2003 年 4 月 9 日 星期三 【陰】

尋晚十二點鐘就訓左lu...但係今朝七點就痛醒左...咪又係M痛囉!激死~><"
痛左十幾分鐘咁啦...之後又再訓過!好在痛得返咋...一訓就訓到十一點幾俾阿嬤叫左起身食飯!
係完飯就睇世紀之戰...睇完就去上網!Download下歌咁啦..睇下網頁呀!唔..到左三點幾就拎左d vcd黎睇!
不過又係講國語...激死!整黎整去都係咁!遲d拎去男朋友屋企同佢一齊睇先得!

夜晚係完飯就睇電視!今日電視群星情報站又講起哥哥喇....
唉!我聽到又眼濕濕喇...我都唔知點解會咁架!或者覺得可惜啦...."鄧"佢d歌迷同影迷傷心~
再晏d就準備聽日見工既野o勒...其實今日都無咩做過囉!
聽日要去見工...我諗今晚都會早d訓~^^"
係咁先啦~~~~


>>April 9, 2003 at 10:28:33 PM GMT+8

2003 年 4 月 8 日 星期二 【雨】

尋晚十點就"達"左落張床度同男朋友傾電話!傾到十一倒點就收左線lu....
但係訓唔著...轉黎轉去..成十二點幾先訓著!今朝五點幾就醒左喇...六點先起身!
跟住就即刻梳洗..之後煮左個麵做早餐!食完就拎左之前醫生開果d經痛藥俾我食...
食完就坐左o係樹"中眼訓"....之後就執野同換衫!七點半就出左門口lu...
出到紅磡八點三倒啦!去到中環就八點半過d....我仲要坐多程小巴先到目的地呀!
嘩..去到小巴站見到好多人排隊呀!死啦...約左九點三見工架嘛!
實遲到tim架!輪左三四架車先到我上車呀!等左成十五分鐘車!shit~
其實我今日係要見瑪麗醫院度見工既!去到都係九點二過d..但係又唔識去果個咩行政大樓喎!
問左三個人先至去到...感覺又係俾人老點咁!所以最終係九點四先搵到我要搵既地方!

首先個女人俾左張form我填..接著問我拎左身分證同d證書既正本&副本!
填填下form又有兩個人入左黎!佢地都係黎見工架!一個係廿幾歲既後生仔...另一個係阿嬸!哈~
又俾佢form佢地填..仲問埋佢地拎資料!最後又黎多個阿叔...唉!
明明約我九點三架嘛!點知成十點半打後先開始interview喎!激死呀...
仲要等齊人咁..晒我時間晒我錢!約我咁鬼死早...我又住得遠喎!><"
唉...今次interview有兩個人見我!有一個係護士長!佢地講俾我聽呢份工作要做d咩...
但係我上網睇果陣...職責都無包括果d既!而家連病人都要我地呢個位服侍呀!仲要整埋d屎屎尿尿!
梗係咪攪啦!總之今次就係晒時間啦!見完就搭返小巴返中環!

要去觀塘!因為尋日阿sir打電話黎話約我傾下見工d野!佢話我都見左好幾份工...要檢討返咁話喎!
搭小巴果陣勁暈呀!因為已經開始肚餓...o係小巴上面有個婆婆唔舒服...想嘔呀!果個婆婆有個嬸嬸陪佢架!
但係佢地係分開坐..不過一時間好難講俾你地聽!因為由佢地上車果一刻...個司機已經係咁鬧個嬸嬸!
佢地有架輪椅架!個司機鬧話阻住人喎!跟住個司機開車個嬸嬸又唔坐低喎!佢都唔想架嘛...
但係個司機就係咁鬧個嬸嬸!講返個婆婆想嘔啦!個司機又係度鬧..話快俾個膠袋佢啦!
一陣整到周圍污糟晒就麻煩喇..個司機一路係咁鬧!呢個時候我就諗起...
有一次我陪嬤嬤去威爾斯覆診...係搭的士去既!都好耐既事lu...果排繼繼嬤嬤都唔食咁舒服!又成日嘔喎!
可能因為咁啦...再加上個司機又開得快...架車上面又臭!嬤嬤就忍唔住嘔左出黎o勒!果陣我地又無膠袋!
嬤嬤又無講俾我知佢想喊喎!咁到左威爾斯落左車之後...個司機就係咁鬧!
話又唔早出聲喎!又鬧我後生既又唔睇住佢!係咁鬧係咁鬧...我又同佢鬥鬧....
都唔可咁講既...佢係咁話我唔睇住老人家!咁我咪話我都唔知架...佢又無講我知佢想嘔!
不過果陣我o係車度又真係無乜點理過嬤嬤喎!咁都唔可以怪我架...
而家係個司機係咁鬧咋嘛!佢話果度附近無水喎!所以無得洗車..又話賺我地廿幾蚊..無得做幾單生意!
因為佢架車有嬤嬤既嘔吐物....所以好臭!唔載得人....唉!真係慘....><"

去到中環就行去地鐵站!離遠望到文華酒店外仲有一大堆鮮花!今日係哥哥出殯既日子....悲哀!
行到去地鐵站就梗係搭地鐵啦!去觀塘搵阿sir嘛!我由中環搭港島線..再轉將軍澳線..最後就係觀塘線o勒!
搭到我頭暈暈...o係北角果度轉車果陣...搵左好耐...唉!幾經辛苦先去到觀塘呀!十二點半就上到中心o勒!
差唔多用左成個半鐘頭呀!真係搭到人都傻呀...去到見到阿sir傾左成大半個鐘!
我係青見度見過四份工!有一份好似話我對工作有熱誠...有禮貌...但係可惜語文水平唔符合標準!
另外一份就話有另一人選更適合!最後一份就話整體表現欠佳喎!激死呀...都唔知點解咁講既!><"

傾到點半就走左lu...鬼死咁餓!就走左去食M記o勒!食完就搭地鐵去旺角!
去到旺角都係兩點半!之後就行去睇vcd...係咁睇vcd!買左好多隻呀...差唔多買左成二百蚊呀!
不過買貴左好多囉!咁多隻之中...有兩隻係新既!『行運超人』同『金雞』呀!信和果度好平咋!
兩隻都係買三十幾蚊!咁多隻加加埋埋...我起碼買貴左三十幾蚊呀!可以買多隻都仲得tim呀!唉...><"
仲o係信和果度...去問價!又係渡假屋果d囉!行呀行呀....又行到去食零食變超人果樹...買左少少零食!
四點鐘就搭火車返屋企lu....

未夠五點就返到屋企!今日收到好多信呀...意外地收到一封馬來西亞寄黎既信!
我地至少都識左兩年喇!但係已經有半年多沒有通訊!但係我月尾...30號先寫左封信寄俾佢!
無理由佢咁快回左架!原來呢封信佢係o係29號寫俾我架!其實係我欠佢信既...
突然之間寫返信俾佢...係因為收到佢send俾我既sms!另外一封信就係叫我去見工!
星期四...又係去醫院見!><"

攪完一輛之後....就去左沖涼!之後就煲飯...食飯果陣睇群星情報站...報導哥哥出殯既事!
仲見到好多哥哥既歌迷同影迷對住載有哥哥既靈柩揮手既埸面..果一刻我就忍唔住流左兩行眼淚出黎o勒!
真係好可惜呀...希望哥哥能夠早日安息啦!食完飯之後就去左上網!
今日竟然唔睇電視喎!因為想快d寫日記..今日好多野要寫嘛...所以趁住記得就拿拿林寫左佢先囉!
九點倒男朋友就打電話黎!一路傾..係咁傾就傾到十點半!先前都好地地既...之後就...唉!
不過又唔係鬧交喎!又俾佢攪到之我係咁喊係咁喊!><"
又唔係唔知人地隻眼痛...仲要攪到人喊!唔知點解呢兩日隻眼都好癢...又好痛!
唉...所以今日買左眼藥水...hehee~^^"

好啦...今日呢篇真係好長好長呀!唔想再寫落去喇...
本來今日都幾開心架!但係經過同男朋友今晚所發生既事..就好唔開心!好想大喊一埸......

>>April 8, 2003 at 11:09:46 PM GMT+8

2003 年 4 月 7 日 星期一 【雨】

今日係無咩做過架囉...
不過M痛..好痛好痛!好辛苦呀~><"
次次都痛到就死咁滯...聽日都唔知點去interview tim呀!
夜晚食左白鳳丸都仲係咁痛!激死....

好痛呀...唔想再寫落去喇!

>>April 8, 2003 at 7:49:10 PM GMT+8

2003 年 4 月 6 日 星期日 【雨】

好凍呀今日!今朝成十一點半先起身...
係俾人叫醒起身食飯呀!咁起身無耐就食飯啦...食完洗埋d碗!
就去左上網!睇下網頁..寫下日記咁啦!上到三點就去換衫...
因為約左男朋友出街!咁三點三就出左門口lu....
約左o係旺角等!四點鐘去到...等左男朋友十五分鐘!><"

之後就去左先達睇電話....再去信和!都係四周圍行下咁啦...睇下有咩vcd買!
行到六點幾..就去左食零食變超人果度買左五十幾蚊零食!hehee~^^"
再o係出面個公園度坐左陣..坐到大概七點就搭火車去九龍塘!
因為我想去果度個公園!哈...男朋友都話我傻!因為我掛住果個公園!
突然間好想去睇下同坐下...所以就特登搭火車黎o勒!
果個公園係o係又一城出面架!叫"歌和老街公園"....我覺得果度都幾靚..幾舒服架!
同男朋友去左公園行...我諗都有坐左成個幾鐘呀!差唔多九點就去左又一城頂樓度食飯!
食左少少咋...因為唔好食!跟住九點半倒都走人lu....
因為男朋友話想搭十點半船喎!咁我就自己搭火車返屋企...佢就搭地鐵啦!
未夠十點半我就返到屋企lu...睇左陣電視!第廿二屆香港電影金像獎~
睇完就去洗白白...又係等..男朋友返屋企囉!返到屋企...傾左陣icq...又俾佢整喊!嗚嗚...><"
激氣呀!再等佢沖埋涼...成個鐘呀!白痴架...搵笨既!下次搵鬼等佢啦!但係佢又叫我等喎!
唔知點好..但係我已經好累...好想訓覺架啦嘛!沖完之後.....點半同佢傾左陣電話!
無耐無啦啦又俾佢鬧...痴線架!今日出街對人鬼死咁好...返到屋企就係咁對住人發脾四!
真係頂佢個肺丫~

>>April 7, 2003 at 2:26:47 PM GMT+8

2003 年 4 月 5 日 星期六 【陰】

尋晚一點先訓...訓到四點幾擲醒左....
之後又再訓...到五點幾又再擲醒!跟住六點幾..七點幾..八點幾..都係咁!
到左九點俾一個電話嘈醒!原來係Candy...唉!之後就索性唔訓o勒!
激死呀...都唔知仲乜鬼..成晚醒!又發惡夢咁喎!><"

起身之後就刷牙啦!之後就煮左個麵做早餐!
再上左陣網..上到十點九倒就去沖涼洗頭!
沖完就拿拿林執野換衫..十一點八就出左門口lu...
約左男朋友o係中環等!因為要佢帶我去小巴站....星期二見工要去過度!
我唔識去...所以要男朋友帶一帶路先!果日仲要晨咁早出到去tim呀!死得~
十二點九就去到中環...要男朋友等左我一陣...真係唔好意思o勒!
搵完小巴站之後呢...就去左香港站入面既M記食lunch...食完就行左過去文華酒店度!
今晚八點鐘o係文華酒店門外會舉行燭光晚會追悼哥哥!不過我唔會去...但係都好想睇下!
唔...去到文華酒店真係見到好多人!同埋好多花擺左o係度!我見到咁既情景...個心好唔舒服!

之後我地就o係附近一直行...行行下就行返出去中環碼頭!一路行..行到去灣仔!
去左一個電腦商場度睇野!唔記得叫咩名...最後買左個滑鼠同mic...之後我就好累!
想坐下...因為行得太耐喇!我份人就係咁架喇...行兩行就話累!哈...
不過今日真係行左好耐啦...一見到男朋友之後就一直係咁行....係食野果陣坐左陣姐!
之後男朋友又話帶我去坐陣..點知又無左件事!都唔知係我衰定係佢衰o勒!
咁又鬧起交上黎喇!真係無聊呀!之後果d唔多講啦...後尾都無事lu....

再行返去灣仔天星碼頭搭船過尖咀!o係海旁度坐左陣...之後又o係附近個公園坐左陣!
就行去食飯o勒!我地行左過去佐敦!柯士甸道果間"點心皇"度食野!都唔好食既...總之去吉野家就算啦!><"
食完都成九點lu...再繼續行...哈!今日真係行足全日呀!係咁行...首先由尖沙咀行去佐敦....
再由佐敦行到去油麻地...最後就行到去旺角!行左陣信和..不過d鋪頭都差唔多關晒門lu....
因為已經成十點幾!見夜...就行返去火車站搭火車返屋企!

今日真係好累!我地用既交通費好少咋!好似剩係得一轉天星...$2.2!
我自己搭火車返屋企!男朋友就搭地鐵返中環!我返到屋企就十一點八倒啦!
哈...岩岩好出左十二個鍾喎!^^"

之後就沖涼再上網!等男朋友返到屋企...又o係傾左陣!
一點半倒打俾佢傾電話!又俾佢鬧...話我咁夜打去佢屋企..而佢又無心理準備!嘈醒佢屋企人咁話喎!
佢自己都試過咁夜打去我屋企嘈住晒啦!唉...自己剩係識得鬧...又諗下自己咪又係咁!乞人憎~
呢場交又鬧左一個鍾倒就無事o勒!其實都唔可以話係鬧既...只係大家拎住個電話唔出聲!
無事之後就繼續傾啦!傾到三點三就訓左lu....

今日行左咁多路...隻腳好痛!><"

>>April 6, 2003 at 2:03:21 PM GMT+8

2003 年 4 月 4 日 星期五 【雨】

今日十一點起身!之後就即刻煲飯....
食完飯就睇左陣電視!之後洗埋d碗....再整埋d"九幾"佢!
用黎晏d滾湯用既...."九幾"湯好好味架!哈哈~
之後再睇世紀之戰!睇左就上網同傾電話!之後又開始洗風扇o勒!
洗完就繼續上網!周圍睇下咁囉...睇下人地d日記呀...青見同勞工處個網呀!
之後無無聊聊咁就上左yahoo個網度search下文華酒店啦!
search到喇..睇下間酒店個樣同位置!原來真係果間呀!
星期三晚我同男朋友身處干諾道中...原來o係我地面前果間真係文華酒店黎!
我地仲o係度諗...佢趺落條馬路度果陣...幸好無比汽車輾過咋!
果條馬路真係好多車架...哥哥可以保留佢既俊俏樣貌...真係好呀!希望佢能夠早日安息啦!
好唔開心...我諗都要一段時間黎平伏!

三點幾就一路上網一路嘆花生!哈...
點知呢個時候俾嬤嬤叫左我去整窗門...真係俾佢激死呀!
人地o係度嘆緊架嘛!不過無計啦...哈哈!我又咁得閒...呢d野應該係我做既!
之後就去左沖涼!五點幾同男朋友傾電話...咪同佢講返星期三晚...我地睇到果間就係文華酒店囉!
無乜特別!

夜晚食完飯都係睇電視啦!無咩做過....
睇完都係果樣....上網囉!寫日記...hehee~
聽日唔駛去拜山....同男朋友出街!^^"
不過都未諗到去邊!

NP Tom:你話我每一日都好充實..唔係嘛!
你究竟係潤我丫定讚我呀?我又無野做...d生活點會充實呢?><"

Brenda:唔..真係唔知你想點囉!
你咁話我架..我好俾心機寫架!><"
有d人話寫得長先好睇...夠全面咁話喎!
但係對於你d懶人黎講就...懶得睇!
既然你係我個fd...就請你耐心睇啦!ok?^^"

>>April 5, 2003 at 9:36:55 AM GMT+8

2003 年 4 月 3 日 星期四 【晴】

今朝又係十一點先起身!唔知點解近排好似訓極都唔夠咁既!^^"
起身無耐就煲飯!十二點食飯...食完飯睇左陣電視!
上左陣網!再同男友傾左陣電話!整下野....

三點就出門口lu...要去圖書館還書呀!
未去到火車站就已經收到個電話!又係叫我去interview既...
約我下星期二喎!但係我無紙筆o係身!又無記性喎!所以佢就俾左個電話我...
唔記得就打去問佢!hehee~^^"
去圖書館既時候...就落起雨上黎喇!但係去完圖書館出黎..d雨已經停左喇...
仲有太陽tim呀!唉...呢d咁既天氣!真係玩太死囉...落一陣雨又話出太陽!又熱到死喎!
之後就再去拎相....拎完相其實想行下街架!不過又怕自己見到d鍾意既野又要買...所以就無行到!
拿拿林返左屋企lu...哈!又係咁..來回用左四十五分鐘!勁呀....^.<

之後就即刻抄返低個地址啦!但係又唔敢肯定岩唔岩喎!
所以為左確保準確...就打左佢留低俾我既電話o勒!
點知...記錯左少少tim..真係失禮晒!希望佢唔好記得係我啦!咁無記性都有既...hehee~
隔左陣...就去沖涼啦!沖完都成五點lu...唉!點解florence姐姐呢幾日都唔online架!><"
好想同佢傾計呀!><"

嗚~都成六點啦!男朋友都放左工好耐喇!點解仲未打黎既....
明明叫左佢放左工就打俾我架嘛!咁我就打俾佢啦.....
佢竟然話唔記得左喎!激氣呀...算啦!都慣架啦...
佢不嬲都咁無記性架!唉..但係我偏偏就係唔鍾意佢呢樣野嘛!><"
唔...佢話一陣要同佢媽咪去買風扇喎!

晚黑食完飯就睇電視.....十點睇完電視就走去上網!
上網同男朋友用msn傾左陣!傾到十二點就用電話傾!
傾左二十分鐘左右就收線喇...唔知點解我覺得好累!
好想訓覺....所以未夠十二點半就訓左lu.....



>>April 4, 2003 at 4:10:35 PM GMT+8

2003 年 4 月 2 日 星期三 【雨】

尋晚好似成點幾先訓...十一點先起身!
不過隔左幾日我都唔太記得lu..一食身好似就食飯!
之後上網!印返張履歷出黎..等見工果陣有得用!
其他野就真係唔係咁記得!

兩點半就去左沖涼...之後執野!
三點半就出門口o勒...lift到喇!呢個時候爸爸出lift....我入lift!佢應該係黎俾家用嬤嬤啦!
同爸爸say左聲hello...佢問我有無帶口罩!我話無...之後又叫我帶返個口罩喎!
佢自己又唔帶喎...d人係咁既!媽咪又係咁...爸爸又係咁!剩係識得叫人帶...自己又唔帶!><"

去到火車站三點八....出到紅磡就四點三!之後唔記得等左幾耐巴士!
過到銅鑼灣搵埋間野都係四點九咋!但係我約左五點三見工!
唔理啦..最後都係入左去!首先填左張form...等左一陣倒啦!
又黎左一個女仔喎!佢都係黎見工既...交返張form俾個女人之後!
就有個人返左黎...佢應該係馮先生啦!無耐就叫我入去見o勒!
哈哈...我諗果個女仔應該約得早過我架!不過無計啦...
因為係我黎先架嘛!所以又係我見先o勒!hehee~
五點倒入去見!咁我d咳咳未好返晒架嘛..所以間唔中都會咳一兩聲!
咁我喉嚨唔係咁舒服...所以我就講左句唔好意思..之後就係咁易咳左一聲啦!
馮生幾攪笑呀!佢又唔係歧視我喎!但係又退後左少少...再笑住咁話...你唔係果d野嘛!
即係指非典型肺炎呢!哈哈...我都唔係!跟住係咁傾啦...又係話我住得遠喎!
唔...佢話呢份工好多野做...一腳踢!話我搭完成個鐘頭車...又要做咁多野!
又要不停咁聽電話...又要計數!好煩喎...佢咁樣講法...應該唔會請我啦!
但係我真係唔覺得地方遠係一個問題囉!至緊要既係快d搵到野做嘛!
最後佢話有咩事...會叫李小姐聯絡我囉!起之前仲主動同我握手tim呀!
而家咁既環境...唔係應該唔好同人握手既咩...點解佢會.....hehee~^^"

傾左好多野...不過唔多講啦!傾左差唔多二十分鐘!
之後就走左去搭"丁丁"過中環!因為約左男朋友!去到五號碼頭都係六點咋!
等左男朋友一陣...之後就一齊行去灣仔o勒!o係灣仔海旁度坐左陣....
之後又四周圍行下..行到八點先去食飯!去左銅鑼灣据扒...食完都係九點!
去左豐澤度睇野!睇完就搭返"丁丁"過中環!果陣先係十點...
呢個時候無啦啦講起張國榮....因為我地正身處干諾道中....
所以諗住睇下文華酒店o係邊!不過望唔到...男朋友話好長!
佢亦都唔知文華酒店o係邊!尋晚至今日既心情都唔係咁好...
為左張國榮自殺身亡既事好唔開心!唔開心既原因係覺得好可惜!
見到好多人為佢自殺既事好唔開心!日日上網都睇到佢d fans留言俾佢!
攪到我都好想喊!好少天皇巨星好似佢咁...無架子!人緣又好...
難怪咁多人喜歡他!就連我表妹都唔例外!佢既死令到我表妹好傷心...
亦為佢哭過幾次!不過算啦..人死不能復生!希望唔好再有人好似佢咁傻而輕生喇!
因為真係有好多人關心自己同疼愛自己架!唔好令身邊既人傷心喇...

見唔到間酒店...所以就去左中環對出既海旁度坐!坐到十一點就走左lu....
男朋友送我去巴士站搭車!仲千叮囑萬叮囑我上到巴士一定要帶口罩呀!
又係咁喇...剩係識得叫人帶...自己又唔帶!><"
咁我上到車之後就即刻拎個口罩出黎帶啦!一直帶到返屋企...勁焗呀!><"
返到屋企十二點三喇!就煲返熱d湯黎飲啦!嬤嬤話唔理返到屋企幾夜...都要飲埋佢喎!
咁我飲完d湯..再洗埋個'煲".....就去左沖涼喇!
跟住點幾鐘同男友傾電話....傾到兩點幾就訓左lu...

>>April 4, 2003 at 3:22:21 PM GMT+8

2003 年 4 月 1 日 星期二 【雨】

尋晚十點幾訓落床..但係點訓都訓唔著!所以就打電話俾阿華傾左陣...
叫佢哄我訓o勒!傾左十五分鐘倒啦!都係訓唔著....><"
成十一點幾喇....o係張床成個幾鐘喇!激氣呀....最後都訓著左lu...
訓左個幾鐘...點知一點鐘果陣屋企電話響喎!原來係阿華打電話黎...俾佢激死呀!
死都唔俾我訓喎!咁我咪放低個電話唔理佢囉!之後拎返起...佢又講左句"係你迫我架"
哈...果陣我都唔知發生咩事!叫佢講多次....佢又唔講喎!又話講左好多次...唉!
我又驚嘈住嬤嬤.....所以唔可以大聲鬧佢喎!咁咪話佢好自私囉..半夜三更打電話嘈住人.....
又唔俾人訓喎!自私自利...乞人憎!唉...唔講佢喇!講起就把鬼火呀!去死啦....

人地諗住早d訓...今朝一早起身整d野架嘛!點知尋晚又...唉!
今朝六點鐘醒左去洗手間!見個天仲咁黑..所以就再去訓多陣!
一訓就訓到十一點!起身就去梳洗...嬤嬤話今日唔想煮飯..所以我梳洗完就落街買飯o勒!
食完就睇左陣電視...同男朋友傾左陣電話!之後就去左上網!
兩點倒勞工處d人又打電話黎!約我聽日去見工..出到去銅鑼灣!
聽日果度唔識去...所以就上網係咁睇地圖同睇下有咩巴士坐去啦!
最後俾我搵到架108...聽日一於搭108去!好在聽日約左5:05pm去見工咋!
如果唔係都唔知蕩去邊度tim呀!因為聽日約左男朋友出街!^^"

都搵左成個幾鐘喇!之後四點就出左去lu...今日出去既目的係要去圖書館還書....
首先去左7仔度fax...又係fax履歷!唉....我都唔知左幾多份履歷喇...都無一份係有回覆既!真傷心~><"
之後就去左曬相鋪度曬證件相!見左咁多份工..d相都用晒lu..好在仲剩返一張!聽日有得用如果唔係都唔知點算好!
最後就去圖書館還書!還左七本書呀...今日去圖書館.....所以我都有帶返個口罩出街!
但係今日咁熱..帶住個口罩真係好辛苦架!又焗喎....真係要唔順呀!><"
還完書就返左屋企lu...一來一回都係九個字咋!返到屋企就汌涼洗頭啦...
沖完出黎五點幾!就打電話俾男朋友...明明叫左佢放左工即刻打電話俾我架嘛!
唉...原來佢仲o係學校喎!話同人bbq喎!聽到之後仲激氣囉!
明知自己唔舒服未好返晒就唔好食埋d熱氣野啦!人地關心佢又唔知...
佢次次都係咁架...做親咩都唔話聲我知!但係我就要預先通知佢!唔公平呀....
人地次次叫親佢做乜..佢實係第一時間仆到去架!激死我喇...再係咁!以後都唔理佢呀!
佢自己都唔緊....我仲乜要咁犯賤去緊張佢喎!><"

夜晚食完飯..就睇電視!o係新聞報導中得知藝人張國榮六點幾在中環文華酒店高處墮下....
送院後證實死亡!仲留有一封遺書!我聽到這個消息真的有點兒愕然!
不會吧...今天是愚人節哩!相信不會開這玩笑吧~但這是事實...
實在有點兒令人難以置信呢!是否為情自殺..何必他要這樣想不通呢??
這樣就去了...真是令人惋惜!

睇完電視都係上網咁啦!無乜野做..等緊一個人上網!
唉....十一點四佢終於都上黎喇!點解我要等佢呢?我自己都唔知道~
但係我知道佢係唔值得我咁等佢既!既然知道....點解又要咁傻等一個咁既人呢?
因為我愛佢...唉!

>>April 2, 2003 at 1:43:11 PM GMT+8

2003 年 3 月 31 日 星期一 【陰】

尋晚成兩點幾先訓呀...所以今朝十一點半先起身!
如果唔係俾嬤嬤叫我起身食飯..我仲係度大覺訓呢!嘻嘻~
今日同樣係好悶呀!食完飯睇左陣電視....到左兩點半就出左去lu....
諗住剩係落去樓下寄信...點知嬤嬤就叫我順便去街市買豆腐!
跟本都唔順路!不過是但啦...唯有行去大街市啦!順便去7仔fax埋履歷佢!

三點三就返到屋企lu....之後繼續上網!
見到hody online喎!咁就同佢傾啦..傾呢個非典型肺炎...仲有我地大家d感情問題!
哈~真係好開心啊!好耐無同佢傾計喇....真係好掛住佢啊!傾傾下..佢無啦啦off左line喎!
咁我就繼續睇網頁...同其他人傾啦!到左四點幾就去左沖涼lu...

夜晚食完飯..洗埋碗就睇電視!都無乜野做...賣廣告咪去玩陣icq囉!
阿華都on住line架!不過唔知點解唔應我!後尾打俾佢...佢話做緊功課唔知道喎!激氣!><"
咁睇完電視都係十點鐘!再叫佢啦..點知佢都仲係唔應我喎!咁我又唔想同其他人傾....
咁咪offline囉!之後就上床訓覺lu..但係訓極都訓唔著囉!唔知係咪慣左夜訓呢...

阿鳳:嗌交梗有一個人撩起先既...但係無論錯在邊個先都好!
我覺得識得第一時間向對方道歉果個人先係真係贏家呀!
我有同佢道歉先架...不過佢好似唔受咁!係都要追究邊個錯先...唉!
我真係唔識得點同佢相處囉!都同佢一齊左成年啦..我自問俾以前已經唔同左!
有乜事既話...我忍到既都會忍!有時都會就佢!佢唔開心同嬲既時候...我亦都會哄佢!
但係佢好似樣樣都唔受咁....我真係唔知可以點做囉!好辛苦架....就快頂唔順!><"



>>April 1, 2003 at 1:25:57 PM GMT+8