋ樂，大佬，昆，朱
我地先坐地鐵去香港站，之後去惠康買左ｄ野就入深水灣
ｏ係車上面我拎左個波出黎玩，諗住頂下頭鎚，點知頂斜左，加上又剎車
個波一下子碌左去前面，碌左唔知去邊，跟住架車越上越多人
已經再冇辦法搵得返個波，繼ｐｅｔｅｒ仔之後，另一個波又離我而去

最後５點幾入到去深水灣，不過超多人，仲要個個爐都有人跟隊
之後我地一方面跟左隊先，另外我又同ｋ樂入赤柱搵下有冇爐
入到去之後情況都差唔多，果度仲要冇燈
唯有出返去深水灣，不過因為太肚餓ｏ既關係，我地買左ｄ野食食完先過返去

返到去之後玩左一陣ｕｎｏ就等到爐喇，我地火速透爐，火速燒，火速食
ｋａｉ豪，圈，ｂｕｂｕ，ｂｅｔｔｙ都先後到達
一邊食一邊傾計，感覺良好
而且旁邊就係海，我地可以餵下ｄ魚，因為一望落去超多魚毛
可能今日冇咩狀態，都食唔到好多野，只係集中食左ｄ丸
最後燒到１１點幾就走ｌｕ，時間掌握得好好，岩岩好東涌尾班車
返到屋企都１點幾，今日都幾好玩～

>>October 28, 2006 at 8:04:30 PM GMT+8

2006 年 10 月 26 日 星期四 【晴】

今日出奇地起到身返學，仲以為又再返唔到學
不過返到學校都係虛渡光陰．．．

之後返屋企再訓過，訓到差唔多又起身打波
又有半個月冇ｏ係青衣打波，一去到果陣好多人
要跟４，５隊先有得打，之後落陣雨
大家都離開晒球場，最後個天又停左雨，我地於是又上返球場再打過
其他人就冇咁醒，個個走晒，結果得返我地打

雖然個地有ｄ濕，我地都打左６打６ｏ既全場
打打下個地已經乾晒，越打越興奮
直至打到有阿ｓｉｒ黎到為止，原來上面有人投訴，話我地過左１１點仲打波
結果我地唯有歸家．．．

>>October 28, 2006 at 7:41:05 PM GMT+8

2006 年 10 月 25 日 星期三 【晴】

今日星期四，最悶ｏ既一日，因為兩堂都係講書
第一堂ｋｅｎ　ｌｅｅ聽到訓左覺，如果下晝果堂張椅子舒服ｄ，一定訓得仲好

夜晚出去同朋友飲野，因為ｉｖａｎ生日
已經係連續３年同佢慶祝，雖然佢連我幾時生日都唔知
佢年年生日都幾乎同飲酒有關，我唯有都係比下面佢，陪佢坐下
出席ｏ既人有我，ｉｖａｎ，ｐａｔ，肥濃同峰仔
ａｌａｎ竟然放飛機．．．

起初得我，ｉｖａｎ，ｐａｔ到左，我地先去左葵興食ｄ野
３個人食炒麵，腸炒食左廿幾蚊，已經食到好飽．．．
之後去左ｐａｃｉｆｉｃ坐低，見未人齊，佢地就叫左一ｓｅｔ啤酒飲
我事前已經講到明我係一杯起，兩杯止，但係佢地冇理過
玩骰盎果陣係咁夾埋黎做我，係咁灌我飲．．．
好彩肥濃同阿峰仔好快到左拯救我，如果唔係第二日一定返唔到學

齊人之後佢地開左枝「芝華士」，第二次接觸呢隻野
第一次又係同佢地飲，不過我上次１０份綠茶先１份酒
今次就係溝好晒，冇得偷雞

不過佢地變得好唔客氣，飲呀飲，咁就豪飲左一枝好酒
其實呢ｄ好野真係唔多岩我，比我飲係只係浪費．．．

最後都玩到唔知幾點就走，可能係ｄ酒精影響，個人好似好唔開心咁，有ｄ想喊．．．＞＜
都唔知點解會咁，唔通果一面先係真正ｏ既我！？

>>October 28, 2006 at 7:33:37 PM GMT+8

2006 年 10 月 21 日 星期六 【晴】

今日又係打手球ｏ既日子，對手係ｍａｙ’ｓ，上屆亞軍
打最後果場，夜晚９點幾先開波

食完飯就出左門口，去到球場我地ｄ人都到左幾個
不過都唔係好齊人，但係多左個幾勁龍門加入左我地，唔錯

熱左一陣身就開波，今日先坐冷板凳，可能係上場打得太差
今場做左ｃｅｎｔｅｒ第４個選擇，冇咩出場機會

一開波果陣依舊係比人連入幾球先，之後隊波先做到野
上半場都係打好多陣地，佢地又冇何郭佩珍果隊咁快，係傳好多波
直到空晒，好有把握先起手，而我地好多波都係死做入去
值得一提ｏ既係爛面傳左球靚波比我，不過高左ｄ
於是我就做個ｓｋｙｐｌａｙ，不過肥左好多，冇以前咁靈活
射就射到，不過出左界，呢個係我唯一ｏ既起手機會．．．＞＜．．．

上半場輸８：１７，到左下半場，情況同上半場差唔多
而我出場ｏ既時間更少，有ｄ冇心機．．．
最後全場輸１７：３５，算係咁啦

其實今場輸波係意料中事，重要ｏ既係打得比上一場好
希望之後果幾場都越打越好啦，期待下星期對南華

>>October 22, 2006 at 9:21:08 PM GMT+8

2006 年 10 月 20 日 星期五 【晴】

今日係星期六，唔洗返學，訓到好晏好晏先起身
成日無所事事，到夜晚就出左去打波

出席ｏ既有我，銳哥同阿ｐａｔ三個壯男
上左去黑地跟隊，對手普普通通，不過都係有贏有輸
最近可能耐冇打籃球，ｄ感覺係差少少

打完之後又去左公園吹水，傾下ｄ無聊野
１２點幾先返屋企．．．

>>October 22, 2006 at 9:08:48 PM GMT+8

2006 年 10 月 19 日 星期四 【晴】

今日一樣依舊，返學，放學
放左學就返屋企訓左陣

夜晚出席小學同學聚會，本來以為左輪會約打波
正當我徬徨無助ｏ既時候，左輪冇約到打波
咁我就可以心安理得咁去小學同學聚會

約左７點，油麻地等，大家都準時，之後我地上左ｃａｆｅ玩
出席會員有我，牛志，雞，君，絲襪女，肥華同黎左一陣ｏ既大勝
起初先叫野食，食飽之後就開始玩，玩左層層疊，七級豬
我七級豬竟然輸左！？就連我自己都有ｄ難以置信
只怪我出手唔夠狠，太仁慈了～
之後又玩左「心臟病」，好玩，不過又係我輸最多，唉．．．

最後玩呀玩，玩到１１點先走，坐地鐵返屋企

>>October 20, 2006 at 6:20:04 PM GMT+8

2006 年 10 月 18 日 星期三 【晴】

宜家ｏ既日記已經慢慢變返以前ｏ既週記
最初見個個朋友都用ｘａｎｇａ果陣曾經好有動力寫日記
不過時間耐左開始覺得冇咩心機打日記

並唔係冇時間打，而係冇咩特別野值得記低
每日ｏ既生活都只不過係返學，放學，打機，訓覺
成個人好似行屍走肉咁，暑假ｄ錢仲有少少淨，又唔想咁快搵兼職
之前想過搵ｄ興趣做下，又怕得三分鐘熱度

意志越黎越薄弱，返學走ｏ既堂越走越多
今個星期走左ｏ既堂幾乎同有上ｏ既堂差唔多
但係又唔係去左做ｄ有意義ｏ既野，都只不過係返屋企訓覺，打機．．
基本上我走堂阿ｓｉｒ都唔會知，亦唔會理，因為功課我係交到足
雖然過到佢果關，但係我卻有少少過唔到自己果關
有時ｏ係屋企訓醒之後又會有一種罪疚感，比錢返學又唔上堂
但係呢種感覺並冇成為我改過ｏ既動力
我諗我就係缺乏左傳說中果種罪與罰ｏ既意識
唔通我真係要得到教訓先會醒覺？

既然我識咁諗，點解我又死性不改呢？
因為．．．因為我係一個意志薄弱ｏ既人．．．

>>October 20, 2006 at 6:11:08 PM GMT+8

2006 年 10 月 13 日 星期五 【晴】

今個星期好似過得好快
返學ｏ既日子比上年仲要悠閒，可能係因為未開始做ｐｒｏｊｅｃｔ

對上一個星期因為要寫返黑馬王子狂想曲，睇返唔少之前ｏ既日記
好多事睇返都好似琴日發生咁，過去ｏ既中學生活真係好開心

有人話過做大事ｏ既人唔可以拘泥於過去，我諗我一定唔會係做大事ｏ既人
因為我對於以前發生ｏ既事都會好介懷
係開心ｏ既事好，唔開心ｏ既事亦好，我都會成日諗起
唔知有冇人同我一樣呢？

>>October 15, 2006 at 7:44:51 AM GMT+8

2006 年 10 月 12 日 星期四 【晴】

今日返８點半，係唯一要返咁早ｏ既一日
所以我習慣唔到，仲係遲左．．．

返到去做ｌａｂ，慢過人地起步都快過唔少人做完
因此又訓多一陣，上完ｌａｂ仲有一堂
果一堂非常沉悶，冇咩記到入腦

到夜晚又去左青衣打波，好耐冇打
而我今次又係最早果幾個，其他人都遲到
今晚可以話係ｋｃｍ之夜，首先有我地呢班
又有低我地２屆果班，仲有費沙都有黎
可謂各路英雄雲集，而費沙更加令出人意表
佢比起以前高左，大隻左，快左，打波勁左
我地都輸左幾場比佢．．．

今日表現一般，還可以接受
不過有人話我打波好想贏，其實都係架
我諗冇人會係想輸掛，定係我真係表現得太好勝呢？

最後因為果度唔熄燈ｏ既關係
打到１１點幾先走．．．

>>October 15, 2006 at 7:37:53 AM GMT+8