2003 年 2 月 20 日 星期四 【晴】

哈..尋日又係兩點先訓!今朝一起身..心情都算係咁啦!
不過好凍呀...今餐有湯飲呀!係青紅蘿蔔湯呀!嬤嬤又係為左我d咳咳..所以煲湯煲得咁密囉!^^"

食完飯咪指定動作去上網囉!玩下icq呀...上網搵下工呀!
攪下攪下又差唔多五點o勒!咁咪去沖涼洗頭囉!
跟住就係敷mask....hehee!呆下呆下...等到七點幾..男朋友就黎到lu!
因為幫我整電腦..佢駛晒我d野...好慘呀!乜都無晒..
原本我之前係用windows me既..而家佢幫我裝左windows xp..話穩定d..無咁易hang機喎!
整到九點幾就出左去食飯..出到去第一時間盲係去還VCD...罰左$10~
跟住先去食飯!途中..大家因為d少事而好唔開心!Sorry呀..我無心架!對唔住..下次唔會再係咁!
食到十幾點就返屋企...返到屋企差唔多十一點倒啦!就繼續整機o勒!點知一整就整到十二點三倒啦!
好對唔住呀!一日都係我唔好啦..整到咁晏!要你搭點半船返屋企..真係好對唔住呀!我係真心架...
你聽晚仲要返學tim架...實累死你喇!不過裝左xp之後...我部腦仲慢過之前呀!唉...><"

今日寫住咁多先啦..部腦實在太慢喇..唔想再寫落去喇!

>>February 21, 2003 at 1:50:39 AM GMT+8

2003 年 2 月 19 日 星期三 【晴】

今日既心情都ok啦!今日十一點幾就醒左lu...不過成十二點幾先捨得起身!哈~
起身無野做呀!又無飯食...hehee!咁就睇埋隻『魂魄唔齊』下半埸佢o勒!都ok咁啦!
唔...睇完大概兩點倒啦!就出左街lu!死o勒...唔記得帶返兩隻VCD出黎tim!今日到期要還架喇!
而家要聽日先還得喇!又要罰$10 lu......><"真係大頭蝦呀!蔥蔥忙忙趕住出黎..攪到我乜都唔記得帶!

四點幾返到屋企!好無聊咁又開始上網lu!上到網發覺....部電腦有d問題!
其實唔係電腦既....電腦入面d野囉!呵..Office全部用唔到啦!打唔到中文等等!
暫時我剩係知道咁多姐..其他就唔知喇!點解會咁...相信係我尋日亂咁delete野囉!
唔知係咩黎既..照delete!咁咪攪成而家咁囉.....唔衰拎黎衰!><"

到左六點幾..就去左煮通粉食喇!我既晚餐!hehee~晚飯過後..又繼續上網!
唔..打唔到字真係好辛苦!我英文又唔好喎..下下都要用手寫板.....><"
上到咁上下...好悶呀!又無野做....就覺得好眼訓...果時差幾分鐘就九點喇!
咁我就上左床覺覺豬喇.....zzzZZZ!!訓呀訓呀~其實都唔係訓得咁好...訓下又醒下咁囉!
到左十點九倒啦!起左身..唔訓喇!咁咪繼續上網囉!玩ICQ呀..睇下網頁咁!
用手寫板真係好辛苦..應人又應得慢喎!咁就有個nf話教下我整喎!
點知都係整唔到!咁我就見到控制台果樹有個"輸入法"啦!咁咪按入去睇下囉..點知空白一片!
咁咪按新增囉..咁就攪掂左喇!終於可以打返字..唔駛用手寫板..好開心呀!^o^
Davis你好屎呀!咁簡單既野都唔識..不過好多謝你教我呀(雖然無用)!哈~
不過我都好蠢囉!應該一早就諗到咁做架嘛!唉~失察失察...................

B.C:我都唔知點解自己會有咁多野寫架!我個fd仲話我寫得短tim呀!我都係將自己每日所發生既事記低!同埋將我內心既野寫出黎咋......^^"

>>February 20, 2003 at 12:59:02 AM GMT+8

2003 年 2 月 18 日 星期二 【晴】

尋晚兩點鍾訓落床...今朝成十一點半先起身!真係好訓呀...哈!^o^
唔..跟住咪又係食飯囉!食完飯就去左玩電腦!睇VCD咁囉~
諗住睇埋『魂魄唔齊』既下半埸..點知部機又唔爭氣喎!點整都睇唔到!
咁唯有睇『這個夏天有異性』啦!點知睇完上上半埸..咁梗係睇埋下半埸佢架啦!
又係睇唔到喎!唉..激死呀!兩套戲都兩頭唔到岸!唔知up乜!><"
部機又成日都hang喎!我諗真係要整整部機佢o勒!
真係掃興呀!咁到左四點幾我就去左沖涼洗頭lu...
跟住晾埋d衫..咁就五點幾..就出左街lu....

到左晚上就...踩左陣單車!之後又睇『這個夏天有異性』...睇睇下..好肚餓呀!
因為我未食晚飯...所以就踩單車出去買宵夜o勒!返到屋企就繼續睇埋套戲佢!
不過呢套戲都係麻麻姐!今日大致上都係咁啦!而家已經差唔多成兩點喇..
我去訓先喇..早抖!^^"

>>February 19, 2003 at 1:43:55 AM GMT+8

2003 年 2 月 17 日 星期一 【晴】

唉!晚晚都成兩點幾先訓...死得啦!唔駛見人喇!><"
不過尋晚點幾就訓左o勒..今朝成十一點幾起身!無計啦..無野做..就剩係識得訓架咋!hehee~
其實我都唔想過呢d生活架..成日都o係屋企又無野做..悶到死!希望快d搵到份好工就好喇!
到時又有錢駛喎!唔駛呢樣"閒"果樣"閒"嘛...哈哈!起身之後就即刻食飯o勒...今餐有湯飲呀!

食完飯就上左陣網..上到三點幾鐘就出左去lu!
首先..我去左銀行入錢..跟住打簿!之後就去左還VCD...
接著又租左兩隻VCD返屋企!因為無野做o係屋企實在太悶喇!
所以就租左兩隻返屋企慢慢睇o勒!一隻係『魂魄唔齊』!而另一隻係『這個夏天有異性』!
唔..最後就係去藥房度買咳水o勒!我咳左成半個月多喇..仲未好返呀!死啦.....唉!買左成$48蚊架!
咁就返左屋企lu...返到屋企抖左陣....就去洗白白o勒!洗完都成五點幾喇..又上左陣網!

到左六點幾就煲飯!食完飯洗埋d碗...又睇左陣電視!到左八點!我就開始睇『魂魄唔齊』lu....
不過都係睇左一半咋!夜喇...所以我唔敢再睇落去!我諗下半都唔會點恐怖法卦..不過都係留返聽日先睇啦!
今日係咁上下啦...無乜特別!係咁多先啦........^.<

>>February 17, 2003 at 11:35:37 PM GMT+8

2003 年 2 月 16 日 星期日 【晴】

雖則係兩點幾先上床訓覺..但係我成三點幾先訓得著呀!慘..大多是心情影響卦!唔開心嘛~><"
唉!跟住今朝八點幾又醒左喇..好在訓得返!到左十點又再醒過...激死!都仲未訓夠~
呢排成日都唔夠訓..個樣殘左好多呀!慘..個樣已經唔靚架啦..仲殘多d..咪死得!
起身..見悶悶地!又唔想上網!就睇VCD喇!不過係睇『我家有一隻河東獅』....隻碟係尋日買架!想睇左好耐架喇!
睇睇下..見到個鐘已經成十一點幾喇!點解個衰佬仲唔打黎呢?o係人地屋企訓..無理由咁晏都仲未起身架!
咁我就諗..佢究竟係咪今日真係唔想同我出街呢?咁我就打電話俾佢..質問佢o勒!傾傾下..又開始黎料喇..又再吵過!
唉..好煩呀!跟住最尾都決定出街!不過我要佢入黎上水接我!果陣時已經十一點半喇!
收線後..我繼續睇VCD..睇呀睇..又攪下呢樣又攪下果樣!都成二點幾喇喎!點解仲未曾有電話既?
唔..咁我就打俾佢啦!又無人聽喎!數數埋埋都連續打左成十次呀!都係無人聽!佢又o係樹攪乜鬼呀!
無耐..佢就打黎喇!仲同我講..話我要等既人已經到左我樓下喎!激氣呀..邊樹有叫佢去到我屋企樓下喎!死蠢~
又晒左d車錢o勒..不過係我衰囉!無叫你o係火車站等我!好對唔住呀!我唔知你咁蠢架嘛!下次我會講清楚d架喇!
佢叫我落去樓下喎!而我就打死都唔肯落..跟住又o係度鬥左幾句..之後都話上黎lu!但係邊有可能到左樓下仲要成五分鐘都未上到黎架!
咁我又再打過電話俾佢啦!佢話已經上到黎..但係我開門又無人喎!玩野咩..唉!之後果d唔講喇..因為實在太激氣喇!
成兩點幾先入到黎!平時o係長洲出黎都係兩個幾鐘..而家o係香港入黎竟然要成三個鐘!都唔知佢想點!

黎到o係我屋企坐到三點幾先出街!出左沙田UA睇戲!戲『老鼠愛上貓』呀!買左五點半票!
跟住我地就行左陣...行到咁上下又返過去UAo勒!套戲都ok啦!不過我都無乜點留心睇呀!唔知點解~
睇完戲出黎都好地地架...之後我男朋友話出公園..而我又唔想出!咁就無出到喇!
咁佢就話送我返屋企..之後佢再返屋企!但係我又唔想返屋企住喎!
難得今日出到黎..梗係想夜d先返屋企架啦!同埋想見多佢幾面嘛!^^"
之後唔知因咩...我地又鬧起上黎!其實我都唔想架..我只係唔開心..無出到聲咋嘛!佢就話我"發爛渣"喇!><"
到最後都係出左公園...因為果時好唔開心!想去透下氣!途中..我問左佢好多野!唉...
原本諗住今日會玩得開開心心架嘛!因為係我地拍拖一年既日子..點知又係抏成咁!唉~><"
今年都唔知仲乜...同佢成日都鬧交!我唔想再係咁呀..好辛苦架!
之後..傾呀傾呀!我諗都有傾左成個鐘!終於都無事喇!希望鬧埋今次..唔好再有下次啦!
你呀..對我好d啦!我初初識你果陣..你真係對我好好..好好架!而家....唉!記住唔好再用d咁惡既語氣對我喇!
之後就去左西田度食晚飯..食到好飽呀!碗飯都剩返成大半呀!因為睇戲食左好多野!哈~
食完飯..都差唔多十點喇!咁就走人喇!落到去火車站又好唔捨得咁既樣..又攪到成十點半先走人..
咁我就自己搭火車返上水..佢又搭返出九龍o勒!
返到上水車站仲見到美玲姨tim!今日就係咁lu...

我覺得我寫呢d簡直唔係日記囉!係我既故事!我將我同男朋友發生既事寫晒o係度..
唔知大家點睇法呢？

>>February 17, 2003 at 1:24:04 AM GMT+8

2003 年 2 月 15 日 星期六 【晴】

咁多日都係天陰陰...今日終於都有太陽喇!^^"
但係我今日既心情仲係唔係咁好囉!
十點幾俾人叫醒左..話去飲茶!但係我仲係好眼訓..唔願起身!
到起左身之後..我阿嬤竟然話唔去飲茶喎!激死呀!咁我咪o係樹鬧囉..
嘈醒左人先話唔去飲茶..玩野咩!講左一大輪之後..終於都去左飲茶喇!
飲完茶之後就好無聊咁返左屋企o勒!

跟住就睇左陣電視!一路睇電視就一路等媽咪入黎!睇到差唔多三點!
媽咪就打電話黎話而家o係大埔喎!咁我睇完電視就出左去lu...出到去之後同媽咪行左陣...
就去左美心食下午茶!食完四點幾就打電話俾嬤嬤約佢今晚食飯!
跟住又再行過o勒...行左去租VCD呀!租左兩套西片!諗住俾男朋友拎去燒..記得呢套片佢話想睇既~
唔...不過今次蠢左喇!唔應該今日租架...聽日租至係架嘛!因為今日租既話..星期一就要還架喇!唉~
失察左tim....行到咁上下!我地就去左酒樓度等嬤嬤喇!
次次食親飯都係去酒樓!好有米咩?><"唔...食左二百七十幾埋單!
食完飯媽咪就走左lu...我地亦都返左屋企!

返到屋企跟住拎個電話出黎睇...原來男朋友八點鐘打過俾我呀!
聽唔到tim...咁我就即刻打返電話俾佢啦!接通左喇..聽到佢把聲就即刻問佢嬲完未...佢話嬲完喇!
咁我都冇再咁傷心!唔..但係果時佢出左香港喎!約左個朋友出黎睇電腦d野!傾左廿分鐘倒啦!
佢就話睇完...走果時先再打俾我啦!咁一路我都睇電視...冇打過俾佢!
睇到十點半阿嬤就熄左電視lu..咁我就去上網啦!上上下都成十一點幾喇!當時已經好累!好眼訓!
點解男朋友仲未call我既..十一點半船都開左啦!照計佢應該最遲會搭十一點半船架!點解呢？
跟住到左十二點(已經到左第二日--十六號喇)..我終於忍唔住打電話俾佢...諗住同佢講聲一週年快樂!
但係其實係唔快樂架!佢仲未返屋企呀!o係個朋友屋企幫佢整機...仲話唔會返屋企訓喎!唉..
o係人地屋企訓點會訓得舒服架兼且聽日一定冇精神同我去街啦!激氣呀!><"
傾傾下又講下聽日去邊去邊..約幾點..邊度等!講講下又開始鬧喇....唉!
今年都唔知發生咩事....成日都鬧交既!剛剛佢先唔嬲我...而家又再鬧過...
再講..我激鬼氣!索性話聽日唔出喇!咁就收左線咯!

跟住就繼續玩我既icq..見到我個fd online!就同佢嗲左幾句!之後仲打埋俾佢..同佢傾左粒幾鐘咁啦!
我個fd又唔開心..我又唔開心!仲要係大家都係為左d感情問題而唔開心!傾到差唔多兩點!
收線後..我繼續玩!玩到兩點十五分倒就去左訓覺喇...

>>February 16, 2003 at 11:58:38 PM GMT+8

2003 年 2 月 14 日 星期五 【陰】

今日係情人節...首先我o係呢度祝有情人終成眷屬!
有情人既靚仔靚女係咪過得好開心..好sweet呢?
而未有情人既靚仔靚女..你地都唔好灰心喎!
你地一定會好快搵到你地既王子同公主架!^^"

但係小妹今日就過得好唔開心喇!其實呢兩日都唔係咁開心囉!
不過唔緊要啦!開唔開心都係咁過架啦!前日同男朋友鬧交..到而家佢仲好似好嬲咁!
唔..識左佢都第三年喇!前兩年我都有送朱古力俾佢架!唯獨是今年無!但係前兩年我地係未o係一齊架喎!
今年係我地既第一個情人節..結果就攪成咁!><"唔..不過就算唔鬧交!我地今日都唔會出街!因為佢朝早要返工..夜晚又要返學!都無時間陪我啦!

今朝又係咁..起身無耐就食飯o勒!日日如是...哈哈!
食完飯就上網....睇下網頁..玩下icq!Check下e-mail之餘又寫下e-mail~好無聊呀!
跟住就打左陣機...到左四點幾就落左樓下買野!返到屋企抖左陣..就去左洗白白lu....

到左夜晚..食完晚飯就繼續我既icq!好悶呀!又開始打機喇...有d迷上左“小朋友齊打交”呢個game tim!哈哈~
唔..咁就自己同自己玩啦!勁白痴囉!呵~到左八點幾又見到男朋友上緊網喇!
果陣佢上緊堂...咁我就hi佢同佢傾左幾句喇!佢話好悶喎!仲訓著左喎!哈~
唔..我仲打電話俾佢..同佢傾左幾句!佢聊我打機呀!哈哈..不過好可惜連唔到線一齊打丫!
我都好想有人同我打呀!唔駛自己同自己打咁白痴嘛!><"

今日既時間就係咁過喇!希望聽日唔好再係咁無聊啦!不過頭先打左電話俾媽咪...佢聽日入黎呀!
咁都好d..至少起碼有得出下街行下先啦!唔駛o係屋企好似面壁咁呀!

*******************************************************************************************
今日係情人節之餘...亦都係阿偉既生日!
我o係度祝佢"生日快樂" & "情人節快樂"~
你唔駛灰心架!俾心機啦!你出年一定有女朋友陪你過生日架!
加油呀!^.<

>>February 14, 2003 at 11:59:20 PM GMT+8

2003 年 2 月 13 日 星期四 【陰】

唉!尋晚都冇乜點訓!訓左三粒鐘倒咋..七點幾就醒左喇!
尋晚同男朋友鬧氣呀!好唔開心!仲喊左好耐..好傷心呀!
都係我唔好啦!我認錯囉..如果我唔認錯既話..到而家我地死能仲拗緊呀!
我唔想再係咁樣糾纏落去喇...果晚好對唔住呀!激到咁嬲...><"

我已經低聲下氣咁同你道歉架啦!哄又哄過..你仲想我點呀!你嬲夠未呀?你想嬲到幾時呀?
唉!我都冇野好講喇!我可以做既野已經做晒喇...你唔原諒我既話就算啦!我都唔知你想我點呀!

今日真係好累!唔夠精神!因為幾晚都好似唔夠訓咁!再加上尋晚只係訓左三粒鐘!而家真係企o係度都訓得著呀!
今日要返馬鞍山見阿sir..傾"青見"d野!二點半返到去..傾左陣..跟住填form..咁就ok左喇!
阿sir話聽日幫我地fax去勞工處..之後過多一星期倒就會通知我地...話個學員編號俾我地知..
咁就可以搵工lu..阿sir仲話同一時間可以登記三份工..都幾好丫!不過我都唔知搵d咩類型既工好!
真係傷腦筋呀!傾到四點半就走左lu...跟住陪Shino同阿詩佢地去M記食野!六點幾就返到屋企lu...

返屋企既途中同男朋友傾電話!不過傾到好唔開心!因為佢仲好嬲呀..佢對我既態度十分強硬呀!
唉!攪到我......同佢講乜..佢都好似唔想聽咁!哄極都係咁..我已經好累喇!佢竟然唔想見我tim呀!
今次慘喇!講真丫...佢真係好少可會咁嬲架!唔..今次都唔知佢要嬲幾耐呀!同佢一齊都差唔多成年喇..仲有三日!
我記得佢只有一兩次話唔見我!唉...可能我平時講野太唔理佢感受啦!好對唔住呀!
我都唔知呀!經過今次之後..我覺得自己...唉!唔想講呀!

到左七點幾我就煮通粉黎食喇!食緊途中..爸爸就上左黎o勒!仲有我個哎呀呀妹同個女人!
唔..初初爸爸係咁叫呀妹叫其其姐姐...但係佢都冇叫!係到走果陣先叫!不過唔緊要啦!
我對佢都無乜感覺!好陌生...佢地走左之後!跟住再無咩特別事發生喇!
不過我仲係好唔開心囉!一唔開心就會亂諗野..呢一刻我好掛住爸爸呀!突然好想大喊出黎!
唔..見到阿妹佢可以同爸爸媽媽一齊!而我...自我懂性以黎..從未試過呀!我都好想有爸爸媽媽同我一齊去街呀!
但係.....我真係好想好想!所以我將來都要有一個完整既家庭..我要俾幸福我d仔女!我唔想佢地好似我咁..冇d家庭溫暖!><"

講完費話lu...呢個時候真係好累..好想訓覺!但係都係冇訓到!
因為見到男朋友上網..佢返緊學!但係都同佢o係icq傾左兩句!
果陣都差唔多九點喇!到左九點半佢就放學喇...同佢傾左陣電話..
收線之後...我就打左陣機!十點倒就訓左喇~~~~

>>February 14, 2003 at 7:44:27 PM GMT+8

2003 年 2 月 12 日 星期三 【晴】

好慘呀!尋晚失眠呀!因為尋晚飲左d茶先黎訓覺囉..唉!
我一飲親咖啡呀..茶呀!果d野夜晚就會訓唔著架喇!
攪到我成四點幾先訓得著..仲要係訓下醒下果隻tim呀!><"
所以今朝成十二點先起身!其實仲未訓夠架..不過醒左又訓唔返喇~

過左無耐就出左去食luncho勒!食完又係返屋企上網!
不過好悶呀!icq又唔多見到熟人喎!咁咪拎左d VCD黎睇囉!
“左眼見到鬼”呀...睇完都成5:15pm喇...跟住又繼續睇“賤精先生”咁..
睇左一陣就冇睇lu...又出左去踩單車...踩左一陣..就覺得好累喇!咁就返左屋企!
唔..見悶悶到!男朋友就提議打機!佢學校d"死靚仔"話『小朋友齊打交(game名)』好玩喎!
咁我地就試下玩啦!玩過之後...估唔到又真係幾好玩喎!哈哈...都成廿幾歲人架啦!
仲成個細路哥咁..玩埋d小朋友玩既野!不過真係幾好玩架!大家都不妨試下玩丫!hehee~^.<

玩到十點幾...因為仲未食晚飯既關係!咁就踩單車出去買宵夜喇!咪住~~都係打返陣籃球先...
咁就順便拎埋個籃球去o勒!玩到十一點幾倒啦!就去買宵夜..食完就返屋企再打過!
可能我已經玩上隱lu...呵呵!點知一打就打到而家....都差唔多兩點鐘喇!已經係第二日喇!
唔...聽朝仲要早起身tim架!死得喇~><"

>>February 13, 2003 at 1:40:56 AM GMT+8

2003 年 2 月 11 日 星期二 【晴】

雖然尋晚唔係好夜訓..但係今日好晏先起身呀!
因為好累好累...真係好累呀!
又係起身冇耐就食lunch喇!哈哈..日日如是!
我嬤嬤成日都話我..乜都唔駛做..一起身就有得食!哈~
唔..我都唔想架嘛!不過就快到星期四喇!好開心呀~
因為到左星期四就可以返去見阿sir..攪轉“青見”d手續呀!
希望快d攪掂啦!真係好想快d做野賺錢呀!咁就唔駛好似而家咁..樣樣都"閒"住"閒"住黎用啦!
男朋友亦都唔駛駛咁多錢o係我身上...可以幫佢分擔!唔駛佢為左我咁辛苦嘛~^.<

今日食完lunch....就上網!上到成5:30pm!就出左街行左陣....
之後又返左屋企...抖左陣!返出左去食晚飯lu!
食完晚飯...好飽好飽!飽到...個肚勁痛呀!死啦..成日都食咁多野..肥左喇!
不過我真係肥左好多囉...真係要決心減肥至得喇!再係咁肥落去...老公實唔要我姐!><"
個肚好痛..痛到我都行唔到咁滯呀!之後又返左屋企抖左陣...
好o勒..抖夠lu...又出去踩下單車做下運動!個肚好返好多喇..可能踩左陣單車...消化左既關係啦!
之後又返左屋企..拿籃球去球場打左幾球咁啦!打到差唔多就返番屋企lu..
返到屋企就洗白白..洗完白白都好夜lu...不過仲未捨得訓住喎!呵呵~
點解唔訓住...咪就係拆利是囉!今年既利是錢....嘻嘻!都冇乜點少到...因為我都唔記得左上年係幾多咯!
數目就唔講俾大家知啦!費時大家羨慕就唔係咁好啦!哈哈~講笑咋~~^^"
總括黎講...今日真係好累好累!好耐都冇試過咁樣運動法喇....

>>February 13, 2003 at 11:34:53 AM GMT+8