2006 年 7 月 18 日 星期二 【晴】

今日精神飽滿去返工，朝早去荃灣沙咀道收張票，然後入票
又係同速遞ｏ既工作一樣，好快就完成左
返到去又見冇咩野做，於是又去左食野先，食完野周圍行左陣，冇咩好行

到真正ｌｕｎｃｈ時間ｄ司機返晒黎，因為佢地下晝３，４點先有貨到
佢地黎到就先ｏ係電梯大堂踢波，踢到碰碰聲
之後就入晒黎ｏｆｆｉｃｅ同老闆開檯打麻雀，本來夠８個開２檯架，不過得一副麻雀
我唯有睇佢地打．．．

今日終於認識晒ｄ同事，岩岩識ｏ既有司機阿文，跟車阿源同志偉
去到３，４點，佢地去晒做野，而我就執下ｄ箱，同埋拎櫃紙落樓下
之後５點幾又走人喇．．．

其實呢入工一係就冇野做，一有貨到就好多野做，就好似星期一咁，有幾車貨做．．．
除此之外都只係送下文件同落下樓咁，有好多時間係等野做．．．

>>July 19, 2006 at 4:04:32 PM GMT+8

2006 年 7 月 17 日 星期一 【晴】

今朝又返工，９點鐘去到，先去左觀塘拎個ｓａｍｐｌｅ
原來果度係我以前速遞附近，沿途風景冇變過，而我拎完個ｓａｍｐｌｅ就返公司

點知返到去，ｔｏｎｙ同ｃｏｎｎｉｅ都出左去，我冇門口入
唯有去食左野先，食完野佢地終於返到，而下晝就去長沙灣送３件文件同拎一張櫃紙
長沙灣果度我唔多熟都要搵左一陣先做晒，成身汗呀．．．

之後返公司又係齋坐，坐到５點半就走喇，今日ｏ既工作係做部遞，不過只係得４個柯打～

>>July 19, 2006 at 3:49:23 PM GMT+8

2006 年 7 月 16 日 星期日 【晴】

今日第一日返工，７點鐘就起左身，之後食左ｄ野，換左衫就出門口喇
落街去地鐵站搭３１ｍ，３，４個字就到左打磚坪街

上到公司見到「大家姐」，即係ｃｏｎｎｉｅ姐同ｔｏｎｙ哥都到左
因為今朝一早已經有某間公司ｏ既貨到左，ｄ司機去晒運貨去沙田中電個倉
而我同２個老闆食完早餐之後都出發去沙田．．．

其實我ｏ既任務主要係ｃｈｅｃｋ某幾間公司ｏ既貨，再打個ｒｅｐｏｒｔ比返人地
因為人地用我地呢間運輸係包埋做個ｒｅｐｏｒｔ，ｆｅｅｄｂａｃｋ比佢
以前係ｄ司機同跟車做埋，不過可能唔多夠時間，就搵左我專做ｑｃ
佢地有貨黎就有野做，冇貨黎就冇野做，變左做ｂｏｙ

去到沙田中電個倉之後要用承辦商身份登記先入得，見到ｄ司機原來到晒
今日有２個司機同２個跟車入沙田，２個司機大哥分別叫阿明同阿剛
２個跟車大哥就叫阿賢同阿志，２個都好後生，２１，２２歲咁

今日由ｃｏｎｎｉｅ姐教我ｑｃ，主要係數返唔同編號ｏ既貨到ｏ既數目同張訂單一唔一樣
之後就抽樣做ｑｃ，每個型號ｏ既貨都要ｃｈｅｃｋ　４％，１００箱就ｃｈｅｃｋ４箱
但係得１箱都要ｃｈｅｃｋ足一箱，入面有張ｌｉｓｔ，要樣樣有，樣樣齊

起初我以為一箱得幾件野ｏ係入面，但係原來每箱都有好多個ｉｔｅｍｓ
有ｄ　ｉｔｅｍｓ仲要係細細粒，有３００粒咁，我都只係象徵式咁數下
好彩今日有ｃｏｎｎｉｅ姐同ｄ司機幫手，如果唔係一定有排ｑ，有成百箱野要ｑ喎

做完之後就同２個老闆返公司，坐到食晏時間佢地就請左我去飲茶
飲完茶返到公司就做個ｒｅｐｏｒｔ，其實都只係填張ｆｏｒｍ
一個ｉｔｅｍ　ｎｏ．做一張ｆｏｒｍ，之後再入電腦，然後ｐｒｉｎｔ一張ｒｅｓｕｌｔ
其餘時間都淨係齋坐，冇咩野做，最多都係拎ｄ櫃紙去樓下比ｄ司機
坐到５點幾就收工ｌｕ．．．

之後返到屋企訓左陣，然後就出發青衣打波，８點先去到．．．
今日有好多人打波，可以６打６打全場，但係我冇咩活力，可能係唔多夠訓
最後打到１０點幾熄燈就走喇～

>>July 19, 2006 at 3:41:33 PM GMT+8

2006 年 7 月 14 日 星期五 【晴】

我日１０點起身，之後就去左「大家姐」間公司，佢阿爸同我阿爸算係世交
而且以前又住附近，佢地一家由細睇到我大

上次佢同我提過佢公司想搵個人幫手ｏ既事，前幾日我又搵返佢
佢就叫我星期六去佢果度睇下，間公司係佢同佢老公，ｔｏｎｙ哥開
係做ｄ物流果類，公司ｏ係葵興，石蔭果頭
真係好神奇，我返過ｏ既工，公司都ｏ係葵興果度

我搵左一陣先搵到果度，基本上公司上面果度係個細貨倉，入面有個ｏｆｆｉｃｅ
而我ｏ既工作主要就係ｏ係個倉做ｑｃ，即係ｃｈｅｃｋ下ｄ貨有冇問題
數數目同埋睇下有冇爛到，之後又封返個箱，間唔中又要出去拎文件同埋跟車
簡單ｄ黎講，其實都係要咩都做，有＄４５００一個月，返星期一至五，星期六長短週

之前我諗過做返速遞，不過做得果個幾月，咁就唔好攪咁多野喇
都係幫「大家姐」做野算啦，星期一開始返工

離開左公司之後，因為成身汗，所以返左屋企先
然後換衫再去阿昆屋企玩，差唔多３點先去到，個人有ｄ眼訓
出席ｏ既人有我，昆，ｃｈｅｒｒｙ，大佬，ｋａｉ豪，左輪，ｋ樂，ｒｏｃｋｙ
人齊就開多一檯打麻雀，我，阿昆，左輪同ｋａｉ豪一張檯
係一個好慢ｏ既組合，一開始我係咁出銃，打ｄ咩人地就食ｄ咩
起初輸左接近＄１０，打到第２圈先開齋．．．

但係打下打下就好順，我食得唔多，不過食親都自摸
最後仲贏返＄１２，真係好
我地今日打到８點就走喇，我地果檯打左４圈唔夠．．．

夜晚返到屋企食飯，然後練習ａｏｃ，ｋａｉ豪琴日ｓｅｎｄ返ａｏｃ比我，太好喇～

>>July 15, 2006 at 6:15:34 PM GMT+8

2006 年 7 月 13 日 星期四 【晴】

今日係呢個學期最後一日返學，不過我遲左成個鐘先到
但係呢個阿ｓｉｒ都幾好人，只要我跟返ｄ野佢都冇話我

ｂｒｅａｋ果陣順便去左拎成績表，雖然之前已經知我科科合格
但係一睇成績表先知自己好危，科科都係４０幾分
係得ｄａｔａｂａｓｅ有７字頭（因為同中７果ｄ一樣）
有ｄ失望，又有ｄ慶幸，失望ｏ既係自己根本唔止呢個水平
而慶幸就係下年就係ｆｉｎａｌ　ｙｅａｒ，只要捱過下年就脫離學子生涯

但係踏足社會又會唔會係另一個惡夢ｏ既開始呢？

>>July 15, 2006 at 5:48:32 PM GMT+8

2006 年 7 月 12 日 星期三 【晴】

今日上堂唔洗再整ｗｉｒｅ或者光纖果ｄ，變左教書
不過我寧願整光纖，因為幾好玩，同埋ｄ時間過得好快

除左講書，仲有做下ｌａｂ，玩下ｓｗｉｔｃｈ，悶到嘔
唯有上網打下機先捱得過．．．

放學又係返屋企訓左陣先，之後起身去小學同學聚會
去荃灣「沙嗲王」食飯，出席ｏ既有我，牛志，大勝，君，肥華，雞，絲襪女
因為我訓晏左，所以去到佢地已經食緊．．．

我地叫左５，６個飯餐一齊食，種感覺有ｄ似一家人
一邊食又一邊傾下近況，大家都過得好好，然後又提起以前ｏ既事
有小學果陣好恐怖ｏ既４樓，又有男廁唔可以用中間果格ｏ既不成文規則
如果有一日，大家可以返去小學果陣一齊上堂就好喇．．．．

食下傾下，不知不覺又去到１０點幾，大家都回家返屋企

>>July 15, 2006 at 5:39:36 PM GMT+8

2006 年 7 月 11 日 星期二 【晴】

今日依然係返學，又係一ｄ整光纖ｏ既野
成個過程都好地地，但係最後條光纖好似爛左．．．＞＜

放左學之後返屋企訓左陣，之後起身食飯，食完之後就去左青衣打波
今日同上次ｏ係文娛打一樣咁辛苦，我已經醒左架喇，一去到就除左件衫
但係打左一場３打３之後已經成身汗，我每次射波都有小水點飛出黎

之後變左打全場，６打６，ｄ位少左，但係亦都可以跑少ｄ
不過種感覺太差喇，成身都係「痴立立」，ｄ汗完全唔乾，仲有ｄ中暑ｏ既感覺
最後打左２場全場就冇打喇，換件衫換條褲然後返屋企

>>July 15, 2006 at 5:28:20 PM GMT+8

2006 年 7 月 10 日 星期一 【晴】

呢２日都要返學，琴日因為睇完世界盃，返唔到上晝果堂
阿ｓｉｒ已經警告我唔能夠再遲到，如果唔係下年暑假再要補課．．．

今日星期ｄ野比上星期有趣好多，至少有野做，唔係對住部電腦打ｃｏｍｍａｎｄ
宜家學緊ｃａｂｌｅ，要自己落手落腳整，琴日整過ｒｊ４５，又有整ｒｊ４５配件
因為ｄ線好細條，要夾得好小心，最後整到手指好痛，大力禁下指甲都好痛

今日就整光纖，要仲仔細，我自問唔係一個如細心ｏ既人，所以整得好吃力
先係剪走條ｆｉｂｌｅ外面個膠套，再夾走個ｃｌｏｄｉｎｇ，就會見到一條好幼好幼ｏ既光纖
呢個步驟足足做左我成半個鐘先完成，之後又要套個頭比佢，又要「痴」膠水，又要焗乾佢
最後仲要磨滑佢，每個過程都有機會整糷條光纖，所以我小心翼翼咁做
好耐未試過咁專注做一樣野，到落堂都未完成，唯有聽日再繼續～

>>July 11, 2006 at 6:27:06 PM GMT+8

2006 年 7 月 8 日 星期六 【晴】

今晚大贊約打波，我食埋飯８點半先到
陣容有我，ｋ樂，大贊，聰聰，浩暉，肥仔同聰聰３個ｆｄ

我一去到球場果陣都嚇左一跳，成個文娛，４個場都冇人打波！？
可能ｄ人等睇世界盃掛，所以我地都係自己人打自己人
次次同佢地打波都係要走好多位，比起同其他人打支力好多
而且今日ｄ天氣好恐怖，ｄ汗完全唔識蒸發，打左幾場，成個身好似游完水，岩岩上水咁
條褲濕到去外面，個體溫好高，總知好辛苦啦．．．

但係又冇人跟隊喎，唯有頂硬上啦，今日我比平時走多左好多位
不過ｄ基本功太差喇，成日比浩暉偷我個波，無論係從前面，定係後面，都比佢捉晒我ｄ路
好想買返個籃球練下ｄ拍波．．．．

最後打到１０點幾就走喇，因為真係好支力，２個鐘幾乎不停打
飲左１枝大水加２枝藍力都略嫌有ｄ唔夠喉．．．

返到屋企沖左個靚涼，之後就等睇波，睇電視，唔洗驚ｃｏｎｎｅｃｔ唔到
意大利對法國呀！！！！係一場歐洲皇者對決～
最初我估意大利會佔盡優勢，但係場波踢落去反而係法國比較好
９０分鐘大家１比１，到加時果陣施丹一頭頂到馬特拉斯飛起，結果紅牌出場
雖然紅牌係無可口非，但係我情感上支持施丹，因為馬特拉斯本身都唔係咩好人
都有名叫「殺人王」啦，又茅，又口多，一定係佢出口術激嬲施丹
咁ｏ既行為同ｃ朗拿度冇分別，就算再好波，好波到識飛，我都唔會尊重佢地．．．

最後意大利射１２碼打敗法國，球球１２碼都射得靚，包括查斯古特射失果球
而世界盃亦隨住意大利球員ｏ既歡呼聲而完滿結束，一個宇，「精彩」～
２０１０年，南非世界盃再見～

>>July 10, 2006 at 11:52:27 AM GMT+8

2006 年 7 月 7 日 星期五 【晴】

今日去阿昆屋企玩，不過我訓到２點幾先起身
去到都已經３點幾喇～

陣容有我，左輪，ｒｏｃｋｙ，ｋ樂，ｋａｉ豪，昆，ｃｈｅｒｒｙ，大佬
岩岩好有８個人，可以開２圍麻雀，變左個賭檔咁．．．
首先我，ｒｏｃｋｙ，左輪，ｋａｉ豪一檯，打得比較慢
起初有錢贏架，不過最後輸返＄９

打完第一ｒｏｕｎｄ之後就去食野，我同ｋ樂去左食陸記，好耐冇食
叫左個牛腩米線少辣，唔．．．．好正，ｄ牛腩夠軟，入口即溶
ｄ米線又夠彈牙，個湯又正，真係好味～

食完之後就上去打第二ｒｏｕｎｄ，我同ｋ樂夾，打呀打
最後都係輸．．．我地玩到１１點半先走，差ｄ冇車返去

返到屋企沖涼，食ｄ野，然後等睇波，又係上網睇
係德國對葡萄牙，上半場好精彩，２隊都有威脅ｏ既攻勢
不過下半場唔知點解睇唔到，唯有等完場再去官網睇精華．．．
最後德國贏３：１，漂亮～

>>July 10, 2006 at 11:24:25 AM GMT+8