2006 年 11 月 19 日 星期日 【晴】

「熱戀男女同居101協議」(1)
《Marie Claire》
2006-09-29 更新

熱戀男女都是盲目的。

初初相識，大家都覺得「無所謂啦！」「你鍾意啦！」「讓我來遷就你！」
然而「相處好，同住難」，漸漸發現「就得一時唔就得一世」乃是同居的死症。所以，有心想過同居生活的熱戀男女，不妨先參考以下「101 條同居協議」。

筆者的同居生活，今年踏入第七個年頭。

女友是個極度需要空間（無論是個人空間或是實際空間）的藝術家，而我卻是個不甘寂寞的儲物狂……
她想要一個 Home Office，而我想要一個 Home Theatre…
她喜歡請朋友返屋企坐，我比較喜歡過二人世界…
她鍾意聽 Buddha Bar 那類 club music，我喜歡聽衛蘭唱《十個他不如一個你》…
似乎只有牙尖嘴利、不服氣、不認輸，是我們的共通點。
經過了一段日子的生活智慧＋實戰體驗＋誠意搭夠，現在二人四貓同一屋簷下的生活，算得上風平浪靜；間中濺起的浪花，反而成為情趣。
這篇「熱戀男女同居 101 式」，情商了女友仗義執筆，從同居男女的不同角度，列出同居 101 宣言，讓大家 happily living ever after！

What Woman Says:

1.不得在對方日間工作時間（home office）播放驚慄片、令對方極度討厭、反感的音樂影響對方的工作情緒。
2.但凡過大、過激、過分刺眼的掛牆飾物和傢俬，最好盡量減少或避免。
3.習慣有手尾，如垃圾不要亂放，或隨便丟出大門，有礙觀瞻。
4.兩人一同工作時盡量把不必要及多餘的聲浪如電話鈴聲減低。
5.了解對方的喜好，切忌擺放對方害怕的東西在屋內，以免發生無謂的爭吵及恐慌。
6.擺放用完的物品要妥當，盡量為對方方便安全而設想，如鋒利的餐刀要倒放、玻璃碗碟要安全疊穩，免生意外。
7.每星期例行家居清潔，各自負責清潔項目。
8.女的不怕爬梯踏高抹扇，男的也不應介意清潔貓咪廁所。
9.男的如廁後緊記把坐廁板及廁蓋放下。
10.要每天更換內褲（指男友）。
11.有朋友探訪，另一半要保持親切笑容及有講有笑。
12.兩人有權擁有私人物品、空間、時間，並且要互相尊重。
13.兩人要互相關懷對方生活以外的事情，不能收埋自己。
14.要多建立二人世界以外的社交圈子。
15.學習享受二人相處的寧靜一面。
16.在家時多跟貓咪玩耍，少跟對方說無聊話。
17.最好大家都有兩呎半的睡眠空間。
18.請學習認識與貓相處，不得強貓所難，愚弄貓咪為己樂。
19.睡房常備洋燭，不時搞搞情調，保持浪漫拍拖的氣氛。
20.不能說太多「我愛你」，也不能少說「我愛你」，要剛剛好。
21.不要過分依賴對方，也要適當的依靠對方。
22.同居不是佔有，要給對方有自己的私人時間及思想空間。
23.緊記不要過分認真吵嘴，免傷感情。
24.忌翻舊賬，解決問題，要一件事還一件事，發晦氣，只會愈演愈烈。
25.客廳最好有張沙發床，又叫「冷宮寢」，用來過冷河。
26.保持「我愛你」的新鮮感，多為同居伴侶搞點新創意。
27.同居不是婚前習慣，也不是拍拖完結篇，需要保持一定程度的興奮和浪漫情懷，不能預支婚後怠懶的惡習，如少來「你鍾意啦！」、「是但啦！」這些毫不積極的態度。
28.鼓勵對方實踐理想，一同向前走，各自在事業上爭取更好的成就。
29.事業型的女友要有作息時間，少對電腦，多對愛人。
30.嘴角常掛著甜美的笑容。
31.多說幽默的笑話，但一定要好笑。
32.一同參與小習作，如焗蛋糕、家具 DIY、甚至寫交換日記，享受一同歡笑投入的時間。
33.不要太早放棄，凡事得來不易，要加倍珍惜。
34.要常常記起初相識的好，吵架時記得喜歡另一半的原因，能降溫。
35.適當的小別，有助增進感情。
36.多為對方花心思，這是一種生活趣味。
37.男的偶然下廚，女的偶然陪坐打機，是同居生活的趣味。
38.男的就算甚麼都不懂，也至少要懂得用心說句「我愛你」。
39.吵架到白熱化時，終極降溫彈是「攬住你」。
40.想打圓場，男方不妨笑著講聲「對不起，是我做錯了」。
41.不論男方或女方，其中一方 EQ 至少比對方高半級。
42.要好好調節大家的生活時差。
43.同居第 43 式——「隱身術」，懂得在適當時候表現自己的存在；不適當的時候立即隱身，切忌在風頭火勢下，在另一半面前遮遮掩掩，不停發問題。
44. 和女強人同居，男的切忌過分小鳥依人；和「小鳥依人」同居，男的更不應軟弱無能。
45.同居不一定要晚晚同房同床，偶爾給對方一點距離，有助將感情拉近。
46.家中鏡子要放在二人都可照到全身的位置，不能出現男女不平等，男照到頭，女照不到腳的情況。
47.一個人一雙手沒有可能把所有家務都做得妥妥當當，自己看不過眼，便不妨自己大方些去做好另一半做不好的家務。
48.女方不時給男方四萬的笑容，勝過以千金贈情郎……（尤其在月尾時！）
49.既然同居，性生活不能忽視，也不能視性生活是理所當然。保持性生活的新鮮感是需要的，性生活也需要練習合拍才能達至無懈可擊的床上快樂生活。
50.冬天皮膚嘴唇乾燥，男友最好先剃鬚才錫錫 。

>>November 23, 2006 at 4:02:36 AM GMT+8

2006 年 11 月 18 日 星期六 【陰】

最後一日行程，幾乎返唔到香港呀！

最後一day，居然要六點幾起身食早餐趕去機場，搭朝頭早機經新加坡返香港，聽聞話新航已經係最晏起身o個條airline，其他airlines有o的要凌晨三點幾起身都夠膽死…

臨走捉住Steven影張相，不過個領隊Joey真係好唔掂囉，收小費前後兩個人，收完小費連o的飛機票都可以派錯晒，真係…


架機飛佐八個字左右（檳城去新加坡約個幾鐘），個機長開始用英文廣播，話架機左邊引擎有問題，但係under control，但架機就要降落吉隆坡機場檢查…ppppppkkkkkk！眼見o的空姐好驚慌咁，眼神有o的憂，雞咁腳咁收返晒o的飛機餐…

我都係人生第一次遇到o的咁o既事，感覺就好似巴士壞車，要等另一班車接走咁。但係第一時間都唔係諗到出事或者生死，又或者買佐幾多錢保險之類，心情異常平靜。其實我唔驚死呀，係驚痛嗟，何況身邊亦有最愛o既人o係度，如果真係有事，都冇乜遺憾喇。


平安咁去到吉隆坡，初時都唔畀落機，檢查完結果都係整唔返，要轉另一間機落新加坡…頂！我o的時間呀！最慘係成個機場都冇吸煙房，雖然有o野食提供，但係要被迫留o係transit個房度等，等佐兩個幾三個鐘，眼見其他人都安排到機位走，唯獨返香港o既就最後先有機接走，而身邊o既團友突然之間又變晒飛機工程師、災難研究專員、顧修全、曹宏威、吳敏倫之類o既專業人士，係咁講架機點解會出事等等，真係聽到耳都傾。例如︰捲佐隻雀入引擎（成萬尺高空，零下幾十度都仲有雀生存到？）、畀雷擘、甩佐粒羅絲等等… @_@


不過我對新航都幾有信心，因為佢係全球最安全o既airlines之一，之後或者都仲會搭。呢三程機睇佐Click同埋周星星o的無聊戲，返到香港o既時間由原定下晝五點幾變佐夜晚十一點…累死…聽日仲要返工嘛…


>>September 10, 2008 at 1:05:49 AM GMT+8

2006 年 11 月 17 日 星期五 【雨】

第四日落返濱城，勁無聊，間酒店又差！連續三朝都要七點半morning call，真係訓幾多都唔夠！今朝仲要酒店遲佐morning call我o地，搞到趕住去死咁仆落樓食早餐… @_@ 豪華團係咁o既咩？！

臨別依依，再見喇浮羅交怡，都唔知幾多年之後我o地先會再返o黎喇！其實間酒店真係好舒服，衰就衰在琴日下晝落雨，愛B冇得o係泳池游水lu…


食完酒店早餐，我o地去佐一間所謂o既土產店，買佐少少手信。最憎就係呢o的hard sale舖頭，但係我唔會因為佢係咁煩住你而屈服o既！買佐o的「冬格亞里」（馬來西亞人蔘）湯包同少少食得o既o野做手信，我o地就去埋浮羅交怡島最後一個景點︰神鷹廣場。


睇完o個隻玻璃纖維鷹之後，就要坐個半鐘頭船再加個半鐘頭車落返檳城。落佐船之後我o地先去佐食「娘惹餐」（馬來式中餐），終於唔駛再食自助餐同埋o的o野比較好味，感動！之後食完飯o個程車足足兩個鐘，因為星期五加學校假期，檳城好似香港咁玩塞車，但係導遊Steven好勁，講足兩個鐘頭未停過，講o下馬來西亞o既歷史呀、現狀呀、將來呀咁，又講o下自己o既經歷、老婆、仔女，仲有佢o係飛機「諧油」o既方法等等，真係無所不談，冇返咁上下學識真係唔可以做好似佢咁出色。


架車兜來兜去，兜到頭都暈，o的路好似去石澳o個o的咁，最終我o地要去o既地方，居然係呢個全馬來西亞最大o既蝴蠂公園…er…其中一個團友直頭話︰「我個後花園都大過呢度啦！」er…er…


食晚飯前去到最後一個景點「康華麗斯古堡」，Steven講到明其實o的景點冇乜o野睇，去o既目的只係為佐畀我o地遊客了解一下馬來西亞呢個地方，good！夠坦白！


天氣又開始轉壞，食完旋轉餐廳自助餐之後返酒店，放低o的o野出佐去行佐陣，雖然唔係太遠，但係都有o的腳跛… @_@ 去到個所謂o既巿場都冇乜特別手信好買，齋賣食但係又未肚餓，最後買完Starbucks咖啡再行返酒店，當散步罷…不過我估坐的士亦都唔見好快，因為超塞車，而且好怕o係o的陌生地方坐的士，硬係「形」住會畀人劏死牛咁… @_@


>>September 10, 2008 at 1:04:12 AM GMT+8

2006 年 11 月 16 日 星期四 【酷熱】

第三日珊瑚號之旅，我同愛B都曬黑晒呀！

其實琴日去完孕婦島返酒店之後，愛B已經急不及待咁要同陽光玩遊戲，今日出海玩，B就更加開心啦~

問過幾個去過浮交o既人，佢o地都話一定要去個浮台度睇魚、好好玩之類。咁辛苦坐機o黎到呢度，點都冇可能話唔去一去，但係我又唔知點解佢唔包埋o係個團費裡面囉，因為如果真係唔出去，留o係酒店度或者以圖去酒店附近o既地方行o下，都一定會悶死…


呢個地方真係多魚到不得了，可以話你一落水，除佐水面上面係空氣之外，真係周圍都係魚包住晒你，你唔會知道o個o的係乜魚，真係實在有太多。對於唔識游水o既我o黎講，落水玩其實都有o的冒險，唯有拎住晒浮板咁o係近住浮台o既地方玩。戴住個潛水鏡、咬住抖氣條管，浸塊面落水，o個種感覺都幾恐怖，又聽唔到聲，好似同外界隔絕佐咁。慢慢係會習慣，但係始終唔覺得太過癮，可能係我自己本身唔太鐘意水o既關係罷。


我o地將o的麵包塞晒入個膠水樽度，再泡滿水，慢慢唧返o的麵包出o黎，o的魚就會埋o黎搶，超級多魚。做魚真係好，一年三百六十五日都有唔同國籍o既傻人o黎畀o野佢o地食，爽死。而我o地午飯呢餐自助餐，就只係食o的垃圾… @_@


食完飯就坐駁艇上岸睇人餵鯊魚，又係一個極之悶冇乜特別睇頭o既環節（除非有人畀鯊魚咬，可能會精彩o的），睇佐一陣我o地就返去浮台度，繼續落水餵魚魚。我o地好好彩，夠鐘要走先開始落雨，要玩o既都玩晒。如果玩玩o下落雨，就一定冇咁多魚睇，到時齋玩浸水，實會悶死。


其實最辛苦都係玩呢個浮台要坐程船去，而船程就要兩個鐘，來回就冇佐四個鐘，真係唔多化算。o係浮交個碼頭附近o既商場，我o地發現到一間只係賣朱古力o既舖頭，真係乜牌子都有，不過食得多個肥喎… >_<


返到酒店又冇門口入，唔係又好似上次去澳門咁千年蟲問題呀嘛？！夜晚o個餐又食酒店自助餐，不過總好過食埋外面o個o的古靈怪而又唔好食o既o野。


浮交o既海天成一線，視線四野無阻，風景靚絕。


>>September 10, 2008 at 1:15:18 AM GMT+8

2006 年 11 月 15 日 星期三 【晴】

第二日，行程非常緊湊！之但係要七點半起身，八點食早餐，真係完全唔覺得係「悠閒假期」囉，冇陰公，眼訓到死…

話雖如此啦，琴晚夜機到，搭車時只見四野冇乜人，又冇乜燈火，路旁都係草同樹，唔知呢度o的風景究竟有幾好。不過日頭一起身出去露台睇一睇，就開始覺得「對版」喇，放眼四周都係海洋、藍天、雲彩、森林、沙灘，嗯…幾好幾好。果然城巿有城巿o既方便，鄉下有鄉下o既風情。


我o地一團人有十六個人，加埋領隊同導遊，分兩隻船，第一站係去睇一個養青口o既魚排，即時畀你感受到漁村風味，雖則有o的悶呀，但係快艇開o個陣時不斷有海風撲面吹來，都幾心廣神怡。


睇完青口我o地就去睇紅樹林，比較悶囉，好似一班中學生上bio去site visit咁，睇o下o的花花草草、動物昆蟲咁，可能過慣佐城巿o既生活，對於郊外地方，並唔係太有興趣。當然啦，有咁豐富o既天然、生態資源的覺係好值得呢度o既人自豪o既，只不過唔係我杯茶咁解嗟。


睇完紅樹林，導遊就帶我o地去睇「餵鷹」，其實只係去到某處好多鷹o既海面，丟o的雞皮落海，我o地就離遠望同影相，又係比較悶o既行程，雖然係悶，但係閒，冇所謂啦。搞完老鷹鷹之後，我o地去佐另一個島個影後面釣魚。對於完全冇耐性o既我，上一次釣魚已經係五、六年前。一放魚絲落海，居然係我第一個釣到魚上o黎，我估呢度o的魚真係多得太緊要，所以唔駛o的咩技術都搞得掂。最終人人都釣到，皆大歡喜。


搞完o的魚魚之後就去一個叫白沙島o既地方，食BBQ自助餐。其實呢個地方，只係o係個沙灘上面插幾碌棍，撐起塊大帆布，半露天o既情況下食已經預先燒好o既食物，o的o野食非常一般，o的燒蝦凍冰冰，隻蟹又水水o地冇肉食，魚我又唔食，唯獨係有個辣辣o地o既魚湯比較好味，但係佢欠缺佐畀你自己燒o野食o既樂趣，而且食得好趕，食完又要即走，駛唔駛呀…hea o下都得o卦…

最後要坐船去o既目的地係孕婦島，導遊話遠望呢個島似個訓o係度o既大肚婆喎，又係三分形像加七分想像o個隻啦。呢個島o既賣點係有個淡水湖，其實又係o的無聊景點。最好玩o既莫過於有塘蚤魚腳底按摸，愛B就好驚咁，但係其實坐落畀o的魚o係腳度游來游去，感覺都幾得意。


玩晒o的戶外o野，最後去睇埋全馬來西亞最大o既水族館，其實都係o個o的o野囉，睇完再食佐餐垃圾o既泰國口味晚餐，好在買佐o的朱古力食，如果唔係實餓死都似…累死又一day…


個導遊Steven勁似劉以達呀！佢不斷咁強調浮羅交怡係一個免稅島，o的啤酒好平，但係對於唔係咁好啤酒o既我，一o的都唔覺得吸引。而且呢度好似又唔多覺有o的咩跳蚤巿場，搞到買手信返香港畀人成為佐一個大難題…


>>September 10, 2008 at 12:58:39 AM GMT+8

2006 年 11 月 14 日 星期二 【晴】

出發喇，大家唔駛等我喇，有排唔會寫日記。

今朝經過太古坊附近，發覺o個一區已經唔再係以住宅為主，o的人多到好似銅鑼灣咁，成條行人路都係人，但係o的人全部都係同你行相反o既方向，感覺好得意。原來自己放緊假…

----------------------------------------------------------------------------------------------------------------------------

琴晚先執好行李，今朝同愛B坐機場巴士入機場，遲到佐，但係班機開下晝一點半，完全唔明點解要十一點集合… @_@ 去到機場咪又係要hea！食完個完美麥當當就上機喇，今次我o地坐新加坡航空，係全球首屈一指安全o既航空公司，但係一上到機就發覺架機唔多夠冷氣，超級焗同熱…而o係飛機上面就睇佐o係香港冇睇o既The Fast and the Furious: Tokyo Drift。


坐到去新加坡o個邊都已經五點幾，之後即刻再轉Silk Air o既內陸機，發現o的空姐又後生又靚喎… :p 約莫八點幾先到目的地浮羅交怡，半日就咁畀佐飛機旅程… @_@ 落佐機仲要由個島o既西面坐成粒鐘車到去個島東面o既酒店，一到酒店有得食自助晚餐，都好，唔駛累到死仲要好似章程咁話自費晚餐四圍撲搵o野食。


我o地入住Sheraton Perdana Resort，雖然唔係高腳屋酒店，但係房間比起想像中更加大、更加靚，有兩張雙人床之餘，居然總共有八個枕頭同兩個攬枕，再加一部Plasma電視（雖然冇o野好睇），仲有一個大大o既廁所，攤o係個浴缸度都可以睇電視，再有一個小露台同埋吊扇，吊扇有樣好，就係怕凍唔開冷氣都可以流通o下室內o既空氣。


嘩，勁累呀，聽朝仲話要七點半morning call出去睇咩紅樹林同餵鷹，殺佐我罷啦…


攬住愛B覺覺豬，勁舒服~

>>September 10, 2008 at 12:51:49 AM GMT+8

2006 年 11 月 13 日 星期一 【晴】

愛B呀~ 我o地去旅行喇！

七月先去完曼谷，十一月又去旅行，真係好似有o的過火…不過見愛B今次特別興致勃勃咁，冇計啦…

今次o既目的地係馬來西亞o既浮羅交怡（Pulau Langkawi），聽聞係o的玩水上活動o既地方，不過我唔識游水喎… @_@


不過唔打緊，因為報團張宣傳單張話係「生態之旅」，我估頂盡都係一日、半日玩水o既嗟，大不了咪睇住人玩…er…


BB話想住o既「高腳屋」，不過我o地今次唔係住呢類酒店喎（睇個款好似好多蛇蟲鼠蟻咁）…


等我睇o下呢個地方係咪真係好似o的旅遊雜誌講咁樣咁「仙境」先！


陽光興海灘，我o地o黎喇！


http://www.langkawi-info.com

>>September 10, 2008 at 12:59:42 AM GMT+8

2006 年 11 月 12 日 星期日 【晴】

Fenwick Pier（分域碼頭）

呢期唔知咩事好興玩集體回憶，好似舊天星碼頭咁，o的人一仆一碌咁走去影「遺照」，我先至突然之間驚覺，原來o係自己o既回憶之中，呢個地方，隨住維港填海，已經o係現實之中慢慢消失…


分域碼頭係一個好得意o既地方，閒時成日有o的美國海軍（水兵）經過，o個度有個Servicemen's Association，間唔中就有一大班水兵o係度聚集。



初次去分域碼頭，已經唔記得係幾時，亦唔記得係自己仆去定係人o地帶我去，總之o係o個度充滿佐好多好多美麗o既回憶，就好似呢個小朋友咁開心。


一個咁靚，有維港無敵全海景o既地方，居然o個時會係開佐麥當勞，唔通係o的水兵鐘意食老麥？一個咁好o既地方，居然可以係我o地呢o的一般平民可以成日去，游游閒咁免費坐足成日，欣賞日同夜o既景物，仲有日落、海洋；加上浪濤拍岸聲…享受無窮無盡o既浪漫，不論日曬雨淋，冇人會打擾。

初時真係冇乜幾多本地人知道呢個好地方，但係後尾就越o黎越多閒雜人等o係度嘈住晒，令到o個份浪漫減退佐。

讀書時代好鐘意同一個失蹤多時o既朋友仔Joseph o黎呢度坐、傾偈、溫書等，亦o係o個度識到以前o既女朋友Josephine，亦同琴日生日o既黃小姐有不少回憶…


>>September 10, 2008 at 12:35:24 AM GMT+8

2006 年 11 月 11 日 星期六 【晴】

黃可君生日快樂~

返埋今日就開始放七日假喇，但係有好多o野都仲要follow-up，暫時就交畀老趙去處理啦，另外CCC Meeting o既o野亦都交佐畀Wendy姐同Kenji搞，希望快手o的搞掂唔駛憂啦…

呀Mi訓佐三日醫院之後，亦都出院歸位，仲以極速做佐大部分早三日積埋o既o野，幾勁呀，所以你話新翠o既員工如果一做起o野上o黎係幾咁有效率呀！

>>November 12, 2006 at 7:03:22 AM GMT+8

2006 年 11 月 10 日 星期五 【晴】

呀Mi入醫院o既第三日，開始冇人打o黎搵佢，下晝仲可以落灣仔training，可以避一避風頭火勢…

有兩件入廠冇返工，佢o地o既工作，或多或少又歸佐我所有…一個人做三工o野，仲要趕o係放大假之前搞掂自己o的o野，冇停過手，好…累…

----------------------------------------------------------------------------------------------------------------------------

突然上網摷o下o的柴灣舊相，不過真係超級難！柴灣係冇相片歷史o既地區！

工作o既地方就係o係中間o個六幢樓o既下面o既商場…


柴灣地鐵站起緊o既時候…


聞說新翠隔o黎o個座山仔，以前原來係一個島o黎o架！要退潮先可以行到過去，即係下面張相個沙灘上面個島仔喇。


>>September 10, 2008 at 12:32:41 AM GMT+8